অধ্যায় 52

52.1

ঋষয় ঊচুঃ
প্রজাপতেরুত্তরবেদিরুচ্যতে; সনাতনা রাম সমন্তপঞ্চকম্
সমীজিরে যত্র পুরা দিবৌকসো; বরেণ সত্রেণ মহাবরপ্রদাঃ

পুরা চ রাজর্ষিবরেণ ধীমতা; বহূনি বর্ষাণ্যমিতেন তেজসা
প্রকৃষ্টমেতত্কুরুণা মহাত্মনা; ততঃ কুরুক্ষেত্রমিতীহ পপ্রথে

রাম উবাচ
কিমর্থং কুরুণা কৃষ্টং ক্ষেত্রমেতন্মহাত্মনা
এতদিচ্ছাম্যহং শ্রোতুং কথ্যমানং তপোধনাঃ

ঋষয় ঊচুঃ
পুরা কিল কুরুং রাম কৃষন্তং সততোত্থিতম্
অভ্যেত্য শক্রস্ত্রিদিবাত্পর্যপৃচ্ছত কারণম্

কিমিদং বর্ততে রাজন্প্রয়ত্নেন পরেণ চ
রাজর্ষে কিমভিপ্রেতং যেনেয়ং কৃষ্যতে ক্ষিতিঃ

কুরুরুবাচ
ইহ যে পুরুষাঃ ক্ষেত্রে মরিষ্যন্তি শতক্রতো
তে গমিষ্যন্তি সুকৃতাঁল্লোকান্পাপবিবর্জিতান্

অবহস্য ততঃ শক্রো জগাম ত্রিদিবং প্রভুঃ
রাজর্ষিরপ্যনির্বিণ্ণঃ কর্ষত্যেব বসুংধরাম্

আগম্যাগম্য চৈবৈনং ভূয়ো ভূয়োঽবহস্য চ
শতক্রতুরনির্বিণ্ণং পৃষ্ট্বা পৃষ্ট্বা জগাম হ

যদা তু তপসোগ্রেণ চকর্ষ বসুধাং নৃপঃ
ততঃ শক্রোঽব্রবীদ্দেবান্রাজর্ষের্যচ্চিকীর্ষিতম্

তচ্ছ্রুত্বা চাব্রুবন্দেবাঃ সহস্রাক্ষমিদং বচঃ
বরেণ চ্ছন্দ্যতাং শক্র রাজর্ষির্যদি শক্যতে

যদি হ্যত্র প্রমীতা বৈ স্বর্গং গচ্ছন্তি মানবাঃ
অস্মাননিষ্ট্বা ক্রতুভির্ভাগো নো ন ভবিষ্যতি

আগম্য চ ততঃ শক্রস্তদা রাজর্ষিমব্রবীৎ
অলং খেদেন ভবতঃ ক্রিয়তাং বচনং মম

মানবা যে নিরাহারা দেহং ত্যক্ষ্যন্ত্যতন্দ্রিতাঃ
যুধি বা নিহতাঃ সম্যগপি তির্যগ্গতা নৃপ

তে স্বর্গভাজো রাজেন্দ্র ভবন্ত্বিতি মহামতে
তথাস্ত্বিতি ততো রাজা কুরুঃ শক্রমুবাচ হ

ততস্তমভ্যনুজ্ঞাপ্য প্রহৃষ্টেনান্তরাত্মনা
জগাম ত্রিদিবং ভূয়ঃ ক্ষিপ্রং বলনিষূদনঃ

এবমেতদ্যদুশ্রেষ্ঠ কৃষ্টং রাজর্ষিণা পুরা
শক্রেণ চাপ্যনুজ্ঞাতং পুণ্যং প্রাণান্বিমুঞ্চতাম্

অপি চাত্র স্বয়ং শক্রো জগৌ গাথাং সুরাধিপঃ
কুরুক্ষেত্রে নিবদ্ধাং বৈ তাং শৃণুষ্ব হলায়ুধ

পাংসবোঽপি কুরুক্ষেত্রাদ্বায়ুনা সমুদীরিতাঃ
অপি দুষ্কৃতকর্মাণং নয়ন্তি পরমাং গতিম্

সুরর্ষভা ব্রাহ্মণসত্তমাশ্চ; তথা নৃগাদ্যা নরদেবমুখ্যাঃ
ইষ্ট্বা মহার্হৈঃ ক্রতুভির্নৃসিংহ; সংন্যস্য দেহান্সুগতিং প্রপন্নাঃ

তরন্তুকারন্তুকয়োর্যদন্তরং; রামহ্রদানাং চ মচক্রুকস্য
এতত্কুরুক্ষেত্রসমন্তপঞ্চকং; প্রজাপতেরুত্তরবেদিরুচ্যতে

শিবং মহত্পুণ্যমিদং দিবৌকসাং; সুসংমতং স্বর্গগুণৈঃ সমন্বিতম্
অতশ্চ সর্বেঽপি বসুংধরাধিপা; হতা গমিষ্যন্তি মহাত্মনাং গতিম্