অধ্যায় 5

5.1

সংজয় উবাচ
অথ হৈমবতে প্রস্থে স্থিত্বা যুদ্ধাভিনন্দিনঃ
সর্ব এব মহারাজ যোধাস্তত্র সমাগতাঃ

5.2

শল্যশ্চ চিত্রসেনশ্চ শকুনিশ্চ মহারথঃ
অশ্বত্থামা কৃপশ্চৈব কৃতবর্মা চ সাত্বতঃ

5.3

সুষেণোঽরিষ্টসেনশ্চ ধৃতসেনশ্চ বীর্যবান্
জয়ত্সেনশ্চ রাজানস্তে রাত্রিমুষিতাস্ততঃ

5.4

রণে কর্ণে হতে বীরে ত্রাসিতা জিতকাশিভিঃ
নালভঞ্শর্ম তে পুত্রা হিমবন্তমৃতে গিরিম্

5.5

তেঽব্রুবন্সহিতাস্তত্র রাজানং সৈন্যসংনিধৌ
কৃতয়ত্না রণে রাজন্সংপূজ্য বিধিবত্তদা

5.6

কৃত্বা সেনাপ্রণেতারং পরাংস্ত্বং যোদ্ধুমর্হসি
যেনাভিগুপ্তাঃ সংগ্রামে জয়েমাসুহৃদো বয়ম্

5.7

ততো দুর্যোধনঃ স্থিত্বা রথে রথবরোত্তমম্
সর্বয়ুদ্ধবিভাগজ্ঞমন্তকপ্রতিমং যুধি

5.8

স্বঙ্গং প্রচ্ছন্নশিরসং কম্বুগ্রীবং প্রিয়ংবদম্
ব্যাকোশপদ্মাভিমুখং ব্যাঘ্রাস্যং মেরুগৌরবম্

5.9

স্থাণোর্বৃষস্য সদৃশং স্কন্ধনেত্রগতিস্বরৈঃ
পুষ্টশ্লিষ্টায়তভুজং সুবিস্তীর্ণঘনোরসম্

5.10

জবে বলে চ সদৃশমরুণানুজবাতয়োঃ
আদিত্যস্য ত্বিষা তুল্যং বুদ্ধ্যা চোশনসা সমম্

5.11

কান্তিরূপমুখৈশ্বর্যৈস্ত্রিভিশ্চন্দ্রমসোপমম্
কাঞ্চনোপলসংঘাতৈঃ সদৃশং শ্লিষ্টসংধিকম্

5.12

সুবৃত্তোরুকটীজঙ্ঘং সুপাদং স্বঙ্গুলীনখম্
স্মৃত্বা স্মৃত্বৈব চ গুণান্ধাত্রা যত্নাদ্বিনির্মিতম্

5.13

সর্বলক্ষণসংপন্নং নিপুণং শ্রুতিসাগরম্
জেতারং তরসারীণামজেয়ং শত্রুভির্বলাৎ

5.14

দশাঙ্গং যশ্চতুষ্পাদমিষ্বস্ত্রং বেদ তত্ত্বতঃ
সাঙ্গাংশ্চ চতুরো বেদান্সম্যগাখ্যানপঞ্চমান্

5.15

আরাধ্য ত্র্যম্বকং যত্নাদ্ব্রতৈরুগ্রৈর্মহাতপাঃ
অয়োনিজায়ামুত্পন্নো দ্রোণেনায়োনিজেন যঃ

5.16

তমপ্রতিমকর্মাণং রূপেণাসদৃশং ভুবি
পারগং সর্ববিদ্যানাং গুণার্ণবমনিন্দিতম্
তমভ্যেত্যাত্মজস্তুভ্যমশ্বত্থামানমব্রবীৎ

5.17

যং পুরস্কৃত্য সহিতা যুধি জেষ্যাম পাণ্ডবান্
গুরুপুত্রোঽদ্য সর্বেষামস্মাকং পরমা গতিঃ
ভবাংস্তস্মান্নিয়োগাত্তে কোঽস্তু সেনাপতির্মম

5.18

দ্রৌণিরুবাচ
অয়ং কুলেন বীর্যেণ তেজসা যশসা শ্রিয়া
সর্বৈর্গুণৈঃ সমুদিতঃ শল্যো নোঽস্তু চমূপতিঃ

5.19

ভাগিনেয়ান্নিজাংস্ত্যক্ত্বা কৃতজ্ঞোঽস্মানুপাগতঃ
মহাসেনো মহাবাহুর্মহাসেন ইবাপরঃ

5.20

এনং সেনাপতিং কৃত্বা নৃপতিং নৃপসত্তম
শক্যঃ প্রাপ্তুং জয়োঽস্মাভির্দেবৈঃ স্কন্দমিবাজিতম্

5.21

তথোক্তে দ্রোণপুত্রেণ সর্ব এব নরাধিপাঃ
পরিবার্য স্থিতাঃ শল্যং জয়শব্দাংশ্চ চক্রিরে
যুদ্ধায় চ মতিং চক্রূরাবেশং চ পরং যয়ুঃ

5.22

ততো দুর্যোধনঃ শল্যং ভূমৌ স্থিত্বা রথে স্থিতম্
উবাচ প্রাঞ্জলির্ভূত্বা রামভীষ্মসমং রণে

5.23

অয়ং স কালঃ সংপ্রাপ্তো মিত্রাণাং মিত্রবত্সল
যত্র মিত্রমমিত্রং বা পরীক্ষন্তে বুধা জনাঃ

5.24

স ভবানস্তু নঃ শূরঃ প্রণেতা বাহিনীমুখে
রণং চ যাতে ভবতি পাণ্ডবা মন্দচেতসঃ
ভবিষ্যন্তি সহামাত্যাঃ পাঞ্চালাশ্চ নিরুদ্যমাঃ

5.25

শল্য উবাচ
যত্তু মাং মন্যসে রাজন্কুরুরাজ করোমি তৎ
ত্বত্প্রিয়ার্থং হি মে সর্বং প্রাণা রাজ্যং ধনানি চ

5.26

দুর্যোধন উবাচ
সেনাপত্যেন বরয়ে ত্বামহং মাতুলাতুলম্
সোঽস্মান্পাহি যুধাং শ্রেষ্ঠ স্কন্দো দেবানিবাহবে

5.27

অভিষিচ্যস্ব রাজেন্দ্র দেবানামিব পাবকিঃ
জহি শত্রূন্রণে বীর মহেন্দ্রো দানবানিব

Contains text from DharmicData, made available under the Open Database License (ODbL). Simple meanings are written by AI and can contain mistakes.