Utshovঅধ্যায় 54
54.1
বৈশংপায়ন উবাচ
এবং তদভবদ্যুদ্ধং তুমুলং জনমেজয়
যত্র দুঃখান্বিতো রাজা ধৃতরাষ্ট্রোঽব্রবীদিদম্
54.2
রামং সংনিহিতং দৃষ্ট্বা গদায়ুদ্ধ উপস্থিতে
মম পুত্রঃ কথং ভীমং প্রত্যয়ুধ্যত সংজয়
54.3
সংজয় উবাচ
রামসাংনিধ্যমাসাদ্য পুত্রো দুর্যোধনস্তব
যুদ্ধকামো মহাবাহুঃ সমহৃষ্যত বীর্যবান্
54.4
দৃষ্ট্বা লাঙ্গলিনং রাজা প্রত্যুত্থায় চ ভারত
প্রীত্যা পরময়া যুক্তো যুধিষ্ঠিরমথাব্রবীৎ
54.5
সমন্তপঞ্চকং ক্ষিপ্রমিতো যাম বিশাং পতে
প্রথিতোত্তরবেদী সা দেবলোকে প্রজাপতেঃ
54.6
তস্মিন্মহাপুণ্যতমে ত্রৈলোক্যস্য সনাতনে
সংগ্রামে নিধনং প্রাপ্য ধ্রুবং স্বর্গো ভবিষ্যতি
54.7
তথেত্যুক্ত্বা মহারাজ কুন্তীপুত্রো যুধিষ্ঠিরঃ
সমন্তপঞ্চকং বীরঃ প্রায়াদভিমুখঃ প্রভুঃ
54.8
ততো দুর্যোধনো রাজা প্রগৃহ্য মহতীং গদাম্
পদ্ভ্যামমর্ষাদ্দ্যুতিমানগচ্ছত্পাণ্ডবৈঃ সহ
54.9
তথা যান্তং গদাহস্তং বর্মণা চাপি দংশিতম্
অন্তরিক্ষগতা দেবাঃ সাধু সাধ্বিত্যপূজয়ন্
বাতিকাশ্চ নরা যেঽত্র দৃষ্ট্বা তে হর্ষমাগতাঃ
54.10
স পাণ্ডবৈঃ পরিবৃতঃ কুরুরাজস্তবাত্মজঃ
মত্তস্যেব গজেন্দ্রস্য গতিমাস্থায় সোঽব্রজৎ
54.11
ততঃ শঙ্খনিনাদেন ভেরীণাং চ মহাস্বনৈঃ
সিংহনাদৈশ্চ শূরাণাং দিশঃ সর্বাঃ প্রপূরিতাঃ
54.12
প্রতীচ্যভিমুখং দেশং যথোদ্দিষ্টং সুতেন তে
গত্বা চ তৈঃ পরিক্ষিপ্তং সমন্তাত্সর্বতোদিশম্
54.13
দক্ষিণেন সরস্বত্যাঃ স্বয়নং তীর্থমুত্তমম্
তস্মিন্দেশে ত্বনিরিণে তত্র যুদ্ধমরোচয়ন্
54.14
ততো ভীমো মহাকোটিং গদাং গৃহ্যাথ বর্মভৃৎ
বিভ্রদ্রূপং মহারাজ সদৃশং হি গরুত্মতঃ
54.15
অববদ্ধশিরস্ত্রাণঃ সংখ্যে কাঞ্চনবর্মভৃৎ
ররাজ রাজন্পুত্রস্তে কাঞ্চনঃ শৈলরাডিব
54.16
বর্মভ্যাং সংবৃতৌ বীরৌ ভীমদুর্যোধনাবুভৌ
সংয়ুগে চ প্রকাশেতে সংরব্ধাবিব কুঞ্জরৌ
54.17
রণমণ্ডলমধ্যস্থৌ ভ্রাতরৌ তৌ নরর্ষভৌ
অশোভেতাং মহারাজ চন্দ্রসূর্যাবিবোদিতৌ
54.18
তাবন্যোন্যং নিরীক্ষেতাং ক্রুদ্ধাবিব মহাদ্বিপৌ
দহন্তৌ লোচনৈ রাজন্পরস্পরবধৈষিণৌ
54.19
সংপ্রহৃষ্টমনা রাজন্গদামাদায় কৌরবঃ
সৃক্কিণী সংলিহন্রাজন্ক্রোধরক্তেক্ষণঃ শ্বসন্
54.20
ততো দুর্যোধনো রাজা গদামাদায় বীর্যবান্
ভীমসেনমভিপ্রেক্ষ্য গজো গজমিবাহ্বয়ৎ
54.21
অদ্রিসারময়ীং ভীমস্তথৈবাদায় বীর্যবান্
আহ্বয়ামাস নৃপতিং সিংহঃ সিংহং যথা বনে
