Utshovঅধ্যায় 45
45.1
বৈশংপায়ন উবাচ
শৃণু মাতৃগণান্রাজন্কুমারানুচরানিমান্
কীর্ত্যমানান্ময়া বীর সপত্নগণসূদনান্
45.2
যশস্বিনীনাং মাতৄণাং শৃণু নামানি ভারত
যাভির্ব্যাপ্তাস্ত্রয়ো লোকাঃ কল্যাণীভিশ্চরাচরাঃ
45.3
প্রভাবতী বিশালাক্ষী পলিতা গোনসী তথা
শ্রীমতী বহুলা চৈব তথৈব বহুপুত্রিকা
45.4
অপ্সুজাতা চ গোপালী বৃহদম্বালিকা তথা
জয়াবতী মালতিকা ধ্রুবরত্না ভয়ংকরী
45.5
বসুদামা সুদামা চ বিশোকা নন্দিনী তথা
একচূডা মহাচূডা চক্রনেমিশ্চ ভারত
45.6
উত্তেজনী জয়ত্সেনা কমলাক্ষ্যথ শোভনা
শত্রুংজয়া তথা চৈব ক্রোধনা শলভী খরী
45.7
মাধবী শুভবক্ত্রা চ তীর্থনেমিশ্চ ভারত
গীতপ্রিয়া চ কল্যাণী কদ্রুলা চামিতাশনা
45.8
মেঘস্বনা ভোগবতী সুভ্রূশ্চ কনকাবতী
অলাতাক্ষী বীর্যবতী বিদ্যুজ্জিহ্বা চ ভারত
45.9
পদ্মাবতী সুনক্ষত্রা কন্দরা বহুয়োজনা
সংতানিকা চ কৌরব্য কমলা চ মহাবলা
45.10
সুদামা বহুদামা চ সুপ্রভা চ যশস্বিনী
নৃত্যপ্রিয়া চ রাজেন্দ্র শতোলূখলমেখলা
45.11
শতঘণ্টা শতানন্দা ভগনন্দা চ ভামিনী
বপুষ্মতী চন্দ্রশীতা ভদ্রকালী চ ভারত
45.12
সংকারিকা নিষ্কুটিকা ভ্রমা চত্বরবাসিনী
সুমঙ্গলা স্বস্তিমতী বৃদ্ধিকামা জয়প্রিয়া
45.13
ধনদা সুপ্রসাদা চ ভবদা চ জলেশ্বরী
এডী ভেডী সমেডী চ বেতালজননী তথা
কণ্ডূতিঃ কালিকা চৈব দেবমিত্রা চ ভারত
45.14
লম্বসী কেতকী চৈব চিত্রসেনা তথা বলা
কুক্কুটিকা শঙ্খনিকা তথা জর্জরিকা নৃপ
45.15
কুণ্ডারিকা কোকলিকা কণ্ডরা চ শতোদরী
উত্ক্রাথিনী জরেণা চ মহাবেগা চ কঙ্কণা
45.16
মনোজবা কণ্টকিনী প্রঘসা পূতনা তথা
খশয়া চুর্ব্যুটির্বামা ক্রোশনাথ তডিত্প্রভা
45.17
মণ্ডোদরী চ তুণ্ডা চ কোটরা মেঘবাসিনী
সুভগা লম্বিনী লম্বা বসুচূডা বিকত্থনী
45.18
ঊর্ধ্ববেণীধরা চৈব পিঙ্গাক্ষী লোহমেখলা
পৃথুবক্ত্রা মধুরিকা মধুকুম্ভা তথৈব চ
45.19
পক্ষালিকা মন্থনিকা জরায়ুর্জর্জরাননা
খ্যাতা দহদহা চৈব তথা ধমধমা নৃপ
45.20
খণ্ডখণ্ডা চ রাজেন্দ্র পূষণা মণিকুণ্ডলা
অমোচা চৈব কৌরব্য তথা লম্বপয়োধরা
45.21
বেণুবীণাধরা চৈব পিঙ্গাক্ষী লোহমেখলা
