Utshovঅধ্যায় 49
49.1
বৈশংপায়ন উবাচ
তস্মিন্নেব তু ধর্মাত্মা বসতি স্ম তপোধনঃ
গার্হস্থ্যং ধর্মমাস্থায় অসিতো দেবলঃ পুরা
49.2
ধর্মনিত্যঃ শুচির্দান্তো ন্যস্তদণ্ডো মহাতপাঃ
কর্মণা মনসা বাচা সমঃ সর্বেষু জন্তুষু
49.3
অক্রোধনো মহারাজ তুল্যনিন্দাপ্রিয়াপ্রিয়ঃ
কাঞ্চনে লোষ্টকে চৈব সমদর্শী মহাতপাঃ
49.4
দেবতাঃ পূজয়ন্নিত্যমতিথীংশ্চ দ্বিজৈঃ সহ
ব্রহ্মচর্যরতো নিত্যং সদা ধর্মপরায়ণঃ
49.5
ততোঽভ্যেত্য মহারাজ যোগমাস্থায় ভিক্ষুকঃ
জৈগীষব্যো মুনির্ধীমাংস্তস্মিংস্তীর্থে সমাহিতঃ
49.6
দেবলস্যাশ্রমে রাজন্ন্যবসত্স মহাদ্যুতিঃ
যোগনিত্যো মহারাজ সিদ্ধিং প্রাপ্তো মহাতপাঃ
49.7
তং তত্র বসমানং তু জৈগীষব্যং মহামুনিম্
দেবলো দর্শয়ন্নেব নৈবায়ুঞ্জত ধর্মতঃ
49.8
এবং তয়োর্মহারাজ দীর্ঘকালো ব্যতিক্রমৎ
জৈগীষব্যং মুনিং চৈব ন দদর্শাথ দেবলঃ
49.9
আহারকালে মতিমান্পরিব্রাড্জনমেজয়
উপাতিষ্ঠত ধর্মজ্ঞো ভৈক্ষকালে স দেবলম্
49.10
স দৃষ্ট্বা ভিক্ষুরূপেণ প্রাপ্তং তত্র মহামুনিম্
গৌরবং পরমং চক্রে প্রীতিং চ বিপুলাং তথা
49.11
দেবলস্তু যথাশক্তি পূজয়ামাস ভারত
ঋষিদৃষ্টেন বিধিনা সমা বহ্ব্যঃ সমাহিতঃ
49.12
কদাচিত্তস্য নৃপতে দেবলস্য মহাত্মনঃ
চিন্তা সুমহতী জাতা মুনিং দৃষ্ট্বা মহাদ্যুতিম্
49.13
সমাস্তু সমতিক্রান্তা বহ্ব্যঃ পূজয়তো মম
ন চায়মলসো ভিক্ষুরভ্যভাষত কিংচন
49.14
এবং বিগণয়ন্নেব স জগাম মহোদধিম্
অন্তরিক্ষচরঃ শ্রীমান্কলশং গৃহ্য দেবলঃ
49.15
গচ্ছন্নেব স ধর্মাত্মা সমুদ্রং সরিতাং পতিম্
জৈগীষব্যং ততোঽপশ্যদ্গতং প্রাগেব ভারত
49.16
ততঃ সবিস্ময়শ্চিন্তাং জগামাথাসিতঃ প্রভুঃ
কথং ভিক্ষুরয়ং প্রাপ্তঃ সমুদ্রে স্নাত এব চ
49.17
ইত্যেবং চিন্তয়ামাস মহর্ষিরসিতস্তদা
স্নাত্বা সমুদ্রে বিধিবচ্ছুচির্জপ্যং জজাপ হ
49.18
কৃতজপ্যাহ্নিকঃ শ্রীমানাশ্রমং চ জগাম হ
কলশং জলপূর্ণং বৈ গৃহীত্বা জনমেজয়
49.19
ততঃ স প্রবিশন্নেব স্বমাশ্রমপদং মুনিঃ
আসীনমাশ্রমে তত্র জৈগীষব্যমপশ্যত
49.20
ন ব্যাহরতি চৈবৈনং জৈগীষব্যঃ কথংচন
কাষ্ঠভূতোঽঽশ্রমপদে বসতি স্ম মহাতপাঃ
49.21
তং দৃষ্ট্বা চাপ্লুতং তোয়ে সাগরে সাগরোপমম্
প্রবিষ্টমাশ্রমং চাপি পূর্বমেব দদর্শ সঃ
49.22
অসিতো দেবলো রাজংশ্চিন্তয়ামাস বুদ্ধিমান্
দৃষ্টঃ প্রভাবং তপসো জৈগীষব্যস্য যোগজম্
49.23
চিন্তয়ামাস রাজেন্দ্র তদা স মুনিসত্তমঃ
