Utshovঅধ্যায় 57
57.1
সংজয় উবাচ
সমুদীর্ণং ততো দৃষ্ট্বা সংগ্রামং কুরুমুখ্যয়োঃ
অথাব্রবীদর্জুনস্তু বাসুদেবং যশস্বিনম্
57.2
অনয়োর্বীরয়োর্যুদ্ধে কো জ্যায়ান্ভবতো মতঃ
কস্য বা কো গুণো ভূয়ানেতদ্বদ জনার্দন
57.3
বাসুদেব উবাচ
উপদেশোঽনয়োস্তুল্যো ভীমস্তু বলবত্তরঃ
কৃতয়ত্নতরস্ত্বেষ ধার্তরাষ্ট্রো বৃকোদরাৎ
57.4
ভীমসেনস্তু ধর্মেণ যুধ্যমানো ন জেষ্যতি
অন্যায়েন তু যুধ্যন্বৈ হন্যাদেষ সুয়োধনম্
57.5
মায়য়া নির্জিতা দেবৈরসুরা ইতি নঃ শ্রুতম্
বিরোচনশ্চ শক্রেণ মায়য়া নির্জিতঃ সখে
মায়য়া চাক্ষিপত্তেজো বৃত্রস্য বলসূদনঃ
57.6
প্রতিজ্ঞাতং তু ভীমেন দ্যূতকালে ধনংজয়
ঊরূ ভেত্স্যামি তে সংখ্যে গদয়েতি সুয়োধনম্
57.7
সোঽয়ং প্রতিজ্ঞাং তাং চাপি পারয়িত্বারিকর্শনঃ
মায়াবিনং চ রাজানং মায়য়ৈব নিকৃন্ততু
57.8
যদ্যেষ বলমাস্থায় ন্যায়েন প্রহরিষ্যতি
বিষমস্থস্ততো রাজা ভবিষ্যতি যুধিষ্ঠিরঃ
57.9
পুনরেব চ বক্ষ্যামি পাণ্ডবেদং নিবোধ মে
ধর্মরাজাপরাধেন ভয়ং নঃ পুনরাগতম্
57.10
কৃত্বা হি সুমহত্কর্ম হত্বা ভীষ্মমুখান্কুরূন্
জয়ঃ প্রাপ্তো যশশ্চাগ্র্যং বৈরং চ প্রতিয়াতিতম্
তদেবং বিজয়ঃ প্রাপ্তঃ পুনঃ সংশয়িতঃ কৃতঃ
57.11
অবুদ্ধিরেষা মহতী ধর্মরাজস্য পাণ্ডব
যদেকবিজয়ে যুদ্ধং পণিতং কৃতমীদৃশম্
সুয়োধনঃ কৃতী বীর একায়নগতস্তথা
57.12
অপি চোশনসা গীতঃ শ্রূয়তেঽয়ং পুরাতনঃ
শ্লোকস্তত্ত্বার্থসহিতস্তন্মে নিগদতঃ শৃণু
57.13
পুনরাবর্তমানানাং ভগ্নানাং জীবিতৈষিণাম্
ভেতব্যমরিশেষাণামেকায়নগতা হি তে
57.14
সুয়োধনমিমং ভগ্নং হতসৈন্যং হ্রদং গতম্
পরাজিতং বনপ্রেপ্সুং নিরাশং রাজ্যলম্ভনে
57.15
কো ন্বেষ সংয়ুগে প্রাজ্ঞঃ পুনর্দ্বংদ্বে সমাহ্বয়েৎ
অপি বো নির্জিতং রাজ্যং ন হরেত সুয়োধনঃ
57.16
যস্ত্রয়োদশবর্ষাণি গদয়া কৃতনিশ্রমঃ
চরত্যূর্ধ্বং চ তির্যক্চ ভীমসেনজিঘাংসয়া
57.17
এবং চেন্ন মহাবাহুরন্যায়েন হনিষ্যতি
এষ বঃ কৌরবো রাজা ধার্তরাষ্ট্রো ভবিষ্যতি
57.18
ধনংজয়স্তু শ্রুত্বৈতত্কেশবস্য মহাত্মনঃ
প্রেক্ষতো ভীমসেনস্য হস্তেনোরুমতাডয়ৎ
57.19
গৃহ্য সংজ্ঞাং ততো ভীমো গদয়া ব্যচরদ্রণে
