Utshovঅধ্যায় 1
1.1
জনমেজয় উবাচ
এবং নিপাতিতে কর্ণে সমরে সব্যসাচিনা
অল্পাবশিষ্টাঃ কুরবঃ কিমকুর্বত বৈ দ্বিজ
1.2
উদীর্যমাণং চ বলং দৃষ্ট্বা রাজা সুয়োধনঃ
পাণ্ডবৈঃ প্রাপ্তকালং চ কিং প্রাপদ্যত কৌরবঃ
1.3
এতদিচ্ছাম্যহং শ্রোতুং তদাচক্ষ্ব দ্বিজোত্তম
ন হি তৃপ্যামি পূর্বেষাং শৃণ্বানশ্চরিতং মহৎ
1.4
বৈশংপায়ন উবাচ
ততঃ কর্ণে হতে রাজন্ধার্তরাষ্ট্রঃ সুয়োধনঃ
ভৃশং শোকার্ণবে মগ্নো নিরাশঃ সর্বতোঽভবৎ
1.5
হা কর্ণ হা কর্ণ ইতি শোচমানঃ পুনঃ পুনঃ
কৃচ্ছ্রাত্স্বশিবিরং প্রায়াদ্ধতশেষৈর্নৃপৈঃ সহ
1.6
স সমাশ্বাস্যমানোঽপি হেতুভিঃ শাস্ত্রনিশ্চিতৈঃ
রাজভির্নালভচ্ছর্ম সূতপুত্রবধং স্মরন্
1.7
স দৈবং বলবন্মত্বা ভবিতব্যং চ পার্থিবঃ
সংগ্রামে নিশ্চয়ং কৃত্বা পুনর্যুদ্ধায় নির্যয়ৌ
1.8
শল্যং সেনাপতিং কৃত্বা বিধিবদ্রাজপুংগবঃ
রণায় নির্যয়ৌ রাজা হতশেষৈর্নৃপৈঃ সহ
1.9
ততঃ সুতুমুলং যুদ্ধং কুরুপাণ্ডবসেনয়োঃ
বভূব ভরতশ্রেষ্ঠ দেবাসুররণোপমম্
1.10
ততঃ শল্যো মহারাজ কৃত্বা কদনমাহবে
পাণ্ডুসৈন্যস্য মধ্যাহ্নে ধর্মরাজেন পাতিতঃ
1.11
ততো দুর্যোধনো রাজা হতবন্ধূ রণাজিরাৎ
অপসৃত্য হ্রদং ঘোরং বিবেশ রিপুজাদ্ভয়াৎ
1.12
অথাপরাহ্ণে তস্যাহ্নঃ পরিবার্য মহারথৈঃ
হ্রদাদাহূয় যোগেন ভীমসেনেন পাতিতঃ
1.13
তস্মিন্হতে মহেষ্বাসে হতশিষ্টাস্ত্রয়ো রথাঃ
সংরভান্নিশি রাজেন্দ্র জঘ্নুঃ পাঞ্চালসৈনিকান্
1.14
ততঃ পূর্বাহ্ণসময়ে শিবিরাদেত্য সংজয়ঃ
প্রবিবেশ পুরীং দীনো দুঃখশোকসমন্বিতঃ
1.15
প্রবিশ্য চ পুরং তূর্ণং ভুজাবুচ্ছ্রিত্য দুঃখিতঃ
বেপমানস্ততো রাজ্ঞঃ প্রবিবেশ নিবেশনম্
1.16
রুরোদ চ নরব্যাঘ্র হা রাজন্নিতি দুঃখিতঃ
অহো বত বিবিগ্নাঃ স্ম নিধনেন মহাত্মনঃ
1.17
অহো সুবলবান্কালো গতিশ্চ পরমা তথা
শক্রতুল্যবলাঃ সর্বে যত্রাবধ্যন্ত পার্থিবাঃ
1.18
দৃষ্ট্বৈব চ পুরো রাজঞ্জনঃ সর্বঃ স সংজয়ম্
প্ররুরোদ ভৃশোদ্বিগ্নো হা রাজন্নিতি সস্বরম্
1.19
