UtshovChapter 60
60.1
धृतराष्ट्र उवाच
हतं दुर्योधनं दृष्ट्वा भीमसेनेन संयुगे
पाण्डवाः सृञ्जयाश्चैव किमकुर्वत संजय
Dhritarashtra uvacha
Hatam duryodhanam drishtva bhimasenena sanyuge
Pandavah srinjayashchaiva kimakurvata sanjaya
60.2
संजय उवाच
हतं दुर्योधनं दृष्ट्वा भीमसेनेन संयुगे
सिंहेनेव महाराज मत्तं वनगजं वने
Sanjaya uvacha
Hatam duryodhanam drishtva bhimasenena sanyuge
Sinheneva maharaja mattam vanagajam vane
60.3
प्रहृष्टमनसस्तत्र कृष्णेन सह पाण्डवाः
पाञ्चालाः सृञ्जयाश्चैव निहते कुरुनन्दने
Prahrishtamanasastatra krishnena saha pandavah
Panchalah srinjayashchaiva nihate kurunandane
60.4
आविध्यन्नुत्तरीयाणि सिंहनादांश्च नेदिरे
नैतान्हर्षसमाविष्टानियं सेहे वसुंधरा
Avidhyannuttariyani sinhanadanshcha nedire
Naitanharshasamavishtaniyam sehe vasundhara
60.5
धनूंष्यन्ये व्याक्षिपन्त ज्याश्चाप्यन्ये तथाक्षिपन्
दध्मुरन्ये महाशङ्खानन्ये जघ्नुश्च दुन्दुभीः
Dhanunshyanye vyakshipanta jyashchapyanye tathakshipan
Dadhmuranye mahashankhananye jaghnushcha dundubhih
60.6
चिक्रीडुश्च तथैवान्ये जहसुश्च तवाहिताः
अब्रुवंश्चासकृद्वीरा भीमसेनमिदं वचः
Chikridushcha tathaivanye jahasushcha tavahitah
Abruvanshchasakridvira bhimasenamidam vachah
60.7
दुष्करं भवता कर्म रणेऽद्य सुमहत्कृतम्
कौरवेन्द्रं रणे हत्वा गदयातिकृतश्रमम्
Dushkaram bhavata karma ranedya sumahatkritam
Kauravendram rane hatva gadayatikritashramam
60.8
इन्द्रेणेव हि वृत्रस्य वधं परमसंयुगे
त्वया कृतममन्यन्त शत्रोर्वधमिमं जनाः
Indreneva hi vritrasya vadham paramasanyuge
Tvaya kritamamanyanta shatrorvadhamimam janah
60.9
चरन्तं विविधान्मार्गान्मण्डलानि च सर्वशः
दुर्योधनमिमं शूरं कोऽन्यो हन्याद्वृकोदरात्
Charantam vividhanmarganmandalani cha sarvashah
Duryodhanamimam shuram konyo hanyadvrikodarat
60.10
वैरस्य च गतः पारं त्वमिहान्यैः सुदुर्गमम्
अशक्यमेतदन्येन संपादयितुमीदृशम्
Vairasya cha gatah param tvamihanyaih sudurgamam
Ashakyametadanyena sampadayitumidrisham
60.11
कुञ्जरेणेव मत्तेन वीर संग्राममूर्धनि
दुर्योधनशिरो दिष्ट्या पादेन मृदितं त्वया
Kunjareneva mattena vira sangramamurdhani
Duryodhanashiro dishtya padena mriditam tvaya
60.12
सिंहेन महिषस्येव कृत्वा संगरमद्भुतम्
दुःशासनस्य रुधिरं दिष्ट्या पीतं त्वयानघ
Sinhena mahishasyeva kritva sangaramadbhutam
Duhshasanasya rudhiram dishtya pitam tvayanagha
60.13
ये विप्रकुर्वन्राजानं धर्मात्मानं युधिष्ठिरम्
मूर्ध्नि तेषां कृतः पादो दिष्ट्या ते स्वेन कर्मणा
Ye viprakurvanrajanam dharmatmanam yudhishthiram
Murdhni tesham kritah pado dishtya te svena karmana
60.14
