সূক্ত 12

12.1

১২ মেধাতিথিঃ কাণ্বঃ। অগ্নিঃ,৬ প্রথমপাদস্য (নির্মথ্যাহবনীয়ৌ) অগ্নী। গায়ত্রী।

অগ্নিং দূতং বৃণীমহে হোতারং বিশ্ববেদসম্ । অস্য যজ্ঞস্য সুক্রতুম্ ॥১॥

অগ্নিমগ্নিং হবীমভিঃ সদা হবন্ত বিশ্পতিম্ । হব্যবাহং পুরুপ্রিয়ম্ ॥২॥

অগ্নে দেবাঁ ইহা বহ জজ্ঞানো বৃক্তবর্হিষে । অসি হোতা ন ঈড্যঃ ॥৩॥

তাঁ উশতো বি বোধয় যদগ্নে যাসি দূত্যম্ । দেবৈরা সত্সি বর্হিষি ॥৪॥

ঘৃতাহবন দীদিবঃ প্রতি ষ্ম রিষতো দহ । অগ্নে ত্বং রক্ষস্বিনঃ ॥৫॥

অগ্নিনাগ্নিঃ সমিধ্যতে কবির্গৃহপতির্যুবা । হব্যবাড্ জুহ্বাস্যঃ ॥৬॥

কবিমগ্নিমুপ স্তুহি সত্যধর্মাণমধ্বরে । দেবমমীবচাতনম্ ॥৭॥

যস্ত্বামগ্নে হবিষ্পতির্দূতং দেব সপর্যতি । তস্য স্ম প্রাবিতা ভব ॥৮॥

যো অগ্নিং দেববীতয়ে হবিষ্মাঁ আবিবাসতি । তস্মৈ পাবক মৃলয় ॥৯॥

স নঃ পাবক দীদিবো ঽগ্নে দেবাঁ ইহা বহ । উপ যজ্ঞং হবিশ্চ নঃ ॥১০॥

স নঃ স্তবান আ ভর গায়ত্রেণ নবীয়সা । রয়িং বীরবতীমিষম্ ॥১১॥

অগ্নে শুক্রেণ শোচিষা বিশ্বাভির্দেবহূতিভিঃ । ইমং স্তোমং জুষস্ব নঃ ॥১২॥