সূক্ত 13

13.1

১২ মেধাতিথিঃ কাণ্বঃ।(আপ্রীসূক্তং, অগ্নিরূপা দেবতা দেবতাঃ) ১ ইধ্মঃ সমিদ্ধোঽগ্নির্বা, ২ তনূনপাৎ, ৩ নরাশংসঃ, ৪ ইলঃ, ৫ বর্হিঃ, ৬ দেবীর্দ্বারঃ, ৭ উষাসানক্তা, ৮ দৈব্যো হোতারৌ প্রচেতসৌ, ৯ তিস্রো দেব্যঃ সরস্বতীলাভারত্যঃ, ১০ ত্বষ্টা, ১১ বনস্পতিঃ, ১২ স্বাহা কৃতয়ঃ । গায়ত্রী।

সুসমিদ্ধো ন আ বহ দেবাঁ অগ্নে হবিষ্মতে । হোতঃ পাবক যক্ষি চ ॥১॥

13.2

মধুমন্তং তনূনপাদ্ যজ্ঞং দেবেষু নঃ কবে । অদ্যা কৃণুহি বীতয়ে ॥২॥

13.3

নরাশংসমিহ প্রিয়মস্মিন্ যজ্ঞ উপ হ্বয়ে । মধুজিহ্বং হবিষ্কৃতম্ ॥৩॥

13.4

অগ্নে সুখতমে রথে দেবাঁ ঈলিত আ বহ । অসি হোতা মনুর্হিতঃ ॥৪॥

13.5

স্তৃণীত বর্হিরানুষগ্ ঘৃতপৃষ্ঠং মনীষিণঃ । যত্রামৃতস্য চক্ষণম্ ॥৫॥

13.6

বি শ্রয়ন্তামৃতাবৃধো দ্বারো দেবীরসশ্চতঃ । অদ্যা নূনং চ যষ্টবে ॥৬॥

13.7

নক্তোষাসা সুপেশসা ঽস্মিন্ যজ্ঞ উপ হ্বয়ে । ইদং নো বর্হিরাসদে ॥৭॥

13.8

তা সুজিহ্বা উপ হ্বয়ে হোতারা দৈব্যা কবী । যজ্ঞং নো যক্ষতামিমম্ ॥৮॥

13.9

ইলা সরস্বতী মহী তিস্রো দেবীর্ময়োভুবঃ । বর্হিঃ সীদন্ত্বস্রিধঃ ॥৯॥

13.10

ইহ ত্বষ্টারমগ্রিয়ং বিশ্বরূপমুপ হ্বয়ে । অস্মাকমস্তু কেবলঃ ॥১০॥

13.11

অব সৃজা বনস্পতে দেব দেবেভ্যো হবিঃ । প্র দাতুরস্তু চেতনম্ ॥১১॥

13.12

স্বাহা যজ্ঞং কৃণোতনেন্দ্রায় যজ্বনো গৃহে । তত্র দেবাঁ উপ হ্বয়ে ॥১২॥