अमित्राणामधिष्ठानाद्वधाद्दुर्योधनस्य च
भीम दिष्ट्या पृथिव्यां ते प्रथितं सुमहद्यशः
Amitranamadhishthanadvadhadduryodhanasya cha
Bhima dishtya prithivyam te prathitam sumahadyashah
60.15
एवं नूनं हते वृत्रे शक्रं नन्दन्ति बन्दिनः
तथा त्वां निहतामित्रं वयं नन्दाम भारत
Evam nunam hate vritre shakram nandanti bandinah
Tatha tvam nihatamitram vayam nandama bharata
60.16
दुर्योधनवधे यानि रोमाणि हृषितानि नः
अद्यापि न विहृष्यन्ति तानि तद्विद्धि भारत
इत्यब्रुवन्भीमसेनं वातिकास्तत्र संगताः
Duryodhanavadhe yani romani hrishitani nah
Adyapi na vihrishyanti tani tadviddhi bharata
Ityabruvanbhimasenam vatikastatra sangatah
60.17
तान्हृष्टान्पुरुषव्याघ्रान्पाञ्चालान्पाण्डवैः सह
ब्रुवतः सदृशं तत्र प्रोवाच मधुसूदनः
Tanhrishtanpurushavyaghranpanchalanpandavaih saha
Bruvatah sadrisham tatra provacha madhusudanah
60.18
न न्याय्यं निहतः शत्रुर्भूयो हन्तुं जनाधिपाः
असकृद्वाग्भिरुग्राभिर्निहतो ह्येष मन्दधीः
Na nyayyam nihatah shatrurbhuyo hantum janadhipah
Asakridvagbhirugrabhirnihato hyesha mandadhih
60.19
तदैवैष हतः पापो यदैव निरपत्रपः
लुब्धः पापसहायश्च सुहृदां शासनातिगः
Tadaivaisha hatah papo yadaiva nirapatrapah
Lubdhah papasahayashcha suhridam shasanatigah
60.20
बहुशो विदुरद्रोणकृपगाङ्गेयसृञ्जयैः
पाण्डुभ्यः प्रोच्यमानोऽपि पित्र्यमंशं न दत्तवान्
Bahusho viduradronakripagangeyasrinjayaih
Pandubhyah prochyamanopi pitryamansham na dattavan
60.21
नैष योग्योऽद्य मित्रं वा शत्रुर्वा पुरुषाधमः
किमनेनातिनुन्नेन वाग्भिः काष्ठसधर्मणा
Naisha yogyodya mitram va shatrurva purushadhamah
Kimanenatinunnena vagbhih kashthasadharmana
60.22
रथेष्वारोहत क्षिप्रं गच्छामो वसुधाधिपाः
दिष्ट्या हतोऽयं पापात्मा सामात्यज्ञातिबान्धवः
Ratheshvarohata kshipram gachchhamo vasudhadhipah
Dishtya hatoyam papatma samatyagyatibandhavah
60.23
इति श्रुत्वा त्वधिक्षेपं कृष्णाद्दुर्योधनो नृपः
अमर्षवशमापन्न उदतिष्ठद्विशां पते
Iti shrutva tvadhikshepam krishnadduryodhano nripah
Amarshavashamapanna udatishthadvisham pate
60.24
स्फिग्देशेनोपविष्टः स दोर्भ्यां विष्टभ्य मेदिनीम्
दृष्टिं भ्रूसंकटां कृत्वा वासुदेवे न्यपातयत्
Sphigdeshenopavishtah sa dorbhyam vishtabhya medinim
Drishtim bhrusankatam kritva vasudeve nyapatayat
60.25
अर्धोन्नतशरीरस्य रूपमासीन्नृपस्य तत्
क्रुद्धस्याशीविषस्येव च्छिन्नपुच्छस्य भारत
Ardhonnatasharirasya rupamasinnripasya tat
Kruddhasyashivishasyeva chchhinnapuchchhasya bharata
60.26
प्राणान्तकरणीं घोरां वेदनामविचिन्तयन्
दुर्योधनो वासुदेवं वाग्भिरुग्राभिरार्दयत्
Pranantakaranim ghoram vedanamavichintayan
