Sukta 12

12.1

12 medhatithih kanvah, agnih, 6 prathamapadasya (nirmathyahavaniyau) agni, gayatri

अ॒ग्निं दू॒तं वृ॑णीमहे॒ होता॑रं वि॒श्ववे॑दसम् । अ॒स्य य॒ज्ञस्य॑ सु॒क्रतु॑म् ॥१॥

Agnim dutam vrinimahe hotaram vishvavedasam, asya yagyasya sukratum

अ॒ग्निम॑ग्निं॒ हवी॑मभि॒ः सदा॑ हवन्त वि॒श्पति॑म् । ह॒व्य॒वाहं॑ पुरुप्रि॒यम् ॥२॥

Agnimagnim havimabhih sada havanta vishpatim, havyavaham purupriyam

अग्ने॑ दे॒वाँ इ॒हा व॑ह जज्ञा॒नो वृ॒क्तब॑र्हिषे । असि॒ होता॑ न॒ ईड्य॑ः ॥३॥

Agne devam iha vaha jagyano vriktabarhishe, asi hota na idyah

ताँ उ॑श॒तो वि बो॑धय॒ यद॑ग्ने॒ यासि॑ दू॒त्य॑म् । दे॒वैरा स॑त्सि ब॒र्हिषि॑ ॥४॥

Tam ushato vi bodhaya yadagne yasi dutyam, devaira satsi barhishi

घृता॑हवन दीदिव॒ः प्रति॑ ष्म॒ रिष॑तो दह । अग्ने॒ त्वं र॑क्ष॒स्विन॑ः ॥५॥

Ghritahavana didivah prati shma rishato daha, agne tvam rakshasvinah

अ॒ग्निना॒ग्निः समि॑ध्यते क॒विर्गृ॒हप॑ति॒र्युवा॑ । ह॒व्य॒वाड् जु॒ह्वा॑स्यः ॥६॥

Agninagnih samidhyate kavirgrihapatiryuva, havyavad juhvasyah

क॒विम॒ग्निमुप॑ स्तुहि स॒त्यध॑र्माणमध्व॒रे । दे॒वम॑मीव॒चात॑नम् ॥७॥

Kavimagnimupa stuhi satyadharmanamadhvare, devamamivachatanam

यस्त्वाम॑ग्ने ह॒विष्प॑तिर्दू॒तं दे॑व सप॒र्यति॑ । तस्य॑ स्म प्रावि॒ता भ॑व ॥८॥

Yastvamagne havishpatirdutam deva saparyati, tasya sma pravita bhava

यो अ॒ग्निं दे॒ववी॑तये ह॒विष्माँ॑ आ॒विवा॑सति । तस्मै॑ पावक मृळय ॥९॥

Yo agnim devavitaye havishmam avivasati, tasmai pavaka mrilaya

स न॑ः पावक दीदि॒वो ऽग्ने॑ दे॒वाँ इ॒हा व॑ह । उप॑ य॒ज्ञं ह॒विश्च॑ नः ॥१०॥

Sa nah pavaka didivo gne devam iha vaha, upa yagyam havishcha nah

स न॒ः स्तवा॑न॒ आ भ॑र गाय॒त्रेण॒ नवी॑यसा । र॒यिं वी॒रव॑ती॒मिष॑म् ॥११॥

Sa nah stavana a bhara gayatrena naviyasa, rayim viravatimisham

अग्ने॑ शु॒क्रेण॑ शो॒चिषा॒ विश्वा॑भिर्दे॒वहू॑तिभिः । इ॒मं स्तोमं॑ जुषस्व नः ॥१२॥

Agne shukrena shochisha vishvabhirdevahutibhih, imam stomam jushasva nah