Sukta 110

110.1

9 kutsa angirasah, ribhavah, jagati, 5, 9 trishtup

त॒तं मे॒ अप॒स्तदु॑ तायते॒ पुन॒ः स्वादि॑ष्ठा धी॒तिरु॒चथा॑य शस्यते ।
अ॒यं स॑मु॒द्र इ॒ह वि॒श्वदे॑व्य॒ः स्वाहा॑कृतस्य॒ समु॑ तृप्णुत ऋभवः ॥१॥

Tatam me apastadu tayate punah svadishtha dhitiruchathaya shasyate
Ayam samudra iha vishvadevyah svahakritasya samu tripnuta ribhavah

110.2

आ॒भो॒गयं॒ प्र यदि॒च्छन्त॒ ऐत॒नापा॑का॒ः प्राञ्चो॒ मम॒ के चि॑दा॒पय॑ः ।
सौध॑न्वनासश्चरि॒तस्य॑ भू॒मनाग॑च्छत सवि॒तुर्दा॒शुषो॑ गृ॒हम् ॥२॥

Abhogayam pra yadichchhanta aitanapakah prancho mama ke chidapayah
Saudhanvanasashcharitasya bhumanagachchhata saviturdashusho griham

110.3

तत् स॑वि॒ता वो॑ऽमृत॒त्वमासु॑व॒दगो॑ह्यं॒ यच्छ्र॒वय॑न्त॒ ऐत॑न ।
त्यं चि॑च्चम॒समसु॑रस्य॒ भक्ष॑ण॒मेकं॒ सन्त॑मकृणुता॒ चतु॑र्वयम् ॥३॥

Tat savita vomritatvamasuvadagohyam yachchhravayanta aitana
Tyam chichchamasamasurasya bhakshanamekam santamakrinuta chaturvayam

110.4

वि॒ष्ट्वी शमी॑ तरणि॒त्वेन॑ वा॒घतो॒ मर्ता॑स॒ः सन्तो॑ अमृत॒त्वमा॑नशुः ।
सौ॒ध॒न्व॒ना ऋ॒भव॒ः सूर॑चक्षसः संवत्स॒रे सम॑पृच्यन्त धी॒तिभि॑ः ॥४॥

Vishtvi shami taranitvena vaghato martasah santo amritatvamanashuh
Saudhanvana ribhavah surachakshasah sanvatsare samaprichyanta dhitibhih

110.5

क्षेत्र॑मिव॒ वि म॑मु॒स्तेज॑नेनँ॒ एकं॒ पात्र॑मृ॒भवो॒ जेह॑मानम् ।
उप॑स्तुता उप॒मं नाध॑माना॒ अम॑र्त्येषु॒ श्रव॑ इ॒च्छमा॑नाः ॥५॥

Kshetramiva vi mamustejanenam ekam patramribhavo jehamanam
Upastuta upamam nadhamana amartyeshu shrava ichchhamanah

110.6

आ म॑नी॒षाम॒न्तरि॑क्षस्य॒ नृभ्य॑ः स्रु॒चेव॑ घृ॒तं जु॑हवाम वि॒द्मना॑ ।
त॒र॒णि॒त्वा ये पि॒तुर॑स्य सश्चि॒र ऋ॒भवो॒ वाज॑मरुहन् दि॒वो रज॑ः ॥६॥

A manishamantarikshasya nribhyah srucheva ghritam juhavama vidmana
Taranitva ye piturasya sashchira ribhavo vajamaruhan divo rajah

110.7

ऋ॒भुर्न॒ इन्द्र॒ः शव॑सा॒ नवी॑यानृ॒भुर्वाजे॑भि॒र्वसु॑भि॒र्वसु॑र्द॒दिः ।
यु॒ष्माकं॑ देवा॒ अव॒साह॑नि प्रि॒ये॒ ३ ऽभि ति॑ष्ठेम पृत्सु॒तीरसु॑न्वताम् ॥७॥

Ribhurna indrah shavasa naviyanribhurvajebhirvasubhirvasurdadih
Yushmakam deva avasahani priye 3 bhi tishthema pritsutirasunvatam

110.8

निश्चर्म॑ण ऋभवो॒ गाम॑पिंशत॒ सं व॒त्सेना॑सृजता मा॒तरं॒ पुन॑ः ।
सौध॑न्वनासः स्वप॒स्यया॑ नरो॒ जिव्री॒ युवा॑ना पि॒तरा॑कृणोतन ॥८॥

Nishcharmana ribhavo gamapinshata sam vatsenasrijata mataram punah
Saudhanvanasah svapasyaya naro jivri yuvana pitarakrinotana

110.9

वाजे॑भिर्नो॒ वाज॑सातावविड्ढ्यृभु॒माँ इ॑न्द्र चि॒त्रमा द॑र्षि॒ राध॑ः ।
तन्नो॑ मि॒त्रो वरु॑णो मामहन्ता॒मदि॑ति॒ः सिन्धु॑ः पृथि॒वी उ॒त द्यौः ॥९॥

Vajebhirno vajasatavaviddhyribhumam indra chitrama darshi radhah
Tanno mitro varuno mamahantamaditih sindhuh prithivi uta dyauh