Utshovঅধ্যায় 60
60.1
ধৃতরাষ্ট্র উবাচ
হতং দুর্যোধনং দৃষ্ট্বা ভীমসেনেন সংয়ুগে
পাণ্ডবাঃ সৃঞ্জয়াশ্চৈব কিমকুর্বত সংজয়
60.2
সংজয় উবাচ
হতং দুর্যোধনং দৃষ্ট্বা ভীমসেনেন সংয়ুগে
সিংহেনেব মহারাজ মত্তং বনগজং বনে
60.3
প্রহৃষ্টমনসস্তত্র কৃষ্ণেন সহ পাণ্ডবাঃ
পাঞ্চালাঃ সৃঞ্জয়াশ্চৈব নিহতে কুরুনন্দনে
60.4
আবিধ্যন্নুত্তরীয়াণি সিংহনাদাংশ্চ নেদিরে
নৈতান্হর্ষসমাবিষ্টানিয়ং সেহে বসুংধরা
60.5
ধনূংষ্যন্যে ব্যাক্ষিপন্ত জ্যাশ্চাপ্যন্যে তথাক্ষিপন্
দধ্মুরন্যে মহাশঙ্খানন্যে জঘ্নুশ্চ দুন্দুভীঃ
60.6
চিক্রীডুশ্চ তথৈবান্যে জহসুশ্চ তবাহিতাঃ
অব্রুবংশ্চাসকৃদ্বীরা ভীমসেনমিদং বচঃ
60.7
দুষ্করং ভবতা কর্ম রণেঽদ্য সুমহত্কৃতম্
কৌরবেন্দ্রং রণে হত্বা গদয়াতিকৃতশ্রমম্
60.8
ইন্দ্রেণেব হি বৃত্রস্য বধং পরমসংয়ুগে
ত্বয়া কৃতমমন্যন্ত শত্রোর্বধমিমং জনাঃ
60.9
চরন্তং বিবিধান্মার্গান্মণ্ডলানি চ সর্বশঃ
দুর্যোধনমিমং শূরং কোঽন্যো হন্যাদ্বৃকোদরাৎ
60.10
বৈরস্য চ গতঃ পারং ত্বমিহান্যৈঃ সুদুর্গমম্
অশক্যমেতদন্যেন সংপাদয়িতুমীদৃশম্
60.11
কুঞ্জরেণেব মত্তেন বীর সংগ্রামমূর্ধনি
দুর্যোধনশিরো দিষ্ট্যা পাদেন মৃদিতং ত্বয়া
60.12
সিংহেন মহিষস্যেব কৃত্বা সংগরমদ্ভুতম্
দুঃশাসনস্য রুধিরং দিষ্ট্যা পীতং ত্বয়ানঘ
60.13
যে বিপ্রকুর্বন্রাজানং ধর্মাত্মানং যুধিষ্ঠিরম্
মূর্ধ্নি তেষাং কৃতঃ পাদো দিষ্ট্যা তে স্বেন কর্মণা
60.14
অমিত্রাণামধিষ্ঠানাদ্বধাদ্দুর্যোধনস্য চ
ভীম দিষ্ট্যা পৃথিব্যাং তে প্রথিতং সুমহদ্যশঃ
60.15
এবং নূনং হতে বৃত্রে শক্রং নন্দন্তি বন্দিনঃ
তথা ত্বাং নিহতামিত্রং বয়ং নন্দাম ভারত
60.16
দুর্যোধনবধে যানি রোমাণি হৃষিতানি নঃ
অদ্যাপি ন বিহৃষ্যন্তি তানি তদ্বিদ্ধি ভারত
ইত্যব্রুবন্ভীমসেনং বাতিকাস্তত্র সংগতাঃ
60.17
তান্হৃষ্টান্পুরুষব্যাঘ্রান্পাঞ্চালান্পাণ্ডবৈঃ সহ
ব্রুবতঃ সদৃশং তত্র প্রোবাচ মধুসূদনঃ
60.18
ন ন্যায্যং নিহতঃ শত্রুর্ভূয়ো হন্তুং জনাধিপাঃ
অসকৃদ্বাগ্ভিরুগ্রাভির্নিহতো হ্যেষ মন্দধীঃ
60.19
তদৈবৈষ হতঃ পাপো যদৈব নিরপত্রপঃ
লুব্ধঃ পাপসহায়শ্চ সুহৃদাং শাসনাতিগঃ
60.20
বহুশো বিদুরদ্রোণকৃপগাঙ্গেয়সৃঞ্জয়ৈঃ
পাণ্ডুভ্যঃ প্রোচ্যমানোঽপি পিত্র্যমংশং ন দত্তবান্
60.21
নৈষ যোগ্যোঽদ্য মিত্রং বা শত্রুর্বা পুরুষাধমঃ
কিমনেনাতিনুন্নেন বাগ্ভিঃ কাষ্ঠসধর্মণা
60.22
রথেষ্বারোহত ক্ষিপ্রং গচ্ছামো বসুধাধিপাঃ
