Utshovঅধ্যায় 56
56.1
সংজয় উবাচ
ততো দুর্যোধনো দৃষ্ট্বা ভীমসেনং তথাগতম্
প্রত্যুদ্যয়াবদীনাত্মা বেগেন মহতা নদন্
56.2
সমাপেততুরানদ্য শৃঙ্গিণৌ বৃষভাবিব
মহানির্ঘাতঘোষশ্চ সংপ্রহারস্তয়োরভূৎ
56.3
অভবচ্চ তয়োর্যুদ্ধং তুমুলং রোমহর্ষণম্
জিগীষতোর্যুধান্যোন্যমিন্দ্রপ্রহ্রাদয়োরিব
56.4
রুধিরোক্ষিতসর্বাঙ্গৌ গদাহস্তৌ মনস্বিনৌ
দদৃশাতে মহাত্মানৌ পুষ্পিতাবিব কিংশুকৌ
56.5
তথা তস্মিন্মহায়ুদ্ধে বর্তমানে সুদারুণে
খদ্যোতসংঘৈরিব খং দর্শনীয়ং ব্যরোচত
56.6
তথা তস্মিন্বর্তমানে সংকুলে তুমুলে ভৃশম্
উভাবপি পরিশ্রান্তৌ যুধ্যমানাবরিংদমৌ
56.7
তৌ মুহূর্তং সমাশ্বস্য পুনরেব পরংতপৌ
অভ্যহারয়তাং তত্র সংপ্রগৃহ্য গদে শুভে
56.8
তৌ তু দৃষ্ট্বা মহাবীর্যৌ সমাশ্বস্তৌ নরর্ষভৌ
বলিনৌ বারণৌ যদ্বদ্বাশিতার্থে মদোত্কটৌ
56.9
অপারবীর্যৌ সংপ্রেক্ষ্য প্রগৃহীতগদাবুভৌ
বিস্ময়ং পরমং জগ্মুর্দেবগন্ধর্বদানবাঃ
56.10
প্রগৃহীতগদৌ দৃষ্ট্বা দুর্যোধনবৃকোদরৌ
সংশয়ঃ সর্বভূতানাং বিজয়ে সমপদ্যত
56.11
সমাগম্য ততো ভূয়ো ভ্রাতরৌ বলিনাং বরৌ
অন্যোন্যস্যান্তরপ্রেপ্সূ প্রচক্রাতেঽন্তরং প্রতি
56.12
যমদণ্ডোপমাং গুর্বীমিন্দ্রাশনিমিবোদ্যতাম্
দদৃশুঃ প্রেক্ষকা রাজন্রৌদ্রীং বিশসনীং গদাম্
56.13
আবিধ্যতো গদাং তস্য ভীমসেনস্য সংয়ুগে
শব্দঃ সুতুমুলো ঘোরো মুহূর্তং সমপদ্যত
56.14
আবিধ্যন্তমভিপ্রেক্ষ্য ধার্তরাষ্ট্রোঽথ পাণ্ডবম্
গদামলঘুবেগাং তাং বিস্মিতঃ সংবভূব হ
56.15
চরংশ্চ বিবিধান্মার্গান্মণ্ডলানি চ ভারত
অশোভত তদা বীরো ভূয় এব বৃকোদরঃ
56.16
তৌ পরস্পরমাসাদ্য যত্তাবন্যোন্যরক্ষণে
মার্জারাবিব ভক্ষার্থে ততক্ষাতে মুহুর্মুহুঃ
56.17
অচরদ্ভীমসেনস্তু মার্গান্বহুবিধাংস্তথা
মণ্ডলানি বিচিত্রাণি স্থানানি বিবিধানি চ
56.18
গোমূত্রিকাণি চিত্রাণি গতপ্রত্যাগতানি চ
পরিমোক্ষং প্রহারাণাং বর্জনং পরিধাবনম্
56.19
অভিদ্রবণমাক্ষেপমবস্থানং সবিগ্রহম্
পরাবর্তনসংবর্তমবপ্লুতমথাপ্লুতম্
উপন্যস্তমপন্যস্তং গদায়ুদ্ধবিশারদৌ
56.20
এবং তৌ বিচরন্তৌ তু ন্যঘ্নতাং বৈ পরস্পরম্
বঞ্চয়ন্তৌ পুনশ্চৈব চেরতুঃ কুরুসত্তমৌ
56.21
বিক্রীডন্তৌ সুবলিনৌ মণ্ডলানি প্রচেরতুঃ
গদাহস্তৌ ততস্তৌ তু মণ্ডলাবস্থিতৌ বলী
56.22
দক্ষিণং মণ্ডলং রাজন্ধার্তরাষ্ট্রোঽভ্যবর্তত
সব্যং তু মণ্ডলং তত্র ভীমসেনোঽভ্যবর্তত
56.23
তথা তু চরতস্তস্য ভীমস্য রণমূর্ধনি
দুর্যোধনো মহারাজ পার্শ্বদেশেঽভ্যতাডয়ৎ