আকুমারং নরব্যাঘ্র তত্পুরং বৈ সমন্ততঃ
আর্তনাদং মহচ্চক্রে শ্রুত্বা বিনিহতং নৃপম্
1.20
ধাবতশ্চাপ্যপশ্যচ্চ তত্র ত্রীন্পুরুষর্ষভান্
নষ্টচিত্তানিবোন্মত্তাঞ্শোকেন ভৃশপীডিতান্
1.21
তথা স বিহ্বলঃ সূতঃ প্রবিশ্য নৃপতিক্ষয়ম্
দদর্শ নৃপতিশ্রেষ্ঠং প্রজ্ঞাচক্ষুষমীশ্বরম্
1.22
দৃষ্ট্বা চাসীনমনঘং সমন্তাত্পরিবারিতম্
স্নুষাভির্ভরতশ্রেষ্ঠ গান্ধার্যা বিদুরেণ চ
1.23
তথান্যৈশ্চ সুহৃদ্ভিশ্চ জ্ঞাতিভিশ্চ হিতৈষিভিঃ
তমেব চার্থং ধ্যায়ন্তং কর্ণস্য নিধনং প্রতি
1.24
রুদন্নেবাব্রবীদ্বাক্যং রাজানং জনমেজয়
নাতিহৃষ্টমনাঃ সূতো বাষ্পসংদিগ্ধয়া গিরা
1.25
সংজয়োঽহং নরব্যাঘ্র নমস্তে ভরতর্ষভ
মদ্রাধিপো হতঃ শল্যঃ শকুনিঃ সৌবলস্তথা
উলূকঃ পুরুষব্যাঘ্র কৈতব্যো দৃঢবিক্রমঃ
1.26
সংশপ্তকা হতাঃ সর্বে কাম্বোজাশ্চ শকৈঃ সহ
ম্লেচ্ছাশ্চ পার্বতীয়াশ্চ যবনাশ্চ নিপাতিতাঃ
1.27
প্রাচ্যা হতা মহারাজ দাক্ষিণাত্যাশ্চ সর্বশঃ
উদীচ্যা নিহতাঃ সর্বে প্রতীচ্যাশ্চ নরাধিপ
রাজানো রাজপুত্রাশ্চ সর্বতো নিহতা নৃপ
1.28
দুর্যোধনো হতো রাজন্যথোক্তং পাণ্ডবেন চ
ভগ্নসক্থো মহারাজ শেতে পাংসুষু রূষিতঃ
1.29
ধৃষ্টদ্যুম্নো হতো রাজঞ্শিখণ্ডী চাপরাজিতঃ
উত্তমৌজা যুধামন্যুস্তথা রাজন্প্রভদ্রকাঃ
1.30
পাঞ্চালাশ্চ নরব্যাঘ্রাশ্চেদয়শ্চ নিষূদিতাঃ
তব পুত্রা হতাঃ সর্বে দ্রৌপদেয়াশ্চ ভারত
কর্ণপুত্রো হতঃ শূরো বৃষসেনো মহাবলঃ
1.31
নরা বিনিহতাঃ সর্বে গজাশ্চ বিনিপাতিতাঃ
রথিনশ্চ নরব্যাঘ্র হয়াশ্চ নিহতা যুধি
1.32
কিংচিচ্ছেষং চ শিবিরং তাবকানাং কৃতং বিভো
পাণ্ডবানাং চ শূরাণাং সমাসাদ্য পরস্পরম্
1.33
প্রায়ঃ স্ত্রীশেষমভবজ্জগত্কালেন মোহিতম্
সপ্ত পাণ্ডবতঃ শেষা ধার্তরাষ্ট্রাস্তথা ত্রয়ঃ
1.34
তে চৈব ভ্রাতরঃ পঞ্চ বাসুদেবোঽথ সাত্যকিঃ
কৃপশ্চ কৃতবর্মা চ দ্রৌণিশ্চ জয়তাং বরঃ
1.35
তবাপ্যেতে মহারাজ রথিনো নৃপসত্তম
অক্ষৌহিণীনাং সর্বাসাং সমেতানাং জনেশ্বর
