Utshovঅধ্যায় 44
44.1
বৈশংপায়ন উবাচ
ততোঽভিষেকসংভারান্সর্বান্সংভৃত্য শাস্ত্রতঃ
বৃহস্পতিঃ সমিদ্ধেঽগ্নৌ জুহাবাজ্যং যথাবিধি
44.2
ততো হিমবতা দত্তে মণিপ্রবরশোভিতে
দিব্যরত্নাচিতে দিব্যে নিষণ্ণঃ পরমাসনে
44.3
সর্বমঙ্গলসংভারৈর্বিধিমন্ত্রপুরস্কৃতম্
আভিষেচনিকং দ্রব্যং গৃহীত্বা দেবতাগণাঃ
44.4
ইন্দ্রাবিষ্ণূ মহাবীর্যৌ সূর্যাচন্দ্রমসৌ তথা
ধাতা চৈব বিধাতা চ তথা চৈবানিলানলৌ
44.5
পূষ্ণা ভগেনার্যম্ণা চ অংশেন চ বিবস্বতা
রুদ্রশ্চ সহিতো ধীমান্মিত্রেণ বরুণেন চ
44.6
রুদ্রৈর্বসুভিরাদিত্যৈরশ্বিভ্যাং চ বৃতঃ প্রভুঃ
বিশ্বেদেবৈর্মরুদ্ভিশ্চ সাধ্যৈশ্চ পিতৃভিঃ সহ
44.7
গন্ধর্বৈরপ্সরোভিশ্চ যক্ষরাক্ষসপন্নগৈঃ
দেবর্ষিভিরসংখ্যেয়ৈস্তথা ব্রহ্মর্ষিভির্বরৈঃ
44.8
বৈখানসৈর্বালখিল্যৈর্বায্বাহারৈর্মরীচিপৈঃ
ভৃগুভিশ্চাঙ্গিরোভিশ্চ যতিভিশ্চ মহাত্মভিঃ
সর্বৈর্বিদ্যাধরৈঃ পুণ্যৈর্যোগসিদ্ধৈস্তথা বৃতঃ
44.9
পিতামহঃ পুলস্ত্যশ্চ পুলহশ্চ মহাতপাঃ
অঙ্গিরাঃ কশ্যপোঽত্রিশ্চ মরীচির্ভৃগুরেব চ
44.10
ক্রতুর্হরঃ প্রচেতাশ্চ মনুর্দক্ষস্তথৈব চ
ঋতবশ্চ গ্রহাশ্চৈব জ্যোতীংষি চ বিশাং পতে
44.11
মূর্তিমত্যশ্চ সরিতো বেদাশ্চৈব সনাতনাঃ
সমুদ্রাশ্চ হ্রদাশ্চৈব তীর্থানি বিবিধানি চ
পৃথিবী দ্যৌর্দিশশ্চৈব পাদপাশ্চ জনাধিপ
44.12
অদিতির্দেবমাতা চ হ্রীঃ শ্রীঃ স্বাহা সরস্বতী
উমা শচী সিনীবালী তথা চানুমতিঃ কুহূঃ
রাকা চ ধিষণা চৈব পত্ন্যশ্চান্যা দিবৌকসাম্
44.13
হিমবাংশ্চৈব বিন্ধ্যশ্চ মেরুশ্চানেকশৃঙ্গবান্
ঐরাবতঃ সানুচরঃ কলাঃ কাষ্ঠাস্তথৈব চ
মাসার্ধমাসা ঋতবস্তথা রাত্র্যহনী নৃপ
44.14
উচ্চৈঃশ্রবা হয়শ্রেষ্ঠো নাগরাজশ্চ বামনঃ
অরুণো গরুডশ্চৈব বৃক্ষাশ্চৌষধিভিঃ সহ
44.15
ধর্মশ্চ ভগবান্দেবঃ সমাজগ্মুর্হি সংগতাঃ
কালো যমশ্চ মৃত্যুশ্চ যমস্যানুচরাশ্চ যে
44.16
বহুলত্বাচ্চ নোক্তা যে বিবিধা দেবতাগণাঃ
তে কুমারাভিষেকার্থং সমাজগ্মুস্ততস্ততঃ
44.17
জগৃহুস্তে তদা রাজন্সর্ব এব দিবৌকসঃ
