Utshovঅধ্যায় 59
59.1
ধৃতরাষ্ট্র উবাচ
অধর্মেণ হতং দৃষ্ট্বা রাজানং মাধবোত্তমঃ
কিমব্রবীত্তদা সূত বলদেবো মহাবলঃ
59.2
গদায়ুদ্ধবিশেষজ্ঞো গদায়ুদ্ধবিশারদঃ
কৃতবান্রৌহিণেয়ো যত্তন্মমাচক্ষ্ব সংজয়
59.3
সংজয় উবাচ
শিরস্যভিহতং দৃষ্ট্বা ভীমসেনেন তে সুতম্
রামঃ প্রহরতাং শ্রেষ্ঠশ্চুক্রোধ বলবদ্বলী
59.4
ততো মধ্যে নরেন্দ্রাণামূর্ধ্ববাহুর্হলায়ুধঃ
কুর্বন্নার্তস্বরং ঘোরং ধিগ্ধিগ্ভীমেত্যুবাচ হ
59.5
অহো ধিগ্যদধো নাভেঃ প্রহৃতং শুদ্ধবিক্রমে
নৈতদ্দৃষ্টং গদায়ুদ্ধে কৃতবান্যদ্বৃকোদরঃ
59.6
অধো নাভ্যা ন হন্তব্যমিতি শাস্ত্রস্য নিশ্চয়ঃ
অয়ং ত্বশাস্ত্রবিন্মূঢঃ স্বচ্ছন্দাত্সংপ্রবর্ততে
59.7
তস্য তত্তদ্ব্রুবাণস্য রোষঃ সমভবন্মহান্
ততো লাঙ্গলমুদ্যম্য ভীমমভ্যদ্রবদ্বলী
59.8
তস্যোর্ধ্ববাহোঃ সদৃশং রূপমাসীন্মহাত্মনঃ
বহুধাতুবিচিত্রস্য শ্বেতস্যেব মহাগিরেঃ
59.9
তমুত্পতন্তং জগ্রাহ কেশবো বিনয়ানতঃ
বাহুভ্যাং পীনবৃত্তাভ্যাং প্রয়ত্নাদ্বলবদ্বলী
59.10
সিতাসিতৌ যদুবরৌ শুশুভাতেঽধিকং ততঃ
নভোগতৌ যথা রাজংশ্চন্দ্রসূর্যৌ দিনক্ষয়ে
59.11
উবাচ চৈনং সংরব্ধং শময়ন্নিব কেশবঃ
আত্মবৃদ্ধির্মিত্রবৃদ্ধির্মিত্রমিত্রোদয়স্তথা
বিপরীতং দ্বিষত্স্বেতত্ষড্বিধা বৃদ্ধিরাত্মনঃ
59.12
আত্মন্যপি চ মিত্রেষু বিপরীতং যদা ভবেৎ
তদা বিদ্যান্মনোজ্যানিমাশু শান্তিকরো ভবেৎ
59.13
অস্মাকং সহজং মিত্রং পাণ্ডবাঃ শুদ্ধপৌরুষাঃ
স্বকাঃ পিতৃষ্বসুঃ পুত্রাস্তে পরৈর্নিকৃতা ভৃশম্
59.14
প্রতিজ্ঞাপারণং ধর্মঃ ক্ষত্রিয়স্যেতি বেত্থ হ
সুয়োধনস্য গদয়া ভঙ্ক্তাস্ম্যূরূ মহাহবে
ইতি পূর্বং প্রতিজ্ঞাতং ভীমেন হি সভাতলে
59.15
মৈত্রেয়েণাভিশপ্তশ্চ পূর্বমেব মহর্ষিণা
ঊরূ ভেত্স্যতি তে ভীমো গদয়েতি পরংতপ
অতো দোষং ন পশ্যামি মা ক্রুধস্ত্বং প্রলম্বহন্
59.16
যৌনৈর্হার্দৈশ্চ সংবন্ধৈঃ সংবদ্ধাঃ স্মেহ পাণ্ডবৈঃ
তেষাং বৃদ্ধ্যাভিবৃদ্ধির্নো মা ক্রুধঃ পুরুষর্ষভ
59.17
রাম উবাচ
ধর্মঃ সুচরিতঃ সদ্ভিঃ সহ দ্বাভ্যাং নিয়চ্ছতি
অর্থশ্চাত্যর্থলুব্ধস্য কামশ্চাতিপ্রসঙ্গিনঃ
59.18
ধর্মার্থৌ ধর্মকামৌ চ কামার্থৌ চাপ্যপীডয়ন্
ধর্মার্থকামান্যোঽভ্যেতি সোঽত্যন্তং সুখমশ্নুতে
59.19
তদিদং ব্যাকুলং সর্বং কৃতং ধর্মস্য পীডনাৎ
ভীমসেনেন গোবিন্দ কামং ত্বং তু যথাত্থ মাম্
59.20
বাসুদেব উবাচ
অরোষণো হি ধর্মাত্মা সততং ধর্মবত্সলঃ
ভবান্প্রখ্যায়তে লোকে তস্মাত্সংশাম্য মা ক্রুধঃ
59.21
প্রাপ্তং কলিয়ুগং বিদ্ধি প্রতিজ্ঞাং পাণ্ডবস্য চ
আনৃণ্যং যাতু বৈরস্য প্রতিজ্ঞায়াশ্চ পাণ্ডবঃ