ময়া দৃষ্টঃ সমুদ্রে চ আশ্রমে চ কথং ত্বয়ম্
49.24
এবং বিগণয়ন্নেব স মুনির্মন্ত্রপারগঃ
উত্পপাতাশ্রমাত্তস্মাদন্তরিক্ষং বিশাং পতে
জিজ্ঞাসার্থং তদা ভিক্ষোর্জৈগীষব্যস্য দেবলঃ
49.25
সোঽন্তরিক্ষচরান্সিদ্ধান্সমপশ্যত্সমাহিতান্
জৈগীষব্যং চ তৈঃ সিদ্ধৈঃ পূজ্যমানমপশ্যত
49.26
ততোঽসিতঃ সুসংরব্ধো ব্যবসায়ী দৃঢব্রতঃ
অপশ্যদ্বৈ দিবং যান্তং জৈগীষব্যং স দেবলঃ
49.27
তস্মাচ্চ পিতৃলোকং তং ব্রজন্তং সোঽন্বপশ্যত
পিতৃলোকাচ্চ তং যান্তং যাম্যং লোকমপশ্যত
49.28
তস্মাদপি সমুত্পত্য সোমলোকমভিষ্টুতম্
ব্রজন্তমন্বপশ্যত্স জৈগীষব্যং মহামুনিম্
49.29
লোকান্সমুত্পতন্তং চ শুভানেকান্তয়াজিনাম্
ততোঽগ্নিহোত্রিণাং লোকাংস্তেভ্যশ্চাপ্যুত্পপাত হ
49.30
দর্শং চ পৌর্ণমাসং চ যে যজন্তি তপোধনাঃ
তেভ্যঃ স দদৃশে ধীমাঁল্লোকেভ্যঃ পশুয়াজিনাম্
ব্রজন্তং লোকমমলমপশ্যদ্দেবপূজিতম্
49.31
চাতুর্মাস্যৈর্বহুবিধৈর্যজন্তে যে তপোধনাঃ
তেষাং স্থানং তথা যান্তং তথাগ্নিষ্টোময়াজিনাম্
49.32
অগ্নিষ্টুতেন চ তথা যে যজন্তি তপোধনাঃ
তত্স্থানমনুসংপ্রাপ্তমন্বপশ্যত দেবলঃ
49.33
বাজপেয়ং ক্রতুবরং তথা বহুসুবর্ণকম্
আহরন্তি মহাপ্রাজ্ঞাস্তেষাং লোকেষ্বপশ্যত
49.34
যজন্তে পুণ্ডরীকেণ রাজসূয়েন চৈব যে
তেষাং লোকেষ্বপশ্যচ্চ জৈগীষব্যং স দেবলঃ
49.35
অশ্বমেধং ক্রতুবরং নরমেধং তথৈব চ
আহরন্তি নরশ্রেষ্ঠাস্তেষাং লোকেষ্বপশ্যত
49.36
সর্বমেধং চ দুষ্প্রাপং তথা সৌত্রামণিং চ যে
তেষাং লোকেষ্বপশ্যচ্চ জৈগীষব্যং স দেবলঃ
49.37
দ্বাদশাহৈশ্চ সত্রৈর্যে যজন্তে বিবিধৈর্নৃপ
তেষাং লোকেষ্বপশ্যচ্চ জৈগীষব্যং স দেবলঃ
49.38
মিত্রাবরুণয়োর্লোকানাদিত্যানাং তথৈব চ
সলোকতামনুপ্রাপ্তমপশ্যত ততোঽসিতঃ
49.39
রুদ্রাণাং চ বসূনাং চ স্থানং যচ্চ বৃহস্পতেঃ
তানি সর্বাণ্যতীতং চ সমপশ্যত্ততোঽসিতঃ
49.40
আরুহ্য চ গবাং লোকং প্রয়ান্তং ব্রহ্মসত্রিণাম্
লোকানপশ্যদ্গচ্ছন্তং জৈগীষব্যং ততোঽসিতঃ
49.41
ত্রীঁল্লোকানপরান্বিপ্রমুত্পতন্তং স্বতেজসা
পতিব্রতানাং লোকাংশ্চ ব্রজন্তং সোঽন্বপশ্যত
49.42
ততো মুনিবরং ভূয়ো জৈগীষব্যমথাসিতঃ
নান্বপশ্যত যোগস্থমন্তর্হিতমরিংদম
49.43
সোঽচিন্তয়ন্মহাভাগো জৈগীষব্যস্য দেবলঃ
প্রভাবং সুব্রতত্বং চ সিদ্ধিং যোগস্য চাতুলাম্
49.44
অসিতোঽপৃচ্ছত তদা সিদ্ধাঁল্লোকেষু সত্তমান্
প্রয়তঃ প্রাঞ্জলির্ভূত্বা ধীরস্তান্ব্রহ্মসত্রিণঃ
49.45
