Utshovঅধ্যায় 4
4.1
সংজয় উবাচ
এবমুক্তস্ততো রাজা গৌতমেন যশস্বিনা
নিঃশ্বস্য দীর্ঘমুষ্ণং চ তূষ্ণীমাসীদ্বিশাং পতে
4.2
ততো মুহূর্তং স ধ্যাত্বা ধার্তরাষ্ট্রো মহামনাঃ
কৃপং শারদ্বতং বাক্যমিত্যুবাচ পরংতপঃ
4.3
যত্কিংচিত্সুহৃদা বাচ্যং তত্সর্বং শ্রাবিতো হ্যহম্
কৃতং চ ভবতা সর্বং প্রাণান্সংত্যজ্য যুধ্যতা
4.4
গাহমানমনীকানি যুধ্যমানং মহারথৈঃ
পাণ্ডবৈরতিতেজোভির্লোকস্ত্বামনুদৃষ্টবান্
4.5
সুহৃদা যদিদং বাচ্যং ভবতা শ্রাবিতো হ্যহম্
ন মাং প্রীণাতি তত্সর্বং মুমূর্ষোরিব ভেষজম্
4.6
হেতুকারণসংয়ুক্তং হিতং বচনমুত্তমম্
উচ্যমানং মহাবাহো ন মে বিপ্রাগ্র্য রোচতে
4.7
রাজ্যাদ্বিনিকৃতোঽস্মাভিঃ কথং সোঽস্মাসু বিশ্বসেৎ
অক্ষদ্যূতে চ নৃপতির্জিতোঽস্মাভির্মহাধনঃ
স কথং মম বাক্যানি শ্রদ্দধ্যাদ্ভূয় এব তু
4.8
তথা দৌত্যেন সংপ্রাপ্তঃ কৃষ্ণঃ পার্থহিতে রতঃ
প্রলব্ধশ্চ হৃষীকেশস্তচ্চ কর্ম বিরোধিতম্
স চ মে বচনং ব্রহ্মন্কথমেবাভিমংস্যতে
4.9
বিললাপ হি যত্কৃষ্ণা সভামধ্যে সমেয়ুষী
ন তন্মর্ষয়তে কৃষ্ণো ন রাজ্যহরণং তথা
4.10
একপ্রাণাবুভৌ কৃষ্ণাবন্যোন্যং প্রতি সংহতৌ
পুরা যচ্ছ্রুতমেবাসীদদ্য পশ্যামি তত্প্রভো
4.11
স্বস্রীয়ং চ হতং শ্রুত্বা দুঃখং স্বপিতি কেশবঃ
কৃতাগসো বয়ং তস্য স মদর্থং কথং ক্ষমেৎ
4.12
অভিমন্যোর্বিনাশেন ন শর্ম লভতেঽর্জুনঃ
স কথং মদ্ধিতে যত্নং প্রকরিষ্যতি যাচিতঃ
4.13
মধ্যমঃ পাণ্ডবস্তীক্ষ্ণো ভীমসেনো মহাবলঃ
প্রতিজ্ঞাতং চ তেনোগ্রং স ভজ্যেত ন সংনমেৎ
4.14
উভৌ তৌ বদ্ধনিস্ত্রিংশাবুভৌ চাবদ্ধকঙ্কটৌ
কৃতবৈরাবুভৌ বীরৌ যমাবপি যমোপমৌ
4.15
ধৃষ্টদ্যুম্নঃ শিখণ্ডী চ কৃতবৈরৌ ময়া সহ
তৌ কথং মদ্ধিতে যত্নং প্রকুর্যাতাং দ্বিজোত্তম
4.16
দুঃশাসনেন যত্কৃষ্ণা একবস্ত্রা রজস্বলা
পরিক্লিষ্টা সভামধ্যে সর্বলোকস্য পশ্যতঃ
4.17
তথা বিবসনাং দীনাং স্মরন্ত্যদ্যাপি পাণ্ডবাঃ
