Utshovঅধ্যায় 46
46.1
জনমেজয় উবাচ
অত্যদ্ভুতমিদং ব্রহ্মঞ্শ্রুতবানস্মি তত্ত্বতঃ
অভিষেকং কুমারস্য বিস্তরেণ যথাবিধি
46.2
যচ্ছ্রুত্বা পূতমাত্মানং বিজানামি তপোধন
প্রহৃষ্টানি চ রোমাণি প্রসন্নং চ মনো মম
46.3
অভিষেকং কুমারস্য দৈত্যানাং চ বধং তথা
শ্রুত্বা মে পরমা প্রীতির্ভূয়ঃ কৌতূহলং হি মে
46.4
অপাং পতিঃ কথং হ্যস্মিন্নভিষিক্তঃ সুরাসুরৈঃ
তন্মে ব্রূহি মহাপ্রাজ্ঞ কুশলো হ্যসি সত্তম
46.5
বৈশংপায়ন উবাচ
শৃণু রাজন্নিদং চিত্রং পূর্বকল্পে যথাতথম্
আদৌ কৃতয়ুগে তস্মিন্বর্তমানে যথাবিধি
বরুণং দেবতাঃ সর্বাঃ সমেত্যেদমথাব্রুবন্
46.6
যথাস্মান্সুররাট্শক্রো ভয়েভ্যঃ পাতি সর্বদা
তথা ত্বমপি সর্বাসাং সরিতাং বৈ পতির্ভব
46.7
বাসশ্চ তে সদা দেব সাগরে মকরালয়ে
সমুদ্রোঽয়ং তব বশে ভবিষ্যতি নদীপতিঃ
46.8
সোমেন সার্ধং চ তব হানিবৃদ্ধী ভবিষ্যতঃ
এবমস্ত্বিতি তান্দেবান্বরুণো বাক্যমব্রবীৎ
46.9
সমাগম্য ততঃ সর্বে বরুণং সাগরালয়ম্
অপাং পতিং প্রচক্রুর্হি বিধিদৃষ্টেন কর্মণা
46.10
অভিষিচ্য ততো দেবা বরুণং যাদসাং পতিম্
জগ্মুঃ স্বান্যেব স্থানানি পূজয়িত্বা জলেশ্বরম্
46.11
অভিষিক্তস্ততো দেবৈর্বরুণোঽপি মহায়শাঃ
সরিতঃ সাগরাংশ্চৈব নদাংশ্চৈব সরাংসি চ
পালয়ামাস বিধিনা যথা দেবাঞ্শতক্রতুঃ
46.12
ততস্তত্রাপ্যুপস্পৃশ্য দত্ত্বা চ বিবিধং বসু
অগ্নিতীর্থং মহাপ্রাজ্ঞঃ স জগাম প্রলম্বহা
নষ্টো ন দৃশ্যতে যত্র শমীগর্ভে হুতাশনঃ
46.13
লোকালোকবিনাশে চ প্রাদুর্ভূতে তদানঘ
উপতস্থুর্মহাত্মানং সর্বলোকপিতামহম্
46.14
অগ্নিঃ প্রনষ্টো ভগবান্কারণং চ ন বিদ্মহে
সর্বলোকক্ষয়ো মা ভূত্সংপাদয়তু নোঽনলম্
46.15
জনমেজয় উবাচ
কিমর্থং ভগবানগ্নিঃ প্রনষ্টো লোকভাবনঃ
বিজ্ঞাতশ্চ কথং দেবৈস্তন্মমাচক্ষ্ব তত্ত্বতঃ
46.16
বৈশংপায়ন উবাচ
ভৃগোঃ শাপাদ্ভৃশং ভীতো জাতবেদাঃ প্রতাপবান্
শমীগর্ভমথাসাদ্য ননাশ ভগবাংস্ততঃ
46.17
প্রনষ্টে তু তদা বহ্নৌ দেবাঃ সর্বে সবাসবাঃ
অন্বেষন্ত তদা নষ্টং জ্বলনং ভৃশদুঃখিতাঃ
46.18
ততোঽগ্নিতীর্থমাসাদ্য শমীগর্ভস্থমেব হি
দদৃশুর্জ্বলনং তত্র বসমানং যথাবিধি
46.19
দেবাঃ সর্বে নরব্যাঘ্র বৃহস্পতিপুরোগমাঃ
জ্বলনং তং সমাসাদ্য প্রীতাভূবন্সবাসবাঃ
পুনর্যথাগতং জগ্মুঃ সর্বভক্ষশ্চ সোঽভবৎ
46.20
ভৃগোঃ শাপান্মহীপাল যদুক্তং ব্রহ্মবাদিনা
তত্রাপ্যাপ্লুত্য মতিমান্ব্রহ্ময়োনিং জগাম হ
46.21
সসর্জ ভগবান্যত্র সর্বলোকপিতামহঃ
তত্রাপ্লুত্য ততো ব্রহ্মা সহ দেবৈঃ প্রভুঃ পুরা
সসর্জ চান্নানি তথা দেবতানাং যথাবিধি
46.22
তত্র স্নাত্বা চ দত্ত্বা চ বসূনি বিবিধানি চ
কৌবেরং প্রয়য়ৌ তীর্থং তত্র তপ্ত্বা মহত্তপঃ
ধনাধিপত্যং সংপ্রাপ্তো রাজন্নৈলবিলঃ প্রভুঃ
46.23
তত্রস্থমেব তং রাজন্ধনানি নিধয়স্তথা
উপতস্থুর্নরশ্রেষ্ঠ তত্তীর্থং লাঙ্গলী ততঃ
গত্বা স্নাত্বা চ বিধিবদ্ব্রাহ্মণেভ্যো ধনং দদৌ
46.24
দদৃশে তত্র তত্স্থানং কৌবেরে কাননোত্তমে
পুরা যত্র তপস্তপ্তং বিপুলং সুমহাত্মনা
46.25
যত্র রাজ্ঞা কুবেরেণ বরা লব্ধাশ্চ পুষ্কলাঃ
ধনাধিপত্যং সখ্যং চ রুদ্রেণামিততেজসা
46.26
সুরত্বং লোকপালত্বং পুত্রং চ নলকূবরম্
যত্র লেভে মহাবাহো ধনাধিপতিরঞ্জসা
46.27
অভিষিক্তশ্চ তত্রৈব সমাগম্য মরুদ্গণৈঃ
বাহনং চাস্য তদ্দত্তং হংসয়ুক্তং মনোরমম্
বিমানং পুষ্পকং দিব্যং নৈরৃতৈশ্বর্যমেব চ
46.28
তত্রাপ্লুত্য বলো রাজন্দত্ত্বা দায়াংশ্চ পুষ্কলান্
জগাম ত্বরিতো রামস্তীর্থং শ্বেতানুলেপনঃ
46.29
নিষেবিতং সর্বসত্ত্বৈর্নাম্না বদরপাচনম্
নানর্তুকবনোপেতং সদাপুষ্পফলং শুভম্