আভিষেচনিকং ভাণ্ডং মঙ্গলানি চ সর্বশঃ
44.18
দিব্যসংভারসংয়ুক্তৈঃ কলশৈঃ কাঞ্চনৈর্নৃপ
সরস্বতীভিঃ পুণ্যাভির্দিব্যতোয়াভিরেব তু
44.19
অভ্যষিঞ্চন্কুমারং বৈ সংপ্রহৃষ্টা দিবৌকসঃ
সেনাপতিং মহাত্মানমসুরাণাং ভয়াবহম্
44.20
পুরা যথা মহারাজ বরুণং বৈ জলেশ্বরম্
তথাভ্যষিঞ্চদ্ভগবান্ব্রহ্মা লোকপিতামহঃ
কশ্যপশ্চ মহাতেজা যে চান্যে নানুকীর্তিতাঃ
44.21
তস্মৈ ব্রহ্মা দদৌ প্রীতো বলিনো বাতরংহসঃ
কামবীর্যধরান্সিদ্ধান্মহাপারিষদান্প্রভুঃ
44.22
নন্দিষেণং লোহিতাক্ষং ঘণ্টাকর্ণং চ সংমতম্
চতুর্থমস্যানুচরং খ্যাতং কুমুদমালিনম্
44.23
ততঃ স্থাণুং মহাবেগং মহাপারিষদং ক্রতুম্
মায়াশতধরং কামং কামবীর্যবলান্বিতম্
দদৌ স্কন্দায় রাজেন্দ্র সুরারিবিনিবর্হণম্
44.24
স হি দেবাসুরে যুদ্ধে দৈত্যানাং ভীমকর্মণাম্
জঘান দোর্ভ্যাং সংক্রুদ্ধঃ প্রয়ুতানি চতুর্দশ
44.25
তথা দেবা দদুস্তস্মৈ সেনাং নৈরৃতসংকুলাম্
দেবশত্রুক্ষয়করীমজয্যাং বিশ্বরূপিণীম্
44.26
জয়শব্দং ততশ্চক্রুর্দেবাঃ সর্বে সবাসবাঃ
গন্ধর্বয়ক্ষরক্ষাংসি মুনয়ঃ পিতরস্তথা
44.27
যমঃ প্রাদাদনুচরৌ যমকালোপমাবুভৌ
উন্মাথং চ প্রমাথং চ মহাবীর্যৌ মহাদ্যুতী
44.28
সুভ্রাজো ভাস্করশ্চৈব যৌ তৌ সূর্যানুয়ায়িনৌ
তৌ সূর্যঃ কার্ত্তিকেয়ায় দদৌ প্রীতঃ প্রতাপবান্
44.29
কৈলাসশৃঙ্গসংকাশৌ শ্বেতমাল্যানুলেপনৌ
সোমোঽপ্যনুচরৌ প্রাদান্মণিং সুমণিমেব চ
44.30
জ্বালাজিহ্বং তথা জ্যোতিরাত্মজায় হুতাশনঃ
দদাবনুচরৌ শূরৌ পরসৈন্যপ্রমাথিনৌ
44.31
পরিঘং চ বটং চৈব ভীমং চ সুমহাবলম্
দহতিং দহনং চৈব প্রচণ্ডৌ বীর্যসংমতৌ
অংশোঽপ্যনুচরান্পঞ্চ দদৌ স্কন্দায় ধীমতে
44.32
উত্ক্রোশং পঙ্কজং চৈব বজ্রদণ্ডধরাবুভৌ
দদাবনলপুত্রায় বাসবঃ পরবীরহা
তৌ হি শত্রূন্মহেন্দ্রস্য জঘ্নতুঃ সমরে বহূন্
44.33
চক্রং বিক্রমকং চৈব সংক্রমং চ মহাবলম্
স্কন্দায় ত্রীননুচরান্দদৌ বিষ্ণুর্মহায়শাঃ
44.34
বর্ধনং নন্দনং চৈব সর্ববিদ্যাবিশারদৌ
স্কন্দায় দদতুঃ প্রীতাবশ্বিনৌ ভরতর্ষভ