Duryodhano vasudevam vagbhirugrabhirardayat
60.27
कंसदासस्य दायाद न ते लज्जास्त्यनेन वै
अधर्मेण गदायुद्धे यदहं विनिपातितः
Kansadasasya dayada na te lajjastyanena vai
Adharmena gadayuddhe yadaham vinipatitah
60.28
ऊरू भिन्धीति भीमस्य स्मृतिं मिथ्या प्रयच्छता
किं न विज्ञातमेतन्मे यदर्जुनमवोचथाः
Uru bhindhiti bhimasya smritim mithya prayachchhata
Kim na vigyatametanme yadarjunamavochathah
60.29
घातयित्वा महीपालानृजुयुद्धान्सहस्रशः
जिह्मैरुपायैर्बहुभिर्न ते लज्जा न ते घृणा
Ghatayitva mahipalanrijuyuddhansahasrashah
Jihmairupayairbahubhirna te lajja na te ghrina
60.30
अहन्यहनि शूराणां कुर्वाणः कदनं महत्
शिखण्डिनं पुरस्कृत्य घातितस्ते पितामहः
Ahanyahani shuranam kurvanah kadanam mahat
Shikhandinam puraskritya ghatitaste pitamahah
60.31
अश्वत्थाम्नः सनामानं हत्वा नागं सुदुर्मते
आचार्यो न्यासितः शस्त्रं किं तन्न विदितं मम
Ashvatthamnah sanamanam hatva nagam sudurmate
Acharyo nyasitah shastram kim tanna viditam mama
60.32
स चानेन नृशंसेन धृष्टद्युम्नेन वीर्यवान्
पात्यमानस्त्वया दृष्टो न चैनं त्वमवारयः
Sa chanena nrishansena dhrishtadyumnena viryavan
Patyamanastvaya drishto na chainam tvamavarayah
60.33
वधार्थं पाण्डुपुत्रस्य याचितां शक्तिमेव च
घटोत्कचे व्यंसयथाः कस्त्वत्तः पापकृत्तमः
Vadhartham panduputrasya yachitam shaktimeva cha
Ghatotkache vyansayathah kastvattah papakrittamah
60.34
छिन्नबाहुः प्रायगतस्तथा भूरिश्रवा बली
त्वया निसृष्टेन हतः शैनेयेन दुरात्मना
Chhinnabahuh prayagatastatha bhurishrava bali
Tvaya nisrishtena hatah shaineyena duratmana
60.35
कुर्वाणश्चोत्तमं कर्म कर्णः पार्थजिगीषया
व्यंसनेनाश्वसेनस्य पन्नगेन्द्रसुतस्य वै
Kurvanashchottamam karma karnah parthajigishaya
Vyansanenashvasenasya pannagendrasutasya vai
60.36
पुनश्च पतिते चक्रे व्यसनार्तः पराजितः
पातितः समरे कर्णश्चक्रव्यग्रोऽग्रणीर्नृणाम्
Punashcha patite chakre vyasanartah parajitah
Patitah samare karnashchakravyagrogranirnrinam
60.37
यदि मां चापि कर्णं च भीष्मद्रोणौ च संयुगे
ऋजुना प्रतियुध्येथा न ते स्याद्विजयो ध्रुवम्
Yadi mam chapi karnam cha bhishmadronau cha sanyuge
Rijuna pratiyudhyetha na te syadvijayo dhruvam
60.38
त्वया पुनरनार्येण जिह्ममार्गेण पार्थिवाः
स्वधर्ममनुतिष्ठन्तो वयं चान्ये च घातिताः
Tvaya punaranaryena jihmamargena parthivah
Svadharmamanutishthanto vayam chanye cha ghatitah
60.39
वासुदेव उवाच
हतस्त्वमसि गान्धारे सभ्रातृसुतबान्धवः
सगणः ससुहृच्चैव पापमार्गमनुष्ठितः
Vasudeva uvacha
Hatastvamasi gandhare sabhratrisutabandhavah
Saganah sasuhrichchaiva papamargamanushthitah
