Utshovঅধ্যায় 8
8.1
সংজয় উবাচ
ততঃ প্রববৃতে যুদ্ধং কুরূণাং ভয়বর্ধনম্
সৃঞ্জয়ৈঃ সহ রাজেন্দ্র ঘোরং দেবাসুরোপমম্
8.2
নরা রথা গজৌঘাশ্চ সাদিনশ্চ সহস্রশঃ
বাজিনশ্চ পরাক্রান্তাঃ সমাজগ্মুঃ পরস্পরম্
8.3
নাগানাং ভীমরূপাণাং দ্রবতাং নিস্বনো মহান্
অশ্রূয়ত যথা কালে জলদানাং নভস্তলে
8.4
নাগৈরভ্যাহতাঃ কেচিত্সরথা রথিনোঽপতন্
ব্যদ্রবন্ত রণে বীরা দ্রাব্যমাণা মদোত্কটৈঃ
8.5
হয়ৌঘান্পাদরক্ষাংশ্চ রথিনস্তত্র শিক্ষিতাঃ
শরৈঃ সংপ্রেষয়ামাসুঃ পরলোকায় ভারত
8.6
সাদিনঃ শিক্ষিতা রাজন্পরিবার্য মহারথান্
বিচরন্তো রণেঽভ্যঘ্নন্প্রাসশক্ত্যৃষ্টিভিস্তথা
8.7
ধন্বিনঃ পুরুষাঃ কেচিত্সংনিবার্য মহারথান্
একং বহব আসাদ্য প্রেষয়েয়ুর্যমক্ষয়ম্
8.8
নাগং রথবরাংশ্চান্যে পরিবার্য মহারথাঃ
সোত্তরায়ুধিনং জঘ্নুর্দ্রবমাণা মহারবম্
8.9
তথা চ রথিনং ক্রুদ্ধং বিকিরন্তং শরান্বহূন্
নাগা জঘ্নুর্মহারাজ পরিবার্য সমন্ততঃ
8.10
নাগো নাগমভিদ্রুত্য রথী চ রথিনং রণে
শক্তিতোমরনারাচৈর্নিজঘ্নুস্তত্র তত্র হ
8.11
পাদাতানবমৃদ্নন্তো রথবারণবাজিনঃ
রণমধ্যে ব্যদৃশ্যন্ত কুর্বন্তো মহদাকুলম্
8.12
হয়াশ্চ পর্যধাবন্ত চামরৈরুপশোভিতাঃ
হংসা হিমবতঃ প্রস্থে পিবন্ত ইব মেদিনীম্
8.13
তেষাং তু বাজিনাং ভূমিঃ খুরৈশ্চিত্রা বিশাং পতে
অশোভত যথা নারী করজক্ষতবিক্ষতা
8.14
বাজিনাং খুরশব্দেন রথনেমিস্বনেন চ
পত্তীনাং চাপি শব্দেন নাগানাং বৃংহিতেন চ
8.15
বাদিত্রাণাং চ ঘোষেণ শঙ্খানাং নিস্বনেন চ
অভবন্নাদিতা ভূমির্নির্ঘাতৈরিব ভারত
8.16
ধনুষাং কূজমানানাং নিস্ত্রিংশানাং চ দীপ্যতাম্
কবচানাং প্রভাভিশ্চ ন প্রাজ্ঞায়ত কিংচন
8.17
বহবো বাহবশ্ছিন্না নাগরাজকরোপমাঃ
উদ্বেষ্টন্তে বিবেষ্টন্তে বেগং কুর্বন্তি দারুণম্
8.18
শিরসাং চ মহারাজ পততাং বসুধাতলে
চ্যুতানামিব তালেভ্যঃ ফলানাং শ্রূয়তে স্বনঃ
8.19
শিরোভিঃ পতিতৈর্ভাতি রুধিরার্দ্রৈর্বসুংধরা
তপনীয়নিভৈঃ কালে নলিনৈরিব ভারত
8.20
উদ্বৃত্তনয়নৈস্তৈস্তু গতসত্ত্বৈঃ সুবিক্ষতৈঃ
ব্যভ্রাজত মহারাজ পুণ্ডরীকৈরিবাবৃতা
8.21
বাহুভিশ্চন্দনাদিগ্ধৈঃ সকেয়ূরৈর্মহাধনৈঃ
পতিতৈর্ভাতি রাজেন্দ্র মহী শক্রধ্বজৈরিব
8.22
ঊরুভিশ্চ নরেন্দ্রাণাং বিনিকৃত্তৈর্মহাহবে
হস্তিহস্তোপমৈরন্যৈঃ সংবৃতং তদ্রণাঙ্গণম্
8.23
কবন্ধশতসংকীর্ণং ছত্রচামরশোভিতম্
সেনাবনং তচ্ছুশুভে বনং পুষ্পাচিতং যথা
8.24
তত্র যোধা মহারাজ বিচরন্তো হ্যভীতবৎ
