Utshovঅধ্যায় 3
3.1
সংজয় উবাচ
শৃণু রাজন্নবহিতো যথা বৃত্তো মহান্ক্ষয়ঃ
কুরূণাং পাণ্ডবানাং চ সমাসাদ্য পরস্পরম্
3.2
নিহতে সূতপুত্রে তু পাণ্ডবেন মহাত্মনা
বিদ্রুতেষু চ সৈন্যেষু সমানীতেষু চাসকৃৎ
3.3
বিমুখে তব পুত্রে তু শোকোপহতচেতসি
ভৃশোদ্বিগ্নেষু সৈন্যেষু দৃষ্ট্বা পার্থস্য বিক্রমম্
3.4
ধ্যায়মানেষু সৈন্যেষু দুঃখং প্রাপ্তেষু ভারত
বলানাং মথ্যমানানাং শ্রুত্বা নিনদমুত্তমম্
3.5
অভিজ্ঞানং নরেন্দ্রাণাং বিকৃতং প্রেক্ষ্য সংয়ুগে
পতিতান্রথনীডাংশ্চ রথাংশ্চাপি মহাত্মনাম্
3.6
রণে বিনিহতান্নাগান্দৃষ্ট্বা পত্তীংশ্চ মারিষ
আয়োধনং চাতিঘোরং রুদ্রস্যাক্রীডসংনিভম্
3.7
অপ্রখ্যাতিং গতানাং তু রাজ্ঞাং শতসহস্রশঃ
কৃপাবিষ্টঃ কৃপো রাজন্বয়ঃশীলসমন্বিতঃ
3.8
অব্রবীত্তত্র তেজস্বী সোঽভিসৃত্য জনাধিপম্
দুর্যোধনং মন্যুবশাদ্বচনং বচনক্ষমঃ
3.9
দুর্যোধন নিবোধেদং যত্ত্বা বক্ষ্যামি কৌরব
শ্রুত্বা কুরু মহারাজ যদি তে রোচতেঽনঘ
3.10
ন যুদ্ধধর্মাচ্ছ্রেয়ান্বৈ পন্থা রাজেন্দ্র বিদ্যতে
যং সমাশ্রিত্য যুধ্যন্তে ক্ষত্রিয়াঃ ক্ষত্রিয়র্ষভ
3.11
পুত্রো ভ্রাতা পিতা চৈব স্বস্রেয়ো মাতুলস্তথা
সংবন্ধিবান্ধবাশ্চৈব যোধ্যা বৈ ক্ষত্রজীবিনা
3.12
বধে চৈব পরো ধর্মস্তথাধর্মঃ পলায়নে
তে স্ম ঘোরাং সমাপন্না জীবিকাং জীবিতার্থিনঃ
3.13
তত্র ত্বাং প্রতিবক্ষ্যামি কিংচিদেব হিতং বচঃ
হতে ভীষ্মে চ দ্রোণে চ কর্ণে চৈব মহারথে
3.14
জয়দ্রথে চ নিহতে তব ভ্রাতৃষু চানঘ
লক্ষ্মণে তব পুত্রে চ কিং শেষং পর্যুপাস্মহে
3.15
যেষু ভারং সমাসজ্য রাজ্যে মতিমকুর্মহি
তে সংত্যজ্য তনূর্যাতাঃ শূরা ব্রহ্মবিদাং গতিম্
3.16
বয়ং ত্বিহ বিনাভূতা গুণবদ্ভির্মহারথৈঃ
কৃপণং বর্তয়িষ্যাম পাতয়িত্বা নৃপান্বহূন্
3.17
সর্বৈরপি চ জীবদ্ভির্বীভত্সুরপরাজিতঃ
কৃষ্ণনেত্রো মহাবাহুর্দেবৈরপি দুরাসদঃ
3.18
ইন্দ্রকার্মুকবজ্রাভমিন্দ্রকেতুমিবোচ্ছ্রিতম্
বানরং কেতুমাসাদ্য সংচচাল মহাচমূঃ
3.19
সিংহনাদেন ভীমস্য পাঞ্চজন্যস্বনেন চ
গাণ্ডীবস্য চ নির্ঘোষাত্সংহৃষ্যন্তি মনাংসি নঃ
3.20
চরন্তীব মহাবিদ্যুন্মুষ্ণন্তী নয়নপ্রভাম্
অলাতমিব চাবিদ্ধং গাণ্ডীবং সমদৃশ্যত
3.21
জাম্বূনদবিচিত্রং চ ধূয়মানং মহদ্ধনুঃ
দৃশ্যতে দিক্ষু সর্বাসু বিদ্যুদভ্রঘনেষ্বিব
3.22
উহ্যমানশ্চ কৃষ্ণেন বায়ুনেব বলাহকঃ
তাবকং তদ্বলং রাজন্নর্জুনোঽস্ত্রবিদাং বরঃ
গহনং শিশিরে কক্ষং দদাহাগ্নিরিবোত্থিতঃ
3.23
গাহমানমনীকানি মহেন্দ্রসদৃশপ্রভম্
ধনংজয়মপশ্যাম চতুর্দন্তমিব দ্বিপম্
3.24
বিক্ষোভয়ন্তং সেনাং তে ত্রাসয়ন্তং চ পার্থিবান্
ধনংজয়মপশ্যাম নলিনীমিব কুঞ্জরম্
3.25
ত্রাসয়ন্তং তথা যোধান্ধনুর্ঘোষেণ পাণ্ডবম্
ভূয় এনমপশ্যাম সিংহং মৃগগণা ইব
3.26
সর্বলোকমহেষ্বাসৌ বৃষভৌ সর্বধন্বিনাম্