44.35
কুন্দনং কুসুমং চৈব কুমুদং চ মহায়শাঃ
ডম্বরাডম্বরৌ চৈব দদৌ ধাতা মহাত্মনে
44.36
বক্রানুবক্রৌ বলিনৌ মেষবক্ত্রৌ বলোত্কটৌ
দদৌ ত্বষ্টা মহামায়ৌ স্কন্দায়ানুচরৌ বরৌ
44.37
সুব্রতং সত্যসংধং চ দদৌ মিত্রো মহাত্মনে
কুমারায় মহাত্মানৌ তপোবিদ্যাধরৌ প্রভুঃ
44.38
সুদর্শনীয়ৌ বরদৌ ত্রিষু লোকেষু বিশ্রুতৌ
সুপ্রভং চ মহাত্মানং শুভকর্মাণমেব চ
কার্ত্তিকেয়ায় সংপ্রাদাদ্বিধাতা লোকবিশ্রুতৌ
44.39
পালিতকং কালিকং চ মহামায়াবিনাবুভৌ
পূষা চ পার্ষদৌ প্রাদাত্কার্ত্তিকেয়ায় ভারত
44.40
বলং চাতিবলং চৈব মহাবক্ত্রৌ মহাবলৌ
প্রদদৌ কার্ত্তিকেয়ায় বায়ুর্ভরতসত্তম
44.41
ঘসং চাতিঘসং চৈব তিমিবক্ত্রৌ মহাবলৌ
প্রদদৌ কার্ত্তিকেয়ায় বরুণঃ সত্যসংগরঃ
44.42
সুবর্চসং মহাত্মানং তথৈবাপ্যতিবর্চসম্
হিমবান্প্রদদৌ রাজন্হুতাশনসুতায় বৈ
44.43
কাঞ্চনং চ মহাত্মানং মেঘমালিনমেব চ
দদাবনুচরৌ মেরুরগ্নিপুত্রায় ভারত
44.44
স্থিরং চাতিস্থিরং চৈব মেরুরেবাপরৌ দদৌ
মহাত্মনেঽগ্নিপুত্রায় মহাবলপরাক্রমৌ
44.45
উচ্ছ্রিতং চাতিশৃঙ্গং চ মহাপাষাণয়োধিনৌ
প্রদদাবগ্নিপুত্রায় বিন্ধ্যঃ পারিষদাবুভৌ
44.46
সংগ্রহং বিগ্রহং চৈব সমুদ্রোঽপি গদাধরৌ
প্রদদাবগ্নিপুত্রায় মহাপারিষদাবুভৌ
44.47
উন্মাদং পুষ্পদন্তং চ শঙ্কুকর্ণং তথৈব চ
প্রদদাবগ্নিপুত্রায় পার্বতী শুভদর্শনা
44.48
জয়ং মহাজয়ং চৈব নাগৌ জ্বলনসূনবে
প্রদদৌ পুরুষব্যাঘ্র বাসুকিঃ পন্নগেশ্বরঃ
44.49
এবং সাধ্যাশ্চ রুদ্রাশ্চ বসবঃ পিতরস্তথা
সাগরাঃ সরিতশ্চৈব গিরয়শ্চ মহাবলাঃ
44.50
দদুঃ সেনাগণাধ্যক্ষাঞ্শূলপট্টিশধারিণঃ
দিব্যপ্রহরণোপেতান্নানাবেষবিভূষিতান্
44.51
শৃণু নামানি চান্যেষাং যেঽন্যে স্কন্দস্য সৈনিকাঃ
বিবিধায়ুধসংপন্নাশ্চিত্রাভরণবর্মিণঃ
44.52
শঙ্কুকর্ণো নিকুম্ভশ্চ পদ্মঃ কুমুদ এব চ
অনন্তো দ্বাদশভুজস্তথা কৃষ্ণোপকৃষ্ণকৌ
44.53
দ্রোণশ্রবাঃ কপিস্কন্ধঃ কাঞ্চনাক্ষো জলংধমঃ
অক্ষসংতর্জনো রাজন্কুনদীকস্তমোভ্রকৃৎ
