সূক্ত 110

110.1

৯ কুত্স আঙ্গিরসঃ। ঋভবঃ। জগতী, ৫, ৯ ত্রিষ্টুপ্।

ততং মে অপস্তদু তায়তে পুনঃ স্বাদিষ্ঠা ধীতিরুচথায় শস্যতে ।
অয়ং সমুদ্র ইহ বিশ্বদেব্যঃ স্বাহাকৃতস্য সমু তৃপ্ণুত ঋভবঃ ॥১॥

আভোগয়ং প্র যদিচ্ছন্ত ঐতনাপাকাঃ প্রাঞ্চো মম কে চিদাপয়ঃ ।
সৌধন্বনাসশ্চরিতস্য ভূমনাগচ্ছত সবিতুর্দাশুষো গৃহম্ ॥২॥

তৎ সবিতা বোঽমৃতত্বমাসুবদগোহ্যং যচ্ছ্রবয়ন্ত ঐতন ।
ত্যং চিচ্চমসমসুরস্য ভক্ষণমেকং সন্তমকৃণুতা চতুর্বয়ম্ ॥৩॥

বিষ্ট্বী শমী তরণিত্বেন বাঘতো মর্তাসঃ সন্তো অমৃতত্বমানশুঃ ।
সৌধন্বনা ঋভবঃ সূরচক্ষসঃ সংবত্সরে সমপৃচ্যন্ত ধীতিভিঃ ॥৪॥

ক্ষেত্রমিব বি মমুস্তেজনেনঁ একং পাত্রমৃভবো জেহমানম্ ।
উপস্তুতা উপমং নাধমানা অমর্ত্যেষু শ্রব ইচ্ছমানাঃ ॥৫॥

আ মনীষামন্তরিক্ষস্য নৃভ্যঃ স্রুচেব ঘৃতং জুহবাম বিদ্মনা ।
তরণিত্বা যে পিতুরস্য সশ্চির ঋভবো বাজমরুহন্ দিবো রজঃ ॥৬॥

ঋভুর্ন ইন্দ্রঃ শবসা নবীয়ানৃভুর্বাজেভির্বসুভির্বসুর্দদিঃ ।
যুষ্মাকং দেবা অবসাহনি প্রিয়ে ৩ ঽভি তিষ্ঠেম পৃত্সুতীরসুন্বতাম্ ॥৭॥

নিশ্চর্মণ ঋভবো গামপিংশত সং বত্সেনাসৃজতা মাতরং পুনঃ ।
সৌধন্বনাসঃ স্বপস্যয়া নরো জিব্রী যুবানা পিতরাকৃণোতন ॥৮॥

বাজেভির্নো বাজসাতাববিড্ঢ্যৃভুমাঁ ইন্দ্র চিত্রমা দর্ষি রাধঃ ।
তন্নো মিত্রো বরুণো মামহন্তামদিতিঃ সিন্ধুঃ পৃথিবী উত দ্যৌঃ ॥৯॥