Utshovঅধ্যায় 61
61.1
সংজয় উবাচ
ততস্তে প্রয়য়ুঃ সর্বে নিবাসায় মহীক্ষিতঃ
শঙ্খান্প্রধ্মাপয়ন্তো বৈ হৃষ্টাঃ পরিঘবাহবঃ
61.2
পাণ্ডবান্গচ্ছতশ্চাপি শিবিরং নো বিশাং পতে
মহেষ্বাসোঽন্বগাত্পশ্চাদ্যুয়ুত্সুঃ সাত্যকিস্তথা
61.3
ধৃষ্টদ্যুম্নঃ শিখণ্ডী চ দ্রৌপদেয়াশ্চ সর্বশঃ
সর্বে চান্যে মহেষ্বাসা যয়ুঃ স্বশিবিরাণ্যুত
61.4
ততস্তে প্রাবিশন্পার্থা হতত্বিট্কং হতেশ্বরম্
দুর্যোধনস্য শিবিরং রঙ্গবদ্বিসৃতে জনে
61.5
গতোত্সবং পুরমিব হৃতনাগমিব হ্রদম্
স্ত্রীবর্ষবরভূয়িষ্ঠং বৃদ্ধামাত্যৈরধিষ্ঠিতম্
61.6
তত্রৈতান্পর্যুপাতিষ্ঠন্দুর্যোধনপুরঃসরাঃ
কৃতাঞ্জলিপুটা রাজন্কাষায়মলিনাম্বরাঃ
61.7
শিবিরং সমনুপ্রাপ্য কুরুরাজস্য পাণ্ডবাঃ
অবতেরুর্মহারাজ রথেভ্যো রথসত্তমাঃ
61.8
ততো গাণ্ডীবধন্বানমভ্যভাষত কেশবঃ
স্থিতঃ প্রিয়হিতে নিত্যমতীব ভরতর্ষভ
61.9
অবরোপয় গাণ্ডীবমক্ষয্যৌ চ মহেষুধী
অথাহমবরোক্ষ্যামি পশ্চাদ্ভরতসত্তম
61.10
স্বয়ং চৈবাবরোহ ত্বমেতচ্ছ্রেয়স্তবানঘ
তচ্চাকরোত্তথা বীরঃ পাণ্ডুপুত্রো ধনংজয়ঃ
61.11
অথ পশ্চাত্ততঃ কৃষ্ণো রশ্মীনুত্সৃজ্য বাজিনাম্
অবারোহত মেধাবী রথাদ্গাণ্ডীবধন্বনঃ
61.12
অথাবতীর্ণে ভূতানামীশ্বরে সুমহাত্মনি
কপিরন্তর্দধে দিব্যো ধ্বজো গাণ্ডীবধন্বনঃ
61.13
স দগ্ধো দ্রোণকর্ণাভ্যাং দিব্যৈরস্ত্রৈর্মহারথঃ
অথ দীপ্তোঽগ্নিনা হ্যাশু প্রজজ্বাল মহীপতে
61.14
সোপাসঙ্গঃ সরশ্মিশ্চ সাশ্বঃ সয়ুগবন্ধুরঃ
ভস্মীভূতোঽপতদ্ভূমৌ রথো গাণ্ডীবধন্বনঃ
61.15
তং তথা ভস্মভূতং তু দৃষ্ট্বা পাণ্ডুসুতাঃ প্রভো
অভবন্বিস্মিতা রাজন্নর্জুনশ্চেদমব্রবীৎ
61.16
কৃতাঞ্জলিঃ সপ্রণয়ং প্রণিপত্যাভিবাদ্য চ
গোবিন্দ কস্মাদ্ভগবন্রথো দগ্ধোঽয়মগ্নিনা
61.17
কিমেতন্মহদাশ্চর্যমভবদ্যদুনন্দন
তন্মে ব্রূহি মহাবাহো শ্রোতব্যং যদি মন্যসে
61.18
বাসুদেব উবাচ
অস্ত্রৈর্বহুবিধৈর্দগ্ধঃ পূর্বমেবায়মর্জুন
মদধিষ্ঠিতত্বাত্সমরে ন বিশীর্ণঃ পরংতপ
61.19
ইদানীং তু বিশীর্ণোঽয়ং দগ্ধো ব্রহ্মাস্ত্রতেজসা
ময়া বিমুক্তঃ কৌন্তেয় ত্বয্যদ্য কৃতকর্মণি
61.20
সংজয় উবাচ
ঈষদুত্স্ময়মানশ্চ ভগবান্কেশবোঽরিহা
পরিষ্বজ্য চ রাজানং যুধিষ্ঠিরমভাষত
61.21
দিষ্ট্যা জয়সি কৌন্তেয় দিষ্ট্যা তে শত্রবো জিতাঃ
দিষ্ট্যা গাণ্ডীবধন্বা চ ভীমসেনশ্চ পাণ্ডবঃ
