Utshovঅধ্যায় 53
53.1
বৈশংপায়ন উবাচ
কুরুক্ষেত্রং ততো দৃষ্ট্বা দত্ত্বা দায়াংশ্চ সাত্বতঃ
আশ্রমং সুমহদ্দিব্যমগমজ্জনমেজয়
53.2
মধূকাম্রবনোপেতং প্লক্ষন্যগ্রোধসংকুলম্
চিরিবিল্বয়ুতং পুণ্যং পনসার্জুনসংকুলম্
53.3
তং দৃষ্ট্বা যাদবশ্রেষ্ঠঃ প্রবরং পুণ্যলক্ষণম্
পপ্রচ্ছ তানৃষীন্সর্বান্কস্যাশ্রমবরস্ত্বয়ম্
53.4
তে তু সর্বে মহাত্মানমূচূ রাজন্হলায়ুধম্
শৃণু বিস্তরতো রাম যস্যায়ং পূর্বমাশ্রমঃ
53.5
অত্র বিষ্ণুঃ পুরা দেবস্তপ্তবাংস্তপ উত্তমম্
অত্রাস্য বিধিবদ্যজ্ঞাঃ সর্বে বৃত্তাঃ সনাতনাঃ
53.6
অত্রৈব ব্রাহ্মণী সিদ্ধা কৌমারব্রহ্মচারিণী
যোগয়ুক্তা দিবং যাতা তপঃসিদ্ধা তপস্বিনী
53.7
বভূব শ্রীমতী রাজঞ্শাণ্ডিল্যস্য মহাত্মনঃ
সুতা ধৃতব্রতা সাধ্বী নিয়তা ব্রহ্মচারিণী
53.8
সা তু প্রাপ্য পরং যোগং গতা স্বর্গমনুত্তমম্
ভুক্ত্বাশ্রমেঽশ্বমেধস্য ফলং ফলবতাং শুভা
গতা স্বর্গং মহাভাগা পূজিতা নিয়তাত্মভিঃ
53.9
অভিগম্যাশ্রমং পুণ্যং দৃষ্ট্বা চ যদুপুংগবঃ
ঋষীংস্তানভিবাদ্যাথ পার্শ্বে হিমবতোঽচ্যুতঃ
স্কন্ধাবারাণি সর্বাণি নিবর্ত্যারুরুহেঽচলম্
53.10
নাতিদূরং ততো গত্বা নগং তালধ্বজো বলী
পুণ্যং তীর্থবরং দৃষ্ট্বা বিস্ময়ং পরমং গতঃ
53.11
প্রভবং চ সরস্বত্যাঃ প্লক্ষপ্রস্রবণং বলঃ
সংপ্রাপ্তঃ কারপচনং তীর্থপ্রবরমুত্তমম্
53.12
হলায়ুধস্তত্র চাপি দত্ত্বা দানং মহাবলঃ
আপ্লুতঃ সলিলে শীতে তস্মাচ্চাপি জগাম হ
আশ্রমং পরমপ্রীতো মিত্রস্য বরুণস্য চ
53.13
ইন্দ্রোঽগ্নিরর্যমা চৈব যত্র প্রাক্প্রীতিমাপ্নুবন্
তং দেশং কারপচনাদ্যমুনায়াং জগাম হ
53.14
স্নাত্বা তত্রাপি ধর্মাত্মা পরাং তুষ্টিমবাপ্য চ
ঋষিভিশ্চৈব সিদ্ধৈশ্চ সহিতো বৈ মহাবলঃ
উপবিষ্টঃ কথাঃ শুভ্রাঃ শুশ্রাব যদুপুংগবঃ
53.15
তথা তু তিষ্ঠতাং তেষাং নারদো ভগবানৃষিঃ
আজগামাথ তং দেশং যত্র রামো ব্যবস্থিতঃ
53.16
জটামণ্ডলসংবীতঃ স্বর্ণচীরী মহাতপাঃ
হেমদণ্ডধরো রাজন্কমণ্ডলুধরস্তথা
53.17
কচ্ছপীং সুখশব্দাং তাং গৃহ্য বীণাং মনোরমাম্
নৃত্যে গীতে চ কুশলো দেবব্রাহ্মণপূজিতঃ
53.18
প্রকর্তা কলহানাং চ নিত্যং চ কলহপ্রিয়ঃ
তং দেশমগমদ্যত্র শ্রীমান্রামো ব্যবস্থিতঃ
53.19
প্রত্যুত্থায় তু তে সর্বে পূজয়িত্বা যতব্রতম্