শশোলূকমুখী কৃষ্ণা খরজঙ্ঘা মহাজবা
45.22
শিশুমারমুখী শ্বেতা লোহিতাক্ষী বিভীষণা
জটালিকা কামচরী দীর্ঘজিহ্বা বলোত্কটা
45.23
কালেডিকা বামনিকা মুকুটা চৈব ভারত
লোহিতাক্ষী মহাকায়া হরিপিণ্ডী চ ভূমিপ
45.24
একাক্ষরা সুকুসুমা কৃষ্ণকর্ণী চ ভারত
ক্ষুরকর্ণী চতুষ্কর্ণী কর্ণপ্রাবরণা তথা
45.25
চতুষ্পথনিকেতা চ গোকর্ণী মহিষাননা
খরকর্ণী মহাকর্ণী ভেরীস্বনমহাস্বনা
45.26
শঙ্খকুম্ভস্বনা চৈব ভঙ্গদা চ মহাবলা
গণা চ সুগণা চৈব তথাভীত্যথ কামদা
45.27
চতুষ্পথরতা চৈব ভূতিতীর্থান্যগোচরা
পশুদা বিত্তদা চৈব সুখদা চ মহায়শাঃ
পয়োদা গোমহিষদা সুবিষাণা চ ভারত
45.28
প্রতিষ্ঠা সুপ্রতিষ্ঠা চ রোচমানা সুরোচনা
গোকর্ণী চ সুকর্ণী চ সসিরা স্থেরিকা তথা
একচক্রা মেঘরবা মেঘমালা বিরোচনা
45.29
এতাশ্চান্যাশ্চ বহবো মাতরো ভরতর্ষভ
কার্ত্তিকেয়ানুয়ায়িন্যো নানারূপাঃ সহস্রশঃ
45.30
দীর্ঘনখ্যো দীর্ঘদন্ত্যো দীর্ঘতুণ্ড্যশ্চ ভারত
সরলা মধুরাশ্চৈব যৌবনস্থাঃ স্বলংকৃতাঃ
45.31
মাহাত্ম্যেন চ সংয়ুক্তাঃ কামরূপধরাস্তথা
নির্মাংসগাত্র্যঃ শ্বেতাশ্চ তথা কাঞ্চনসংনিভাঃ
45.32
কৃষ্ণমেঘনিভাশ্চান্যা ধূম্রাশ্চ ভরতর্ষভ
অরুণাভা মহাভাগা দীর্ঘকেশ্যঃ সিতাম্বরাঃ
45.33
ঊর্ধ্ববেণীধরাশ্চৈব পিঙ্গাক্ষ্যো লম্বমেখলাঃ
লম্বোদর্যো লম্বকর্ণাস্তথা লম্বপয়োধরাঃ
45.34
তাম্রাক্ষ্যস্তাম্রবর্ণাশ্চ হর্যক্ষ্যশ্চ তথাপরাঃ
বরদাঃ কামচারিণ্যো নিত্যপ্রমুদিতাস্তথা
45.35
যাম্যো রৌদ্র্যস্তথা সৌম্যাঃ কৌবের্যোঽথ মহাবলাঃ
বারুণ্যোঽথ চ মাহেন্দ্র্যস্তথাগ্নেয্যঃ পরংতপ
45.36
বায়ব্যশ্চাথ কৌমার্যো ব্রাহ্ম্যশ্চ ভরতর্ষভ
রূপেণাপ্সরসাং তুল্যা জবে বায়ুসমাস্তথা
45.37
পরপুষ্টোপমা বাক্যে তথর্দ্ধ্যা ধনদোপমাঃ
শক্রবীর্যোপমাশ্চৈব দীপ্ত্যা বহ্নিসমাস্তথা
45.38
বৃক্ষচত্বরবাসিন্যশ্চতুষ্পথনিকেতনাঃ
গুহাশ্মশানবাসিন্যঃ শৈলপ্রস্রবণালয়াঃ
45.39
নানাভরণধারিণ্যো নানামাল্যাম্বরাস্তথা
নানাবিচিত্রবেষাশ্চ নানাভাষাস্তথৈব চ
45.40
এতে চান্যে চ বহবো গণাঃ শত্রুভয়ংকরাঃ
অনুজগ্মুর্মহাত্মানং ত্রিদশেন্দ্রস্য সংমতে