61.22
ত্বং চাপি কুশলী রাজন্মাদ্রীপুত্রৌ চ পাণ্ডবৌ
মুক্তা বীরক্ষয়াদস্মাত্সংগ্রামান্নিহতদ্বিষঃ
ক্ষিপ্রমুত্তরকালানি কুরু কার্যাণি ভারত
61.23
উপয়াতমুপপ্লব্যং সহ গাণ্ডীবধন্বনা
আনীয় মধুপর্কং মাং যত্পুরা ত্বমবোচথাঃ
61.24
এষ ভ্রাতা সখা চৈব তব কৃষ্ণ ধনংজয়ঃ
রক্ষিতব্যো মহাবাহো সর্বাস্বাপত্স্বিতি প্রভো
তব চৈবং ব্রুবাণস্য তথেত্যেবাহমব্রুবম্
61.25
স সব্যসাচী গুপ্তস্তে বিজয়ী চ নরেশ্বর
ভ্রাতৃভিঃ সহ রাজেন্দ্র শূরঃ সত্যপরাক্রমঃ
মুক্তো বীরক্ষয়াদস্মাত্সংগ্রামাদ্রোমহর্ষণাৎ
61.26
এবমুক্তস্তু কৃষ্ণেন ধর্মরাজো যুধিষ্ঠিরঃ
হৃষ্টরোমা মহারাজ প্রত্যুবাচ জনার্দনম্
61.27
প্রমুক্তং দ্রোণকর্ণাভ্যাং ব্রহ্মাস্ত্রমরিমর্দন
কস্ত্বদন্যঃ সহেত্সাক্ষাদপি বজ্রী পুরংদরঃ
61.28
ভবতস্তু প্রসাদেন সংগ্রামে বহবো জিতাঃ
মহারণগতঃ পার্থো যচ্চ নাসীত্পরাঙ্মুখঃ
61.29
তথৈব চ মহাবাহো পর্যায়ৈর্বহুভির্ময়া
কর্মণামনুসংতানং তেজসশ্চ গতিঃ শুভা
61.30
উপপ্লব্যে মহর্ষির্মে কৃষ্ণদ্বৈপায়নোঽব্রবীৎ
যতো ধর্মস্ততঃ কৃষ্ণো যতঃ কৃষ্ণস্ততো জয়ঃ
61.31
ইত্যেবমুক্তে তে বীরাঃ শিবিরং তব ভারত
প্রবিশ্য প্রত্যপদ্যন্ত কোশরত্নর্দ্ধিসংচয়ান্
61.32
রজতং জাতরূপং চ মণীনথ চ মৌক্তিকান্
ভূষণান্যথ মুখ্যানি কম্বলান্যজিনানি চ
দাসীদাসমসংখ্যেয়ং রাজ্যোপকরণানি চ
61.33
তে প্রাপ্য ধনমক্ষয্যং ত্বদীয়ং ভরতর্ষভ
উদক্রোশন্মহেষ্বাসা নরেন্দ্র বিজিতারয়ঃ
61.34
তে তু বীরাঃ সমাশ্বস্য বাহনান্যবমুচ্য চ
অতিষ্ঠন্ত মুহুঃ সর্বে পাণ্ডবাঃ সাত্যকিস্তথা
61.35
অথাব্রবীন্মহারাজ বাসুদেবো মহায়শাঃ
অস্মাভির্মঙ্গলার্থায় বস্তব্যং শিবিরাদ্বহিঃ
61.36
তথেত্যুক্ত্বা চ তে সর্বে পাণ্ডবাঃ সাত্যকিস্তথা
বাসুদেবেন সহিতা মঙ্গলার্থং যয়ুর্বহিঃ
61.37
তে সমাসাদ্য সরিতং পুণ্যামোঘবতীং নৃপ
ন্যবসন্নথ তাং রাত্রিং পাণ্ডবা হতশত্রবঃ
61.38
ততঃ সংপ্রেষয়ামাসুর্যাদবং নাগসাহ্বয়ম্
স চ প্রায়াজ্জবেনাশু বাসুদেবঃ প্রতাপবান্
দারুকং রথমারোপ্য যেন রাজাম্বিকাসুতঃ
61.39
তমূচুঃ সংপ্রয়াস্যন্তং সৈন্যসুগ্রীববাহনম্
প্রত্যাশ্বাসয় গান্ধারীং হতপুত্রাং যশস্বিনীম্
61.40
স প্রায়াত্পাণ্ডবৈরুক্তস্তত্পুরং সাত্বতাং বরঃ
আসসাদয়িষুঃ ক্ষিপ্রং গান্ধারীং নিহতাত্মজাম্