56.24
আহতস্তু তদা ভীমস্তব পুত্রেণ ভারত
আবিধ্যত গদাং গুর্বীং প্রহারং তমচিন্তয়ন্
56.25
ইন্দ্রাশনিসমাং ঘোরাং যমদণ্ডমিবোদ্যতাম্
দদৃশুস্তে মহারাজ ভীমসেনস্য তাং গদাম্
56.26
আবিধ্যন্তং গদাং দৃষ্ট্বা ভীমসেনং তবাত্মজঃ
সমুদ্যম্য গদাং ঘোরাং প্রত্যবিধ্যদরিংদমঃ
56.27
গদামারুতবেগেন তব পুত্রস্য ভারত
শব্দ আসীত্সুতুমুলস্তেজশ্চ সমজায়ত
56.28
স চরন্বিবিধান্মার্গান্মণ্ডলানি চ ভাগশঃ
সমশোভত তেজস্বী ভূয়ো ভীমাত্সুয়োধনঃ
56.29
আবিদ্ধা সর্ববেগেন ভীমেন মহতী গদা
সধূমং সার্চিষং চাগ্নিং মুমোচোগ্রা মহাস্বনা
56.30
আধূতাং ভীমসেনেন গদাং দৃষ্ট্বা সুয়োধনঃ
অদ্রিসারময়ীং গুর্বীমাবিধ্যন্বহ্বশোভত
56.31
গদামারুতবেগং হি দৃষ্ট্বা তস্য মহাত্মনঃ
ভয়ং বিবেশ পাণ্ডূন্বৈ সর্বানেব সসোমকান্
56.32
তৌ দর্শয়ন্তৌ সমরে যুদ্ধক্রীডাং সমন্ততঃ
গদাভ্যাং সহসান্যোন্যমাজঘ্নতুররিংদমৌ
56.33
তৌ পরস্পরমাসাদ্য দংষ্ট্রাভ্যাং দ্বিরদৌ যথা
অশোভেতাং মহারাজ শোণিতেন পরিপ্লুতৌ
56.34
এবং তদভবদ্যুদ্ধং ঘোররূপমসংবৃতম্
পরিবৃত্তেঽহনি ক্রূরং বৃত্রবাসবয়োরিব
56.35
দৃষ্ট্বা ব্যবস্থিতং ভীমং তব পুত্রো মহাবলঃ
চরংশ্চিত্রতরান্মার্গান্কৌন্তেয়মভিদুদ্রুবে
56.36
তস্য ভীমো মহাবেগাং জাম্বূনদপরিষ্কৃতাম্
অভিক্রুদ্ধস্য ক্রুদ্ধস্তু তাডয়ামাস তাং গদাম্
56.37
সবিস্ফুলিঙ্গো নির্হ্রাদস্তয়োস্তত্রাভিঘাতজঃ
প্রাদুরাসীন্মহারাজ সৃষ্টয়োর্বজ্রয়োরিব
56.38
বেগবত্যা তয়া তত্র ভীমসেনপ্রমুক্তয়া
নিপতন্ত্যা মহারাজ পৃথিবী সমকম্পত
56.39
তাং নামৃষ্যত কৌরব্যো গদাং প্রতিহতাং রণে
মত্তো দ্বিপ ইব ক্রুদ্ধঃ প্রতিকুঞ্জরদর্শনাৎ
56.40
স সব্যং মণ্ডলং রাজন্নুদ্ভ্রাম্য কৃতনিশ্চয়ঃ
আজঘ্নে মূর্ধ্নি কৌন্তেয়ং গদয়া ভীমবেগয়া
56.41
তয়া ত্বভিহতো ভীমঃ পুত্রেণ তব পাণ্ডবঃ
নাকম্পত মহারাজ তদদ্ভুতমিবাভবৎ
56.42
আশ্চর্যং চাপি তদ্রাজন্সর্বসৈন্যান্যপূজয়ন্
যদ্গদাভিহতো ভীমো নাকম্পত পদাত্পদম্
56.43
ততো গুরুতরাং দীপ্তাং গদাং হেমপরিষ্কৃতাম্
দুর্যোধনায় ব্যসৃজদ্ভীমো ভীমপরাক্রমঃ
56.44
তং প্রহারমসংভ্রান্তো লাঘবেন মহাবলঃ
মোঘং দুর্যোধনশ্চক্রে তত্রাভূদ্বিস্ময়ো মহান্
56.45
সা তু মোঘা গদা রাজন্পতন্তী ভীমচোদিতা
চালয়ামাস পৃথিবীং মহানির্ঘাতনিস্বনা
56.46
আস্থায় কৌশিকান্মার্গানুত্পতন্স পুনঃ পুনঃ
গদানিপাতং প্রজ্ঞায় ভীমসেনমবঞ্চয়ৎ
56.47
বঞ্চয়িত্বা তথা ভীমং গদয়া কুরুসত্তমঃ
