Utshovঅধ্যায় 47
47.1
বৈশংপায়ন উবাচ
ততস্তীর্থবরং রামো যয়ৌ বদরপাচনম্
তপস্বিসিদ্ধচরিতং যত্র কন্যা ধৃতব্রতা
47.2
ভরদ্বাজস্য দুহিতা রূপেণাপ্রতিমা ভুবি
স্রুচাবতী নাম বিভো কুমারী ব্রহ্মচারিণী
47.3
তপশ্চচার সাত্যুগ্রং নিয়মৈর্বহুভির্নৃপ
ভর্তা মে দেবরাজঃ স্যাদিতি নিশ্চিত্য ভামিনী
47.4
সমাস্তস্যা ব্যতিক্রান্তা বহ্ব্যঃ কুরুকুলোদ্বহ
চরন্ত্যা নিয়মাংস্তাংস্তান্স্ত্রীভিস্তীব্রান্সুদুশ্চরান্
47.5
তস্যাস্তু তেন বৃত্তেন তপসা চ বিশাং পতে
ভক্ত্যা চ ভগবান্প্রীতঃ পরয়া পাকশাসনঃ
47.6
আজগামাশ্রমং তস্যাস্ত্রিদশাধিপতিঃ প্রভুঃ
আস্থায় রূপং বিপ্রর্ষের্বসিষ্ঠস্য মহাত্মনঃ
47.7
সা তং দৃষ্ট্বোগ্রতপসং বসিষ্ঠং তপতাং বরম্
আচারৈর্মুনিভির্দৃষ্টৈঃ পূজয়ামাস ভারত
47.8
উবাচ নিয়মজ্ঞা চ কল্যাণী সা প্রিয়ংবদা
ভগবন্মুনিশার্দূল কিমাজ্ঞাপয়সি প্রভো
47.9
সর্বমদ্য যথাশক্তি তব দাস্যামি সুব্রত
শক্রভক্ত্যা তু তে পাণিং ন দাস্যামি কথংচন
47.10
ব্রতৈশ্চ নিয়মৈশ্চৈব তপসা চ তপোধন
শক্রস্তোষয়িতব্যো বৈ ময়া ত্রিভুবনেশ্বরঃ
47.11
ইত্যুক্তো ভগবান্দেবঃ স্ময়ন্নিব নিরীক্ষ্য তাম্
উবাচ নিয়মজ্ঞাং তাং সান্ত্বয়ন্নিব ভারত
47.12
উগ্রং তপশ্চরসি বৈ বিদিতা মেঽসি সুব্রতে
যদর্থময়মারম্ভস্তব কল্যাণি হৃদ্গতঃ
47.13
তচ্চ সর্বং যথাভূতং ভবিষ্যতি বরাননে
তপসা লভ্যতে সর্বং সর্বং তপসি তিষ্ঠতি
47.14
যানি স্থানানি দিব্যানি বিবুধানাং শুভাননে
তপসা তানি প্রাপ্যানি তপোমূলং মহত্সুখম্
47.15
ইহ কৃত্বা তপো ঘোরং দেহং সংন্যস্য মানবাঃ
দেবত্বং যান্তি কল্যাণি শৃণু চেদং বচো মম
47.16
পচস্বৈতানি সুভগে বদরাণি শুভব্রতে
পচেত্যুক্ত্বা স ভগবাঞ্জগাম বলসূদনঃ
47.17
আমন্ত্র্য তাং তু কল্যাণীং ততো জপ্যং জজাপ সঃ
অবিদূরে ততস্তস্মাদাশ্রমাত্তীর্থ উত্তমে
ইন্দ্রতীর্থে মহারাজ ত্রিষু লোকেষু বিশ্রুতে
47.18
তস্যা জিজ্ঞাসনার্থং স ভগবান্পাকশাসনঃ
বদরাণামপচনং চকার বিবুধাধিপঃ
47.19
ততঃ স প্রয়তা রাজন্বাগ্যতা বিগতক্লমা
তত্পরা শুচিসংবীতা পাবকে সমধিশ্রয়ৎ
অপচদ্রাজশার্দূল বদরাণি মহাব্রতা
47.20
তস্যাঃ পচন্ত্যাঃ সুমহান্কালোঽগাত্পুরুষর্ষভ
ন চ স্ম তান্যপচ্যন্ত দিনং চ ক্ষয়মভ্যগাৎ
47.21
হুতাশনেন দগ্ধশ্চ যস্তস্যাঃ কাষ্ঠসংচয়ঃ
অকাষ্ঠমগ্নিং সা দৃষ্ট্বা স্বশরীরমথাদহৎ
47.22
