Utshovঅধ্যায় 62
62.1
জনমেজয় উবাচ
কিমর্থং রাজশার্দূলো ধর্মরাজো যুধিষ্ঠিরঃ
গান্ধার্যাঃ প্রেষয়ামাস বাসুদেবং পরংতপম্
62.2
যদা পূর্বং গতঃ কৃষ্ণঃ শমার্থং কৌরবান্প্রতি
ন চ তং লব্ধবান্কামং ততো যুদ্ধমভূদিদম্
62.3
নিহতেষু তু যোধেষু হতে দুর্যোধনে তথা
পৃথিব্যাং পাণ্ডবেয়স্য নিঃসপত্নে কৃতে যুধি
62.4
বিদ্রুতে শিবিরে শূন্যে প্রাপ্তে যশসি চোত্তমে
কিং নু তত্কারণং ব্রহ্মন্যেন কৃষ্ণো গতঃ পুনঃ
62.5
ন চৈতত্কারণং ব্রহ্মন্নল্পং বৈ প্রতিভাতি মে
যত্রাগমদমেয়াত্মা স্বয়মেব জনার্দনঃ
62.6
তত্ত্বতো বৈ সমাচক্ষ্ব সর্বমধ্বর্যুসত্তম
যচ্চাত্র কারণং ব্রহ্মন্কার্যস্যাস্য বিনিশ্চয়ে
62.7
বৈশংপায়ন উবাচ
ত্বদ্যুক্তোঽয়মনুপ্রশ্নো যন্মাং পৃচ্ছসি পার্থিব
তত্তেঽহং সংপ্রবক্ষ্যামি যথাবদ্ভরতর্ষভ
62.8
হতং দুর্যোধনং দৃষ্ট্বা ভীমসেনেন সংয়ুগে
ব্যুত্ক্রম্য সময়ং রাজন্ধার্তরাষ্ট্রং মহাবলম্
62.9
অন্যায়েন হতং দৃষ্ট্বা গদায়ুদ্ধেন ভারত
যুধিষ্ঠিরং মহারাজ মহদ্ভয়মথাবিশৎ
62.10
চিন্তয়ানো মহাভাগাং গান্ধারীং তপসান্বিতাম্
ঘোরেণ তপসা যুক্তাং ত্রৈলোক্যমপি সা দহেৎ
62.11
তস্য চিন্তয়মানস্য বুদ্ধিঃ সমভবত্তদা
গান্ধার্যাঃ ক্রোধদীপ্তায়াঃ পূর্বং প্রশমনং ভবেৎ
62.12
সা হি পুত্রবধং শ্রুত্বা কৃতমস্মাভিরীদৃশম্
মানসেনাগ্নিনা ক্রুদ্ধা ভস্মসান্নঃ করিষ্যতি
62.13
কথং দুঃখমিদং তীব্রং গান্ধারী প্রসহিষ্যতি
শ্রুত্বা বিনিহতং পুত্রং ছলেনাজিহ্ময়োধিনম্
62.14
এবং বিচিন্ত্য বহুধা ভয়শোকসমন্বিতঃ
বাসুদেবমিদং বাক্যং ধর্মরাজোঽভ্যভাষত
62.15
তব প্রসাদাদ্গোবিন্দ রাজ্যং নিহতকণ্টকম্
অপ্রাপ্যং মনসাপীহ প্রাপ্তমস্মাভিরচ্যুত
62.16
প্রত্যক্ষং মে মহাবাহো সংগ্রামে রোমহর্ষণে
বিমর্দঃ সুমহান্প্রাপ্তস্ত্বয়া যাদবনন্দন
62.17
ত্বয়া দেবাসুরে যুদ্ধে বধার্থমমরদ্বিষাম্
যথা সাহ্যং পুরা দত্তং হতাশ্চ বিবুধদ্বিষঃ
62.18
সাহ্যং তথা মহাবাহো দত্তমস্মাকমচ্যুত
সারথ্যেন চ বার্ষ্ণেয় ভবতা যদ্ধৃতা বয়ম্
62.19
যদি ন ত্বং ভবেন্নাথঃ ফল্গুনস্য মহারণে
