Utshovঅধ্যায় 50
50.1
বৈশংপায়ন উবাচ
যত্রেজিবানুডুপতী রাজসূয়েন ভারত
তস্মিন্বৃত্তে মহানাসীত্সংগ্রামস্তারকাময়ঃ
50.2
তত্রাপ্যুপস্পৃশ্য বলো দত্ত্বা দানানি চাত্মবান্
সারস্বতস্য ধর্মাত্মা মুনেস্তীর্থং জগাম হ
50.3
যত্র দ্বাদশবার্ষিক্যামনাবৃষ্ট্যাং দ্বিজোত্তমান্
বেদানধ্যাপয়ামাস পুরা সারস্বতো মুনিঃ
50.4
জনমেজয় উবাচ
কথং দ্বাদশবার্ষিক্যামনাবৃষ্ট্যাং তপোধনঃ
বেদানধ্যাপয়ামাস পুরা সারস্বতো মুনিঃ
50.5
বৈশংপায়ন উবাচ
আসীত্পূর্বং মহারাজ মুনির্ধীমান্মহাতপাঃ
দধীচ ইতি বিখ্যাতো ব্রহ্মচারী জিতেন্দ্রিয়ঃ
50.6
তস্যাতিতপসঃ শক্রো বিভেতি সততং বিভো
ন স লোভয়িতুং শক্যঃ ফলৈর্বহুবিধৈরপি
50.7
প্রলোভনার্থং তস্যাথ প্রাহিণোত্পাকশাসনঃ
দিব্যামপ্সরসং পুণ্যাং দর্শনীয়ামলম্বুসাম্
50.8
তস্য তর্পয়তো দেবান্সরস্বত্যাং মহাত্মনঃ
সমীপতো মহারাজ সোপাতিষ্ঠত ভামিনী
50.9
তাং দিব্যবপুষং দৃষ্ট্বা তস্যর্ষের্ভাবিতাত্মনঃ
রেতঃ স্কন্নং সরস্বত্যাং তত্সা জগ্রাহ নিম্নগা
50.10
কুক্ষৌ চাপ্যদধদ্দৃষ্ট্বা তদ্রেতঃ পুরুষর্ষভ
সা দধার চ তং গর্ভং পুত্রহেতোর্মহানদী
50.11
সুষুবে চাপি সময়ে পুত্রং সা সরিতাং বরা
জগাম পুত্রমাদায় তমৃষিং প্রতি চ প্রভো
50.12
ঋষিসংসদি তং দৃষ্ট্বা সা নদী মুনিসত্তমম্
ততঃ প্রোবাচ রাজেন্দ্র দদতী পুত্রমস্য তম্
ব্রহ্মর্ষে তব পুত্রোঽয়ং ত্বদ্ভক্ত্যা ধারিতো ময়া
50.13
দৃষ্ট্বা তেঽপ্সরসং রেতো যত্স্কন্নং প্রাগলম্বুসাম্
তত্কুক্ষিণা বৈ ব্রহ্মর্ষে ত্বদ্ভক্ত্যা ধৃতবত্যহম্
50.14
ন বিনাশমিদং গচ্ছেত্ত্বত্তেজ ইতি নিশ্চয়াৎ
প্রতিগৃহ্ণীষ্ব পুত্রং স্বং ময়া দত্তমনিন্দিতম্
50.15
ইত্যুক্তঃ প্রতিজগ্রাহ প্রীতিং চাবাপ উত্তমাম্
মন্ত্রবচ্চোপজিঘ্রত্তং মূর্ধ্নি প্রেম্ণা দ্বিজোত্তমঃ
50.16
পরিষ্বজ্য চিরং কালং তদা ভরতসত্তম
সরস্বত্যৈ বরং প্রাদাত্প্রীয়মাণো মহামুনিঃ
50.17
বিশ্বে দেবাঃ সপিতরো গন্ধর্বাপ্সরসাং গণাঃ