তাডয়ামাস সংক্রুদ্ধো বক্ষোদেশে মহাবলঃ
56.48
গদয়াভিহতো ভীমো মুহ্যমানো মহারণে
নাভ্যমন্যত কর্তব্যং পুত্রেণাভ্যাহতস্তব
56.49
তস্মিংস্তথা বর্তমানে রাজন্সোমকপাণ্ডবাঃ
ভৃশোপহতসংকল্পা নহৃষ্টমনসোঽভবন্
56.50
স তু তেন প্রহারেণ মাতঙ্গ ইব রোষিতঃ
হস্তিবদ্ধস্তিসংকাশমভিদুদ্রাব তে সুতম্
56.51
ততস্তু রভসো ভীমো গদয়া তনয়ং তব
অভিদুদ্রাব বেগেন সিংহো বনগজং যথা
56.52
উপসৃত্য তু রাজানং গদামোক্ষবিশারদঃ
আবিধ্যত গদাং রাজন্সমুদ্দিশ্য সুতং তব
56.53
অতাডয়দ্ভীমসেনঃ পার্শ্বে দুর্যোধনং তদা
স বিহ্বলঃ প্রহারেণ জানুভ্যামগমন্মহীম্
56.54
তস্মিংস্তু ভরতশ্রেষ্ঠে জানুভ্যামবনীং গতে
উদতিষ্ঠত্ততো নাদঃ সৃঞ্জয়ানাং জগত্পতে
56.55
তেষাং তু নিনদং শ্রুত্বা সৃঞ্জয়ানাং নরর্ষভঃ
অমর্ষাদ্ভরতশ্রেষ্ঠ পুত্রস্তে সমকুপ্যত
56.56
উত্থায় তু মহাবাহুঃ ক্রুদ্ধো নাগ ইব শ্বসন্
দিধক্ষন্নিব নেত্রাভ্যাং ভীমসেনমবৈক্ষত
56.57
ততঃ স ভরতশ্রেষ্ঠো গদাপাণিরভিদ্রবৎ
প্রমথিষ্যন্নিব শিরো ভীমসেনস্য সংয়ুগে
56.58
স মহাত্মা মহাত্মানং ভীমং ভীমপরাক্রমঃ
অতাডয়চ্ছঙ্খদেশে স চচালাচলোপমঃ
56.59
স ভূয়ঃ শুশুভে পার্থস্তাডিতো গদয়া রণে
উদ্ভিন্নরুধিরো রাজন্প্রভিন্ন ইব কুঞ্জরঃ
56.60
ততো গদাং বীরহণীময়স্ময়ীং; প্রগৃহ্য বজ্রাশনিতুল্যনিস্বনাম্
অতাডয়চ্ছত্রুমমিত্রকর্শনো; বলেন বিক্রম্য ধনংজয়াগ্রজঃ
56.61
স ভীমসেনাভিহতস্তবাত্মজঃ; পপাত সংকম্পিতদেহবন্ধনঃ
সুপুষ্পিতো মারুতবেগতাডিতো; মহাবনে সাল ইবাবঘূর্ণিতঃ
56.62
ততঃ প্রণেদুর্জহৃষুশ্চ পাণ্ডবাঃ; সমীক্ষ্য পুত্রং পতিতং ক্ষিতৌ তব
ততঃ সুতস্তে প্রতিলভ্য চেতনাং; সমুত্পপাত দ্বিরদো যথা হ্রদাৎ
56.63
স পার্থিবো নিত্যমমর্ষিতস্তদা; মহারথঃ শিক্ষিতবত্পরিভ্রমন্
অতাডয়ত্পাণ্ডবমগ্রতঃ স্থিতং; স বিহ্বলাঙ্গো জগতীমুপাস্পৃশৎ
56.64
স সিংহনাদান্বিননাদ কৌরবো; নিপাত্য ভূমৌ যুধি ভীমমোজসা
বিভেদ চৈবাশনিতুল্যতেজসা; গদানিপাতেন শরীররক্ষণম্
56.65
ততোঽন্তরিক্ষে নিনদো মহানভূ;দ্দিবৌকসামপ্সরসাং চ নেদুষাম্
পপাত চোচ্চৈরমরপ্রবেরিতং; বিচিত্রপুষ্পোত্করবর্ষমুত্তমম্
56.66
ততঃ পরানাবিশদুত্তমং ভয়ং; সমীক্ষ্য ভূমৌ পতিতং নরোত্তমম্
অহীয়মানং চ বলেন কৌরবং; নিশম্য ভেদং চ দৃঢস্য বর্মণঃ
56.67
ততো মুহূর্তাদুপলভ্য চেতনাং; প্রমৃজ্য বক্ত্রং রুধিরার্দ্রমাত্মনঃ
ধৃতিং সমালম্ব্য বিবৃত্তলোচনো; বলেন সংস্তভ্য বৃকোদরঃ স্থিতঃ