পাদৌ প্রক্ষিপ্য সা পূর্বং পাবকে চারুদর্শনা
দগ্ধৌ দগ্ধৌ পুনঃ পাদাবুপাবর্তয়তানঘা
47.23
চরণৌ দহ্যমানৌ চ নাচিন্তয়দনিন্দিতা
দুঃখং কমলপত্রাক্ষী মহর্ষেঃ প্রিয়কাম্যয়া
47.24
অথ তত্কর্ম দৃষ্ট্বাস্যাঃ প্রীতস্ত্রিভুবনেশ্বরঃ
ততঃ সংদর্শয়ামাস কন্যায়ৈ রূপমাত্মনঃ
47.25
উবাচ চ সুরশ্রেষ্ঠস্তাং কন্যাং সুদৃঢব্রতাম্
প্রীতোঽস্মি তে শুভে ভক্ত্যা তপসা নিয়মেন চ
47.26
তস্মাদ্যোঽভিমতঃ কামঃ স তে সংপত্স্যতে শুভে
দেহং ত্যক্ত্বা মহাভাগে ত্রিদিবে ময়ি বত্স্যসি
47.27
ইদং চ তে তীর্থবরং স্থিরং লোকে ভবিষ্যতি
সর্বপাপাপহং সুভ্রু নাম্না বদরপাচনম্
বিখ্যাতং ত্রিষু লোকেষু ব্রহ্মর্ষিভিরভিপ্লুতম্
47.28
অস্মিন্খলু মহাভাগে শুভে তীর্থবরে পুরা
ত্যক্ত্বা সপ্তর্ষয়ো জগ্মুর্হিমবন্তমরুন্ধতীম্
47.29
ততস্তে বৈ মহাভাগা গত্বা তত্র সুসংশিতাঃ
বৃত্ত্যর্থং ফলমূলানি সমাহর্তুং যয়ুঃ কিল
47.30
তেষাং বৃত্ত্যর্থিনাং তত্র বসতাং হিমবদ্বনে
অনাবৃষ্টিরনুপ্রাপ্তা তদা দ্বাদশবার্ষিকী
47.31
তে কৃত্বা চাশ্রমং তত্র ন্যবসন্ত তপস্বিনঃ
অরুন্ধত্যপি কল্যাণী তপোনিত্যাভবত্তদা
47.32
অরুন্ধতীং ততো দৃষ্ট্বা তীব্রং নিয়মমাস্থিতাম্
অথাগমত্ত্রিনয়নঃ সুপ্রীতো বরদস্তদা
47.33
ব্রাহ্মং রূপং ততঃ কৃত্বা মহাদেবো মহায়শাঃ
তামভ্যেত্যাব্রবীদ্দেবো ভিক্ষামিচ্ছাম্যহং শুভে
47.34
প্রত্যুবাচ ততঃ সা তং ব্রাহ্মণং চারুদর্শনা
ক্ষীণোঽন্নসংচয়ো বিপ্র বদরাণীহ ভক্ষয়
ততোঽব্রবীন্মহাদেবঃ পচস্বৈতানি সুব্রতে
47.35
ইত্যুক্তা সাপচত্তানি ব্রাহ্মণপ্রিয়কাম্যয়া
অধিশ্রিত্য সমিদ্ধেঽগ্নৌ বদরাণি যশস্বিনী
47.36
দিব্যা মনোরমাঃ পুণ্যাঃ কথাঃ শুশ্রাব সা তদা
অতীতা সা ত্বনাবৃষ্টির্ঘোরা দ্বাদশবার্ষিকী
47.37
অনশ্নন্ত্যাঃ পচন্ত্যাশ্চ শৃণ্বন্ত্যাশ্চ কথাঃ শুভাঃ
অহঃসমঃ স তস্যাস্তু কালোঽতীতঃ সুদারুণঃ
47.38
ততস্তে মুনয়ঃ প্রাপ্তাঃ ফলান্যাদায় পর্বতাৎ
ততঃ স ভগবান্প্রীতঃ প্রোবাচারুন্ধতীং তদা
47.39
উপসর্পস্ব ধর্মজ্ঞে যথাপূর্বমিমানৃষীন্
প্রীতোঽস্মি তব ধর্মজ্ঞে তপসা নিয়মেন চ
47.40
ততঃ সংদর্শয়ামাস স্বরূপং ভগবান্হরঃ
ততোঽব্রবীত্তদা তেভ্যস্তস্যাস্তচ্চরিতং মহৎ
47.41
ভবদ্ভির্হিমবত্পৃষ্ঠে যত্তপঃ সমুপার্জিতম্
অস্যাশ্চ যত্তপো বিপ্রা ন সমং তন্মতং মম
47.42
অনয়া হি তপস্বিন্যা তপস্তপ্তং সুদুশ্চরম্