দৃশ্যন্তে রুধিরাক্তাঙ্গাঃ পুষ্পিতা ইব কিংশুকাঃ
8.25
মাতঙ্গাশ্চাপ্যদৃশ্যন্ত শরতোমরপীডিতাঃ
পতন্তস্তত্র তত্রৈব ছিন্নাভ্রসদৃশা রণে
8.26
গজানীকং মহারাজ বধ্যমানং মহাত্মভিঃ
ব্যদীর্যত দিশঃ সর্বা বাতনুন্না ঘনা ইব
8.27
তে গজা ঘনসংকাশাঃ পেতুরুর্ব্যাং সমন্ততঃ
বজ্ররুগ্ণা ইব বভুঃ পর্বতা যুগসংক্ষয়ে
8.28
হয়ানাং সাদিভিঃ সার্ধং পতিতানাং মহীতলে
রাশয়ঃ সংপ্রদৃশ্যন্তে গিরিমাত্রাস্ততস্ততঃ
8.29
সংজজ্ঞে রণভূমৌ তু পরলোকবহা নদী
শোণিতোদা রথাবর্তা ধ্বজবৃক্ষাস্থিশর্করা
8.30
ভুজনক্রা ধনুঃস্রোতা হস্তিশৈলা হয়োপলা
মেদোমজ্জাকর্দমিনী ছত্রহংসা গদোডুপা
8.31
কবচোষ্ণীষসংছন্না পতাকারুচিরদ্রুমা
চক্রচক্রাবলীজুষ্টা ত্রিবেণূদণ্ডকাবৃতা
8.32
শূরাণাং হর্ষজননী ভীরূণাং ভয়বর্ধিনী
প্রাবর্তত নদী রৌদ্রা কুরুসৃঞ্জয়সংকুলা
8.33
তাং নদীং পিতৃলোকায় বহন্তীমতিভৈরবাম্
তেরুর্বাহননৌভিস্তে শূরাঃ পরিঘবাহবঃ
8.34
বর্তমানে তথা যুদ্ধে নির্মর্যাদে বিশাং পতে
চতুরঙ্গক্ষয়ে ঘোরে পূর্বং দেবাসুরোপমে
8.35
অক্রোশন্বান্ধবানন্যে তত্র তত্র পরংতপ
ক্রোশদ্ভির্বান্ধবৈশ্চান্যে ভয়ার্তা ন নিবর্তিরে
8.36
নির্মর্যাদে তথা যুদ্ধে বর্তমানে ভয়ানকে
অর্জুনো ভীমসেনশ্চ মোহয়াং চক্রতুঃ পরান্
8.37
সা বধ্যমানা মহতী সেনা তব জনাধিপ
অমুহ্যত্তত্র তত্রৈব যোষিন্মদবশাদিব
8.38
মোহয়িত্বা চ তাং সেনাং ভীমসেনধনংজয়ৌ
দধ্মতুর্বারিজৌ তত্র সিংহনাদং চ নেদতুঃ
8.39
শ্রুত্বৈব তু মহাশব্দং ধৃষ্টদ্যুম্নশিখণ্ডিনৌ
ধর্মরাজং পুরস্কৃত্য মদ্ররাজমভিদ্রুতৌ
8.40
তত্রাশ্চর্যমপশ্যাম ঘোররূপং বিশাং পতে
শল্যেন সংগতাঃ শূরা যদয়ুধ্যন্ত ভাগশঃ
8.41
মাদ্রীপুত্রৌ সরভসৌ কৃতাস্ত্রৌ যুদ্ধদুর্মদৌ
অভ্যয়াতাং ত্বরায়ুক্তৌ জিগীষন্তৌ বলং তব
8.42
ততো ন্যবর্তত বলং তাবকং ভরতর্ষভ
শরৈঃ প্রণুন্নং বহুধা পাণ্ডবৈর্জিতকাশিভিঃ
8.43
বধ্যমানা চমূঃ সা তু পুত্রাণাং প্রেক্ষতাং তব
ভেজে দিশো মহারাজ প্রণুন্না দৃঢধন্বিভিঃ
হাহাকারো মহাঞ্জজ্ঞে যোধানাং তব ভারত
8.44
তিষ্ঠ তিষ্ঠেতি বাগাসীদ্দ্রাবিতানাং মহাত্মনাম্
ক্ষত্রিয়াণাং তদান্যোন্যং সংয়ুগে জয়মিচ্ছতাম্
আদ্রবন্নেব ভগ্নাস্তে পাণ্ডবৈস্তব সৈনিকাঃ
8.45
ত্যক্ত্বা যুদ্ধে প্রিয়ান্পুত্রান্ভ্রাতৄনথ পিতামহান্
মাতুলান্ভাগিনেয়াংশ্চ তথা সংবন্ধিবান্ধবান্
8.46
হয়ান্দ্বিপাংস্ত্বরয়ন্তো যোধা জগ্মুঃ সমন্ততঃ
আত্মত্রাণকৃতোত্সাহাস্তাবকা ভরতর্ষভ