Utshovঅধ্যায় 2
2.1
বৈশংপায়ন উবাচ
বিসৃষ্টাস্বথ নারীষু ধৃতরাষ্ট্রোঽম্বিকাসুতঃ
বিললাপ মহারাজ দুঃখাদ্দুঃখতরং গতঃ
2.2
সধূমমিব নিঃশ্বস্য করৌ ধুন্বন্পুনঃ পুনঃ
বিচিন্ত্য চ মহারাজ ততো বচনমব্রবীৎ
2.3
অহো বত মহদ্দুঃখং যদহং পাণ্ডবান্রণে
ক্ষেমিণশ্চাব্যয়াংশ্চৈব ত্বত্তঃ সূত শৃণোমি বৈ
2.4
বজ্রসারময়ং নূনং হৃদয়ং সুদৃঢং মম
যচ্ছ্রুত্বা নিহতান্পুত্রান্দীর্যতে ন সহস্রধা
2.5
চিন্তয়িত্বা বচস্তেষাং বালক্রীডাং চ সংজয়
অদ্য শ্রুত্বা হতান্পুত্রান্ভৃশং মে দীর্যতে মনঃ
2.6
অন্ধত্বাদ্যদি তেষাং তু ন মে রূপনিদর্শনম্
পুত্রস্নেহকৃতা প্রীতির্নিত্যমেতেষু ধারিতা
2.7
বালভাবমতিক্রান্তান্যৌবনস্থাংশ্চ তানহম্
মধ্যপ্রাপ্তাংস্তথা শ্রুত্বা হৃষ্ট আসং তথানঘ
2.8
তানদ্য নিহতাঞ্শ্রুত্বা হৃতৈশ্বর্যান্হৃতৌজসঃ
ন লভে বৈ ক্বচিচ্ছান্তিং পুত্রাধিভিরভিপ্লুতঃ
2.9
এহ্যেহি পুত্র রাজেন্দ্র মমানাথস্য সাংপ্রতম্
ত্বয়া হীনো মহাবাহো কাং নু যাস্যাম্যহং গতিম্
2.10
গতির্ভূত্বা মহারাজ জ্ঞাতীনাং সুহৃদাং তথা
অন্ধং বৃদ্ধং চ মাং বীর বিহায় ক্ব নু গচ্ছসি
2.11
সা কৃপা সা চ তে প্রীতিঃ সা চ রাজন্সুমানিতা
কথং বিনিহতঃ পার্থৈঃ সংয়ুগেষ্বপরাজিতঃ
2.12
কথং ত্বং পৃথিবীপালান্ভুক্ত্বা তাত সমাগতান্
শেষে বিনিহতো ভূমৌ প্রাকৃতঃ কুনৃপো যথা
2.13
কো নু মামুত্থিতং কাল্যে তাত তাতেতি বক্ষ্যতি
মহারাজেতি সততং লোকনাথেতি চাসকৃৎ
2.14
পরিষ্বজ্য চ মাং কণ্ঠে স্নেহেনাক্লিন্নলোচনঃ
অনুশাধীতি কৌরব্য তত্সাধু বদ মে বচঃ
2.15
ননু নামাহমশ্রৌষং বচনং তব পুত্রক
ভূয়সী মম পৃথ্বীয়ং যথা পার্থস্য নো তথা
2.16
ভগদত্তঃ কৃপঃ শল্য আবন্ত্যোঽথ জয়দ্রথঃ
ভূরিশ্রবাঃ সোমদত্তো মহারাজোঽথ বাহ্লিকঃ
2.17
অশ্বত্থামা চ ভোজশ্চ মাগধশ্চ মহাবলঃ
বৃহদ্বলশ্চ কাশীশঃ শকুনিশ্চাপি সৌবলঃ
2.18
ম্লেচ্ছাশ্চ বহুসাহস্রাঃ শকাশ্চ যবনৈঃ সহ
সুদক্ষিণশ্চ কাম্বোজস্ত্রিগর্তাধিপতিস্তথা
2.19
ভীষ্মঃ পিতামহশ্চৈব ভারদ্বাজোঽথ গৌতমঃ
শ্রুতায়ুশ্চাচ্যুতায়ুশ্চ শতায়ুশ্চাপি বীর্যবান্
2.20
জলসংধোঽথার্শ্যশৃঙ্গী রাক্ষসশ্চাপ্যলায়ুধঃ
অলংবুসো মহাবাহুঃ সুবাহুশ্চ মহারথঃ
2.21
এতে চান্যে চ বহবো রাজানো রাজসত্তম
মদর্থমুদ্যতাঃ সর্বে প্রাণাংস্ত্যক্ত্বা রণে প্রভো
2.22
যেষাং মধ্যে স্থিতো যুদ্ধে ভ্রাতৃভিঃ পরিবারিতঃ