ন নিবারয়িতুং শক্যাঃ সংগ্রামাত্তে পরংতপাঃ
4.18
যদা চ দ্রৌপদী কৃষ্ণা মদ্বিনাশায় দুঃখিতা
উগ্রং তেপে তপঃ কৃষ্ণা ভর্তৄণামর্থসিদ্ধয়ে
স্থণ্ডিলে নিত্যদা শেতে যাবদ্বৈরস্য যাতনা
4.19
নিক্ষিপ্য মানং দর্পং চ বাসুদেবসহোদরা
কৃষ্ণায়াঃ প্রেষ্যবদ্ভূত্বা শুশ্রূষাং কুরুতে সদা
4.20
ইতি সর্বং সমুন্নদ্ধং ন নির্বাতি কথংচন
অভিমন্যোর্বিনাশেন স সংধেয়ঃ কথং ময়া
4.21
কথং চ নাম ভুক্ত্বেমাং পৃথিবীং সাগরাম্বরাম্
পাণ্ডবানাং প্রসাদেন ভুঞ্জীয়াং রাজ্যমল্পকম্
4.22
উপর্যুপরি রাজ্ঞাং বৈ জ্বলিতো ভাস্করো যথা
যুধিষ্ঠিরং কথং পশ্চাদনুয়াস্যামি দাসবৎ
4.23
কথং ভুক্ত্বা স্বয়ং ভোগান্দত্ত্বা দায়াংশ্চ পুষ্কলান্
কৃপণং বর্তয়িষ্যামি কৃপণৈঃ সহ জীবিকাম্
4.24
নাভ্যসূয়ামি তে বাক্যমুক্তং স্নিগ্ধং হিতং ত্বয়া
ন তু সংধিমহং মন্যে প্রাপ্তকালং কথংচন
4.25
সুনীতমনুপশ্যামি সুয়ুদ্ধেন পরংতপ
নায়ং ক্লীবয়িতুং কালঃ সংয়োদ্ধুং কাল এব নঃ
4.26
ইষ্টং মে বহুভির্যজ্ঞৈর্দত্তা বিপ্রেষু দক্ষিণাঃ
প্রাপ্তাঃ ক্রমশ্রুতা বেদাঃ শত্রূণাং মূর্ধ্নি চ স্থিতম্
4.27
ভৃত্যা মে সুভৃতাস্তাত দীনশ্চাভ্যুদ্ধৃতো জনঃ
যাতানি পররাষ্ট্রাণি স্বরাষ্ট্রমনুপালিতম্
4.28
ভুক্তাশ্চ বিবিধা ভোগাস্ত্রিবর্গঃ সেবিতো ময়া
পিতৄণাং গতমানৃণ্যং ক্ষত্রধর্মস্য চোভয়োঃ
4.29
ন ধ্রুবং সুখমস্তীহ কুতো রাজ্যং কুতো যশঃ
ইহ কীর্তির্বিধাতব্যা সা চ যুদ্ধেন নান্যথা
4.30
গৃহে যত্ক্ষত্রিয়স্যাপি নিধনং তদ্বিগর্হিতম্
অধর্মঃ সুমহানেষ যচ্ছয্যামরণং গৃহে
4.31
অরণ্যে যো বিমুঞ্চেত সংগ্রামে বা তনুং নরঃ
ক্রতূনাহৃত্য মহতো মহিমানং স গচ্ছতি
4.32
কৃপণং বিলপন্নার্তো জরয়াভিপরিপ্লুতঃ
ম্রিয়তে রুদতাং মধ্যে জ্ঞাতীনাং ন স পূরুষঃ
4.33
ত্যক্ত্বা তু বিবিধান্ভোগান্প্রাপ্তানাং পরমাং গতিম্
অপীদানীং সুয়ুদ্ধেন গচ্ছেয়ং সত্সলোকতাম্
4.34
