Utshovঅধ্যায় 51
51.1
জনমেজয় উবাচ
কথং কুমারী ভগবংস্তপোয়ুক্তা হ্যভূত্পুরা
কিমর্থং চ তপস্তেপে কো বাস্যা নিয়মোঽভবৎ
51.2
সুদুষ্করমিদং ব্রহ্মংস্ত্বত্তঃ শ্রুতমনুত্তমম্
আখ্যাহি তত্ত্বমখিলং যথা তপসি সা স্থিতা
51.3
বৈশংপায়ন উবাচ
ঋষিরাসীন্মহাবীর্যঃ কুণির্গার্গ্যো মহায়শাঃ
স তপ্ত্বা বিপুলং রাজংস্তপো বৈ তপতাং বরঃ
মানসীং স সুতাং সুভ্রূং সমুত্পাদিতবান্বিভুঃ
51.4
তাং চ দৃষ্ট্বা ভৃশং প্রীতঃ কুণির্গার্গ্যো মহায়শাঃ
জগাম ত্রিদিবং রাজন্সংত্যজ্যেহ কলেবরম্
51.5
সুভ্রূঃ সা হ্যথ কল্যাণী পুণ্ডরীকনিভেক্ষণা
মহতা তপসোগ্রেণ কৃত্বাশ্রমমনিন্দিতা
51.6
উপবাসৈঃ পূজয়ন্তী পিতৄন্দেবাংশ্চ সা পুরা
তস্যাস্তু তপসোগ্রেণ মহান্কালোঽত্যগান্নৃপ
51.7
সা পিত্রা দীয়মানাপি ভর্ত্রে নৈচ্ছদনিন্দিতা
আত্মনঃ সদৃশং সা তু ভর্তারং নান্বপশ্যত
51.8
ততঃ সা তপসোগ্রেণ পীডয়িত্বাত্মনস্তনুম্
পিতৃদেবার্চনরতা বভূব বিজনে বনে
51.9
সাত্মানং মন্যমানাপি কৃতকৃত্যং শ্রমান্বিতা
বার্দ্ধকেন চ রাজেন্দ্র তপসা চৈব কর্শিতা
51.10
সা নাশকদ্যদা গন্তুং পদাত্পদমপি স্বয়ম্
চকার গমনে বুদ্ধিং পরলোকায় বৈ তদা
51.11
মোক্তুকামাং তু তাং দৃষ্ট্বা শরীরং নারদোঽব্রবীৎ
অসংস্কৃতায়াঃ কন্যায়াঃ কুতো লোকাস্তবানঘে
51.12
এবং হি শ্রুতমস্মাভির্দেবলোকে মহাব্রতে
তপঃ পরমকং প্রাপ্তং ন তু লোকাস্ত্বয়া জিতাঃ
51.13
তন্নারদবচঃ শ্রুত্বা সাব্রবীদৃষিসংসদি
তপসোঽর্ধং প্রয়চ্ছামি পাণিগ্রাহস্য সত্তমাঃ
51.14
ইত্যুক্তে চাস্যা জগ্রাহ পাণিং গালবসংভবঃ
ঋষিঃ প্রাক্শৃঙ্গবান্নাম সময়ং চেদমব্রবীৎ
51.15
সময়েন তবাদ্যাহং পাণিং স্প্রক্ষ্যামি শোভনে
যদ্যেকরাত্রং বস্তব্যং ত্বয়া সহ ময়েতি হ
51.16
তথেতি সা প্রতিশ্রুত্য তস্মৈ পাণিং দদৌ তদা
চক্রে চ পাণিগ্রহণং তস্যোদ্বাহং চ গালবিঃ
51.17
সা রাত্রাবভবদ্রাজংস্তরুণী দেববর্ণিনী
দিব্যাভরণবস্ত্রা চ দিব্যস্রগনুলেপনা
51.18
তাং দৃষ্ট্বা গালবিঃ প্রীতো দীপয়ন্তীমিবাত্মনা
উবাস চ ক্ষপামেকাং প্রভাতে সাব্রবীচ্চ তম্
51.19
যস্ত্বয়া সময়ো বিপ্র কৃতো মে তপতাং বর
তেনোষিতাস্মি ভদ্রং তে স্বস্তি তেঽস্তু ব্রজাম্যহম্
51.20
সানুজ্ঞাতাব্রবীদ্ভূয়ো যোঽস্মিংস্তীর্থে সমাহিতঃ
বত্স্যতে রজনীমেকাং তর্পয়িত্বা দিবৌকসঃ
51.21
চত্বারিংশতমষ্টৌ চ দ্বে চাষ্টৌ সম্যগাচরেৎ
যো ব্রহ্মচর্যং বর্ষাণি ফলং তস্য লভেত সঃ
এবমুক্ত্বা ততঃ সাধ্বী দেহং ত্যক্ত্বা দিবং গতা
51.22
ঋষিরপ্যভবদ্দীনস্তস্যা রূপং বিচিন্তয়ন্
সময়েন তপোঽর্ধং চ কৃচ্ছ্রাত্প্রতিগৃহীতবান্
51.23
সাধয়িত্বা তদাত্মানং তস্যাঃ স গতিমন্বয়াৎ
দুঃখিতো ভরতশ্রেষ্ঠ তস্যা রূপবলাত্কৃতঃ
এতত্তে বৃদ্ধকন্যায়া ব্যাখ্যাতং চরিতং মহৎ
51.24
তত্রস্থশ্চাপি শুশ্রাব হতং শল্যং হলায়ুধঃ
তত্রাপি দত্ত্বা দানানি দ্বিজাতিভ্যঃ পরংতপ
শুশোচ শল্যং সংগ্রামে নিহতং পাণ্ডবৈস্তদা
51.25
সমন্তপঞ্চকদ্বারাত্ততো নিষ্ক্রম্য মাধবঃ
পপ্রচ্ছর্ষিগণান্রামঃ কুরুক্ষেত্রস্য যত্ফলম্
51.26
তে পৃষ্টা যদুসিংহেন কুরুক্ষেত্রফলং বিভো
সমাচখ্যুর্মহাত্মানস্তস্মৈ সর্বং যথাতথম্