কথং শক্যো রণে জেতুং ভবেদেষ বলার্ণবঃ
62.20
গদাপ্রহারা বিপুলাঃ পরিঘৈশ্চাপি তাডনম্
শক্তিভির্ভিণ্ডিপালৈশ্চ তোমরৈঃ সপরশ্বধৈঃ
62.21
বাচশ্চ পরুষাঃ প্রাপ্তাস্ত্বয়া হ্যস্মদ্ধিতৈষিণা
তাশ্চ তে সফলাঃ সর্বা হতে দুর্যোধনেঽচ্যুত
62.22
গান্ধার্যা হি মহাবাহো ক্রোধং বুধ্যস্ব মাধব
সা হি নিত্যং মহাভাগা তপসোগ্রেণ কর্শিতা
62.23
পুত্রপৌত্রবধং শ্রুত্বা ধ্রুবং নঃ সংপ্রধক্ষ্যতি
তস্যাঃ প্রসাদনং বীর প্রাপ্তকালং মতং মম
62.24
কশ্চ তাং ক্রোধদীপ্তাক্ষীং পুত্রব্যসনকর্শিতাম্
বীক্ষিতুং পুরুষঃ শক্তস্ত্বামৃতে পুরুষোত্তম
62.25
তত্র মে গমনং প্রাপ্তং রোচতে তব মাধব
গান্ধার্যাঃ ক্রোধদীপ্তায়াঃ প্রশমার্থমরিংদম
62.26
ত্বং হি কর্তা বিকর্তা চ লোকানাং প্রভবাপ্যয়ঃ
হেতুকারণসংয়ুক্তৈর্বাক্যৈঃ কালসমীরিতৈঃ
62.27
ক্ষিপ্রমেব মহাপ্রাজ্ঞ গান্ধারীং শময়িষ্যসি
পিতামহশ্চ ভগবান্কৃষ্ণস্তত্র ভবিষ্যতি
62.28
সর্বথা তে মহাবাহো গান্ধার্যাঃ ক্রোধনাশনম্
কর্তব্যং সাত্বতশ্রেষ্ঠ পাণ্ডবানাং হিতৈষিণা
62.29
ধর্মরাজস্য বচনং শ্রুত্বা যদুকুলোদ্বহঃ
আমন্ত্র্য দারুকং প্রাহ রথঃ সজ্জো বিধীয়তাম্
62.30
কেশবস্য বচঃ শ্রুত্বা ত্বরমাণোঽথ দারুকঃ
ন্যবেদয়দ্রথং সজ্জং কেশবায় মহাত্মনে
62.31
তং রথং যাদবশ্রেষ্ঠঃ সমারুহ্য পরংতপঃ
জগাম হাস্তিনপুরং ত্বরিতঃ কেশবো বিভুঃ
62.32
ততঃ প্রায়ান্মহারাজ মাধবো ভগবান্রথী
নাগসাহ্বয়মাসাদ্য প্রবিবেশ চ বীর্যবান্
62.33
প্রবিশ্য নগরং বীরো রথঘোষেণ নাদয়ন্
বিদিতো ধৃতরাষ্ট্রস্য সোঽবতীর্য রথোত্তমাৎ
62.34
অভ্যগচ্ছদদীনাত্মা ধৃতরাষ্ট্রনিবেশনম্
পূর্বং চাভিগতং তত্র সোঽপশ্যদৃষিসত্তমম্
62.35
পাদৌ প্রপীড্য কৃষ্ণস্য রাজ্ঞশ্চাপি জনার্দনঃ
অভ্যবাদয়দব্যগ্রো গান্ধারীং চাপি কেশবঃ
62.36
ততস্তু যাদবশ্রেষ্ঠো ধৃতরাষ্ট্রমধোক্ষজঃ
পাণিমালম্ব্য রাজ্ঞঃ স সস্বরং প্ররুরোদ হ
62.37
স মুহূর্তমিবোত্সৃজ্য বাষ্পং শোকসমুদ্ভবম্
প্রক্ষাল্য বারিণা নেত্রে আচম্য চ যথাবিধি
উবাচ প্রশ্রিতং বাক্যং ধৃতরাষ্ট্রমরিংদমঃ
62.38