45.41
ততঃ শক্ত্যস্ত্রমদদদ্ভগবান্পাকশাসনঃ
গুহায় রাজশার্দূল বিনাশায় সুরদ্বিষাম্
45.42
মহাস্বনাং মহাঘণ্টাং দ্যোতমানাং সিতপ্রভাম্
তরুণাদিত্যবর্ণাং চ পতাকাং ভরতর্ষভ
45.43
দদৌ পশুপতিস্তস্মৈ সর্বভূতমহাচমূম্
উগ্রাং নানাপ্রহরণাং তপোবীর্যবলান্বিতাম্
45.44
বিষ্ণুর্দদৌ বৈজয়ন্তীং মালাং বলবিবর্ধিনীম্
উমা দদৌ চারজসী বাসসী সূর্যসপ্রভে
45.45
গঙ্গা কমণ্ডলুং দিব্যমমৃতোদ্ভবমুত্তমম্
দদৌ প্রীত্যা কুমারায় দণ্ডং চৈব বৃহস্পতিঃ
45.46
গরুডো দয়িতং পুত্রং ময়ূরং চিত্রবর্হিণম্
অরুণস্তাম্রচূডং চ প্রদদৌ চরণায়ুধম্
45.47
পাশং তু বরুণো রাজা বলবীর্যসমন্বিতম্
কৃষ্ণাজিনং তথা ব্রহ্মা ব্রহ্মণ্যায় দদৌ প্রভুঃ
সমরেষু জয়ং চৈব প্রদদৌ লোকভাবনঃ
45.48
সেনাপত্যমনুপ্রাপ্য স্কন্দো দেবগণস্য হ
শুশুভে জ্বলিতোঽর্চিষ্মান্দ্বিতীয় ইব পাবকঃ
ততঃ পারিষদৈশ্চৈব মাতৃভিশ্চ সমন্বিতঃ
45.49
সা সেনা নৈরৃতী ভীমা সঘণ্টোচ্ছ্রিতকেতনা
সভেরীশঙ্খমুরজা সায়ুধা সপতাকিনী
শারদী দ্যৌরিবাভাতি জ্যোতির্ভিরুপশোভিতা
45.50
ততো দেবনিকায়াস্তে ভূতসেনাগণাস্তথা
বাদয়ামাসুরব্যগ্রা ভেরীশঙ্খাংশ্চ পুষ্কলান্
45.51
পটহাঞ্ঝর্ঝরাংশ্চৈব কৃকচান্গোবিষাণিকান্
আডম্বরান্গোমুখাংশ্চ ডিণ্ডিমাংশ্চ মহাস্বনান্
45.52
তুষ্টুবুস্তে কুমারং চ সর্বে দেবাঃ সবাসবাঃ
জগুশ্চ দেবগন্ধর্বা ননৃতুশ্চাপ্সরোগণাঃ
45.53
ততঃ প্রীতো মহাসেনস্ত্রিদশেভ্যো বরং দদৌ
রিপূন্হন্তাস্মি সমরে যে বো বধচিকীর্ষবঃ
45.54
প্রতিগৃহ্য বরং দেবাস্তস্মাদ্বিবুধসত্তমাৎ
প্রীতাত্মানো মহাত্মানো মেনিরে নিহতান্রিপূন্
45.55
সর্বেষাং ভূতসংঘানাং হর্ষান্নাদঃ সমুত্থিতঃ
অপূরয়ত লোকাংস্ত্রীন্বরে দত্তে মহাত্মনা
45.56
স নির্যয়ৌ মহাসেনো মহত্যা সেনয়া বৃতঃ
বধায় যুধি দৈত্যানাং রক্ষার্থং চ দিবৌকসাম্
45.57
ব্যবসায়ো জয়ো ধর্মঃ সিদ্ধির্লক্ষ্মীর্ধৃতিঃ স্মৃতিঃ
মহাসেনস্য সৈন্যানামগ্রে জগ্মুর্নরাধিপ
45.58
স তয়া ভীময়া দেবঃ শূলমুদ্গরহস্তয়া
গদামুসলনারাচশক্তিতোমরহস্তয়া
দৃপ্তসিংহনিনাদিন্যা বিনদ্য প্রয়য়ৌ গুহঃ
45.59
