Utshovঅধ্যায় 6
6.1
সংজয় উবাচ
এতচ্ছ্রুত্বা বচো রাজ্ঞো মদ্ররাজঃ প্রতাপবান্
দুর্যোধনং তদা রাজন্বাক্যমেতদুবাচ হ
6.2
দুর্যোধন মহাবাহো শৃণু বাক্যবিদাং বর
যাবেতৌ মন্যসে কৃষ্ণৌ রথস্থৌ রথিনাং বরৌ
ন মে তুল্যাবুভাবেতৌ বাহুবীর্যে কথংচন
6.3
উদ্যতাং পৃথিবীং সর্বাং সসুরাসুরমানবাম্
যোধয়েয়ং রণমুখে সংক্রুদ্ধঃ কিমু পাণ্ডবান্
বিজেষ্যে চ রণে পার্থান্সোমকাংশ্চ সমাগতান্
6.4
অহং সেনাপ্রণেতা তে ভবিষ্যামি ন সংশয়ঃ
তং চ ব্যূহং বিধাস্যামি ন তরিষ্যন্তি যং পরে
ইতি সত্যং ব্রবীম্যেষ দুর্যোধন ন সংশয়ঃ
6.5
এবমুক্তস্ততো রাজা মদ্রাধিপতিমঞ্জসা
অভ্যষিঞ্চত সেনায়া মধ্যে ভরতসত্তম
বিধিনা শাস্ত্রদৃষ্টেন হৃষ্টরূপো বিশাং পতে
6.6
অভিষিক্তে ততস্তস্মিন্সিংহনাদো মহানভূৎ
তব সৈন্যেষ্ববাদ্যন্ত বাদিত্রাণি চ ভারত
6.7
হৃষ্টাশ্চাসংস্তদা যোধা মদ্রকাশ্চ মহারথাঃ
তুষ্টুবুশ্চৈব রাজানং শল্যমাহবশোভিনম্
6.8
জয় রাজংশ্চিরং জীব জহি শত্রূন্সমাগতান্
তব বাহুবলং প্রাপ্য ধার্তরাষ্ট্রা মহাবলাঃ
নিখিলাং পৃথিবীং সর্বাং প্রশাসন্তু হতদ্বিষঃ
6.9
ত্বং হি শক্তো রণে জেতুং সসুরাসুরমানবান্
মর্ত্যধর্মাণ ইহ তু কিমু সোমকসৃঞ্জয়ান্
6.10
এবং সংস্তূয়মানস্তু মদ্রাণামধিপো বলী
হর্ষং প্রাপ তদা বীরো দুরাপমকৃতাত্মভিঃ
6.11
শল্য উবাচ
অদ্যৈবাহং রণে সর্বান্পাঞ্চালান্সহ পাণ্ডবৈঃ
নিহনিষ্যামি রাজেন্দ্র স্বর্গং যাস্যামি বা হতঃ
6.12
অদ্য পশ্যন্তু মাং লোকা বিচরন্তমভীতবৎ
অদ্য পাণ্ডুসুতাঃ সর্বে বাসুদেবঃ সসাত্যকিঃ
6.13
পাঞ্চালাশ্চেদয়শ্চৈব দ্রৌপদেয়াশ্চ সর্বশঃ
ধৃষ্টদ্যুম্নঃ শিখণ্ডী চ সর্বে চাপি প্রভদ্রকাঃ
6.14
বিক্রমং মম পশ্যন্তু ধনুষশ্চ মহদ্বলম্
লাঘবং চাস্ত্রবীর্যং চ ভুজয়োশ্চ বলং যুধি
6.15
অদ্য পশ্যন্তু মে পার্থাঃ সিদ্ধাশ্চ সহ চারণৈঃ
যাদৃশং মে বলং বাহ্বোঃ সংপদস্ত্রেষু যা চ মে
6.16
অদ্য মে বিক্রমং দৃষ্ট্বা পাণ্ডবানাং মহারথাঃ
প্রতীকারপরা ভূত্বা চেষ্টন্তাং বিবিধাঃ ক্রিয়াঃ
6.17
অদ্য সৈন্যানি পাণ্ডূনাং দ্রাবয়িষ্যে সমন্ততঃ
দ্রোণভীষ্মাবতি বিভো সূতপুত্রং চ সংয়ুগে
বিচরিষ্যে রণে যুধ্যন্প্রিয়ার্থং তব কৌরব
6.18
সংজয় উবাচ
অভিষিক্তে তদা শল্যে তব সৈন্যেষু মানদ
ন কর্ণব্যসনং কিংচিন্মেনিরে তত্র ভারত
6.19
হৃষ্টাঃ সুমনসশ্চৈব বভূবুস্তত্র সৈনিকাঃ
মেনিরে নিহতান্পার্থান্মদ্ররাজবশং গতান্
6.20
প্রহর্ষং প্রাপ্য সেনা তু তাবকী ভরতর্ষভ
