Utshovঅধ্যায় 55
55.1
বৈশংপায়ন উবাচ
ততো বাগ্যুদ্ধমভবত্তুমুলং জনমেজয়
যত্র দুঃখান্বিতো রাজা ধৃতরাষ্ট্রোঽব্রবীদিদম্
55.2
ধিগস্তু খলু মানুষ্যং যস্য নিষ্ঠেয়মীদৃশী
একাদশচমূভর্তা যত্র পুত্রো মমাভিভূঃ
55.3
আজ্ঞাপ্য সর্বান্নৃপতীন্ভুক্ত্বা চেমাং বসুংধরাম্
গদামাদায় বেগেন পদাতিঃ প্রস্থিতো রণম্
55.4
ভূত্বা হি জগতো নাথো হ্যনাথ ইব মে সুতঃ
গদামুদ্যম্য যো যাতি কিমন্যদ্ভাগধেয়তঃ
55.5
অহো দুঃখং মহত্প্রাপ্তং পুত্রেণ মম সংজয়
এবমুক্ত্বা স দুঃখার্তো বিররাম জনাধিপঃ
55.6
সংজয় উবাচ
স মেঘনিনদো হর্ষাদ্বিনদন্নিব গোবৃষঃ
আজুহাব ততঃ পার্থং যুদ্ধায় যুধি বীর্যবান্
55.7
ভীমমাহ্বয়মানে তু কুরুরাজে মহাত্মনি
প্রাদুরাসন্সুঘোরাণি রূপাণি বিবিধান্যুত
55.8
ববুর্বাতাঃ সনির্ঘাতাঃ পাংসুবর্ষং পপাত চ
বভূবুশ্চ দিশঃ সর্বাস্তিমিরেণ সমাবৃতাঃ
55.9
মহাস্বনাঃ সনির্ঘাতাস্তুমুলা রোমহর্ষণাঃ
পেতুস্তথোল্কাঃ শতশঃ স্ফোটয়ন্ত্যো নভস্তলম্
55.10
রাহুশ্চাগ্রসদাদিত্যমপর্বণি বিশাং পতে
চকম্পে চ মহাকম্পং পৃথিবী সবনদ্রুমা
55.11
রূক্ষাশ্চ বাতাঃ প্রববুর্নীচৈঃ শর্করবর্ষিণঃ
গিরীণাং শিখরাণ্যেব ন্যপতন্ত মহীতলে
55.12
মৃগা বহুবিধাকারাঃ সংপতন্তি দিশো দশ
দীপ্তাঃ শিবাশ্চাপ্যনদন্ঘোররূপাঃ সুদারুণাঃ
55.13
নির্ঘাতাশ্চ মহাঘোরা বভূবূ রোমহর্ষণাঃ
দীপ্তায়াং দিশি রাজেন্দ্র মৃগাশ্চাশুভবাদিনঃ
55.14
উদপানগতাশ্চাপো ব্যবর্ধন্ত সমন্ততঃ
অশরীরা মহানাদাঃ শ্রূয়ন্তে স্ম তদা নৃপ
55.15
এবমাদীনি দৃষ্ট্বাথ নিমিত্তানি বৃকোদরঃ
উবাচ ভ্রাতরং জ্যেষ্ঠং ধর্মরাজং যুধিষ্ঠিরম্
55.16
নৈষ শক্তো রণে জেতুং মন্দাত্মা মাং সুয়োধনঃ
অদ্য ক্রোধং বিমোক্ষ্যামি নিগূঢং হৃদয়ে চিরম্
সুয়োধনে কৌরবেন্দ্রে খাণ্ডবে পাবকো যথা
55.17
শল্যমদ্যোদ্ধরিষ্যামি তব পাণ্ডব হৃচ্ছয়ম্
নিহত্য গদয়া পাপমিমং কুরুকুলাধমম্
55.18
অদ্য কীর্তিময়ীং মালাং প্রতিমোক্ষ্যাম্যহং ত্বয়ি
হত্বেমং পাপকর্মাণং গদয়া রণমূর্ধনি
55.19
অদ্যাস্য শতধা দেহং ভিনদ্মি গদয়ানয়া
নায়ং প্রবেষ্টা নগরং পুনর্বারণসাহ্বয়ম্
55.20
সর্পোত্সর্গস্য শয়নে বিষদানস্য ভোজনে
প্রমাণকোট্যাং পাতস্য দাহস্য জতুবেশ্মনি
55.21
সভায়ামবহাসস্য সর্বস্বহরণস্য চ
বর্ষমজ্ঞাতবাসস্য বনবাসস্য চানঘ
55.22
অদ্যান্তমেষাং দুঃখানাং গন্তা ভরতসত্তম
একাহ্না বিনিহত্যেমং ভবিষ্যাম্যাত্মনোঽনৃণঃ
55.23
অদ্যায়ুর্ধার্তরাষ্ট্রস্য দুর্মতেরকৃতাত্মনঃ
