Utshovঅধ্যায় 63
63.1
ধৃতরাষ্ট্র উবাচ
অধিষ্ঠিতঃ পদা মূর্ধ্নি ভগ্নসক্থো মহীং গতঃ
শৌটীরমানী পুত্রো মে কান্যভাষত সংজয়
63.2
অত্যর্থং কোপনো রাজা জাতবৈরশ্চ পাণ্ডুষু
ব্যসনং পরমং প্রাপ্তঃ কিমাহ পরমাহবে
63.3
সংজয় উবাচ
শৃণু রাজন্প্রবক্ষ্যামি যথাবৃত্তং নরাধিপ
রাজ্ঞা যদুক্তং ভগ্নেন তস্মিন্ব্যসন আগতে
63.4
ভগ্নসক্থো নৃপো রাজন্পাংসুনা সোঽবগুণ্ঠিতঃ
যময়ন্মূর্ধজাংস্তত্র বীক্ষ্য চৈব দিশো দশ
63.5
কেশান্নিয়ম্য যত্নেন নিঃশ্বসন্নুরগো যথা
সংরম্ভাশ্রুপরীতাভ্যাং নেত্রাভ্যামভিবীক্ষ্য মাম্
63.6
বাহূ ধরণ্যাং নিষ্পিষ্য মুহুর্মত্ত ইব দ্বিপঃ
প্রকীর্ণান্মূর্ধজান্ধুন্বন্দন্তৈর্দন্তানুপস্পৃশন্
গর্হয়ন্পাণ্ডবং জ্যেষ্ঠং নিঃশ্বস্যেদমথাব্রবীৎ
63.7
ভীষ্মে শাংতনবে নাথে কর্ণে চাস্ত্রভৃতাং বরে
গৌতমে শকুনৌ চাপি দ্রোণে চাস্ত্রভৃতাং বরে
63.8
অশ্বত্থাম্নি তথা শল্যে শূরে চ কৃতবর্মণি
ইমামবস্থাং প্রাপ্তোঽস্মি কালো হি দুরতিক্রমঃ
63.9
একাদশচমূভর্তা সোঽহমেতাং দশাং গতঃ
কালং প্রাপ্য মহাবাহো ন কশ্চিদতিবর্ততে
63.10
আখ্যাতব্যং মদীয়ানাং যেঽস্মিঞ্জীবন্তি সংগরে
যথাহং ভীমসেনেন ব্যুত্ক্রম্য সময়ং হতঃ
63.11
বহূনি সুনৃশংসানি কৃতানি খলু পাণ্ডবৈঃ
ভূরিশ্রবসি কর্ণে চ ভীষ্মে দ্রোণে চ শ্রীমতি
63.12
ইদং চাকীর্তিজং কর্ম নৃশংসৈঃ পাণ্ডবৈঃ কৃতম্
যেন তে সত্সু নির্বেদং গমিষ্যন্তীতি মে মতিঃ
63.13
কা প্রীতিঃ সত্ত্বয়ুক্তস্য কৃত্বোপধিকৃতং জয়ম্
কো বা সময়ভেত্তারং বুধঃ সংমন্তুমর্হতি
63.14
অধর্মেণ জয়ং লব্ধ্বা কো নু হৃষ্যেত পণ্ডিতঃ
যথা সংহৃষ্যতে পাপঃ পাণ্ডুপুত্রো বৃকোদরঃ
63.15
কিং নু চিত্রমতস্ত্বদ্য ভগ্নসক্থস্য যন্মম
ক্রুদ্ধেন ভীমসেনেন পাদেন মৃদিতং শিরঃ
63.16
প্রতপন্তং শ্রিয়া জুষ্টং বর্তমানং চ বন্ধুষু
এবং কুর্যান্নরো যো হি স বৈ সংজয় পূজিতঃ
63.17
অভিজ্ঞৌ ক্ষত্রধর্মস্য মম মাতা পিতা চ মে
তৌ হি সংজয় দুঃখার্তৌ বিজ্ঞাপ্যৌ বচনান্মম
63.18
ইষ্টং ভৃত্যা ভৃতাঃ সম্যগ্ভূঃ প্রশাস্তা সসাগরা
মূর্ধ্নি স্থিতমমিত্রাণাং জীবতামেব সংজয়
63.19
দত্তা দায়া যথাশক্তি মিত্রাণাং চ প্রিয়ং কৃতম্
অমিত্রা বাধিতাঃ সর্বে কো নু স্বন্ততরো ময়া
63.20
যাতানি পররাষ্ট্রাণি নৃপা ভুক্তাশ্চ দাসবৎ
প্রিয়েভ্যঃ প্রকৃতং সাধু কো নু স্বন্ততরো ময়া
63.21
মানিতা বান্ধবাঃ সর্বে মান্যঃ সংপূজিতো জনঃ
ত্রিতয়ং সেবিতং সর্বং কো নু স্বন্ততরো ময়া