এতে শেষা মহারাজ সর্বেঽন্যে নিধনং গতাঃ
1.36
কালেন নিহতং সর্বং জগদ্বৈ ভরতর্ষভ
দুর্যোধনং বৈ পুরতঃ কৃত্বা বৈরস্য ভারত
1.37
এতচ্ছ্রুত্বা বচঃ ক্রূরং ধৃতরাষ্ট্রো জনেশ্বরঃ
নিপপাত মহারাজ গতসত্ত্বো মহীতলে
1.38
তস্মিন্নিপতিতে ভূমৌ বিদুরোঽপি মহায়শাঃ
নিপপাত মহারাজ রাজব্যসনকর্শিতঃ
1.39
গান্ধারী চ নৃপশ্রেষ্ঠ সর্বাশ্চ কুরুয়োষিতঃ
পতিতাঃ সহসা ভূমৌ শ্রুত্বা ক্রূরং বচশ্চ তাঃ
1.40
নিঃসংজ্ঞং পতিতং ভূমৌ তদাসীদ্রাজমণ্ডলম্
প্রলাপয়ুক্তা মহতী কথা ন্যস্তা পটে যথা
1.41
কৃচ্ছ্রেণ তু ততো রাজা ধৃতরাষ্ট্রো মহীপতিঃ
শনৈরলভত প্রাণান্পুত্রব্যসনকর্শিতঃ
1.42
লব্ধ্বা তু স নৃপঃ সংজ্ঞাং বেপমানঃ সুদুঃখিতঃ
উদীক্ষ্য চ দিশঃ সর্বাঃ ক্ষত্তারং বাক্যমব্রবীৎ
1.43
বিদ্বন্ক্ষত্তর্মহাপ্রাজ্ঞ ত্বং গতির্ভরতর্ষভ
মমানাথস্য সুভৃশং পুত্রৈর্হীনস্য সর্বশঃ
এবমুক্ত্বা ততো ভূয়ো বিসংজ্ঞো নিপপাত হ
1.44
তং তথা পতিতং দৃষ্ট্বা বান্ধবা যেঽস্য কেচন
শীতৈস্তু সিষিচুস্তোয়ৈর্বিব্যজুর্ব্যজনৈরপি
1.45
স তু দীর্ঘেণ কালেন প্রত্যাশ্বস্তো মহীপতিঃ
তূষ্ণীং দধ্যৌ মহীপালঃ পুত্রব্যসনকর্শিতঃ
নিঃশ্বসঞ্জিহ্মগ ইব কুম্ভক্ষিপ্তো বিশাং পতে
1.46
সংজয়োঽপ্যরুদত্তত্র দৃষ্ট্বা রাজানমাতুরম্
তথা সর্বাঃ স্ত্রিয়শ্চৈব গান্ধারী চ যশস্বিনী
1.47
ততো দীর্ঘেণ কালেন বিদুরং বাক্যমব্রবীৎ
ধৃতরাষ্ট্রো নরব্যাঘ্রো মুহ্যমানো মুহুর্মুহুঃ
1.48
গচ্ছন্তু যোষিতঃ সর্বা গান্ধারী চ যশস্বিনী
তথেমে সুহৃদঃ সর্বে ভ্রশ্যতে মে মনো ভৃশম্
1.49
এবমুক্তস্ততঃ ক্ষত্তা তাঃ স্ত্রিয়ো ভরতর্ষভ
বিসর্জয়ামাস শনৈর্বেপমানঃ পুনঃ পুনঃ
1.50
নিশ্চক্রমুস্ততঃ সর্বাস্তাঃ স্ত্রিয়ো ভরতর্ষভ
সুহৃদশ্চ ততঃ সর্বে দৃষ্ট্বা রাজানমাতুরম্
1.51
ততো নরপতিং তত্র লব্ধসংজ্ঞং পরংতপ
অবেক্ষ্য সংজয়ো দীনো রোদমানং ভৃশাতুরম্
1.52
প্রাঞ্জলির্নিঃশ্বসন্তং চ তং নরেন্দ্রং মুহুর্মুহুঃ
সমাশ্বাসয়ত ক্ষত্তা বচসা মধুরেণ চ