Utshovঅধ্যায় 7
7.1
সংজয় উবাচ
ব্যতীতায়াং রজন্যাং তু রাজা দুর্যোধনস্তদা
অব্রবীত্তাবকান্সর্বান্সংনহ্যন্তাং মহারথাঃ
7.2
রাজ্ঞস্তু মতমাজ্ঞায় সমনহ্যত সা চমূঃ
অয়োজয়ন্রথাংস্তূর্ণং পর্যধাবংস্তথাপরে
7.3
অকল্প্যন্ত চ মাতঙ্গাঃ সমনহ্যন্ত পত্তয়ঃ
হয়ানাস্তরণোপেতাংশ্চক্রুরন্যে সহস্রশঃ
7.4
বাদিত্রাণাং চ নিনদঃ প্রাদুরাসীদ্বিশাং পতে
বোধনার্থং হি যোধানাং সৈন্যানাং চাপ্যুদীর্যতাম্
7.5
ততো বলানি সর্বাণি সেনাশিষ্টানি ভারত
সংনদ্ধান্যেব দদৃশুর্মৃত্যুং কৃত্বা নিবর্তনম্
7.6
শল্যং সেনাপতিং কৃত্বা মদ্ররাজং মহারথাঃ
প্রবিভজ্য বলং সর্বমনীকেষু ব্যবস্থিতাঃ
7.7
ততঃ সর্বে সমাগম্য পুত্রেণ তব সৈনিকাঃ
কৃপশ্চ কৃতবর্মা চ দ্রৌণিঃ শল্যোঽথ সৌবলঃ
7.8
অন্যে চ পার্থিবাঃ শেষাঃ সময়ং চক্রিরে তদা
ন ন একেন যোদ্ধব্যং কথংচিদপি পাণ্ডবৈঃ
7.9
যো হ্যেকঃ পাণ্ডবৈর্যুধ্যেদ্যো বা যুধ্যন্তমুত্সৃজেৎ
স পঞ্চভির্ভবেদ্যুক্তঃ পাতকৈঃ সোপপাতকৈঃ
অন্যোন্যং পরিরক্ষদ্ভির্যোদ্ধব্যং সহিতৈশ্চ নঃ
7.10
এবং তে সময়ং কৃত্বা সর্বে তত্র মহারথাঃ
মদ্ররাজং পুরস্কৃত্য তূর্ণমভ্যদ্রবন্পরান্
7.11
তথৈব পাণ্ডবা রাজন্ব্যূহ্য সৈন্যং মহারণে
অভ্যয়ুঃ কৌরবান্সর্বান্যোত্স্যমানাঃ সমন্ততঃ
7.12
তদ্বলং ভরতশ্রেষ্ঠ ক্ষুব্ধার্ণবসমস্বনম্
সমুদ্ধূতার্ণবাকারমুদ্ধূতরথকুঞ্জরম্
7.13
ধৃতরাষ্ট্র উবাচ
দ্রোণস্য ভীষ্মস্য চ বৈ রাধেয়স্য চ মে শ্রুতম্
পাতনং শংস মে ভূয়ঃ শল্যস্যাথ সুতস্য মে
7.14
কথং রণে হতঃ শল্যো ধর্মরাজেন সংজয়
ভীমেন চ মহাবাহুঃ পুত্রো দুর্যোধনো মম
7.15
সংজয় উবাচ
ক্ষয়ং মনুষ্যদেহানাং রথনাগাশ্বসংক্ষয়ম্
শৃণু রাজন্স্থিরো ভূত্বা সংগ্রামং শংসতো মম
7.16
আশা বলবতী রাজন্পুত্রাণাং তেঽভবত্তদা
হতে ভীষ্মে চ দ্রোণে চ সূতপুত্রে চ পাতিতে
শল্যঃ পার্থান্রণে সর্বান্নিহনিষ্যতি মারিষ
7.17
তামাশাং হৃদয়ে কৃত্বা সমাশ্বাস্য চ ভারত
মদ্ররাজং চ সমরে সমাশ্রিত্য মহারথম্
নাথবন্তমথাত্মানমমন্যত সুতস্তব
7.18
যদা কর্ণে হতে পার্থাঃ সিংহনাদং প্রচক্রিরে
তদা রাজন্ধার্তরাষ্ট্রানাবিবেশ মহদ্ভয়ম্
7.19
তান্সমাশ্বাস্য তু তদা মদ্ররাজঃ প্রতাপবান্
ব্যূহ্য ব্যূহং মহারাজ সর্বতোভদ্রমৃদ্ধিমৎ
7.20
প্রত্যুদ্যাতো রণে পার্থান্মদ্ররাজঃ প্রতাপবান্
বিধুন্বন্কার্মুকং চিত্রং ভারঘ্নং বেগবত্তরম্
7.21
রথপ্রবরমাস্থায় সৈন্ধবাশ্বং মহারথঃ