60.40
तवैव दुष्कृतैर्वीरौ भीष्मद्रोणौ निपातितौ
कर्णश्च निहतः संख्ये तव शीलानुवर्तकः
Tavaiva dushkritairvirau bhishmadronau nipatitau
Karnashcha nihatah sankhye tava shilanuvartakah
60.41
याच्यमानो मया मूढ पित्र्यमंशं न दित्ससि
पाण्डवेभ्यः स्वराज्यार्धं लोभाच्छकुनिनिश्चयात्
Yachyamano maya mudha pitryamansham na ditsasi
Pandavebhyah svarajyardham lobhachchhakuninishchayat
60.42
विषं ते भीमसेनाय दत्तं सर्वे च पाण्डवाः
प्रदीपिता जतुगृहे मात्रा सह सुदुर्मते
Visham te bhimasenaya dattam sarve cha pandavah
Pradipita jatugrihe matra saha sudurmate
60.43
सभायां याज्ञसेनी च कृष्टा द्यूते रजस्वला
तदैव तावद्दुष्टात्मन्वध्यस्त्वं निरपत्रपः
Sabhayam yagyaseni cha krishta dyute rajasvala
Tadaiva tavaddushtatmanvadhyastvam nirapatrapah
60.44
अनक्षज्ञं च धर्मज्ञं सौबलेनाक्षवेदिना
निकृत्या यत्पराजैषीस्तस्मादसि हतो रणे
Anakshagyam cha dharmagyam saubalenakshavedina
Nikritya yatparajaishistasmadasi hato rane
60.45
जयद्रथेन पापेन यत्कृष्णा क्लेशिता वने
यातेषु मृगयां तेषु तृणबिन्दोरथाश्रमे
Jayadrathena papena yatkrishna kleshita vane
Yateshu mrigayam teshu trinabindorathashrame
60.46
अभिमन्युश्च यद्बाल एको बहुभिराहवे
त्वद्दोषैर्निहतः पाप तस्मादसि हतो रणे
Abhimanyushcha yadbala eko bahubhirahave
Tvaddoshairnihatah papa tasmadasi hato rane
60.47
दुर्योधन उवाच
अधीतं विधिवद्दत्तं भूः प्रशास्ता ससागरा
मूर्ध्नि स्थितममित्राणां को नु स्वन्ततरो मया
Duryodhana uvacha
Adhitam vidhivaddattam bhuh prashasta sasagara
Murdhni sthitamamitranam ko nu svantataro maya
60.48
यदिष्टं क्षत्रबन्धूनां स्वधर्ममनुपश्यताम्
तदिदं निधनं प्राप्तं को नु स्वन्ततरो मया
Yadishtam kshatrabandhunam svadharmamanupashyatam
Tadidam nidhanam praptam ko nu svantataro maya
60.49
देवार्हा मानुषा भोगाः प्राप्ता असुलभा नृपैः
ऐश्वर्यं चोत्तमं प्राप्तं को नु स्वन्ततरो मया
Devarha manusha bhogah prapta asulabha nripaih
Aishvaryam chottamam praptam ko nu svantataro maya
60.50
ससुहृत्सानुबन्धश्च स्वर्गं गन्ताहमच्युत
यूयं विहतसंकल्पाः शोचन्तो वर्तयिष्यथ
Sasuhritsanubandhashcha svargam gantahamachyuta
Yuyam vihatasankalpah shochanto vartayishyatha
60.51
संजय उवाच
अस्य वाक्यस्य निधने कुरुराजस्य भारत
अपतत्सुमहद्वर्षं पुष्पाणां पुण्यगन्धिनाम्
Sanjaya uvacha
Asya vakyasya nidhane kururajasya bharata
Apatatsumahadvarsham pushpanam punyagandhinam
60.52
अवादयन्त गन्धर्वा जगुश्चाप्सरसां गणाः
सिद्धाश्च मुमुचुर्वाचः साधु साध्विति भारत
Avadayanta gandharva jagushchapsarasam ganah
Siddhashcha mumuchurvachah sadhu sadhviti bharata