ন তেঽস্ত্যবিদিতং কিংচিদ্ভূতভব্যস্য ভারত
কালস্য চ যথা বৃত্তং তত্তে সুবিদিতং প্রভো
62.39
যদিদং পাণ্ডবৈঃ সর্বৈস্তব চিত্তানুরোধিভিঃ
কথং কুলক্ষয়ো ন স্যাত্তথা ক্ষত্রস্য ভারত
62.40
ভ্রাতৃভিঃ সময়ং কৃত্বা ক্ষান্তবান্ধর্মবত্সলঃ
দ্যূতচ্ছলজিতৈঃ শক্তৈর্বনবাসোঽভ্যুপাগতঃ
62.41
অজ্ঞাতবাসচর্যা চ নানাবেশসমাবৃতৈঃ
অন্যে চ বহবঃ ক্লেশাস্ত্বশক্তৈরিব নিত্যদা
62.42
ময়া চ স্বয়মাগম্য যুদ্ধকাল উপস্থিতে
সর্বলোকস্য সাংনিধ্যে গ্রামাংস্ত্বং পঞ্চ যাচিতঃ
62.43
ত্বয়া কালোপসৃষ্টেন লোভতো নাপবর্জিতাঃ
তবাপরাধান্নৃপতে সর্বং ক্ষত্রং ক্ষয়ং গতম্
62.44
ভীষ্মেণ সোমদত্তেন বাহ্লিকেন কৃপেণ চ
দ্রোণেন চ সপুত্রেণ বিদুরেণ চ ধীমতা
যাচিতস্ত্বং শমং নিত্যং ন চ তত্কৃতবানসি
62.45
কালোপহতচিত্তো হি সর্বো মুহ্যতি ভারত
যথা মূঢো ভবান্পূর্বমস্মিন্নর্থে সমুদ্যতে
62.46
কিমন্যত্কালয়োগাদ্ধি দিষ্টমেব পরায়ণম্
মা চ দোষং মহারাজ পাণ্ডবেষু নিবেশয়
62.47
অল্পোঽপ্যতিক্রমো নাস্তি পাণ্ডবানাং মহাত্মনাম্
ধর্মতো ন্যায়তশ্চৈব স্নেহতশ্চ পরংতপ
62.48
এতত্সর্বং তু বিজ্ঞায় আত্মদোষকৃতং ফলম্
অসূয়াং পাণ্ডুপুত্রেষু ন ভবান্কর্তুমর্হতি
62.49
কুলং বংশশ্চ পিণ্ডশ্চ যচ্চ পুত্রকৃতং ফলম্
গান্ধার্যাস্তব চৈবাদ্য পাণ্ডবেষু প্রতিষ্ঠিতম্
62.50
এতত্সর্বমনুধ্যাত্বা আত্মনশ্চ ব্যতিক্রমম্
শিবেন পাণ্ডবান্ধ্যাহি নমস্তে ভরতর্ষভ
62.51
জানাসি চ মহাবাহো ধর্মরাজস্য যা ত্বয়ি
ভক্তির্ভরতশার্দূল স্নেহশ্চাপি স্বভাবতঃ
62.52
এতচ্চ কদনং কৃত্বা শত্রূণামপকারিণাম্
দহ্যতে স্ম দিবারাত্রং ন চ শর্মাধিগচ্ছতি
62.53
ত্বাং চৈব নরশার্দূল গান্ধারীং চ যশস্বিনীম্
স শোচন্ভরতশ্রেষ্ঠ ন শান্তিমধিগচ্ছতি
62.54
হ্রিয়া চ পরয়াবিষ্টো ভবন্তং নাধিগচ্ছতি
পুত্রশোকাভিসংতপ্তং বুদ্ধিব্যাকুলিতেন্দ্রিয়ম্
62.55
এবমুক্ত্বা মহারাজ ধৃতরাষ্ট্রং যদূত্তমঃ
উবাচ পরমং বাক্যং গান্ধারীং শোককর্শিতাম্
62.56
সৌবলেয়ি নিবোধ ত্বং যত্ত্বাং বক্ষ্যামি সুব্রতে
ত্বত্সমা নাস্তি লোকেঽস্মিন্নদ্য সীমন্তিনী শুভে