মণ্ডলানি বিচিত্রাণি যমকানীতরাণি চ
57.20
দক্ষিণং মণ্ডলং সব্যং গোমূত্রকমথাপি চ
ব্যচরত্পাণ্ডবো রাজন্নরিং সংমোহয়ন্নিব
57.21
তথৈব তব পুত্রোঽপি গদামার্গবিশারদঃ
ব্যচরল্লঘু চিত্রং চ ভীমসেনজিঘাংসয়া
57.22
আধুন্বন্তৌ গদে ঘোরে চন্দনাগরুরূষিতে
বৈরস্যান্তং পরীপ্সন্তৌ রণে ক্রুদ্ধাবিবান্তকৌ
57.23
অন্যোন্যং তৌ জিঘাংসন্তৌ প্রবীরৌ পুরুষর্ষভৌ
যুয়ুধাতে গরুত্মন্তৌ যথা নাগামিষৈষিণৌ
57.24
মণ্ডলানি বিচিত্রাণি চরতোর্নৃপভীময়োঃ
গদাসংপাতজাস্তত্র প্রজজ্ঞুঃ পাবকার্চিষঃ
57.25
সমং প্রহরতোস্তত্র শূরয়োর্বলিনোর্মৃধে
ক্ষুব্ধয়োর্বায়ুনা রাজন্দ্বয়োরিব সমুদ্রয়োঃ
57.26
তয়োঃ প্রহরতোস্তুল্যং মত্তকুঞ্জরয়োরিব
গদানির্ঘাতসংহ্রাদঃ প্রহারাণামজায়ত
57.27
তস্মিংস্তদা সংপ্রহারে দারুণে সংকুলে ভৃশম্
উভাবপি পরিশ্রান্তৌ যুধ্যমানাবরিংদমৌ
57.28
তৌ মুহূর্তং সমাশ্বস্য পুনরেব পরংতপৌ
অভ্যহারয়তাং ক্রুদ্ধৌ প্রগৃহ্য মহতী গদে
57.29
তয়োঃ সমভবদ্যুদ্ধং ঘোররূপমসংবৃতম্
গদানিপাতৈ রাজেন্দ্র তক্ষতোর্বৈ পরস্পরম্
57.30
ব্যায়ামপ্রদ্রুতৌ তৌ তু বৃষভাক্ষৌ তরস্বিনৌ
অন্যোন্যং জঘ্নতুর্বীরৌ পঙ্কস্থৌ মহিষাবিব
57.31
জর্জরীকৃতসর্বাঙ্গৌ রুধিরেণাভিসংপ্লুতৌ
দদৃশাতে হিমবতি পুষ্পিতাবিব কিংশুকৌ
57.32
দুর্যোধনেন পার্থস্তু বিবরে সংপ্রদর্শিতে
ঈষদুত্স্ময়মানস্তু সহসা প্রসসার হ
57.33
তমভ্যাশগতং প্রাজ্ঞো রণে প্রেক্ষ্য বৃকোদরঃ
অবাক্ষিপদ্গদাং তস্মৈ বেগেন মহতা বলী
57.34
অবক্ষেপং তু তং দৃষ্ট্বা পুত্রস্তব বিশাং পতে
অপাসর্পত্ততঃ স্থানাত্সা মোঘা ন্যপতদ্ভুবি
57.35
মোক্ষয়িত্বা প্রহারং তং সুতস্তব স সংভ্রমাৎ
ভীমসেনং চ গদয়া প্রাহরত্কুরুসত্তমঃ
57.36
তস্য বিষ্যন্দমানেন রুধিরেণামিতৌজসঃ
প্রহারগুরুপাতাচ্চ মূর্ছেব সমজায়ত
57.37
দুর্যোধনস্তং চ বেদ পীডিতং পাণ্ডবং রণে
ধারয়ামাস ভীমোঽপি শরীরমতিপীডিতম্
57.38
অমন্যত স্থিতং হ্যেনং প্রহরিষ্যন্তমাহবে
অতো ন প্রাহরত্তস্মৈ পুনরেব তবাত্মজঃ
57.39
ততো মুহূর্তমাশ্বস্য দুর্যোধনমবস্থিতম্
বেগেনাভ্যদ্রবদ্রাজন্ভীমসেনঃ প্রতাপবান্