59.22
সংজয় উবাচ
ধর্মচ্ছলমপি শ্রুত্বা কেশবাত্স বিশাং পতে
নৈব প্রীতমনা রামো বচনং প্রাহ সংসদি
59.23
হত্বাধর্মেণ রাজানং ধর্মাত্মানং সুয়োধনম্
জিহ্ময়োধীতি লোকেঽস্মিন্খ্যাতিং যাস্যতি পাণ্ডবঃ
59.24
দুর্যোধনোঽপি ধর্মাত্মা গতিং যাস্যতি শাশ্বতীম্
ঋজুয়োধী হতো রাজা ধার্তরাষ্ট্রো নরাধিপঃ
59.25
যুদ্ধদীক্ষাং প্রবিশ্যাজৌ রণয়জ্ঞং বিতত্য চ
হুত্বাত্মানমমিত্রাগ্নৌ প্রাপ চাবভৃথং যশঃ
59.26
ইত্যুক্ত্বা রথমাস্থায় রৌহিণেয়ঃ প্রতাপবান্
শ্বেতাভ্রশিখরাকারঃ প্রয়য়ৌ দ্বারকাং প্রতি
59.27
পাঞ্চালাশ্চ সবার্ষ্ণেয়াঃ পাণ্ডবাশ্চ বিশাং পতে
রামে দ্বারবতীং যাতে নাতিপ্রমনসোঽভবন্
59.28
ততো যুধিষ্ঠিরং দীনং চিন্তাপরমধোমুখম্
শোকোপহতসংকল্পং বাসুদেবোঽব্রবীদিদম্
59.29
ধর্মরাজ কিমর্থং ত্বমধর্মমনুমন্যসে
হতবন্ধোর্যদেতস্য পতিতস্য বিচেতসঃ
59.30
দুর্যোধনস্য ভীমেন মৃদ্যমানং শিরঃ পদা
উপপ্রেক্ষসি কস্মাত্ত্বং ধর্মজ্ঞঃ সন্নরাধিপ
59.31
যুধিষ্ঠির উবাচ
ন মমৈতত্প্রিয়ং কৃষ্ণ যদ্রাজানং বৃকোদরঃ
পদা মূর্ধ্ন্যস্পৃশত্ক্রোধান্ন চ হৃষ্যে কুলক্ষয়ে
59.32
নিকৃত্যা নিকৃতা নিত্যং ধৃতরাষ্ট্রসুতৈর্বয়ম্
বহূনি পরুষাণ্যুক্ত্বা বনং প্রস্থাপিতাঃ স্ম হ
59.33
ভীমসেনস্য তদ্দুঃখমতীব হৃদি বর্ততে
ইতি সংচিন্ত্য বার্ষ্ণেয় ময়ৈতত্সমুপেক্ষিতম্
59.34
তস্মাদ্ধত্বাকৃতপ্রজ্ঞং লুব্ধং কামবশানুগম্
লভতাং পাণ্ডবঃ কামং ধর্মেঽধর্মেঽপি বা কৃতে
59.35
সংজয় উবাচ
ইত্যুক্তে ধর্মরাজেন বাসুদেবোঽব্রবীদিদম্
কামমস্ত্বেবমিতি বৈ কৃচ্ছ্রাদ্যদুকুলোদ্বহঃ
59.36
ইত্যুক্তো বাসুদেবেন ভীমপ্রিয়হিতৈষিণা
অন্বমোদত তত্সর্বং যদ্ভীমেন কৃতং যুধি
59.37
ভীমসেনোঽপি হত্বাজৌ তব পুত্রমমর্ষণঃ
অভিবাদ্যাগ্রতঃ স্থিত্বা সংপ্রহৃষ্টঃ কৃতাঞ্জলিঃ
59.38
প্রোবাচ সুমহাতেজা ধর্মরাজং যুধিষ্ঠিরম্
হর্ষাদুত্ফুল্লনয়নো জিতকাশী বিশাং পতে
59.39
তবাদ্য পৃথিবী রাজন্ক্ষেমা নিহতকণ্টকা
তাং প্রশাধি মহারাজ স্বধর্মমনুপালয়ন্
59.40
যস্তু কর্তাস্য বৈরস্য নিকৃত্যা নিকৃতিপ্রিয়ঃ
সোঽয়ং বিনিহতঃ শেতে পৃথিব্যাং পৃথিবীপতে
59.41
দুঃশাসনপ্রভৃতয়ঃ সর্বে তে চোগ্রবাদিনঃ
রাধেয়ঃ শকুনিশ্চাপি নিহতাস্তব শত্রবঃ
59.42
সেয়ং রত্নসমাকীর্ণা মহী সবনপর্বতা
উপাবৃত্তা মহারাজ ত্বামদ্য নিহতদ্বিষম্
59.43
যুধিষ্ঠির উবাচ
গতং বৈরস্য নিধনং হতো রাজা সুয়োধনঃ
কৃষ্ণস্য মতমাস্থায় বিজিতেয়ং বসুংধরা
59.44
দিষ্ট্যা গতস্ত্বমানৃণ্যং মাতুঃ কোপস্য চোভয়োঃ
দিষ্ট্যা জয়সি দুর্ধর্ষ দিষ্ট্যা শত্রুর্নিপাতিতঃ