তং দৃষ্ট্বা সর্বদৈতেয়া রাক্ষসা দানবাস্তথা
ব্যদ্রবন্ত দিশঃ সর্বা ভয়োদ্বিগ্নাঃ সমন্ততঃ
অভ্যদ্রবন্ত দেবাস্তান্বিবিধায়ুধপাণয়ঃ
45.60
দৃষ্ট্বা চ স ততঃ ক্রুদ্ধঃ স্কন্দস্তেজোবলান্বিতঃ
শক্ত্যস্ত্রং ভগবান্ভীমং পুনঃ পুনরবাসৃজৎ
আদধচ্চাত্মনস্তেজো হবিষেদ্ধ ইবানলঃ
45.61
অভ্যস্যমানে শক্ত্যস্ত্রে স্কন্দেনামিততেজসা
উল্কাজ্বালা মহারাজ পপাত বসুধাতলে
45.62
সংহ্রাদয়ন্তশ্চ তথা নির্ঘাতাশ্চাপতন্ক্ষিতৌ
যথান্তকালসময়ে সুঘোরাঃ স্যুস্তথা নৃপ
45.63
ক্ষিপ্তা হ্যেকা তথা শক্তিঃ সুঘোরানলসূনুনা
ততঃ কোট্যো বিনিষ্পেতুঃ শক্তীনাং ভরতর্ষভ
45.64
স শক্ত্যস্ত্রেণ সংগ্রামে জঘান ভগবান্প্রভুঃ
দৈত্যেন্দ্রং তারকং নাম মহাবলপরাক্রমম্
বৃতং দৈত্যায়ুতৈর্বীরৈর্বলিভির্দশভির্নৃপ
45.65
মহিষং চাষ্টভিঃ পদ্মৈর্বৃতং সংখ্যে নিজঘ্নিবান্
ত্রিপাদং চায়ুতশতৈর্জঘান দশভির্বৃতম্
45.66
হ্রদোদরং নিখর্বৈশ্চ বৃতং দশভিরীশ্বরঃ
জঘানানুচরৈঃ সার্ধং বিবিধায়ুধপাণিভিঃ
45.67
তত্রাকুর্বন্ত বিপুলং নাদং বধ্যত্সু শত্রুষু
কুমারানুচরা রাজন্পূরয়ন্তো দিশো দশ
45.68
শক্ত্যস্ত্রস্য তু রাজেন্দ্র ততোঽর্চির্ভিঃ সমন্ততঃ
দগ্ধাঃ সহস্রশো দৈত্যা নাদৈঃ স্কন্দস্য চাপরে
45.69
পতাকয়াবধূতাশ্চ হতাঃ কেচিত্সুরদ্বিষঃ
কেচিদ্ঘণ্টারবত্রস্তা নিপেতুর্বসুধাতলে
কেচিত্প্রহরণৈশ্ছিন্না বিনিপেতুর্গতাসবঃ
45.70
এবং সুরদ্বিষোঽনেকান্বলবানাততায়িনঃ
জঘান সমরে বীরঃ কার্ত্তিকেয়ো মহাবলঃ
45.71
বাণো নামাথ দৈতেয়ো বলেঃ পুত্রো মহাবলঃ
ক্রৌঞ্চং পর্বতমাসাদ্য দেবসংঘানবাধত
45.72
তমভ্যয়ান্মহাসেনঃ সুরশত্রুমুদারধীঃ
স কার্ত্তিকেয়স্য ভয়াত্ক্রৌঞ্চং শরণমেয়িবান্
45.73
ততঃ ক্রৌঞ্চং মহামন্যুঃ ক্রৌঞ্চনাদনিনাদিতম্
শক্ত্যা বিভেদ ভগবান্কার্ত্তিকেয়োঽগ্নিদত্তয়া
45.74
সশালস্কন্ধসরলং ত্রস্তবানরবারণম্
পুলিনত্রস্তবিহগং বিনিষ্পতিতপন্নগম্
45.75
গোলাঙ্গূলর্ক্ষসংঘৈশ্চ দ্রবদ্ভিরনুনাদিতম্
কুরঙ্গগতিনির্ঘোষমুদ্ভ্রান্তসৃমরাচিতম্
45.76
বিনিষ্পতদ্ভিঃ শরভৈঃ সিংহৈশ্চ সহসা দ্রুতৈঃ
শোচ্যামপি দশাং প্রাপ্তো ররাজৈব স পর্বতঃ
