Sukta 122

122.1

15 kakshivan dairghatamasa aushijah, vishve devah, trishtup, - 5-6 virad rupa

प्र व॒ः पान्तं॑ रघुमन्य॒वोऽन्धो॑ य॒ज्ञं रु॒द्राय॑ मी॒ह्लुषे॑ भरध्वम् ।
दि॒वो अ॑स्तो॒ष्यसु॑रस्य वी॒रैरि॑षु॒ध्येव॑ म॒रुतो॒ रोद॑स्योः ॥१॥

Pra vah pantam raghumanyavondho yagyam rudraya mihlushe bharadhvam
Divo astoshyasurasya virairishudhyeva maruto rodasyoh

पत्नी॑व पू॒र्वहू॑तिं वावृ॒धध्या॑ उ॒षासा॒नक्ता॑ पुरु॒धा विदा॑ने ।
स्त॒रीर्नात्कं॒ व्यु॑तं॒ वसा॑ना॒ सूर्य॑स्य श्रि॒या सु॒दृशी॒ हिर॑ण्यैः ॥२॥

Patniva purvahutim vavridhadhya ushasanakta purudha vidane
Starirnatkam vyutam vasana suryasya shriya sudrishi hiranyaih

म॒मत्तु॑ न॒ः परि॑ज्मा वस॒र्हा म॒मत्तु॒ वातो॑ अ॒पां वृष॑ण्वान् ।
शि॒शी॒तमि॑न्द्रापर्वता यु॒वं न॒स्तन्नो॒ विश्वे॑ वरिवस्यन्तु दे॒वाः ॥३॥

Mamattu nah parijma vasarha mamattu vato apam vrishanvan
Shishitamindraparvata yuvam nastanno vishve varivasyantu devah

उ॒त त्या मे॑ य॒शसा॑ श्वेत॒नायै॒ व्यन्ता॒ पान्तौ॑शि॒जो हु॒वध्यै॑ ।
प्र वो॒ नपा॑तम॒पां कृ॑णुध्वं॒ प्र मा॒तरा॑ रास्पि॒नस्या॒योः ॥४॥

Uta tya me yashasa shvetanayai vyanta pantaushijo huvadhyai
Pra vo napatamapam krinudhvam pra matara raspinasyayoh

आ वो॑ रुव॒ण्युमौ॑शि॒जो हु॒वध्यै॒ घोषे॑व॒ शंस॒मर्जु॑नस्य॒ नंशे॑ ।
प्र व॑ः पू॒ष्णे दा॒वन॒ आँ अच्छा॑ वोचेय व॒सुता॑तिम॒ग्नेः ॥५॥

A vo ruvanyumaushijo huvadhyai ghosheva shansamarjunasya nanshe
Pra vah pushne davana am achchha vocheya vasutatimagneh

श्रु॒तं मे॑ मित्रावरुणा॒ हवे॒मोत श्रु॑तं॒ सद॑ने वि॒श्वत॑ः सीम् ।
श्रोतु॑ न॒ः श्रोतु॑रातिः सु॒श्रोतु॑ः सु॒क्षेत्रा॒ सिन्धु॑र॒द्भिः ॥६॥

Shrutam me mitravaruna havemota shrutam sadane vishvatah sim
Shrotu nah shroturatih sushrotuh sukshetra sindhuradbhih

स्तु॒षे सा वां॑ वरुण मित्र रा॒तिर्गवां॑ श॒ता पृ॒क्षया॑मेषु प॒ज्रे ।
श्रु॒तर॑थे प्रि॒यर॑थे॒ दधा॑नाः स॒द्यः पु॒ष्टिं नि॑रुन्धा॒नासो॑ अग्मन् ॥७॥

Stushe sa vam varuna mitra ratirgavam shata prikshayameshu pajre
Shrutarathe priyarathe dadhanah sadyah pushtim nirundhanaso agman

अ॒स्य स्तु॑षे॒ महि॑मघस्य॒ राध॒ः सचा॑ सनेम॒ नहु॑षः सु॒वीरा॑ः ।
जनो॒ यः प॒ज्रेभ्यो॑ वा॒जिनी॑वा॒नश्वा॑वतो र॒थिनो॒ मह्यं॑ सू॒रिः ॥८॥

