Sukta 111

111.1

5 kutsa angirasah, ribhavah, jagati, 5 trishtup

तक्ष॒न् रथं॑ सु॒वृतं॑ विद्म॒नाप॑स॒स्तक्ष॒न् हरी॑ इन्द्र॒वाहा॒ वृष॑ण्वसू ।
तक्ष॑न् पि॒तृभ्या॑मृ॒भवो॒ युव॒द् वय॒स्तक्ष॑न् व॒त्साय॑ मा॒तरं॑ सचा॒भुव॑म् ॥१॥

Takshan ratham suvritam vidmanapasastakshan hari indravaha vrishanvasu
Takshan pitribhyamribhavo yuvad vayastakshan vatsaya mataram sachabhuvam

111.2

आ नो॑ य॒ज्ञाय॑ तक्षत ऋभु॒मद्वय॒ः क्रत्वे॒ दक्षा॑य सुप्र॒जाव॑ती॒मिष॑म् ।
यथा॒ क्षया॑म॒ सर्व॑वीरया वि॒शा तन्न॒ः शर्धा॑य धासथा॒ स्वि॑न्द्रि॒यम् ॥२॥

A no yagyaya takshata ribhumadvayah kratve dakshaya suprajavatimisham
Yatha kshayama sarvaviraya visha tannah shardhaya dhasatha svindriyam

111.3

आ त॑क्षत सा॒तिम॒स्मभ्य॑मृभवः सा॒तिं रथा॑य सा॒तिमर्व॑ते नरः ।
सा॒तिं नो॒ जैत्रीं॒ सं म॑हेत वि॒श्वहा॑ जा॒मिमजा॑मिं॒ पृत॑नासु स॒क्षणि॑म् ॥३॥

A takshata satimasmabhyamribhavah satim rathaya satimarvate narah
Satim no jaitrim sam maheta vishvaha jamimajamim pritanasu sakshanim

111.4

ऋ॒भु॒क्षण॒मिन्द्र॒मा हु॑व ऊ॒तय॑ ऋ॒भून् वाजा॑न् म॒रुत॒ः सोम॑पीतये ।
उ॒भा मि॒त्रावरु॑णा नू॒नम॒श्विना॒ ते नो॑ हिन्वन्तु सा॒तये॑ धि॒ये जि॒षे ॥४॥

Ribhukshanamindrama huva utaya ribhun vajan marutah somapitaye
Ubha mitravaruna nunamashvina te no hinvantu sataye dhiye jishe

111.5

ऋ॒भुर्भरा॑य॒ सं शि॑शातु सा॒तिं स॑मर्य॒जिद्वाजो॑ अ॒स्माँ अ॑विष्टु ।
तन्नो॑ मि॒त्रो वरु॑णो मामहन्ता॒मदि॑ति॒ः सिन्धु॑ः पृथि॒वी उ॒त द्यौः ॥५॥

Ribhurbharaya sam shishatu satim samaryajidvajo asmam avishtu
Tanno mitro varuno mamahantamaditih sindhuh prithivi uta dyauh