দিষ্ট্যা হতোঽয়ং পাপাত্মা সামাত্যজ্ঞাতিবান্ধবঃ
60.23
ইতি শ্রুত্বা ত্বধিক্ষেপং কৃষ্ণাদ্দুর্যোধনো নৃপঃ
অমর্ষবশমাপন্ন উদতিষ্ঠদ্বিশাং পতে
60.24
স্ফিগ্দেশেনোপবিষ্টঃ স দোর্ভ্যাং বিষ্টভ্য মেদিনীম্
দৃষ্টিং ভ্রূসংকটাং কৃত্বা বাসুদেবে ন্যপাতয়ৎ
60.25
অর্ধোন্নতশরীরস্য রূপমাসীন্নৃপস্য তৎ
ক্রুদ্ধস্যাশীবিষস্যেব চ্ছিন্নপুচ্ছস্য ভারত
60.26
প্রাণান্তকরণীং ঘোরাং বেদনামবিচিন্তয়ন্
দুর্যোধনো বাসুদেবং বাগ্ভিরুগ্রাভিরার্দয়ৎ
60.27
কংসদাসস্য দায়াদ ন তে লজ্জাস্ত্যনেন বৈ
অধর্মেণ গদায়ুদ্ধে যদহং বিনিপাতিতঃ
60.28
ঊরূ ভিন্ধীতি ভীমস্য স্মৃতিং মিথ্যা প্রয়চ্ছতা
কিং ন বিজ্ঞাতমেতন্মে যদর্জুনমবোচথাঃ
60.29
ঘাতয়িত্বা মহীপালানৃজুয়ুদ্ধান্সহস্রশঃ
জিহ্মৈরুপায়ৈর্বহুভির্ন তে লজ্জা ন তে ঘৃণা
60.30
অহন্যহনি শূরাণাং কুর্বাণঃ কদনং মহৎ
শিখণ্ডিনং পুরস্কৃত্য ঘাতিতস্তে পিতামহঃ
60.31
অশ্বত্থাম্নঃ সনামানং হত্বা নাগং সুদুর্মতে
আচার্যো ন্যাসিতঃ শস্ত্রং কিং তন্ন বিদিতং মম
60.32
স চানেন নৃশংসেন ধৃষ্টদ্যুম্নেন বীর্যবান্
পাত্যমানস্ত্বয়া দৃষ্টো ন চৈনং ত্বমবারয়ঃ
60.33
বধার্থং পাণ্ডুপুত্রস্য যাচিতাং শক্তিমেব চ
ঘটোত্কচে ব্যংসয়থাঃ কস্ত্বত্তঃ পাপকৃত্তমঃ
60.34
ছিন্নবাহুঃ প্রায়গতস্তথা ভূরিশ্রবা বলী
ত্বয়া নিসৃষ্টেন হতঃ শৈনেয়েন দুরাত্মনা
60.35
কুর্বাণশ্চোত্তমং কর্ম কর্ণঃ পার্থজিগীষয়া
ব্যংসনেনাশ্বসেনস্য পন্নগেন্দ্রসুতস্য বৈ
60.36
পুনশ্চ পতিতে চক্রে ব্যসনার্তঃ পরাজিতঃ
পাতিতঃ সমরে কর্ণশ্চক্রব্যগ্রোঽগ্রণীর্নৃণাম্
60.37
যদি মাং চাপি কর্ণং চ ভীষ্মদ্রোণৌ চ সংয়ুগে
ঋজুনা প্রতিয়ুধ্যেথা ন তে স্যাদ্বিজয়ো ধ্রুবম্
60.38
ত্বয়া পুনরনার্যেণ জিহ্মমার্গেণ পার্থিবাঃ
স্বধর্মমনুতিষ্ঠন্তো বয়ং চান্যে চ ঘাতিতাঃ
60.39
বাসুদেব উবাচ
হতস্ত্বমসি গান্ধারে সভ্রাতৃসুতবান্ধবঃ
সগণঃ সসুহৃচ্চৈব পাপমার্গমনুষ্ঠিতঃ
60.40
তবৈব দুষ্কৃতৈর্বীরৌ ভীষ্মদ্রোণৌ নিপাতিতৌ
কর্ণশ্চ নিহতঃ সংখ্যে তব শীলানুবর্তকঃ
60.41
যাচ্যমানো ময়া মূঢ পিত্র্যমংশং ন দিত্সসি
পাণ্ডবেভ্যঃ স্বরাজ্যার্ধং লোভাচ্ছকুনিনিশ্চয়াৎ
60.42
বিষং তে ভীমসেনায় দত্তং সর্বে চ পাণ্ডবাঃ
প্রদীপিতা জতুগৃহে মাত্রা সহ সুদুর্মতে
60.43
সভায়াং যাজ্ঞসেনী চ কৃষ্টা দ্যূতে রজস্বলা
তদৈব তাবদ্দুষ্টাত্মন্বধ্যস্ত্বং নিরপত্রপঃ
60.44