45.77
বিদ্যাধরাঃ সমুত্পেতুস্তস্য শৃঙ্গনিবাসিনঃ
কিংনরাশ্চ সমুদ্বিগ্নাঃ শক্তিপাতরবোদ্ধতাঃ
45.78
ততো দৈত্যা বিনিষ্পেতুঃ শতশোঽথ সহস্রশঃ
প্রদীপ্তাত্পর্বতশ্রেষ্ঠাদ্বিচিত্রাভরণস্রজঃ
45.79
তান্নিজঘ্নুরতিক্রম্য কুমারানুচরা মৃধে
বিভেদ শক্ত্যা ক্রৌঞ্চং চ পাবকিঃ পরবীরহা
45.80
বহুধা চৈকধা চৈব কৃত্বাত্মানং মহাত্মনা
শক্তিঃ ক্ষিপ্তা রণে তস্য পাণিমেতি পুনঃ পুনঃ
45.81
এবংপ্রভাবো ভগবানতো ভূয়শ্চ পাবকিঃ
ক্রৌঞ্চস্তেন বিনির্ভিন্নো দৈত্যাশ্চ শতশো হতাঃ
45.82
ততঃ স ভগবান্দেবো নিহত্য বিবুধদ্বিষঃ
সভাজ্যমানো বিবুধৈঃ পরং হর্ষমবাপ হ
45.83
ততো দুন্দুভয়ো রাজন্নেদুঃ শঙ্খাশ্চ ভারত
মুমুচুর্দেবয়োষাশ্চ পুষ্পবর্ষমনুত্তমম্
45.84
দিব্যগন্ধমুপাদায় ববৌ পুণ্যশ্চ মারুতঃ
গন্ধর্বাস্তুষ্টুবুশ্চৈনং যজ্বানশ্চ মহর্ষয়ঃ
45.85
কেচিদেনং ব্যবস্যন্তি পিতামহসুতং প্রভুম্
সনত্কুমারং সর্বেষাং ব্রহ্ময়োনিং তমগ্রজম্
45.86
কেচিন্মহেশ্বরসুতং কেচিত্পুত্রং বিভাবসোঃ
উমায়াঃ কৃত্তিকানাং চ গঙ্গায়াশ্চ বদন্ত্যুত
45.87
একধা চ দ্বিধা চৈব চতুর্ধা চ মহাবলম্
যোগিনামীশ্বরং দেবং শতশোঽথ সহস্রশঃ
45.88
এতত্তে কথিতং রাজন্কার্ত্তিকেয়াভিষেচনম্
শৃণু চৈব সরস্বত্যাস্তীর্থবংশস্য পুণ্যতাম্
45.89
বভূব তীর্থপ্রবরং হতেষু সুরশত্রুষু
কুমারেণ মহারাজ ত্রিবিষ্টপমিবাপরম্
45.90
ঐশ্বর্যাণি চ তত্রস্থো দদাবীশঃ পৃথক্পৃথক্
তদা নৈরৃতমুখ্যেভ্যস্ত্রৈলোক্যে পাবকাত্মজঃ
45.91
এবং স ভগবাংস্তস্মিংস্তীর্থে দৈত্যকুলান্তকঃ
অভিষিক্তো মহারাজ দেবসেনাপতিঃ সুরৈঃ
45.92
ঔজসং নাম তত্তীর্থং যত্র পূর্বমপাং পতিঃ
অভিষিক্তঃ সুরগণৈর্বরুণো ভরতর্ষভ
45.93
তস্মিংস্তীর্থবরে স্নাত্বা স্কন্দং চাভ্যর্চ্য লাঙ্গলী
ব্রাহ্মণেভ্যো দদৌ রুক্মং বাসাংস্যাভরণানি চ
45.94
উষিত্বা রজনীং তত্র মাধবঃ পরবীরহা
পূজ্য তীর্থবরং তচ্চ স্পৃষ্ট্বা তোয়ং চ লাঙ্গলী
হৃষ্টঃ প্রীতমনাশ্চৈব হ্যভবন্মাধবোত্তমঃ
45.95
এতত্তে সর্বমাখ্যাতং যন্মাং ত্বং পরিপৃচ্ছসি
যথাভিষিক্তো ভগবান্স্কন্দো দেবৈঃ সমাগতৈঃ