54.22
তাবুদ্যতগদাপাণী দুর্যোধনবৃকোদরৌ
সংয়ুগে স্ম প্রকাশেতে গিরী সশিখরাবিব
54.23
তাবুভাবভিসংক্রুদ্ধাবুভৌ ভীমপরাক্রমৌ
উভৌ শিষ্যৌ গদায়ুদ্ধে রৌহিণেয়স্য ধীমতঃ
54.24
উভৌ সদৃশকর্মাণৌ যমবাসবয়োরিব
তথা সদৃশকর্মাণৌ বরুণস্য মহাবলৌ
54.25
বাসুদেবস্য রামস্য তথা বৈশ্রবণস্য চ
সদৃশৌ তৌ মহারাজ মধুকৈটভয়োর্যুধি
54.26
উভৌ সদৃশকর্মাণৌ রণে সুন্দোপসুন্দয়োঃ
তথৈব কালস্য সমৌ মৃত্যোশ্চৈব পরংতপৌ
54.27
অন্যোন্যমভিধাবন্তৌ মত্তাবিব মহাদ্বিপৌ
বাশিতাসংগমে দৃপ্তৌ শরদীব মদোত্কটৌ
54.28
মত্তাবিব জিগীষন্তৌ মাতঙ্গৌ ভরতর্ষভৌ
উভৌ ক্রোধবিষং দীপ্তং বমন্তাবুরগাবিব
54.29
অন্যোন্যমভিসংরব্ধৌ প্রেক্ষমাণাবরিংদমৌ
উভৌ ভরতশার্দূলৌ বিক্রমেণ সমন্বিতৌ
54.30
সিংহাবিব দুরাধর্ষৌ গদায়ুদ্ধে পরংতপৌ
নখদংষ্ট্রায়ুধৌ বীরৌ ব্যাঘ্রাবিব দুরুত্সহৌ
54.31
প্রজাসংহরণে ক্ষুব্ধৌ সমুদ্রাবিব দুস্তরৌ
লোহিতাঙ্গাবিব ক্রুদ্ধৌ প্রতপন্তৌ মহারথৌ
54.32
রশ্মিমন্তৌ মহাত্মানৌ দীপ্তিমন্তৌ মহাবলৌ
দদৃশাতে কুরুশ্রেষ্ঠৌ কালসূর্যাবিবোদিতৌ
54.33
ব্যাঘ্রাবিব সুসংরব্ধৌ গর্জন্তাবিব তোয়দৌ
জহৃষাতে মহাবাহূ সিংহৌ কেসরিণাবিব
54.34
গজাবিব সুসংরব্ধৌ জ্বলিতাবিব পাবকৌ
দদৃশুস্তৌ মহাত্মানৌ সশৃঙ্গাবিব পর্বতৌ
54.35
রোষাত্প্রস্ফুরমাণোষ্ঠৌ নিরীক্ষন্তৌ পরস্পরম্
তৌ সমেতৌ মহাত্মানৌ গদাহস্তৌ নরোত্তমৌ
54.36
উভৌ পরমসংহৃষ্টাবুভৌ পরমসংমতৌ
সদশ্বাবিব হেষন্তৌ বৃংহন্তাবিব কুঞ্জরৌ
54.37
বৃষভাবিব গর্জন্তৌ দুর্যোধনবৃকোদরৌ
দৈত্যাবিব বলোন্মত্তৌ রেজতুস্তৌ নরোত্তমৌ
54.38
ততো দুর্যোধনো রাজন্নিদমাহ যুধিষ্ঠিরম্
সৃঞ্জয়ৈঃ সহ তিষ্ঠন্তং তপন্তমিব ভাস্করম্
54.39
ইদং ব্যবসিতং যুদ্ধং মম ভীমস্য চোভয়োঃ
উপোপবিষ্টাঃ পশ্যধ্বং বিমর্দং নৃপসত্তমাঃ
54.40
ততঃ সমুপবিষ্টং তত্সুমহদ্রাজমণ্ডলম্
বিরাজমানং দদৃশে দিবীবাদিত্যমণ্ডলম্
54.41
তেষাং মধ্যে মহাবাহুঃ শ্রীমান্কেশবপূর্বজঃ
উপবিষ্টো মহারাজ পূজ্যমানঃ সমন্ততঃ
54.42
শুশুভে রাজমধ্যস্থো নীলবাসাঃ সিতপ্রভঃ
নক্ষত্রৈরিব সংপূর্ণো বৃতো নিশি নিশাকরঃ
54.43
তৌ তথা তু মহারাজ গদাহস্তৌ দুরাসদৌ
অন্যোন্যং বাগ্ভিরুগ্রাভিস্তক্ষমাণৌ ব্যবস্থিতৌ
54.44
অপ্রিয়াণি ততোঽন্যোন্যমুক্ত্বা তৌ কুরুপুংগবৌ
উদীক্ষন্তৌ স্থিতৌ বীরৌ বৃত্রশক্রাবিবাহবে