সূক্ত 121

121.1

১৫ কক্ষীবান্ দৈর্ঘতমস ঔশিজঃ। ইন্দ্রো বিশ্বে দেবা বা। ত্রিষ্টুপ্।

কদিত্থা নৄঁঃ পাত্রং দেবয়তাং শ্রবদ্ গিরো অঙ্গিরসাং তুরণ্যন্ ।
প্র যদানড্বিশ আ হর্ম্যস্যোরু ক্রংসতে অধ্বরে যজত্রঃ ॥১॥

স্তম্ভীদ্ধ দ্যাং স ধরুণং প্রুষায়দৃভুর্বাজায় দ্রবিণং নরো গোঃ ।
অনু স্বজাং মহিষশ্চক্ষত ব্রাং মেনামশ্বস্য পরি মাতরং গোঃ ॥২॥

নক্ষদ্ধবমরুণীঃ পূর্ব্যং রাট্ তুরো বিশামঙ্গিরসামনু দ্যূন্ ।
তক্ষদ্ বজ্রং নিয়ুতং তস্তম্ভদ্ দ্যাং চতুষ্পদে নর্যায় দ্বিপাদে ॥৩॥

অস্য মদে স্বর্যং দা ঋতায়াপীবৃতমুস্রিয়াণামনীকম্ ।
যদ্ধ প্রসর্গে ত্রিককুম্নিবর্তদপ দ্রুহো মানুষস্য দুরো বঃ ॥৪॥

তুভ্যং পয়ো যৎ পিতরাবনীতাং রাধঃ সুরেতস্তুরণে ভুরণ্যূ ।
শুচি যৎ তে রেক্ণ আয়জন্ত সবর্দুঘায়াঃ পয় উস্রিয়ায়াঃ ॥৫॥

অধ প্র জজ্ঞে তরণির্মমত্তু প্র রোচ্যস্যা উষসো ন সূরঃ ।
ইন্দুর্যেভিরাষ্ট স্বেদুহব্যৈঃ স্রুবেণ সিঞ্চঞ্জরণাভি ধাম ॥৬॥

স্বিধ্মা যদ্ বনধিতিরপস্যাৎ সূরো অধ্বরে পরি রোধনা গোঃ ।
যদ্ধ প্রভাসি কৃত্ব্যাঁ অনু দ্যূননর্বিশে পশ্বিষে তুরায় ॥৭॥

অষ্টা মহো দিব আদো হরী ইহ দ্যুম্নাসাহমভি যোধান উত্সম্ ।
হরিং যত্তে মন্দিনং দুক্ষন্ বৃধে গোরভসমদ্রিভির্বাতাপ্যম্ ॥৮॥

ত্বমায়সং প্রতি বর্তয়ো গোর্দিবো অশ্মানমুপনীতমৃভ্বা ।
কুত্সায় যত্র পুরুহূত বন্বঞ্ছুষ্ণমনন্তৈঃ পরিয়াসি বধৈঃ ॥৯॥

পুরা যৎ সূরস্তমসো অপীতেস্তমদ্রিবঃ ফলিগং হেতিমস্য ।
শুষ্ণস্য চিৎ পরিহিতং যদোজো দিবস্পরি সুগ্রথিতং তদাদঃ ॥১০॥

অনু ত্বা মহী পাজসী অচক্রে দ্যাবাক্ষামা মদতামিন্দ্র কর্মন্ ।
ত্বং বৃত্রমাশয়ানং সিরাসু মহো বজ্রেণ সিষ্বপো বরাহুম্ ॥১১॥

ত্বমিন্দ্র নর্যো যাঁ অবো নৄন্ তিষ্ঠা বাতস্য সুয়ুজো বহিষ্ঠান্ ।
যং তে কাব্য উশনা মন্দিনং দাদ্ বৃত্রহণং পার্যং ততক্ষ বজ্রম্ ॥১২॥

ত্বং সূরো হরিতো রাময়ো নৄন্ ভরচ্চক্রমেতশো নায়মিন্দ্র ।
প্রাস্য পারং নবতিং নাব্যানামপি কর্তমবর্তয়োঽয়জ্যূন্ ॥১৩॥

ত্বং নো অস্যা ইন্দ্র দুর্হণায়াঃ পাহি বজ্রিবো দুরিতাদভীকে ।
প্র নো বাজান্ রথ্যো ৩ অশ্ববুধ্যানিষে যন্ধি শ্রবসে সূনৃতায়ৈ ॥১৪॥

মা সা তে অস্মৎ সুমতির্বি দসদ্ বাজপ্রমহঃ সমিষো বরন্ত ।
আ নো ভজ মঘবন্ গোষ্বর্যো মংহিষ্ঠাস্তে সধমাদঃ স্যাম ॥১৫॥