অনশ্নন্ত্যা পচন্ত্যা চ সমা দ্বাদশ পারিতাঃ
47.43
ততঃ প্রোবাচ ভগবাংস্তামেবারুন্ধতীং পুনঃ
বরং বৃণীষ্ব কল্যাণি যত্তেঽভিলষিতং হৃদি
47.44
সাব্রবীত্পৃথুতাম্রাক্ষী দেবং সপ্তর্ষিসংসদি
ভগবান্যদি মে প্রীতস্তীর্থং স্যাদিদমুত্তমম্
সিদ্ধদেবর্ষিদয়িতং নাম্না বদরপাচনম্
47.45
তথাস্মিন্দেবদেবেশ ত্রিরাত্রমুষিতঃ শুচিঃ
প্রাপ্নুয়াদুপবাসেন ফলং দ্বাদশবার্ষিকম্
এবমস্ত্বিতি তাং চোক্ত্বা হরো যাতস্তদা দিবম্
47.46
ঋষয়ো বিস্ময়ং জগ্মুস্তাং দৃষ্ট্বা চাপ্যরুন্ধতীম্
অশ্রান্তাং চাবিবর্ণাং চ ক্ষুত্পিপাসাসহাং সতীম্
47.47
এবং সিদ্ধিঃ পরা প্রাপ্তা অরুন্ধত্যা বিশুদ্ধয়া
যথা ত্বয়া মহাভাগে মদর্থং সংশিতব্রতে
47.48
বিশেষো হি ত্বয়া ভদ্রে ব্রতে হ্যস্মিন্সমর্পিতঃ
তথা চেদং দদাম্যদ্য নিয়মেন সুতোষিতঃ
47.49
বিশেষং তব কল্যাণি প্রয়চ্ছামি বরং বরে
অরুন্ধত্যা বরস্তস্যা যো দত্তো বৈ মহাত্মনা
47.50
তস্য চাহং প্রসাদেন তব কল্যাণি তেজসা
প্রবক্ষ্যাম্যপরং ভূয়ো বরমত্র যথাবিধি
47.51
যস্ত্বেকাং রজনীং তীর্থে বত্স্যতে সুসমাহিতঃ
স স্নাত্বা প্রাপ্স্যতে লোকান্দেহন্যাসাচ্চ দুর্লভান্
47.52
ইত্যুক্ত্বা ভগবান্দেবঃ সহস্রাক্ষঃ প্রতাপবান্
স্রুচাবতীং ততঃ পুণ্যাং জগাম ত্রিদিবং পুনঃ
47.53
গতে বজ্রধরে রাজংস্তত্র বর্ষং পপাত হ
পুষ্পাণাং ভরতশ্রেষ্ঠ দিব্যানাং দিব্যগন্ধিনাম্
47.54
নেদুর্দুন্দুভয়শ্চাপি সমন্তাত্সুমহাস্বনাঃ
মারুতশ্চ ববৌ যুক্ত্যা পুণ্যগন্ধো বিশাং পতে
47.55
উত্সৃজ্য তু শুভং দেহং জগামেন্দ্রস্য ভার্যতাম্
তপসোগ্রেণ সা লব্ধ্বা তেন রেমে সহাচ্যুত
47.56
জনমেজয় উবাচ
কা তস্যা ভগবন্মাতা ক্ব সংবৃদ্ধা চ শোভনা
শ্রোতুমিচ্ছাম্যহং ব্রহ্মন্পরং কৌতূহলং হি মে
47.57
বৈশংপায়ন উবাচ
ভারদ্বাজস্য বিপ্রর্ষেঃ স্কন্নং রেতো মহাত্মনঃ
দৃষ্ট্বাপ্সরসমায়ান্তীং ঘৃতাচীং পৃথুলোচনাম্
47.58
স তু জগ্রাহ তদ্রেতঃ করেণ জপতাং বরঃ
তদাবপত্পর্ণপুটে তত্র সা সংভবচ্ছুভা
47.59
তস্যাস্তু জাতকর্মাদি কৃত্বা সর্বং তপোধনঃ
নাম চাস্যাঃ স কৃতবান্ভারদ্বাজো মহামুনিঃ
47.60
স্রুচাবতীতি ধর্মাত্মা তদর্ষিগণসংসদি
স চ তামাশ্রমে ন্যস্য জগাম হিমবদ্বনম্
47.61
তত্রাপ্যুপস্পৃশ্য মহানুভাবো; বসূনি দত্ত্বা চ মহাদ্বিজেভ্যঃ
জগাম তীর্থং সুসমাহিতাত্মা; শক্রস্য বৃষ্ণিপ্রবরস্তদানীম্