দেবর্ষিং পর্যপৃচ্ছন্ত যথাবৃত্তং কুরূন্প্রতি
53.20
ততোঽস্যাকথয়দ্রাজন্নারদঃ সর্বধর্মবিৎ
সর্বমেব যথাবৃত্তমতীতং কুরুসংক্ষয়ম্
53.21
ততোঽব্রবীদ্রৌহিণেয়ো নারদং দীনয়া গিরা
কিমবস্থং তু তত্ক্ষত্রং যে চ তত্রাভবন্নৃপাঃ
53.22
শ্রুতমেতন্ময়া পূর্বং সর্বমেব তপোধন
বিস্তরশ্রবণে জাতং কৌতূহলমতীব মে
53.23
নারদ উবাচ
পূর্বমেব হতো ভীষ্মো দ্রোণঃ সিন্ধুপতিস্তথা
হতো বৈকর্তনঃ কর্ণঃ পুত্রাশ্চাস্য মহারথাঃ
53.24
ভূরিশ্রবা রৌহিণেয় মদ্ররাজশ্চ বীর্যবান্
এতে চান্যে চ বহবস্তত্র তত্র মহাবলাঃ
53.25
প্রিয়ান্প্রাণান্পরিত্যজ্য প্রিয়ার্থং কৌরবস্য বৈ
রাজানো রাজপুত্রাশ্চ সমরেষ্বনিবর্তিনঃ
53.26
অহতাংস্তু মহাবাহো শৃণু মে তত্র মাধব
ধার্তরাষ্ট্রবলে শেষাঃ কৃপো ভোজশ্চ বীর্যবান্
অশ্বত্থামা চ বিক্রান্তো ভগ্নসৈন্যা দিশো গতাঃ
53.27
দুর্যোধনো হতে সৈন্যে প্রদ্রুতেষু কৃপাদিষু
হ্রদং দ্বৈপায়নং নাম বিবেশ ভৃশদুঃখিতঃ
53.28
শয়ানং ধার্তরাষ্ট্রং তু স্তম্ভিতে সলিলে তদা
পাণ্ডবাঃ সহ কৃষ্ণেন বাগ্ভিরুগ্রাভিরার্দয়ন্
53.29
স তুদ্যমানো বলবান্বাগ্ভী রাম সমন্ততঃ
উত্থিতঃ প্রাগ্ঘ্রদাদ্বীরঃ প্রগৃহ্য মহতীং গদাম্
53.30
স চাপ্যুপগতো যুদ্ধং ভীমেন সহ সাংপ্রতম্
ভবিষ্যতি চ তত্সদ্যস্তয়ো রাম সুদারুণম্
53.31
যদি কৌতূহলং তেঽস্তি ব্রজ মাধব মা চিরম্
পশ্য যুদ্ধং মহাঘোরং শিষ্যয়োর্যদি মন্যসে
53.32
বৈশংপায়ন উবাচ
নারদস্য বচঃ শ্রুত্বা তানভ্যর্চ্য দ্বিজর্ষভান্
সর্বান্বিসর্জয়ামাস যে তেনাভ্যাগতাঃ সহ
গম্যতাং দ্বারকাং চেতি সোঽন্বশাদনুয়ায়িনঃ
53.33
সোঽবতীর্যাচলশ্রেষ্ঠাত্প্লক্ষপ্রস্রবণাচ্ছুভাৎ
ততঃ প্রীতমনা রামঃ শ্রুত্বা তীর্থফলং মহৎ
বিপ্রাণাং সংনিধৌ শ্লোকমগায়দিদমচ্যুতঃ
53.34
সরস্বতীবাসসমা কুতো রতিঃ; সরস্বতীবাসসমাঃ কুতো গুণাঃ
সরস্বতীং প্রাপ্য দিবং গতা জনাঃ; সদা স্মরিষ্যন্তি নদীং সরস্বতীম্
53.35
সরস্বতী সর্বনদীষু পুণ্যা; সরস্বতী লোকসুখাবহা সদা
সরস্বতীং প্রাপ্য জনাঃ সুদুষ্কৃতাঃ; সদা ন শোচন্তি পরত্র চেহ চ
53.36
ততো মুহুর্মুহুঃ প্রীত্যা প্রেক্ষমাণঃ সরস্বতীম্
হয়ৈর্যুক্তং রথং শুভ্রমাতিষ্ঠত পরংতপঃ
53.37
স শীঘ্রগামিনা তেন রথেন যদুপুংগবঃ
দিদৃক্ষুরভিসংপ্রাপ্তঃ শিষ্যয়ুদ্ধমুপস্থিতম্