60.53
ववौ च सुरभिर्वायुः पुण्यगन्धो मृदुः सुखः
व्यराजतामलं चैव नभो वैडूर्यसंनिभम्
Vavau cha surabhirvayuh punyagandho mriduh sukhah
Vyarajatamalam chaiva nabho vaiduryasannibham
60.54
अत्यद्भुतानि ते दृष्ट्वा वासुदेवपुरोगमाः
दुर्योधनस्य पूजां च दृष्ट्वा व्रीडामुपागमन्
Atyadbhutani te drishtva vasudevapurogamah
Duryodhanasya pujam cha drishtva vridamupagaman
60.55
हतांश्चाधर्मतः श्रुत्वा शोकार्ताः शुशुचुर्हि ते
भीष्मं द्रोणं तथा कर्णं भूरिश्रवसमेव च
Hatanshchadharmatah shrutva shokartah shushuchurhi te
Bhishmam dronam tatha karnam bhurishravasameva cha
60.56
तांस्तु चिन्तापरान्दृष्ट्वा पाण्डवान्दीनचेतसः
प्रोवाचेदं वचः कृष्णो मेघदुन्दुभिनिस्वनः
Tanstu chintaparandrishtva pandavandinachetasah
Provachedam vachah krishno meghadundubhinisvanah
60.57
नैष शक्योऽतिशीघ्रास्त्रस्ते च सर्वे महारथाः
ऋजुयुद्धेन विक्रान्ता हन्तुं युष्माभिराहवे
Naisha shakyotishighrastraste cha sarve maharathah
Rijuyuddhena vikranta hantum yushmabhirahave
60.58
उपाया विहिता ह्येते मया तस्मान्नराधिपाः
अन्यथा पाण्डवेयानां नाभविष्यज्जयः क्वचित्
Upaya vihita hyete maya tasmannaradhipah
Anyatha pandaveyanam nabhavishyajjayah kvachit
60.59
ते हि सर्वे महात्मानश्चत्वारोऽतिरथा भुवि
न शक्या धर्मतो हन्तुं लोकपालैरपि स्वयम्
Te hi sarve mahatmanashchatvarotiratha bhuvi
Na shakya dharmato hantum lokapalairapi svayam
60.60
तथैवायं गदापाणिर्धार्तराष्ट्रो गतक्लमः
न शक्यो धर्मतो हन्तुं कालेनापीह दण्डिना
Tathaivayam gadapanirdhartarashtro gataklamah
Na shakyo dharmato hantum kalenapiha dandina
60.61
न च वो हृदि कर्तव्यं यदयं घातितो नृपः
मिथ्यावध्यास्तथोपायैर्बहवः शत्रवोऽधिकाः
Na cha vo hridi kartavyam yadayam ghatito nripah
Mithyavadhyastathopayairbahavah shatravodhikah
60.62
पूर्वैरनुगतो मार्गो देवैरसुरघातिभिः
सद्भिश्चानुगतः पन्थाः स सर्वैरनुगम्यते
Purvairanugato margo devairasuraghatibhih
Sadbhishchanugatah panthah sa sarvairanugamyate
60.63
कृतकृत्याः स्म सायाह्ने निवासं रोचयामहे
साश्वनागरथाः सर्वे विश्रमामो नराधिपाः
Kritakrityah sma sayahne nivasam rochayamahe
Sashvanagarathah sarve vishramamo naradhipah
60.64
वासुदेववचः श्रुत्वा तदानीं पाण्डवैः सह
पाञ्चाला भृशसंहृष्टा विनेदुः सिंहसंघवत्
Vasudevavachah shrutva tadanim pandavaih saha
Panchala bhrishasanhrishta vineduh sinhasanghavat
60.65
ततः प्राध्मापयञ्शङ्खान्पाञ्चजन्यं च माधवः
हृष्टा दुर्योधनं दृष्ट्वा निहतं पुरुषर्षभाः
Tatah pradhmapayanshankhanpanchajanyam cha madhavah
Hrishta duryodhanam drishtva nihatam purusharshabhah