তস্য সীতা মহারাজ রথস্থাশোভয়দ্রথম্
7.22
স তেন সংবৃতো বীরো রথেনামিত্রকর্শনঃ
তস্থৌ শূরো মহারাজ পুত্রাণাং তে ভয়প্রণুৎ
7.23
প্রয়াণে মদ্ররাজোঽভূন্মুখং ব্যূহস্য দংশিতঃ
মদ্রকৈঃ সহিতো বীরৈঃ কর্ণপুত্রৈশ্চ দুর্জয়ৈঃ
7.24
সব্যেঽভূত্কৃতবর্মা চ ত্রিগর্তৈঃ পরিবারিতঃ
গৌতমো দক্ষিণে পার্শ্বে শকৈশ্চ যবনৈঃ সহ
7.25
অশ্বত্থামা পৃষ্ঠতোঽভূত্কাম্বোজৈঃ পরিবারিতঃ
দুর্যোধনোঽভবন্মধ্যে রক্ষিতঃ কুরুপুংগবৈঃ
7.26
হয়ানীকেন মহতা সৌবলশ্চাপি সংবৃতঃ
প্রয়য়ৌ সর্বসৈন্যেন কৈতব্যশ্চ মহারথঃ
7.27
পাণ্ডবাশ্চ মহেষ্বাসা ব্যূহ্য সৈন্যমরিংদমাঃ
ত্রিধা ভূত্বা মহারাজ তব সৈন্যমুপাদ্রবন্
7.28
ধৃষ্টদ্যুম্নঃ শিখণ্ডী চ সাত্যকিশ্চ মহারথঃ
শল্যস্য বাহিনীং তূর্ণমভিদুদ্রুবুরাহবে
7.29
ততো যুধিষ্ঠিরো রাজা স্বেনানীকেন সংবৃতঃ
শল্যমেবাভিদুদ্রাব জিঘাংসুর্ভরতর্ষভ
7.30
হার্দিক্যং তু মহেষ্বাসমর্জুনঃ শত্রুপূগহা
সংশপ্তকগণাংশ্চৈব বেগতোঽভিবিদুদ্রুবে
7.31
গৌতমং ভীমসেনো বৈ সোমকাশ্চ মহারথাঃ
অভ্যদ্রবন্ত রাজেন্দ্র জিঘাংসন্তঃ পরান্যুধি
7.32
মাদ্রীপুত্রৌ তু শকুনিমুলূকং চ মহারথৌ
সসৈন্যৌ সহসেনৌ তাবুপতস্থতুরাহবে
7.33
তথৈবায়ুতশো যোধাস্তাবকাঃ পাণ্ডবান্রণে
অভ্যদ্রবন্ত সংক্রুদ্ধা বিবিধায়ুধপাণয়ঃ
7.34
ধৃতরাষ্ট্র উবাচ
হতে ভীষ্মে মহেষ্বাসে দ্রোণে কর্ণে মহারথে
কুরুষ্বল্পাবশিষ্টেষু পাণ্ডবেষু চ সংয়ুগে
7.35
সুসংরব্ধেষু পার্থেষু পরাক্রান্তেষু সংজয়
মামকানাং পরেষাং চ কিং শিষ্টমভবদ্বলম্
7.36
সংজয় উবাচ
যথা বয়ং পরে রাজন্যুদ্ধায় সমবস্থিতাঃ
যাবচ্চাসীদ্বলং শিষ্টং সংগ্রামে তন্নিবোধ মে
7.37
একাদশ সহস্রাণি রথানাং ভরতর্ষভ
দশ দন্তিসহস্রাণি সপ্ত চৈব শতানি চ
7.38
পূর্ণে শতসহস্রে দ্বে হয়ানাং ভরতর্ষভ
নরকোট্যস্তথা তিস্রো বলমেতত্তবাভবৎ
7.39
রথানাং ষট্সহস্রাণি ষট্সহস্রাশ্চ কুঞ্জরাঃ
দশ চাশ্বসহস্রাণি পত্তিকোটী চ ভারত
7.40
এতদ্বলং পাণ্ডবানামভবচ্ছেষমাহবে
এত এব সমাজগ্মুর্যুদ্ধায় ভরতর্ষভ
7.41
এবং বিভজ্য রাজেন্দ্র মদ্ররাজমতে স্থিতাঃ
পাণ্ডবান্প্রত্যুদীয়াম জয়গৃদ্ধাঃ প্রমন্যবঃ
7.42
তথৈব পাণ্ডবাঃ শূরাঃ সমরে জিতকাশিনঃ
উপয়াতা নরব্যাঘ্রাঃ পাঞ্চালাশ্চ যশস্বিনঃ
7.43
এবমেতে বলৌঘেন পরস্পরবধৈষিণঃ
উপয়াতা নরব্যাঘ্রাঃ পূর্বাং সংধ্যাং প্রতি প্রভো
7.44
ততঃ প্রববৃতে যুদ্ধং ঘোররূপং ভয়ানকম্
তাবকানাং পরেষাং চ নিঘ্নতামিতরেতরম্