Sukta 123

123.1

13 kakshivan dairghatamasa aushijah, ushah, trishtup

पृ॒थू रथो॒ दक्षि॑णाया अयो॒ज्यैनं॑ दे॒वासो॑ अ॒मृता॑सो अस्थुः ।
कृ॒ष्णादुद॑स्थाद॒र्या॒ ३ विहा॑या॒श्चिकि॑त्सन्ती॒ मानु॑षाय॒ क्षया॑य ॥१॥

Prithu ratho dakshinaya ayojyainam devaso amritaso asthuh
Krishnadudasthadarya 3 vihayashchikitsanti manushaya kshayaya

पूर्वा॒ विश्व॑स्मा॒द् भुव॑नादबोधि॒ जय॑न्ती॒ वाजं॑ बृह॒ती सनु॑त्री ।
उ॒च्चा व्य॑ख्यद् युव॒तिः पु॑न॒र्भूरोषा अ॑गन् प्रथ॒मा पू॒र्वहू॑तौ ॥२॥

Purva vishvasmad bhuvanadabodhi jayanti vajam brihati sanutri
Uchcha vyakhyad yuvatih punarbhurosha agan prathama purvahutau

यद॒द्य भा॒गं वि॒भजा॑सि॒ नृभ्य॒ उषो॑ देवि मर्त्य॒त्रा सु॑जाते ।
दे॒वो नो॒ अत्र॑ सवि॒ता दमू॑ना॒ अना॑गसो वोचति॒ सूर्या॑य ॥३॥

Yadadya bhagam vibhajasi nribhya usho devi martyatra sujate
Devo no atra savita damuna anagaso vochati suryaya

गृ॒हंगृ॑हमह॒ना या॒त्यच्छा॑ दि॒वेदि॑वे॒ अधि॒ नामा॒ दधा॑ना ।
सिषा॑सन्ती द्योत॒ना शश्व॒दागा॒दग्र॑मग्र॒मिद् भ॑जते॒ वसू॑नाम् ॥४॥

Grihangrihamahana yatyachchha divedive adhi nama dadhana
Sishasanti dyotana shashvadagadagramagramid bhajate vasunam

भग॑स्य॒ स्वसा॒ वरु॑णस्य जा॒मिरुष॑ः सूनृते प्रथ॒मा ज॑रस्व ।
प॒श्चा स द॑घ्या॒ यो अ॒घस्य॑ धा॒ता जये॑म॒ तं दक्षि॑णया॒ रथे॑न ॥५॥

Bhagasya svasa varunasya jamirushah sunrite prathama jarasva
Pashcha sa daghya yo aghasya dhata jayema tam dakshinaya rathena

उदी॑रतां सू॒नृता॒ उत् पुर॑न्धी॒रुद॒ग्नय॑ः शुशुचा॒नासो॑ अस्थुः ।
स्पा॒र्हा वसू॑नि॒ तम॒साप॑गूह्ल॒विष्कृ॑ण्वन्त्यु॒षसो॑ विभा॒तीः ॥६॥

Udiratam sunrita ut purandhirudagnayah shushuchanaso asthuh
Sparha vasuni tamasapaguhlavishkrinvantyushaso vibhatih

अपा॒न्यदेत्य॒भ्य १ न्यदे॑ति॒ विषु॑रूपे॒ अह॑नी॒ सं च॑रेते ।
प॒रि॒क्षितो॒स्तमो॑ अ॒न्या गुहा॑क॒रद्यौ॑दु॒षाः शोशु॑चता॒ रथे॑न ॥७॥

Apanyadetyabhya 1 nyadeti vishurupe ahani sam charete
Parikshitostamo anya guhakaradyaudushah shoshuchata rathena

स॒दृशी॑र॒द्य स॒दृशी॒रिदु॒ श्वो दी॒र्घं स॑चन्ते॒ वरु॑णस्य॒ धाम॑ ।
अ॒न॒व॒द्यास्त्रिं॒शतं॒ योज॑ना॒न्येकै॑का॒ क्रतुं॒ परि॑ यन्ति स॒द्यः ॥८॥

Sadrishiradya sadrishiridu shvo dirgham sachante varunasya dhama
Anavadyastrinshatam yojananyekaika kratum pari yanti sadyah

जा॒न॒त्यह्न॑ः प्रथ॒मस्य॒ नाम॑ शु॒क्रा कृ॒ष्णाद॑जनिष्ट श्विती॒ची ।
ऋ॒तस्य॒ योषा॒ न मि॑नाति॒ धामाह॑रहर्निष्कृ॒तमा॒चर॑न्ती ॥९॥

Janatyahnah prathamasya nama shukra krishnadajanishta shvitichi
Ritasya yosha na minati dhamaharaharnishkritamacharanti

क॒न्ये॑व त॒न्वा॒ ३ शाश॑दानाँ॒ एषि॑ देवि दे॒वमिय॑क्षमाणम् ।
सं॒स्मय॑माना युव॒तिः पु॒रस्ता॑दा॒विर्वक्षां॑सि कृणुषे विभा॒ती ॥१०॥

Kanyeva tanva 3 shashadanam eshi devi devamiyakshamanam
Sansmayamana yuvatih purastadavirvakshansi krinushe vibhati

सु॒सं॒का॒शा मा॒तृमृ॑ष्टेव॒ योषा॒विस्त॒न्वं॑ कृणुषे दृ॒शे कम् ।
भ॒द्रा त्वमु॑षो वित॒रं व्यु॑च्छ॒ न तत्ते॑ अ॒न्या उ॒षसो॑ नशन्त ॥११॥

Susankasha matrimrishteva yoshavistanvam krinushe drishe kam
Bhadra tvamusho vitaram vyuchchha na tatte anya ushaso nashanta

अश्वा॑वती॒र्गोम॑तीर्वि॒श्ववा॑रा॒ यत॑माना र॒श्मिभि॒ः सूर्य॑स्य ।
परा॑ च॒ यन्ति॒ पुन॒रा च॑ यन्ति भ॒द्रा नाम॒ वह॑माना उ॒षास॑ः ॥१२॥

Ashvavatirgomatirvishvavara yatamana rashmibhih suryasya
Para cha yanti punara cha yanti bhadra nama vahamana ushasah

ऋ॒तस्य॑ र॒श्मिम॑नु॒यच्छ॑माना भ॒द्रम्भ॑द्रं॒ क्रतु॑म॒स्मासु॑ धेहि ।
उषो॑ नो अ॒द्य सु॒हवा॒ व्यु॑च्छा॒स्मासु॒ रायो॑ म॒घव॑त्सु च स्युः ॥१३॥

Ritasya rashmimanuyachchhamana bhadrambhadram kratumasmasu dhehi
Usho no adya suhava vyuchchhasmasu rayo maghavatsu cha syuh