Utshovঅধ্যায় 58
58.1
সংজয় উবাচ
তং পাতিতং ততো দৃষ্ট্বা মহাশালমিবোদ্গতম্
প্রহৃষ্টমনসঃ সর্বে বভূবুস্তত্র পাণ্ডবাঃ
58.2
উন্মত্তমিব মাতঙ্গং সিংহেন বিনিপাতিতম্
দদৃশুর্হৃষ্টরোমাণঃ সর্বে তে চাপি সোমকাঃ
58.3
ততো দুর্যোধনং হত্বা ভীমসেনঃ প্রতাপবান্
পতিতং কৌরবেন্দ্রং তমুপগম্যেদমব্রবীৎ
58.4
গৌর্গৌরিতি পুরা মন্দ দ্রৌপদীমেকবাসসম্
যত্সভায়াং হসন্নস্মাংস্তদা বদসি দুর্মতে
তস্যাবহাসস্য ফলমদ্য ত্বং সমবাপ্নুহি
58.5
এবমুক্ত্বা স বামেন পদা মৌলিমুপাস্পৃশৎ
শিরশ্চ রাজসিংহস্য পাদেন সমলোডয়ৎ
58.6
তথৈব ক্রোধসংরক্তো ভীমঃ পরবলার্দনঃ
পুনরেবাব্রবীদ্বাক্যং যত্তচ্ছৃণু নরাধিপ
58.7
যেঽস্মান্পুরোঽপনৃত্যন্ত পুনর্গৌরিতি গৌরিতি
তান্বয়ং প্রতিনৃত্যামঃ পুনর্গৌরিতি গৌরিতি
58.8
নাস্মাকং নিকৃতির্বহ্নির্নাক্ষদ্যূতং ন বঞ্চনা
স্ববাহুবলমাশ্রিত্য প্রবাধামো বয়ং রিপূন্
58.9
সোঽবাপ্য বৈরস্য পরস্য পারং; বৃকোদরঃ প্রাহ শনৈঃ প্রহস্য
যুধিষ্ঠিরং কেশবসৃঞ্জয়াংশ্চ; ধনংজয়ং মাদ্রবতীসুতৌ চ
58.10
রজস্বলাং দ্রৌপদীমানয়ন্যে; যে চাপ্যকুর্বন্ত সদস্যবস্ত্রাম্
তান্পশ্যধ্বং পাণ্ডবৈর্ধার্তরাষ্ট্রা;ন্রণে হতাংস্তপসা যাজ্ঞসেন্যাঃ
58.11
যে নঃ পুরা ষণ্ঢতিলানবোচ;ন্ক্রূরা রাজ্ঞো ধৃতরাষ্ট্রস্য পুত্রাঃ
তে নো হতাঃ সগণাঃ সানুবন্ধাঃ; কামং স্বর্গং নরকং বা ব্রজামঃ
58.12
পুনশ্চ রাজ্ঞঃ পতিতস্য ভূমৌ; স তাং গদাং স্কন্ধগতাং নিরীক্ষ্য
বামেন পাদেন শিরঃ প্রমৃদ্য; দুর্যোধনং নৈকৃতিকেত্যবোচৎ
58.13
হৃষ্টেন রাজন্কুরুপার্থিবস্য; ক্ষুদ্রাত্মনা ভীমসেনেন পাদম্
দৃষ্ট্বা কৃতং মূর্ধনি নাভ্যনন্দ;ন্ধর্মাত্মানঃ সোমকানাং প্রবর্হাঃ
58.14
তব পুত্রং তথা হত্বা কত্থমানং বৃকোদরম্
নৃত্যমানং চ বহুশো ধর্মরাজোঽব্রবীদিদম্
58.15
মা শিরোঽস্য পদা মর্দীর্মা ধর্মস্তেঽত্যগান্মহান্
রাজা জ্ঞাতির্হতশ্চায়ং নৈতন্ন্যায্যং তবানঘ
58.16
বিধ্বস্তোঽয়ং হতামাত্যো হতভ্রাতা হতপ্রজঃ
উত্সন্নপিণ্ডো ভ্রাতা চ নৈতন্ন্যায্যং কৃতং ত্বয়া
58.17
ধার্মিকো ভীমসেনোঽসাবিত্যাহুস্ত্বাং পুরা জনাঃ
স কস্মাদ্ভীমসেন ত্বং রাজানমধিতিষ্ঠসি
58.18
দৃষ্ট্বা দুর্যোধনং রাজা কুন্তীপুত্রস্তথাগতম্
নেত্রাভ্যামশ্রুপূর্ণাভ্যামিদং বচনমব্রবীৎ
58.19
নূনমেতদ্বলবতা ধাত্রাদিষ্টং মহাত্মনা
যদ্বয়ং ত্বাং জিঘাংসামস্ত্বং চাস্মান্কুরুসত্তম
58.20
আত্মনো হ্যপরাধেন মহদ্ব্যসনমীদৃশম্
প্রাপ্তবানসি যল্লোভান্মদাদ্বাল্যাচ্চ ভারত
58.21
ঘাতয়িত্বা বয়স্যাংশ্চ ভ্রাতৄনথ পিতৄংস্তথা
পুত্রান্পৌত্রাংস্তথাচার্যাংস্ততোঽসি নিধনং গতঃ
58.22
তবাপরাধাদস্মাভির্ভ্রাতরস্তে মহারথাঃ
নিহতা জ্ঞাতয়শ্চান্যে দিষ্টং মন্যে দুরত্যয়ম্
58.23
স্নুষাশ্চ প্রস্নুষাশ্চৈব ধৃতরাষ্ট্রস্য বিহ্বলাঃ
গর্হয়িষ্যন্তি নো নূনং বিধবাঃ শোককর্শিতাঃ
58.24
এবমুক্ত্বা সুদুঃখার্তো নিশশ্বাস স পার্থিবঃ
বিললাপ চিরং চাপি ধর্মপুত্রো যুধিষ্ঠিরঃ