63.22
আজ্ঞপ্তং নৃপমুখ্যেষু মানঃ প্রাপ্তঃ সুদুর্লভঃ
আজানেয়ৈস্তথা যাতং কো নু স্বন্ততরো ময়া
63.23
অধীতং বিধিবদ্দত্তং প্রাপ্তমায়ুর্নিরাময়ম্
স্বধর্মেণ জিতা লোকাঃ কো নু স্বন্ততরো ময়া
63.24
দিষ্ট্যা নাহং জিতঃ সংখ্যে পরান্প্রেষ্যবদাশ্রিতঃ
দিষ্ট্যা মে বিপুলা লক্ষ্মীর্মৃতে ত্বন্যং গতা বিভো
63.25
যদিষ্টং ক্ষত্রবন্ধূনাং স্বধর্মমনুতিষ্ঠতাম্
নিধনং তন্ময়া প্রাপ্তং কো নু স্বন্ততরো ময়া
63.26
দিষ্ট্যা নাহং পরাবৃত্তো বৈরাত্প্রাকৃতবজ্জিতঃ
দিষ্ট্যা ন বিমতিং কাংচিদ্ভজিত্বা তু পরাজিতঃ
63.27
সুপ্তং বাথ প্রমত্তং বা যথা হন্যাদ্বিষেণ বা
এবং ব্যুত্ক্রান্তধর্মেণ ব্যুত্ক্রম্য সময়ং হতঃ
63.28
অশ্বত্থামা মহাভাগঃ কৃতবর্মা চ সাত্বতঃ
কৃপঃ শারদ্বতশ্চৈব বক্তব্যা বচনান্মম
63.29
অধর্মেণ প্রবৃত্তানাং পাণ্ডবানামনেকশঃ
বিশ্বাসং সময়ঘ্নানাং ন যূয়ং গন্তুমর্হথ
63.30
বাতিকাংশ্চাব্রবীদ্রাজা পুত্রস্তে সত্যবিক্রমঃ
অধর্মাদ্ভীমসেনেন নিহতোঽহং যথা রণে
63.31
সোঽহং দ্রোণং স্বর্গগতং শল্যকর্ণাবুভৌ তথা
বৃষসেনং মহাবীর্যং শকুনিং চাপি সৌবলম্
63.32
জলসংধং মহাবীর্যং ভগদত্তং চ পার্থিবম্
সৌমদত্তিং মহেষ্বাসং সৈন্ধবং চ জয়দ্রথম্
63.33
দুঃশাসনপুরোগাংশ্চ ভ্রাতৄনাত্মসমাংস্তথা
দৌঃশাসনিং চ বিক্রান্তং লক্ষ্মণং চাত্মজাবুভৌ
63.34
এতাংশ্চান্যাংশ্চ সুবহূন্মদীয়াংশ্চ সহস্রশঃ
পৃষ্ঠতোঽনুগমিষ্যামি সার্থহীন ইবাধ্বগঃ
63.35
কথং ভ্রাতৄন্হতাঞ্শ্রুত্বা ভর্তারং চ স্বসা মম
রোরূয়মাণা দুঃখার্তা দুঃশলা সা ভবিষ্যতি
63.36
স্নুষাভিঃ প্রস্নুষাভিশ্চ বৃদ্ধো রাজা পিতা মম
গান্ধারীসহিতঃ ক্রোশন্কাং গতিং প্রতিপত্স্যতে
63.37
নূনং লক্ষ্মণমাতাপি হতপুত্রা হতেশ্বরা
বিনাশং যাস্যতি ক্ষিপ্রং কল্যাণী পৃথুলোচনা
63.38
যদি জানাতি চার্বাকঃ পরিব্রাড্বাগ্বিশারদঃ
করিষ্যতি মহাভাগো ধ্রুবং সোঽপচিতিং মম
63.39
সমন্তপঞ্চকে পুণ্যে ত্রিষু লোকেষু বিশ্রুতে
অহং নিধনমাসাদ্য লোকান্প্রাপ্স্যামি শাশ্বতান্
63.40
ততো জনসহস্রাণি বাষ্পপূর্ণানি মারিষ
প্রলাপং নৃপতেঃ শ্রুত্বা বিদ্রবন্তি দিশো দশ
63.41
সসাগরবনা ঘোরা পৃথিবী সচরাচরা
চচালাথ সনির্হ্রাদা দিশশ্চৈবাবিলাভবন্
63.42
তে দ্রোণপুত্রমাসাদ্য যথাবৃত্তং ন্যবেদয়ন্
ব্যবহারং গদায়ুদ্ধে পার্থিবস্য চ ঘাতনম্
63.43
তদাখ্যায় ততঃ সর্বে দ্রোণপুত্রস্য ভারত
ধ্যাত্বা চ সুচিরং কালং জগ্মুরার্তা যথাগতম্