62.57
জানামি চ যথা রাজ্ঞি সভায়াং মম সংনিধৌ
ধর্মার্থসহিতং বাক্যমুভয়োঃ পক্ষয়োর্হিতম্
উক্তবত্যসি কল্যাণি ন চ তে তনয়ৈঃ শ্রুতম্
62.58
দুর্যোধনস্ত্বয়া চোক্তো জয়ার্থী পরুষং বচঃ
শৃণু মূঢ বচো মহ্যং যতো ধর্মস্ততো জয়ঃ
62.59
তদিদং সমনুপ্রাপ্তং তব বাক্যং নৃপাত্মজে
এবং বিদিত্বা কল্যাণি মা স্ম শোকে মনঃ কৃথাঃ
পাণ্ডবানাং বিনাশায় মা তে বুদ্ধিঃ কদাচন
62.60
শক্তা চাসি মহাভাগে পৃথিবীং সচরাচরাম্
চক্ষুষা ক্রোধদীপ্তেন নির্দগ্ধুং তপসো বলাৎ
62.61
বাসুদেববচঃ শ্রুত্বা গান্ধারী বাক্যমব্রবীৎ
এবমেতন্মহাবাহো যথা বদসি কেশব
62.62
আধিভির্দহ্যমানায়া মতিঃ সংচলিতা মম
সা মে ব্যবস্থিতা শ্রুত্বা তব বাক্যং জনার্দন
62.63
রাজ্ঞস্ত্বন্ধস্য বৃদ্ধস্য হতপুত্রস্য কেশব
ত্বং গতিঃ সহ তৈর্বীরৈঃ পাণ্ডবৈর্দ্বিপদাং বর
62.64
এতাবদুক্ত্বা বচনং মুখং প্রচ্ছাদ্য বাসসা
পুত্রশোকাভিসংতপ্তা গান্ধারী প্ররুরোদ হ
62.65
তত এনাং মহাবাহুঃ কেশবঃ শোককর্শিতাম্
হেতুকারণসংয়ুক্তৈর্বাক্যৈরাশ্বাসয়ত্প্রভুঃ
62.66
সমাশ্বাস্য চ গান্ধারীং ধৃতরাষ্ট্রং চ মাধবঃ
দ্রৌণেঃ সংকল্পিতং ভাবমন্ববুধ্যত কেশবঃ
62.67
ততস্ত্বরিত উত্থায় পাদৌ মূর্ধ্না প্রণম্য চ
দ্বৈপায়নস্য রাজেন্দ্র ততঃ কৌরবমব্রবীৎ
62.68
আপৃচ্ছে ত্বাং কুরুশ্রেষ্ঠ মা চ শোকে মনঃ কৃথাঃ
দ্রৌণেঃ পাপোঽস্ত্যভিপ্রায়স্তেনাস্মি সহসোত্থিতঃ
পাণ্ডবানাং বধে রাত্রৌ বুদ্ধিস্তেন প্রদর্শিতা
62.69
এতচ্ছ্রুত্বা তু বচনং গান্ধার্যা সহিতোঽব্রবীৎ
ধৃতরাষ্ট্রো মহাবাহুঃ কেশবং কেশিসূদনম্
62.70
শীঘ্রং গচ্ছ মহাবাহো পাণ্ডবান্পরিপালয়
ভূয়স্ত্বয়া সমেষ্যামি ক্ষিপ্রমেব জনার্দন
প্রায়াত্ততস্তু ত্বরিতো দারুকেণ সহাচ্যুতঃ
62.71
বাসুদেবে গতে রাজন্ধৃতরাষ্ট্রং জনেশ্বরম্
আশ্বাসয়দমেয়াত্মা ব্যাসো লোকনমস্কৃতঃ
62.72
বাসুদেবোঽপি ধর্মাত্মা কৃতকৃত্যো জগাম হ
শিবিরং হাস্তিনপুরাদ্দিদৃক্ষুঃ পাণ্ডবান্নৃপ
62.73
আগম্য শিবিরং রাত্রৌ সোঽভ্যগচ্ছত পাণ্ডবান্
তচ্চ তেভ্যঃ সমাখ্যায় সহিতস্তৈঃ সমাবিশৎ