তৃপ্তিং যাস্যন্তি সুভগে তর্প্যমাণাস্তবাম্ভসা
50.18
ইত্যুক্ত্বা স তু তুষ্টাব বচোভির্বৈ মহানদীম্
প্রীতঃ পরমহৃষ্টাত্মা যথাবচ্ছৃণু পার্থিব
50.19
প্রসৃতাসি মহাভাগে সরসো ব্রহ্মণঃ পুরা
জানন্তি ত্বাং সরিচ্ছ্রেষ্ঠে মুনয়ঃ সংশিতব্রতাঃ
50.20
মম প্রিয়করী চাপি সততং প্রিয়দর্শনে
তস্মাত্সারস্বতঃ পুত্রো মহাংস্তে বরবর্ণিনি
50.21
তবৈব নাম্না প্রথিতঃ পুত্রস্তে লোকভাবনঃ
সারস্বত ইতি খ্যাতো ভবিষ্যতি মহাতপাঃ
50.22
এষ দ্বাদশবার্ষিক্যামনাবৃষ্ট্যাং দ্বিজর্ষভান্
সারস্বতো মহাভাগে বেদানধ্যাপয়িষ্যতি
50.23
পুণ্যাভ্যশ্চ সরিদ্ভ্যস্ত্বং সদা পুণ্যতমা শুভে
ভবিষ্যসি মহাভাগে মত্প্রসাদাত্সরস্বতি
50.24
এবং সা সংস্তুতা তেন বরং লব্ধ্বা মহানদী
পুত্রমাদায় মুদিতা জগাম ভরতর্ষভ
50.25
এতস্মিন্নেব কালে তু বিরোধে দেবদানবৈঃ
শক্রঃ প্রহরণান্বেষী লোকাংস্ত্রীন্বিচচার হ
50.26
ন চোপলেভে ভগবাঞ্শক্রঃ প্রহরণং তদা
যদ্বৈ তেষাং ভবেদ্যোগ্যং বধায় বিবুধদ্বিষাম্
50.27
ততোঽব্রবীত্সুরাঞ্শক্রো ন মে শক্যা মহাসুরাঃ
ঋতেঽস্থিভির্দধীচস্য নিহন্তুং ত্রিদশদ্বিষঃ
50.28
তস্মাদ্গত্বা ঋষিশ্রেষ্ঠো যাচ্যতাং সুরসত্তমাঃ
দধীচাস্থীনি দেহীতি তৈর্বধিষ্যামহে রিপূন্
50.29
স দেবৈর্যাচিতোঽস্থীনি যত্নাদৃষিবরস্তদা
প্রাণত্যাগং কুরুষ্বেতি চকারৈবাবিচারয়ন্
স লোকানক্ষয়ান্প্রাপ্তো দেবপ্রিয়করস্তদা
50.30
তস্যাস্থিভিরথো শক্রঃ সংপ্রহৃষ্টমনাস্তদা
কারয়ামাস দিব্যানি নানাপ্রহরণান্যুত
বজ্রাণি চক্রাণি গদা গুরুদণ্ডাংশ্চ পুষ্কলান্
50.31
স হি তীব্রেণ তপসা সংভৃতঃ পরমর্ষিণা
প্রজাপতিসুতেনাথ ভৃগুণা লোকভাবনঃ
50.32
অতিকায়ঃ স তেজস্বী লোকসারবিনির্মিতঃ
জজ্ঞে শৈলগুরুঃ প্রাংশুর্মহিম্না প্রথিতঃ প্রভুঃ
নিত্যমুদ্বিজতে চাস্য তেজসা পাকশাসনঃ
50.33
তেন বজ্রেণ ভগবান্মন্ত্রয়ুক্তেন ভারত
ভৃশং ক্রোধবিসৃষ্টেন ব্রহ্মতেজোভবেন চ
দৈত্যদানববীরাণাং জঘান নবতীর্নব
50.34
অথ কালে ব্যতিক্রান্তে মহত্যতিভয়ংকরে