জৈগীষব্যং ন পশ্যামি তং শংসত মহৌজসম্
এতদিচ্ছাম্যহং শ্রোতুং পরং কৌতূহলং হি মে
49.46
সিদ্ধা ঊচুঃ
শৃণু দেবল ভূতার্থং শংসতাং নো দৃঢব্রত
জৈগীষব্যো গতো লোকং শাশ্বতং ব্রহ্মণোঽব্যয়ম্
49.47
স শ্রুত্বা বচনং তেষাং সিদ্ধানাং ব্রহ্মসত্রিণাম্
অসিতো দেবলস্তূর্ণমুত্পপাত পপাত চ
49.48
ততঃ সিদ্ধাস্ত ঊচুর্হি দেবলং পুনরেব হ
ন দেবল গতিস্তত্র তব গন্তুং তপোধন
ব্রহ্মণঃ সদনং বিপ্র জৈগীষব্যো যদাপ্তবান্
49.49
তেষাং তদ্বচনং শ্রুত্বা সিদ্ধানাং দেবলঃ পুনঃ
আনুপূর্ব্যেণ লোকাংস্তান্সর্বানবততার হ
49.50
স্বমাশ্রমপদং পুণ্যমাজগাম পতংগবৎ
প্রবিশন্নেব চাপশ্যজ্জৈগীষব্যং স দেবলঃ
49.51
ততো বুদ্ধ্যা ব্যগণয়দ্দেবলো ধর্ময়ুক্তয়া
দৃষ্ট্বা প্রভাবং তপসো জৈগীষব্যস্য যোগজম্
49.52
ততোঽব্রবীন্মহাত্মানং জৈগীষব্যং স দেবলঃ
বিনয়াবনতো রাজন্নুপসর্প্য মহামুনিম্
মোক্ষধর্মং সমাস্থাতুমিচ্ছেয়ং ভগবন্নহম্
49.53
তস্য তদ্বচনং শ্রুত্বা উপদেশং চকার সঃ
বিধিং চ যোগস্য পরং কার্যাকার্যং চ শাস্ত্রতঃ
49.54
সংন্যাসকৃতবুদ্ধিং তং ততো দৃষ্ট্বা মহাতপাঃ
সর্বাশ্চাস্য ক্রিয়াশ্চক্রে বিধিদৃষ্টেন কর্মণা
49.55
সংন্যাসকৃতবুদ্ধিং তং ভূতানি পিতৃভিঃ সহ
ততো দৃষ্ট্বা প্ররুরুদুঃ কোঽস্মান্সংবিভজিষ্যতি
49.56
দেবলস্তু বচঃ শ্রুত্বা ভূতানাং করুণং তথা
দিশো দশ ব্যাহরতাং মোক্ষং ত্যক্তুং মনো দধে
49.57
ততস্তু ফলমূলানি পবিত্রাণি চ ভারত
পুষ্পাণ্যোষধয়শ্চৈব রোরূয়ন্তে সহস্রশঃ
49.58
পুনর্নো দেবলঃ ক্ষুদ্রো নূনং ছেত্স্যতি দুর্মতিঃ
অভয়ং সর্বভূতেভ্যো যো দত্ত্বা নাববুধ্যতে
49.59
ততো ভূয়ো ব্যগণয়ত্স্ববুদ্ধ্যা মুনিসত্তমঃ
মোক্ষে গার্হস্থ্যধর্মে বা কিং নু শ্রেয়স্করং ভবেৎ
49.60
ইতি নিশ্চিত্য মনসা দেবলো রাজসত্তম
ত্যক্ত্বা গার্হস্থ্যধর্মং স মোক্ষধর্মমরোচয়ৎ
49.61
এবমাদীনি সংচিন্ত্য দেবলো নিশ্চয়াত্ততঃ
প্রাপ্তবান্পরমাং সিদ্ধিং পরং যোগং চ ভারত
49.62
ততো দেবাঃ সমাগম্য বৃহস্পতিপুরোগমাঃ
জৈগীষব্যং তপশ্চাস্য প্রশংসন্তি তপস্বিনঃ
49.63
অথাব্রবীদৃষিবরো দেবান্বৈ নারদস্তদা
জৈগীষব্যে তপো নাস্তি বিস্মাপয়তি যোঽসিতম্
49.64
তমেবংবাদিনং ধীরং প্রত্যূচুস্তে দিবৌকসঃ
মৈবমিত্যেব শংসন্তো জৈগীষব্যং মহামুনিম্
49.65
তত্রাপ্যুপস্পৃশ্য ততো মহাত্মা; দত্ত্বা চ বিত্তং হলভৃদ্দ্বিজেভ্যঃ
অবাপ্য ধর্মং পরমার্যকর্মা; জগাম সোমস্য মহত্স তীর্থম্