যোধয়িষ্যাম্যহং পার্থান্পাঞ্চালাংশ্চৈব সর্বশঃ
2.23
চেদীংশ্চ নৃপশার্দূল দ্রৌপদেয়াংশ্চ সংয়ুগে
সাত্যকিং কুন্তিভোজং চ রাক্ষসং চ ঘটোত্কচম্
2.24
একোঽপ্যেষাং মহারাজ সমর্থঃ সংনিবারণে
সমরে পাণ্ডবেয়ানাং সংক্রুদ্ধো হ্যভিধাবতাম্
কিং পুনঃ সহিতা বীরাঃ কৃতবৈরাশ্চ পাণ্ডবৈঃ
2.25
অথ বা সর্ব এবৈতে পাণ্ডবস্যানুয়ায়িভিঃ
যোত্স্যন্তি সহ রাজেন্দ্র হনিষ্যন্তি চ তান্মৃধে
2.26
কর্ণস্ত্বেকো ময়া সার্ধং নিহনিষ্যতি পাণ্ডবান্
ততো নৃপতয়ো বীরাঃ স্থাস্যন্তি মম শাসনে
2.27
যশ্চ তেষাং প্রণেতা বৈ বাসুদেবো মহাবলঃ
ন স সংনহ্যতে রাজন্নিতি মামব্রবীদ্বচঃ
2.28
তস্যাহং বদতঃ সূত বহুশো মম সংনিধৌ
যুক্তিতো হ্যনুপশ্যামি নিহতান্পাণ্ডবান্মৃধে
2.29
তেষাং মধ্যে স্থিতা যত্র হন্যন্তে মম পুত্রকাঃ
ব্যায়চ্ছমানাঃ সমরে কিমন্যদ্ভাগধেয়তঃ
2.30
ভীষ্মশ্চ নিহতো যত্র লোকনাথঃ প্রতাপবান্
শিখণ্ডিনং সমাসাদ্য মৃগেন্দ্র ইব জম্বুকম্
2.31
দ্রোণশ্চ ব্রাহ্মণো যত্র সর্বশস্ত্রাস্ত্রপারগঃ
নিহতঃ পাণ্ডবৈঃ সংখ্যে কিমন্যদ্ভাগধেয়তঃ
2.32
ভূরিশ্রবা হতো যত্র সোমদত্তশ্চ সংয়ুগে
বাহ্লীকশ্চ মহারাজ কিমন্যদ্ভাগধেয়তঃ
2.33
সুদক্ষিণো হতো যত্র জলসংধশ্চ কৌরবঃ
শ্রুতায়ুশ্চাচ্যুতায়ুশ্চ কিমন্যদ্ভাগধেয়তঃ
2.34
বৃহদ্বলো হতো যত্র মাগধশ্চ মহাবলঃ
আবন্ত্যো নিহতো যত্র ত্রিগর্তশ্চ জনাধিপঃ
সংশপ্তকাশ্চ বহবঃ কিমন্যদ্ভাগধেয়তঃ
2.35
অলংবুসস্তথা রাজন্রাক্ষসশ্চাপ্যলায়ুধঃ
আর্শ্যশৃঙ্গশ্চ নিহতঃ কিমন্যদ্ভাগধেয়তঃ
2.36
নারায়ণা হতা যত্র গোপালা যুদ্ধদুর্মদাঃ
ম্লেচ্ছাশ্চ বহুসাহস্রাঃ কিমন্যদ্ভাগধেয়তঃ
2.37
শকুনিঃ সৌবলো যত্র কৈতব্যশ্চ মহাবলঃ
নিহতঃ সবলো বীরঃ কিমন্যদ্ভাগধেয়তঃ
2.38
রাজানো রাজপুত্রাশ্চ শূরাঃ পরিঘবাহবঃ
নিহতা বহবো যত্র কিমন্যদ্ভাগধেয়তঃ
2.39
নানাদেশসমাবৃত্তাঃ ক্ষত্রিয়া যত্র সংজয়
নিহতাঃ সমরে সর্বে কিমন্যদ্ভাগধেয়তঃ
2.40
পুত্রাশ্চ মে বিনিহতাঃ পৌত্রাশ্চৈব মহাবলাঃ
বয়স্যা ভ্রাতরশ্চৈব কিমন্যদ্ভাগধেয়তঃ
2.41
ভাগধেয়সমায়ুক্তো ধ্রুবমুত্পদ্যতে নরঃ
যশ্চ ভাগ্যসমায়ুক্তঃ স শুভং প্রাপ্নুয়ান্নরঃ
2.42
অহং বিয়ুক্তঃ স্বৈর্ভাগ্যৈঃ পুত্রৈশ্চৈবেহ সংজয়
কথমদ্য ভবিষ্যামি বৃদ্ধঃ শত্রুবশং গতঃ
2.43
নান্যদত্র পরং মন্যে বনবাসাদৃতে প্রভো