আমুক্তকবচৌ কৃষ্ণৌ লোকমধ্যে বিরেজতুঃ
3.27
অদ্য সপ্তদশাহানি বর্তমানস্য ভারত
সংগ্রামস্যাতিঘোরস্য বধ্যতাং চাভিতো যুধি
3.28
বায়ুনেব বিধূতানি তবানীকানি সর্বশঃ
শরদম্ভোদজালানি ব্যশীর্যন্ত সমন্ততঃ
3.29
তাং নাবমিব পর্যস্তাং ভ্রান্তবাতাং মহার্ণবে
তব সেনাং মহারাজ সব্যসাচী ব্যকম্পয়ৎ
3.30
ক্ব নু তে সূতপুত্রোঽভূত্ক্ব নু দ্রোণঃ সহানুগঃ
অহং ক্ব চ ক্ব চাত্মা তে হার্দিক্যশ্চ তথা ক্ব নু
দুঃশাসনশ্চ ভ্রাতা তে ভ্রাতৃভিঃ সহিতঃ ক্ব নু
3.31
বাণগোচরসংপ্রাপ্তং প্রেক্ষ্য চৈব জয়দ্রথম্
সংবন্ধিনস্তে ভ্রাতৄংশ্চ সহায়ান্মাতুলাংস্তথা
3.32
সর্বান্বিক্রম্য মিষতো লোকাংশ্চাক্রম্য মূর্ধনি
জয়দ্রথো হতো রাজন্কিং নু শেষমুপাস্মহে
3.33
কো বেহ স পুমানস্তি যো বিজেষ্যতি পাণ্ডবম্
তস্য চাস্ত্রাণি দিব্যানি বিবিধানি মহাত্মনঃ
গাণ্ডীবস্য চ নির্ঘোষো বীর্যাণি হরতে হি নঃ
3.34
নষ্টচন্দ্রা যথা রাত্রিঃ সেনেয়ং হতনায়কা
নাগভগ্নদ্রুমা শুষ্কা নদীবাকুলতাং গতা
3.35
ধ্বজিন্যাং হতনেত্রায়াং যথেষ্টং শ্বেতবাহনঃ
চরিষ্যতি মহাবাহুঃ কক্ষেঽগ্নিরিব সংজ্বলন্
3.36
সাত্যকেশ্চৈব যো বেগো ভীমসেনস্য চোভয়োঃ
দারয়েত গিরীন্সর্বাঞ্শোষয়েত চ সাগরান্
3.37
উবাচ বাক্যং যদ্ভীমঃ সভামধ্যে বিশাং পতে
কৃতং তত্সকলং তেন ভূয়শ্চৈব করিষ্যতি
3.38
প্রমুখস্থে তদা কর্ণে বলং পাণ্ডবরক্ষিতম্
দুরাসদং তথা গুপ্তং গূঢং গাণ্ডীবধন্বনা
3.39
যুষ্মাভিস্তানি চীর্ণানি যান্যসাধূনি সাধুষু
অকারণকৃতান্যেব তেষাং বঃ ফলমাগতম্
3.40
আত্মনোঽর্থে ত্বয়া লোকো যত্নতঃ সর্ব আহৃতঃ
স তে সংশয়িতস্তাত আত্মা চ ভরতর্ষভ
3.41
রক্ষ দুর্যোধনাত্মানমাত্মা সর্বস্য ভাজনম্
ভিন্নে হি ভাজনে তাত দিশো গচ্ছতি তদ্গতম্
3.42
হীয়মানেন বৈ সংধিঃ পর্যেষ্টব্যঃ সমেন চ
বিগ্রহো বর্ধমানেন নীতিরেষা বৃহস্পতেঃ
3.43
তে বয়ং পাণ্ডুপুত্রেভ্যো হীনাঃ স্ববলশক্তিতঃ
অত্র তে পাণ্ডবৈঃ সার্ধং সংধিং মন্যে ক্ষমং প্রভো
3.44
ন জানীতে হি যঃ শ্রেয়ঃ শ্রেয়সশ্চাবমন্যতে
স ক্ষিপ্রং ভ্রশ্যতে রাজ্যান্ন চ শ্রেয়োঽনুবিন্দতি
3.45
প্রণিপত্য হি রাজানং রাজ্যং যদি লভেমহি
শ্রেয়ঃ স্যান্ন তু মৌঢ্যেন রাজন্গন্তুং পরাভবম্
3.46
বৈচিত্রবীর্যবচনাত্কৃপাশীলো যুধিষ্ঠিরঃ
বিনিয়ুঞ্জীত রাজ্যে ত্বাং গোবিন্দবচনেন চ
3.47
যদ্ব্রূয়াদ্ধি হৃষীকেশো রাজানমপরাজিতম্
অর্জুনং ভীমসেনং চ সর্বং কুর্যুরসংশয়ম্
3.48
নাতিক্রমিষ্যতে কৃষ্ণো বচনং কৌরবস্য হ
ধৃতরাষ্ট্রস্য মন্যেঽহং নাপি কৃষ্ণস্য পাণ্ডবঃ
3.49
এতত্ক্ষমমহং মন্যে তব পার্থৈরবিগ্রহম্
ন ত্বা ব্রবীমি কার্পণ্যান্ন প্রাণপরিরক্ষণাৎ
পথ্যং রাজন্ব্রবীমি ত্বাং তত্পরাসুঃ স্মরিষ্যসি
3.50
ইতি বৃদ্ধো বিলপ্যৈতত্কৃপঃ শারদ্বতো বচঃ
দীর্ঘমুষ্ণং চ নিঃশ্বস্য শুশোচ চ মুমোহ চ