শূরাণামার্যবৃত্তানাং সংগ্রামেষ্বনিবর্তিনাম্
ধীমতাং সত্যসংধানাং সর্বেষাং ক্রতুয়াজিনাম্
4.35
শস্ত্রাবভৃথমাপ্তানাং ধ্রুবং বাসস্ত্রিবিষ্টপে
মুদা নূনং প্রপশ্যন্তি শুভ্রা হ্যপ্সরসাং গণাঃ
4.36
পশ্যন্তি নূনং পিতরঃ পূজিতাঞ্শক্রসংসদি
অপ্সরোভিঃ পরিবৃতান্মোদমানাংস্ত্রিবিষ্টপে
4.37
পন্থানমমরৈর্যাতং শূরৈশ্চৈবানিবর্তিভিঃ
অপি তৈঃ সংগতং মার্গং বয়মপ্যারুহেমহি
4.38
পিতামহেন বৃদ্ধেন তথাচার্যেণ ধীমতা
জয়দ্রথেন কর্ণেন তথা দুঃশাসনেন চ
4.39
ঘটমানা মদর্থেঽস্মিন্হতাঃ শূরা জনাধিপাঃ
শেরতে লোহিতাক্তাঙ্গাঃ পৃথিব্যাং শরবিক্ষতাঃ
4.40
উত্তমাস্ত্রবিদঃ শূরা যথোক্তক্রতুয়াজিনঃ
ত্যক্ত্বা প্রাণান্যথান্যায়মিন্দ্রসদ্মসু ধিষ্ঠিতাঃ
4.41
তৈস্ত্বয়ং রচিতঃ পন্থা দুর্গমো হি পুনর্ভবেৎ
সংপতদ্ভির্মহাবেগৈরিতো যাদ্ভিশ্চ সদ্গতিম্
4.42
যে মদর্থে হতাঃ শূরাস্তেষাং কৃতমনুস্মরন্
ঋণং তত্প্রতিমুঞ্চানো ন রাজ্যে মন আদধে
4.43
পাতয়িত্বা বয়স্যাংশ্চ ভ্রাতৄনথ পিতামহান্
জীবিতং যদি রক্ষেয়ং লোকো মাং গর্হয়েদ্ধ্রুবম্
4.44
কীদৃশং চ ভবেদ্রাজ্যং মম হীনস্য বন্ধুভিঃ
সখিভিশ্চ সুহৃদ্ভিশ্চ প্রণিপত্য চ পাণ্ডবম্
4.45
সোঽহমেতাদৃশং কৃত্বা জগতোঽস্য পরাভবম্
সুয়ুদ্ধেন ততঃ স্বর্গং প্রাপ্স্যামি ন তদন্যথা
4.46
এবং দুর্যোধনেনোক্তং সর্বে সংপূজ্য তদ্বচঃ
সাধু সাধ্বিতি রাজানং ক্ষত্রিয়াঃ সংবভাষিরে
4.47
পরাজয়মশোচন্তঃ কৃতচিত্তাশ্চ বিক্রমে
সর্বে সুনিশ্চিতা যোদ্ধুমুদগ্রমনসোঽভবন্
4.48
ততো বাহান্সমাশ্বাস্য সর্বে যুদ্ধাভিনন্দিনঃ
ঊনে দ্বিয়োজনে গত্বা প্রত্যতিষ্ঠন্ত কৌরবাঃ
4.49
আকাশে বিদ্রুমে পুণ্যে প্রস্থে হিমবতঃ শুভে
অরুণাং সরস্বতীং প্রাপ্য পপুঃ সস্নুশ্চ তজ্জলম্
4.50
তব পুত্রাঃ কৃতোত্সাহাঃ পর্যবর্তন্ত তে ততঃ
পর্যবস্থাপ্য চাত্মানমন্যোন্যেন পুনস্তদা
সর্বে রাজন্ন্যবর্তন্ত ক্ষত্রিয়াঃ কালচোদিতাঃ