অধ্যায় 48

48.1

বৈশংপায়ন উবাচ
ইন্দ্রতীর্থং ততো গত্বা যদূনাং প্রবরো বলী
বিপ্রেভ্যো ধনরত্নানি দদৌ স্নাত্বা যথাবিধি

তত্র হ্যমররাজোঽসাবীজে ক্রতুশতেন হ
বৃহস্পতেশ্চ দেবেশঃ প্রদদৌ বিপুলং ধনম্

নিরর্গলান্সজারূথ্যান্সর্বান্বিবিধদক্ষিণান্
আজহার ক্রতূংস্তত্র যথোক্তান্বেদপারগৈঃ

তান্ক্রতূন্ভরতশ্রেষ্ঠ শতকৃত্বো মহাদ্যুতিঃ
পূরয়ামাস বিধিবত্ততঃ খ্যাতঃ শতক্রতুঃ

তস্য নাম্না চ তত্তীর্থং শিবং পুণ্যং সনাতনম্
ইন্দ্রতীর্থমিতি খ্যাতং সর্বপাপপ্রমোচনম্

উপস্পৃশ্য চ তত্রাপি বিধিবন্মুসলায়ুধঃ
ব্রাহ্মণান্পূজয়িত্বা চ পানাচ্ছাদনভোজনৈঃ
শুভং তীর্থবরং তস্মাদ্রামতীর্থং জগাম হ

যত্র রামো মহাভাগো ভার্গবঃ সুমহাতপাঃ
অসকৃত্পৃথিবীং সর্বাং হতক্ষত্রিয়পুংগবাম্

উপাধ্যায়ং পুরস্কৃত্য কশ্যপং মুনিসত্তমম্
অয়জদ্বাজপেয়েন সোঽশ্বমেধশতেন চ
প্রদদৌ দক্ষিণার্থং চ পৃথিবীং বৈ সসাগরাম্

রামো দত্ত্বা ধনং তত্র দ্বিজেভ্যো জনমেজয়
উপস্পৃশ্য যথান্যায়ং পূজয়িত্বা তথা দ্বিজান্

পুণ্যে তীর্থে শুভে দেশে বসু দত্ত্বা শুভাননঃ
মুনীংশ্চৈবাভিবাদ্যাথ যমুনাতীর্থমাগমৎ

যত্রানয়ামাস তদা রাজসূয়ং মহীপতে
পুত্রোঽদিতের্মহাভাগো বরুণো বৈ সিতপ্রভঃ

তত্র নির্জিত্য সংগ্রামে মানুষান্দৈবতাংস্তথা
বরং ক্রতুং সমাজহ্রে বরুণঃ পরবীরহা

তস্মিন্ক্রতুবরে বৃত্তে সংগ্রামঃ সমজায়ত
দেবানাং দানবানাং চ ত্রৈলোক্যস্য ক্ষয়াবহঃ

রাজসূয়ে ক্রতুশ্রেষ্ঠে নিবৃত্তে জনমেজয়
জায়তে সুমহাঘোরঃ সংগ্রামঃ ক্ষত্রিয়ান্প্রতি

সীরায়ুধস্তদা রামস্তস্মিংস্তীর্থবরে তদা
তত্র স্নাত্বা চ দত্ত্বা চ দ্বিজেভ্যো বসু মাধবঃ

বনমালী ততো হৃষ্টঃ স্তূয়মানো দ্বিজাতিভিঃ
তস্মাদাদিত্যতীর্থং চ জগাম কমলেক্ষণঃ

যত্রেষ্ট্বা ভগবাঞ্জ্যোতির্ভাস্করো রাজসত্তম
জ্যোতিষামাধিপত্যং চ প্রভাবং চাভ্যপদ্যত

তস্যা নদ্যাস্তু তীরে বৈ সর্বে দেবাঃ সবাসবাঃ
বিশ্বেদেবাঃ সমরুতো গন্ধর্বাপ্সরসশ্চ হ

দ্বৈপায়নঃ শুকশ্চৈব কৃষ্ণশ্চ মধুসূদনঃ
যক্ষাশ্চ রাক্ষসাশ্চৈব পিশাচাশ্চ বিশাং পতে

এতে চান্যে চ বহবো যোগসিদ্ধাঃ সহস্রশঃ
তস্মিংস্তীর্থে সরস্বত্যাঃ শিবে পুণ্যে পরংতপ

তত্র হত্বা পুরা বিষ্ণুরসুরৌ মধুকৈটভৌ
আপ্লুতো ভরতশ্রেষ্ঠ তীর্থপ্রবর উত্তমে

দ্বৈপায়নশ্চ ধর্মাত্মা তত্রৈবাপ্লুত্য ভারত
সংপ্রাপ্তঃ পরমং যোগং সিদ্ধিং চ পরমাং গতঃ

অসিতো দেবলশ্চৈব তস্মিন্নেব মহাতপাঃ
পরমং যোগমাস্থায় ঋষির্যোগমবাপ্তবান্