Asya stushe mahimaghasya radhah sacha sanema nahushah suvirah
Jano yah pajrebhyo vajinivanashvavato rathino mahyam surih

जनो॒ यो मि॑त्रावरुणावभि॒ध्रुग॒पो न वां॑ सु॒नोत्य॑क्ष्णया॒ध्रुक् ।
स्व॒यं स यक्ष्मं॒ हृद॑ये॒ नि ध॑त्त॒ आप॒ यदीं॒ होत्रा॑भिर्ऋ॒तावा॑ ॥९॥

Jano yo mitravarunavabhidhrugapo na vam sunotyakshnayadhruk
Svayam sa yakshmam hridaye ni dhatta apa yadim hotrabhirritava

स व्राध॑तो॒ नहु॑षो॒ दंसु॑जूत॒ः शर्ध॑स्तरो न॒रां गू॒र्तश्र॑वाः ।
विसृ॑ष्टरातिर्याति बाह्ल॒सृत्वा॒ विश्वा॑सु पृ॒त्सु सद॒मिच्छूर॑ः ॥१०॥

Sa vradhato nahusho dansujutah shardhastaro naram gurtashravah
Visrishtaratiryati bahlasritva vishvasu pritsu sadamichchhurah

अध॒ ग्मन्ता॒ नहु॑षो॒ हवं॑ सू॒रेः श्रोता॑ राजानो अ॒मृत॑स्य मन्द्राः ।
न॒भो॒जुवो॒ यन्नि॑र॒वस्य॒ राध॒ः प्रश॑स्तये महि॒ना रथ॑वते ॥११॥

Adha gmanta nahusho havam sureh shrota rajano amritasya mandrah
Nabhojuvo yanniravasya radhah prashastaye mahina rathavate

ए॒तं शर्धं॑ धाम॒ यस्य॑ सू॒रेरित्य॑वोच॒न् दश॑तयस्य॒ नंशे॑ ।
द्यु॒म्नानि॒ येषु॑ व॒सुता॑ती रा॒रन् विश्वे॑ सन्वन्तु प्रभृ॒थेषु॒ वाज॑म् ॥१२॥

Etam shardham dhama yasya surerityavochan dashatayasya nanshe
Dyumnani yeshu vasutati raran vishve sanvantu prabhritheshu vajam

मन्दा॑महे॒ दश॑तयस्य धा॒सेर्द्विर्यत् पञ्च॒ बिभ्र॑तो॒ यन्त्यन्ना॑ ।
किमि॒ष्टाश्व॑ इ॒ष्टर॑श्मिरे॒त ई॑शा॒नास॒स्तरु॑ष ऋञ्जते॒ नॄन् ॥१३॥

Mandamahe dashatayasya dhaserdviryat pancha bibhrato yantyanna
Kimishtashva ishtarashmireta ishanasastarusha rinjate nrin

हिर॑ण्यकर्णं मणिग्रीव॒मर्ण॒स्तन्नो॒ विश्वे॑ वरिवस्यन्तु दे॒वाः ।
अ॒र्यो गिर॑ः स॒द्य आ ज॒ग्मुषी॒रोस्राश्चा॑कन्तू॒भये॑ष्व॒स्मे ॥१४॥

Hiranyakarnam manigrivamarnastanno vishve varivasyantu devah
Aryo girah sadya a jagmushirosrashchakantubhayeshvasme

च॒त्वारो॑ मा मश॒र्शार॑स्य॒ शिश्व॒स्त्रयो॒ राज्ञ॒ आय॑वसस्य जि॒ष्णोः ।
रथो॑ वां मित्रावरुणा दी॒र्घाप्सा॒ः स्यूम॑गभस्ति॒ः सूरो॒ नाद्यौ॑त् ॥१५॥

Chatvaro ma masharsharasya shishvastrayo ragya ayavasasya jishnoh
Ratho vam mitravaruna dirghapsah syumagabhastih suro nadyaut