অনক্ষজ্ঞং চ ধর্মজ্ঞং সৌবলেনাক্ষবেদিনা
নিকৃত্যা যত্পরাজৈষীস্তস্মাদসি হতো রণে
60.45
জয়দ্রথেন পাপেন যত্কৃষ্ণা ক্লেশিতা বনে
যাতেষু মৃগয়াং তেষু তৃণবিন্দোরথাশ্রমে
60.46
অভিমন্যুশ্চ যদ্বাল একো বহুভিরাহবে
ত্বদ্দোষৈর্নিহতঃ পাপ তস্মাদসি হতো রণে
60.47
দুর্যোধন উবাচ
অধীতং বিধিবদ্দত্তং ভূঃ প্রশাস্তা সসাগরা
মূর্ধ্নি স্থিতমমিত্রাণাং কো নু স্বন্ততরো ময়া
60.48
যদিষ্টং ক্ষত্রবন্ধূনাং স্বধর্মমনুপশ্যতাম্
তদিদং নিধনং প্রাপ্তং কো নু স্বন্ততরো ময়া
60.49
দেবার্হা মানুষা ভোগাঃ প্রাপ্তা অসুলভা নৃপৈঃ
ঐশ্বর্যং চোত্তমং প্রাপ্তং কো নু স্বন্ততরো ময়া
60.50
সসুহৃত্সানুবন্ধশ্চ স্বর্গং গন্তাহমচ্যুত
যূয়ং বিহতসংকল্পাঃ শোচন্তো বর্তয়িষ্যথ
60.51
সংজয় উবাচ
অস্য বাক্যস্য নিধনে কুরুরাজস্য ভারত
অপতত্সুমহদ্বর্ষং পুষ্পাণাং পুণ্যগন্ধিনাম্
60.52
অবাদয়ন্ত গন্ধর্বা জগুশ্চাপ্সরসাং গণাঃ
সিদ্ধাশ্চ মুমুচুর্বাচঃ সাধু সাধ্বিতি ভারত
60.53
ববৌ চ সুরভির্বায়ুঃ পুণ্যগন্ধো মৃদুঃ সুখঃ
ব্যরাজতামলং চৈব নভো বৈডূর্যসংনিভম্
60.54
অত্যদ্ভুতানি তে দৃষ্ট্বা বাসুদেবপুরোগমাঃ
দুর্যোধনস্য পূজাং চ দৃষ্ট্বা ব্রীডামুপাগমন্
60.55
হতাংশ্চাধর্মতঃ শ্রুত্বা শোকার্তাঃ শুশুচুর্হি তে
ভীষ্মং দ্রোণং তথা কর্ণং ভূরিশ্রবসমেব চ
60.56
তাংস্তু চিন্তাপরান্দৃষ্ট্বা পাণ্ডবান্দীনচেতসঃ
প্রোবাচেদং বচঃ কৃষ্ণো মেঘদুন্দুভিনিস্বনঃ
60.57
নৈষ শক্যোঽতিশীঘ্রাস্ত্রস্তে চ সর্বে মহারথাঃ
ঋজুয়ুদ্ধেন বিক্রান্তা হন্তুং যুষ্মাভিরাহবে
60.58
উপায়া বিহিতা হ্যেতে ময়া তস্মান্নরাধিপাঃ
অন্যথা পাণ্ডবেয়ানাং নাভবিষ্যজ্জয়ঃ ক্বচিৎ
60.59
তে হি সর্বে মহাত্মানশ্চত্বারোঽতিরথা ভুবি
ন শক্যা ধর্মতো হন্তুং লোকপালৈরপি স্বয়ম্
60.60
তথৈবায়ং গদাপাণির্ধার্তরাষ্ট্রো গতক্লমঃ
ন শক্যো ধর্মতো হন্তুং কালেনাপীহ দণ্ডিনা
60.61
ন চ বো হৃদি কর্তব্যং যদয়ং ঘাতিতো নৃপঃ
মিথ্যাবধ্যাস্তথোপায়ৈর্বহবঃ শত্রবোঽধিকাঃ
60.62
পূর্বৈরনুগতো মার্গো দেবৈরসুরঘাতিভিঃ
সদ্ভিশ্চানুগতঃ পন্থাঃ স সর্বৈরনুগম্যতে
60.63
কৃতকৃত্যাঃ স্ম সায়াহ্নে নিবাসং রোচয়ামহে
সাশ্বনাগরথাঃ সর্বে বিশ্রমামো নরাধিপাঃ
60.64
বাসুদেববচঃ শ্রুত্বা তদানীং পাণ্ডবৈঃ সহ
পাঞ্চালা ভৃশসংহৃষ্টা বিনেদুঃ সিংহসংঘবৎ
60.65
ততঃ প্রাধ্মাপয়ঞ্শঙ্খান্পাঞ্চজন্যং চ মাধবঃ
হৃষ্টা দুর্যোধনং দৃষ্ট্বা নিহতং পুরুষর্ষভাঃ