সমাপ্তং ভরতশ্রেষ্ঠ মাতাপিত্রোশ্চ দর্শনম্
55.24
অদ্যায়ং কুরুরাজস্য শংতনোঃ কুলপাংসনঃ
প্রাণাঞ্শ্রিয়ং চ রাজ্যং চ ত্যক্ত্বা শেষ্যতি ভূতলে
55.25
রাজা চ ধৃতরাষ্ট্রোঽদ্য শ্রুত্বা পুত্রং ময়া হতম্
স্মরিষ্যত্যশুভং কর্ম যত্তচ্ছকুনিবুদ্ধিজম্
55.26
ইত্যুক্ত্বা রাজশার্দূল গদামাদায় বীর্যবান্
অবাতিষ্ঠত যুদ্ধায় শক্রো বৃত্রমিবাহ্বয়ন্
55.27
তমুদ্যতগদং দৃষ্ট্বা কৈলাসমিব শৃঙ্গিণম্
ভীমসেনঃ পুনঃ ক্রুদ্ধো দুর্যোধনমুবাচ হ
55.28
রাজ্ঞশ্চ ধৃতরাষ্ট্রস্য তথা ত্বমপি চাত্মনঃ
স্মর তদ্দুষ্কৃতং কর্ম যদ্বৃত্তং বারণাবতে
55.29
দ্রৌপদী চ পরিক্লিষ্টা সভায়াং যদ্রজস্বলা
দ্যূতে চ বঞ্চিতো রাজা যত্ত্বয়া সৌবলেন চ
55.30
বনে দুঃখং চ যত্প্রাপ্তমস্মাভিস্ত্বত্কৃতং মহৎ
বিরাটনগরে চৈব যোন্যন্তরগতৈরিব
তত্সর্বং যাতয়াম্যদ্য দিষ্ট্যা দৃষ্টোঽসি দুর্মতে
55.31
ত্বত্কৃতেঽসৌ হতঃ শেতে শরতল্পে প্রতাপবান্
গাঙ্গেয়ো রথিনাং শ্রেষ্ঠো নিহতো যাজ্ঞসেনিনা
55.32
হতো দ্রোণশ্চ কর্ণশ্চ তথা শল্যঃ প্রতাপবান্
বৈরাগ্নেরাদিকর্তা চ শকুনিঃ সৌবলো হতঃ
55.33
প্রাতিকামী তথা পাপো দ্রৌপদ্যাঃ ক্লেশকৃদ্ধতঃ
ভ্রাতরস্তে হতাঃ সর্বে শূরা বিক্রান্তয়োধিনঃ
55.34
এতে চান্যে চ বহবো নিহতাস্ত্বত্কৃতে নৃপাঃ
ত্বামদ্য নিহনিষ্যামি গদয়া নাত্র সংশয়ঃ
55.35
ইত্যেবমুচ্চৈ রাজেন্দ্র ভাষমাণং বৃকোদরম্
উবাচ বীতভী রাজন্পুত্রস্তে সত্যবিক্রমঃ
55.36
কিং কত্থিতেন বহুধা যুধ্যস্ব ত্বং বৃকোদর
অদ্য তেঽহং বিনেষ্যামি যুদ্ধশ্রদ্ধাং কুলাধম
55.37
নৈব দুর্যোধনঃ ক্ষুদ্র কেনচিত্ত্বদ্বিধেন বৈ
শক্যস্ত্রাসয়িতুং বাচা যথান্যঃ প্রাকৃতো নরঃ
55.38
চিরকালেপ্সিতং দিষ্ট্যা হৃদয়স্থমিদং মম
ত্বয়া সহ গদায়ুদ্ধং ত্রিদশৈরুপপাদিতম্
55.39
কিং বাচা বহুনোক্তেন কত্থিতেন চ দুর্মতে
বাণী সংপদ্যতামেষা কর্মণা মা চিরং কৃথাঃ
55.40
তস্য তদ্বচনং শ্রুত্বা সর্ব এবাভ্যপূজয়ন্
রাজানঃ সোমকাশ্চৈব যে তত্রাসন্সমাগতাঃ
55.41
ততঃ সংপূজিতঃ সর্বৈঃ সংপ্রহৃষ্টতনূরুহঃ
ভূয়ো ধীরং মনশ্চক্রে যুদ্ধায় কুরুনন্দনঃ
55.42
তং মত্তমিব মাতঙ্গং তলতালৈর্নরাধিপাঃ
ভূয়ঃ সংহর্ষয়াং চক্রুর্দুর্যোধনমমর্ষণম্
55.43
তং মহাত্মা মহাত্মানং গদামুদ্যম্য পাণ্ডবঃ
অভিদুদ্রাব বেগেন ধার্তরাষ্ট্রং বৃকোদরঃ
55.44
বৃংহন্তি কুঞ্জরাস্তত্র হয়া হেষন্তি চাসকৃৎ
শস্ত্রাণি চাপ্যদীপ্যন্ত পাণ্ডবানাং জয়ৈষিণাম্