Sukta 121

121.1

15 kakshivan dairghatamasa aushijah, indro vishve deva va, trishtup

कदि॒त्था नॄँः पात्रं॑ देवय॒तां श्रव॒द् गिरो॒ अङ्गि॑रसां तुर॒ण्यन् ।
प्र यदान॒ड्विश॒ आ ह॒र्म्यस्यो॒रु क्रं॑सते अध्व॒रे यज॑त्रः ॥१॥

Kadittha nrinh patram devayatam shravad giro angirasam turanyan
Pra yadanadvisha a harmyasyoru kransate adhvare yajatrah

स्तम्भी॑द्ध॒ द्यां स ध॒रुणं॑ प्रुषायदृ॒भुर्वाजा॑य॒ द्रवि॑णं॒ नरो॒ गोः ।
अनु॑ स्व॒जां म॑हि॒षश्च॑क्षत॒ व्रां मेना॒मश्व॑स्य॒ परि॑ मा॒तरं॒ गोः ॥२॥

Stambhiddha dyam sa dharunam prushayadribhurvajaya dravinam naro goh
Anu svajam mahishashchakshata vram menamashvasya pari mataram goh

नक्ष॒द्धव॑मरु॒णीः पू॒र्व्यं राट् तु॒रो वि॒शामङ्गि॑रसा॒मनु॒ द्यून् ।
तक्ष॒द् वज्रं॒ नियु॑तं त॒स्तम्भ॒द् द्यां चतु॑ष्पदे॒ नर्या॑य द्वि॒पादे॑ ॥३॥

Nakshaddhavamarunih purvyam rat turo vishamangirasamanu dyun
Takshad vajram niyutam tastambhad dyam chatushpade naryaya dvipade

अ॒स्य मदे॑ स्व॒र्यं॑ दा ऋ॒तायापी॑वृतमु॒स्रिया॑णा॒मनी॑कम् ।
यद्ध॑ प्र॒सर्गे॑ त्रिक॒कुम्नि॒वर्त॒दप॒ द्रुहो॒ मानु॑षस्य॒ दुरो॑ वः ॥४॥

Asya made svaryam da ritayapivritamusriyanamanikam
Yaddha prasarge trikakumnivartadapa druho manushasya duro vah

तुभ्यं॒ पयो॒ यत् पि॒तरा॒वनी॑तां॒ राध॑ः सु॒रेत॑स्तु॒रणे॑ भुर॒ण्यू ।
शुचि॒ यत् ते रेक्ण॒ आय॑जन्त सब॒र्दुघा॑या॒ः पय॑ उ॒स्रिया॑याः ॥५॥

Tubhyam payo yat pitaravanitam radhah suretasturane bhuranyu
Shuchi yat te rekna ayajanta sabardughayah paya usriyayah

अध॒ प्र ज॑ज्ञे त॒रणि॑र्ममत्तु॒ प्र रो॑च्य॒स्या उ॒षसो॒ न सूर॑ः ।
इन्दु॒र्येभि॒राष्ट॒ स्वेदु॑हव्यैः स्रु॒वेण॑ सि॒ञ्चञ्ज॒रणा॒भि धाम॑ ॥६॥

Adha pra jagye taranirmamattu pra rochyasya ushaso na surah
Induryebhirashta sveduhavyaih sruvena sinchanjaranabhi dhama

स्वि॒ध्मा यद् व॒नधि॑तिरप॒स्यात् सूरो॑ अध्व॒रे परि॒ रोध॑ना॒ गोः ।
यद्ध॑ प्र॒भासि॒ कृत्व्याँ॒ अनु॒ द्यूनन॑र्विशे प॒श्विषे॑ तु॒राय॑ ॥७॥

Svidhma yad vanadhitirapasyat suro adhvare pari rodhana goh
Yaddha prabhasi kritvyam anu dyunanarvishe pashvishe turaya

अ॒ष्टा म॒हो दि॒व आदो॒ हरी॑ इ॒ह द्यु॑म्ना॒साह॑म॒भि यो॑धा॒न उत्स॑म् ।
हरिं॒ यत्ते॑ म॒न्दिनं॑ दु॒क्षन् वृ॒धे गोर॑भस॒मद्रि॑भिर्वा॒ताप्य॑म् ॥८॥