অনাবৃষ্টিরনুপ্রাপ্তা রাজন্দ্বাদশবার্ষিকী
50.35
তস্যাং দ্বাদশবার্ষিক্যামনাবৃষ্ট্যাং মহর্ষয়ঃ
বৃত্ত্যর্থং প্রাদ্রবন্রাজন্ক্ষুধার্তাঃ সর্বতোদিশম্
50.36
দিগ্ভ্যস্তান্প্রদ্রুতান্দৃষ্ট্বা মুনিঃ সারস্বতস্তদা
গমনায় মতিং চক্রে তং প্রোবাচ সরস্বতী
50.37
ন গন্তব্যমিতঃ পুত্র তবাহারমহং সদা
দাস্যামি মত্স্যপ্রবরানুষ্যতামিহ ভারত
50.38
ইত্যুক্তস্তর্পয়ামাস স পিতৄন্দেবতাস্তথা
আহারমকরোন্নিত্যং প্রাণান্বেদাংশ্চ ধারয়ন্
50.39
অথ তস্যামতীতায়ামনাবৃষ্ট্যাং মহর্ষয়ঃ
অন্যোন্যং পরিপপ্রচ্ছুঃ পুনঃ স্বাধ্যায়কারণাৎ
50.40
তেষাং ক্ষুধাপরীতানাং নষ্টা বেদা বিধাবতাম্
সর্বেষামেব রাজেন্দ্র ন কশ্চিত্প্রতিভানবান্
50.41
অথ কশ্চিদৃষিস্তেষাং সারস্বতমুপেয়িবান্
কুর্বাণং সংশিতাত্মানং স্বাধ্যায়মৃষিসত্তমম্
50.42
স গত্বাচষ্ট তেভ্যশ্চ সারস্বতমতিপ্রভম্
স্বাধ্যায়মমরপ্রখ্যং কুর্বাণং বিজনে জনে
50.43
ততঃ সর্বে সমাজগ্মুস্তত্র রাজন্মহর্ষয়ঃ
সারস্বতং মুনিশ্রেষ্ঠমিদমূচুঃ সমাগতাঃ
50.44
অস্মানধ্যাপয়স্বেতি তানুবাচ ততো মুনিঃ
শিষ্যত্বমুপগচ্ছধ্বং বিধিবদ্ভো মমেত্যুত
50.45
ততোঽব্রবীদৃষিগণো বালস্ত্বমসি পুত্রক
স তানাহ ন মে ধর্মো নশ্যেদিতি পুনর্মুনীন্
50.46
যো হ্যধর্মেণ বিব্রূয়াদ্গৃহ্ণীয়াদ্বাপ্যধর্মতঃ
ম্রিয়তাং তাবুভৌ ক্ষিপ্রং স্যাতাং বা বৈরিণাবুভৌ
50.47
ন হায়নৈর্ন পলিতৈর্ন বিত্তেন ন বন্ধুভিঃ
ঋষয়শ্চক্রিরে ধর্মং যোঽনূচানঃ স নো মহান্
50.48
এতচ্ছ্রুত্বা বচস্তস্য মুনয়স্তে বিধানতঃ
তস্মাদ্বেদাননুপ্রাপ্য পুনর্ধর্মং প্রচক্রিরে
50.49
ষষ্টির্মুনিসহস্রাণি শিষ্যত্বং প্রতিপেদিরে
সারস্বতস্য বিপ্রর্ষের্বেদস্বাধ্যায়কারণাৎ
50.50
মুষ্টিং মুষ্টিং ততঃ সর্বে দর্ভাণাং তেঽভ্যুপাহরন্
তস্যাসনার্থং বিপ্রর্ষের্বালস্যাপি বশে স্থিতাঃ
50.51
তত্রাপি দত্ত্বা বসু রৌহিণেয়ো; মহাবলঃ কেশবপূর্বজোঽথ
জগাম তীর্থং মুদিতঃ ক্রমেণ; খ্যাতং মহদ্বৃদ্ধকন্যা স্ম যত্র