তাং রাত্রিং সুখিনী সুপ্তা স্বস্থচিত্তেব সাভবৎ
6.21
সৈন্যস্য তব তং শব্দং শ্রুত্বা রাজা যুধিষ্ঠিরঃ
বার্ষ্ণেয়মব্রবীদ্বাক্যং সর্বক্ষত্রস্য শৃণ্বতঃ
6.22
মদ্ররাজঃ কৃতঃ শল্যো ধার্তরাষ্ট্রেণ মাধব
সেনাপতির্মহেষ্বাসঃ সর্বসৈন্যেষু পূজিতঃ
6.23
এতজ্জ্ঞাত্বা যথাভূতং কুরু মাধব যত্ক্ষমম্
ভবান্নেতা চ গোপ্তা চ বিধত্স্ব যদনন্তরম্
6.24
তমব্রবীন্মহারাজ বাসুদেবো জনাধিপম্
আর্তায়নিমহং জানে যথাতত্ত্বেন ভারত
6.25
বীর্যবাংশ্চ মহাতেজা মহাত্মা চ বিশেষতঃ
কৃতী চ চিত্রয়োধী চ সংয়ুক্তো লাঘবেন চ
6.26
যাদৃগ্ভীষ্মস্তথা দ্রোণো যাদৃক্কর্ণশ্চ সংয়ুগে
তাদৃশস্তদ্বিশিষ্টো বা মদ্ররাজো মতো মম
6.27
যুধ্যমানস্য তস্যাজৌ চিন্তয়ন্নেব ভারত
যোদ্ধারং নাধিগচ্ছামি তুল্যরূপং জনাধিপ
6.28
শিখণ্ড্যর্জুনভীমানাং সাত্বতস্য চ ভারত
ধৃষ্টদ্যুম্নস্য চ তথা বলেনাভ্যধিকো রণে
6.29
মদ্ররাজো মহারাজ সিংহদ্বিরদবিক্রমঃ
বিচরিষ্যত্যভীঃ কালে কালঃ ক্রুদ্ধঃ প্রজাস্বিব
6.30
তস্যাদ্য ন প্রপশ্যামি প্রতিয়োদ্ধারমাহবে
ত্বামৃতে পুরুষব্যাঘ্র শার্দূলসমবিক্রমম্
6.31
সদেবলোকে কৃত্স্নেঽস্মিন্নান্যস্ত্বত্তঃ পুমান্ভবেৎ
মদ্ররাজং রণে ক্রুদ্ধং যো হন্যাত্কুরুনন্দন
অহন্যহনি যুধ্যন্তং ক্ষোভয়ন্তং বলং তব
6.32
তস্মাজ্জহি রণে শল্যং মঘবানিব শম্বরম্
অতিপশ্চাদসৌ বীরো ধার্তরাষ্ট্রেণ সত্কৃতঃ
6.33
তবৈব হি জয়ো নূনং হতে মদ্রেশ্বরে যুধি
তস্মিন্হতে হতং সর্বং ধার্তরাষ্ট্রবলং মহৎ
6.34
এতচ্ছ্রুত্বা মহারাজ বচনং মম সাংপ্রতম্
প্রত্যুদ্যাহি রণে পার্থ মদ্ররাজং মহাবলম্
জহি চৈনং মহাবাহো বাসবো নমুচিং যথা
6.35
ন চৈবাত্র দয়া কার্যা মাতুলোঽয়ং মমেতি বৈ
ক্ষত্রধর্মং পুরস্কৃত্য জহি মদ্রজনেশ্বরম্
6.36
ভীষ্মদ্রোণার্ণবং তীর্ত্বা কর্ণপাতালসংভবম্
মা নিমজ্জস্ব সগণঃ শল্যমাসাদ্য গোষ্পদম্
6.37
যচ্চ তে তপসো বীর্যং যচ্চ ক্ষাত্রং বলং তব
তদ্দর্শয় রণে সর্বং জহি চৈনং মহারথম্
6.38
এতাবদুক্ত্বা বচনং কেশবঃ পরবীরহা
জগাম শিবিরং সায়ং পূজ্যমানোঽথ পাণ্ডবৈঃ
6.39
কেশবে তু তদা যাতে ধর্মরাজো যুধিষ্ঠিরঃ
বিসৃজ্য সর্বান্ভ্রাতৄংশ্চ পাঞ্চালানথ সোমকান্
সুষ্বাপ রজনীং তাং তু বিশল্য ইব কুঞ্জরঃ
6.40
তে চ সর্বে মহেষ্বাসাঃ পাঞ্চালাঃ পাণ্ডবাস্তথা
কর্ণস্য নিধনে হৃষ্টাঃ সুষুপুস্তাং নিশাং তদা
6.41
গতজ্বরং মহেষ্বাসং তীর্ণপারং মহারথম্
বভূব পাণ্ডবেয়ানাং সৈন্যং প্রমুদিতং নিশি
সূতপুত্রস্য নিধনে জয়ং লব্ধ্বা চ মারিষ