সোঽহং বনং গমিষ্যামি নির্বন্ধুর্জ্ঞাতিসংক্ষয়ে
2.44
ন হি মেঽন্যদ্ভবেচ্ছ্রেয়ো বনাভ্যুপগমাদৃতে
ইমামবস্থাং প্রাপ্তস্য লূনপক্ষস্য সংজয়
2.45
দুর্যোধনো হতো যত্র শল্যশ্চ নিহতো যুধি
দুঃশাসনো বিশস্তশ্চ বিকর্ণশ্চ মহাবলঃ
2.46
কথং হি ভীমসেনস্য শ্রোষ্যেঽহং শব্দমুত্তমম্
একেন সমরে যেন হতং পুত্রশতং মম
2.47
অসকৃদ্বদতস্তস্য দুর্যোধনবধেন চ
দুঃখশোকাভিসংতপ্তো ন শ্রোষ্যে পরুষা গিরঃ
2.48
এবং স শোকসংতপ্তঃ পার্থিবো হতবান্ধবঃ
মুহুর্মুহুর্মুহ্যমানঃ পুত্রাধিভিরভিপ্লুতঃ
2.49
বিলপ্য সুচিরং কালং ধৃতরাষ্ট্রোঽম্বিকাসুতঃ
দীর্ঘমুষ্ণং চ নিঃশ্বস্য চিন্তয়িত্বা পরাভবম্
2.50
দুঃখেন মহতা রাজা সংতপ্তো ভরতর্ষভ
পুনর্গাবল্গণিং সূতং পর্যপৃচ্ছদ্যথাতথম্
2.51
ভীষ্মদ্রোণৌ হতৌ শ্রুত্বা সূতপুত্রং চ পাতিতম্
সেনাপতিং প্রণেতারং কিমকুর্বত মামকাঃ
2.52
যং যং সেনাপ্রণেতারং যুধি কুর্বন্তি মামকাঃ
অচিরেণৈব কালেন তং তং নিঘ্নন্তি পাণ্ডবাঃ
2.53
রণমূর্ধ্নি হতো ভীষ্মঃ পশ্যতাং বঃ কিরীটিনা
এবমেব হতো দ্রোণঃ সর্বেষামেব পশ্যতাম্
2.54
এবমেব হতঃ কর্ণঃ সূতপুত্রঃ প্রতাপবান্
স রাজকানাং সর্বেষাং পশ্যতাং বঃ কিরীটিনা
2.55
পূর্বমেবাহমুক্তো বৈ বিদুরেণ মহাত্মনা
দুর্যোধনাপরাধেন প্রজেয়ং বিনশিষ্যতি
2.56
কেচিন্ন সম্যক্পশ্যন্তি মূঢাঃ সম্যক্তথাপরে
তদিদং মম মূঢস্য তথাভূতং বচঃ স্ম হ
2.57
যদব্রবীন্মে ধর্মাত্মা বিদুরো দীর্ঘদর্শিবান্
তত্তথা সমনুপ্রাপ্তং বচনং সত্যবাদিনঃ
2.58
দৈবোপহতচিত্তেন যন্ময়াপকৃতং পুরা
অনয়স্য ফলং তস্য ব্রূহি গাবল্গণে পুনঃ
2.59
কো বা মুখমনীকানামাসীত্কর্ণে নিপাতিতে
অর্জুনং বাসুদেবং চ কো বা প্রত্যুদ্যয়ৌ রথী
2.60
কেঽরক্ষন্দক্ষিণং চক্রং মদ্ররাজস্য সংয়ুগে
বামং চ যোদ্ধুকামস্য কে বা বীরস্য পৃষ্ঠতঃ
2.61
কথং চ বঃ সমেতানাং মদ্ররাজো মহাবলঃ
নিহতঃ পাণ্ডবৈঃ সংখ্যে পুত্রো বা মম সংজয়
2.62
ব্রূহি সর্বং যথাতত্ত্বং ভরতানাং মহাক্ষয়ম্
যথা চ নিহতঃ সংখ্যে পুত্রো দুর্যোধনো মম
2.63
পাঞ্চালাশ্চ যথা সর্বে নিহতাঃ সপদানুগাঃ
ধৃষ্টদ্যুম্নঃ শিখণ্ডী চ দ্রৌপদ্যাঃ পঞ্চ চাত্মজাঃ
2.64
পাণ্ডবাশ্চ যথা মুক্তাস্তথোভৌ সাত্বতৌ যুধি
কৃপশ্চ কৃতবর্মা চ ভারদ্বাজস্য চাত্মজঃ
2.65
যদ্যথা যাদৃশং চৈব যুদ্ধং বৃত্তং চ সাংপ্রতম্
অখিলং শ্রোতুমিচ্ছামি কুশলো হ্যসি সংজয়