সূক্ত 14

14.1

১২ মেধাতিথিঃ কাণ্বঃ। বিশ্বে দেবাঃ (বিশ্বৈর্দেবৈঃ সহিতোঽগ্নিঃ), ৩ ইন্দ্রবায়ুবৃহস্পতিমিত্রাগ্নিপূষভগাদিত্যমরুদ্গণাঃ, ১০ বিশ্বদেবাগ্নীন্দ্রবায়ুমিত্রধামানি, ১১ অগ্নিঃ। গায়ত্রী।

ঐভিরগ্নে দুবো গিরো বিশ্বেভিঃ সোমপীতয়ে । দেবেভির্যাহি যক্ষি চ ॥১॥

14.2

আ ত্বা কণ্বা অহূষত গৃণন্তি বিপ্র তে ধিয়ঃ । দেবেভিরগ্ন আ গহি ॥২॥

14.3

ইন্দ্রবায়ূ বৃহস্পতিং মিত্রাগ্নিং পূষণং ভগম্ । আদিত্যান্ মারুতং গণম্ ॥৩॥

14.4

প্র বো ভ্রিয়ন্ত ইন্দবো মত্সরা মাদয়িষ্ণবঃ । দ্রপ্সা মধ্বশ্চমূষদঃ ॥৪॥

14.5

ঈলতে ত্বামবস্যবঃ কণ্বাসো বৃক্তবর্হিষঃ । হবিষ্মন্তো অরংকৃতঃ ॥৫॥

14.6

ঘৃতপৃষ্ঠা মনোয়ুজো যে ত্বা বহন্তি বহ্নয়ঃ । আ দেবান্ত্সোমপীতয়ে ॥৬॥

14.7

তান্ যজত্রাঁ ঋতাবৃধো ঽগ্নে পত্নীবতস্কৃধি । মধ্বঃ সুজিহ্ব পায়য় ॥৭॥

14.8

যে যজত্রা য ঈড্যাস্ তে তে পিবন্তু জিহ্বয়া । মধোরগ্নে বষট্কৃতি ॥৮॥

14.9

আকীং সূর্যস্য রোচনাদ্ বিশ্বান্দেবাঁ উষর্বুধঃ । বিপ্রো হোতেহ বক্ষতি ॥৯॥

14.10

বিশ্বেভিঃ সোম্যং মধ্বগ্ন ইন্দ্রেণ বায়ুনা । পিবা মিত্রস্য ধামভিঃ ॥১০॥

14.11

ত্বং হোতা মনুর্হিতো ঽগ্নে যজ্ঞেষু সীদসি । সেমং নো অধ্বরং যজ ॥১১॥

14.12

যুক্ষ্বা হ্যরুষী রথে হরিতো দেব রোহিতঃ । তাভির্দেবাঁ ইহা বহ ॥১২॥