57.40
তমাপতন্তং সংপ্রেক্ষ্য সংরব্ধমমিতৌজসম্
মোঘমস্য প্রহারং তং চিকীর্ষুর্ভরতর্ষভ
57.41
অবস্থানে মতিং কৃত্বা পুত্রস্তব মহামনাঃ
ইয়েষোত্পতিতুং রাজংশ্ছলয়িষ্যন্বৃকোদরম্
57.42
অবুধ্যদ্ভীমসেনস্তদ্রাজ্ঞস্তস্য চিকীর্ষিতম্
অথাস্য সমভিদ্রুত্য সমুত্ক্রম্য চ সিংহবৎ
57.43
সৃত্যা বঞ্চয়তো রাজন্পুনরেবোত্পতিষ্যতঃ
ঊরুভ্যাং প্রাহিণোদ্রাজন্গদাং বেগেন পাণ্ডবঃ
57.44
সা বজ্রনিষ্পেষসমা প্রহিতা ভীমকর্মণা
ঊরূ দুর্যোধনস্যাথ বভঞ্জ প্রিয়দর্শনৌ
57.45
স পপাত নরব্যাঘ্রো বসুধামনুনাদয়ন্
ভগ্নোরুর্ভীমসেনেন পুত্রস্তব মহীপতে
57.46
ববুর্বাতাঃ সনির্ঘাতাঃ পাংসুবর্ষং পপাত চ
চচাল পৃথিবী চাপি সবৃক্ষক্ষুপপর্বতা
57.47
তস্মিন্নিপতিতে বীরে পত্যৌ সর্বমহীক্ষিতাম্
মহাস্বনা পুনর্দীপ্তা সনির্ঘাতা ভয়ংকরী
পপাত চোল্কা মহতী পতিতে পৃথিবীপতৌ
57.48
তথা শোণিতবর্ষং চ পাংসুবর্ষং চ ভারত
ববর্ষ মঘবাংস্তত্র তব পুত্রে নিপাতিতে
57.49
যক্ষাণাং রাক্ষসানাং চ পিশাচানাং তথৈব চ
অন্তরিক্ষে মহানাদঃ শ্রূয়তে ভরতর্ষভ
57.50
তেন শব্দেন ঘোরেণ মৃগাণামথ পক্ষিণাম্
জজ্ঞে ঘোরতমঃ শব্দো বহূনাং সর্বতোদিশম্
57.51
যে তত্র বাজিনঃ শেষা গজাশ্চ মনুজৈঃ সহ
মুমুচুস্তে মহানাদং তব পুত্রে নিপাতিতে
57.52
ভেরীশঙ্খমৃদঙ্গানামভবচ্চ স্বনো মহান্
অন্তর্ভূমিগতশ্চৈব তব পুত্রে নিপাতিতে
57.53
বহুপাদৈর্বহুভুজৈঃ কবন্ধৈর্ঘোরদর্শনৈঃ
নৃত্যদ্ভির্ভয়দৈর্ব্যাপ্তা দিশস্তত্রাভবন্নৃপ
57.54
ধ্বজবন্তোঽস্ত্রবন্তশ্চ শস্ত্রবন্তস্তথৈব চ
প্রাকম্পন্ত ততো রাজংস্তব পুত্রে নিপাতিতে
57.55
হ্রদাঃ কূপাশ্চ রুধিরমুদ্বেমুর্নৃপসত্তম
নদ্যশ্চ সুমহাবেগাঃ প্রতিস্রোতোবহাভবন্
57.56
পুল্লিঙ্গা ইব নার্যস্তু স্ত্রীলিঙ্গাঃ পুরুষাভবন্
দুর্যোধনে তদা রাজন্পতিতে তনয়ে তব
57.57
দৃষ্ট্বা তানদ্ভুতোত্পাতান্পাঞ্চালাঃ পাণ্ডবৈঃ সহ
আবিগ্নমনসঃ সর্বে বভূবুর্ভরতর্ষভ
57.58
যয়ুর্দেবা যথাকামং গন্ধর্বাপ্সরসস্তথা
কথয়ন্তোঽদ্ভুতং যুদ্ধং সুতয়োস্তব ভারত
57.59
তথৈব সিদ্ধা রাজেন্দ্র তথা বাতিকচারণাঃ
নরসিংহৌ প্রশংসন্তৌ বিপ্রজগ্মুর্যথাগতম্