Ashta maho diva ado hari iha dyumnasahamabhi yodhana utsam
Harim yatte mandinam dukshan vridhe gorabhasamadribhirvatapyam

त्वमा॑य॒सं प्रति॑ वर्तयो॒ गोर्दि॒वो अश्मा॑न॒मुप॑नीत॒मृभ्वा॑ ।
कुत्सा॑य॒ यत्र॑ पुरुहूत व॒न्वञ्छुष्ण॑मन॒न्तैः प॑रि॒यासि॑ व॒धैः ॥९॥

Tvamayasam prati vartayo gordivo ashmanamupanitamribhva
Kutsaya yatra puruhuta vanvanchhushnamanantaih pariyasi vadhaih

पु॒रा यत् सूर॒स्तम॑सो॒ अपी॑ते॒स्तम॑द्रिवः फलि॒गं हे॒तिम॑स्य ।
शुष्ण॑स्य चि॒त् परि॑हितं॒ यदोजो॑ दि॒वस्परि॒ सुग्र॑थितं॒ तदाद॑ः ॥१०॥

Pura yat surastamaso apitestamadrivah phaligam hetimasya
Shushnasya chit parihitam yadojo divaspari sugrathitam tadadah

अनु॑ त्वा म॒ही पाज॑सी अच॒क्रे द्यावा॒क्षामा॑ मदतामिन्द्र॒ कर्म॑न् ।
त्वं वृ॒त्रमा॒शया॑नं सि॒रासु॑ म॒हो वज्रे॑ण सिष्वपो व॒राहु॑म् ॥११॥

Anu tva mahi pajasi achakre dyavakshama madatamindra karman
Tvam vritramashayanam sirasu maho vajrena sishvapo varahum

त्वमि॑न्द्र॒ नर्यो॒ याँ अवो॒ नॄन् तिष्ठा॒ वात॑स्य सु॒युजो॒ वहि॑ष्ठान् ।
यं ते॑ का॒व्य उ॒शना॑ म॒न्दिनं॒ दाद् वृ॑त्र॒हणं॒ पार्यं॑ ततक्ष॒ वज्र॑म् ॥१२॥

Tvamindra naryo yam avo nrin tishtha vatasya suyujo vahishthan
Yam te kavya ushana mandinam dad vritrahanam paryam tataksha vajram

त्वं सूरो॑ ह॒रितो॑ रामयो॒ नॄन् भर॑च्च॒क्रमेत॑शो॒ नायमि॑न्द्र ।
प्रास्य॑ पा॒रं न॑व॒तिं ना॒व्या॑ना॒मपि॑ क॒र्तम॑वर्त॒योऽय॑ज्यून् ॥१३॥

Tvam suro harito ramayo nrin bharachchakrametasho nayamindra
Prasya param navatim navyanamapi kartamavartayoyajyun

त्वं नो॑ अ॒स्या इ॑न्द्र दु॒र्हणा॑याः पा॒हि व॑ज्रिवो दुरि॒ताद॒भीके॑ ।
प्र नो॒ वाजा॑न् र॒थ्यो॒ ३ अश्व॑बुध्यानि॒षे य॑न्धि॒ श्रव॑से सू॒नृता॑यै ॥१४॥

Tvam no asya indra durhanayah pahi vajrivo duritadabhike
Pra no vajan rathyo 3 ashvabudhyanishe yandhi shravase sunritayai

मा सा ते॑ अ॒स्मत् सु॑म॒तिर्वि द॑स॒द् वाज॑प्रमह॒ः समिषो॑ वरन्त ।
आ नो॑ भज मघव॒न् गोष्व॒र्यो मंहि॑ष्ठास्ते सध॒माद॑ः स्याम ॥१५॥

Ma sa te asmat sumatirvi dasad vajapramahah samisho varanta
A no bhaja maghavan goshvaryo manhishthaste sadhamadah syama