44.54
একাক্ষো দ্বাদশাক্ষশ্চ তথৈবৈকজটঃ প্রভুঃ
সহস্রবাহুর্বিকটো ব্যাঘ্রাক্ষঃ ক্ষিতিকম্পনঃ
44.55
পুণ্যনামা সুনামা চ সুবক্ত্রঃ প্রিয়দর্শনঃ
পরিশ্রুতঃ কোকনদঃ প্রিয়মাল্যানুলেপনঃ
44.56
অজোদরো গজশিরাঃ স্কন্ধাক্ষঃ শতলোচনঃ
জ্বালাজিহ্বঃ করালশ্চ সিতকেশো জটী হরিঃ
44.57
চতুর্দংষ্ট্রোঽষ্টজিহ্বশ্চ মেঘনাদঃ পৃথুশ্রবাঃ
বিদ্যুদক্ষো ধনুর্বক্ত্রো জঠরো মারুতাশনঃ
44.58
উদরাক্ষো ঝষাক্ষশ্চ বজ্রনাভো বসুপ্রভঃ
সমুদ্রবেগো রাজেন্দ্র শৈলকম্পী তথৈব চ
44.59
পুত্রমেষঃ প্রবাহশ্চ তথা নন্দোপনন্দকৌ
ধূম্রঃ শ্বেতঃ কলিঙ্গশ্চ সিদ্ধার্থো বরদস্তথা
44.60
প্রিয়কশ্চৈব নন্দশ্চ গোনন্দশ্চ প্রতাপবান্
আনন্দশ্চ প্রমোদশ্চ স্বস্তিকো ধ্রুবকস্তথা
44.61
ক্ষেমবাপঃ সুজাতশ্চ সিদ্ধয়াত্রশ্চ ভারত
গোব্রজঃ কনকাপীডো মহাপারিষদেশ্বরঃ
44.62
গায়নো হসনশ্চৈব বাণঃ খড্গশ্চ বীর্যবান্
বৈতালী চাতিতালী চ তথা কতিকবাতিকৌ
44.63
হংসজঃ পঙ্কদিগ্ধাঙ্গঃ সমুদ্রোন্মাদনশ্চ হ
রণোত্কটঃ প্রহাসশ্চ শ্বেতশীর্ষশ্চ নন্দকঃ
44.64
কালকণ্ঠঃ প্রভাসশ্চ তথা কুম্ভাণ্ডকোঽপরঃ
কালকাক্ষঃ সিতশ্চৈব ভূতলোন্মথনস্তথা
44.65
যজ্ঞবাহঃ প্রবাহশ্চ দেবয়াজী চ সোমপঃ
সজালশ্চ মহাতেজাঃ ক্রথক্রাথৌ চ ভারত
44.66
তুহনশ্চ তুহানশ্চ চিত্রদেবশ্চ বীর্যবান্
মধুরঃ সুপ্রসাদশ্চ কিরীটী চ মহাবলঃ
44.67
বসনো মধুবর্ণশ্চ কলশোদর এব চ
ধমন্তো মন্মথকরঃ সূচীবক্ত্রশ্চ বীর্যবান্
44.68
শ্বেতবক্ত্রঃ সুবক্ত্রশ্চ চারুবক্ত্রশ্চ পাণ্ডুরঃ
দণ্ডবাহুঃ সুবাহুশ্চ রজঃ কোকিলকস্তথা
44.69
অচলঃ কনকাক্ষশ্চ বালানাময়িকঃ প্রভুঃ
সংচারকঃ কোকনদো গৃধ্রবক্ত্রশ্চ জম্বুকঃ
44.70
লোহাশবক্ত্রো জঠরঃ কুম্ভবক্ত্রশ্চ কুণ্ডকঃ
মদ্গুগ্রীবশ্চ কৃষ্ণৌজা হংসবক্ত্রশ্চ চন্দ্রভাঃ
44.71
পাণিকূর্মা চ শম্বূকঃ পঞ্চবক্ত্রশ্চ শিক্ষকঃ
চাষবক্ত্রশ্চ জম্বূকঃ শাকবক্ত্রশ্চ কুণ্ডকঃ
44.72
যোগয়ুক্তা মহাত্মানঃ সততং ব্রাহ্মণপ্রিয়াঃ
পৈতামহা মহাত্মানো মহাপারিষদাশ্চ হ
যৌবনস্থাশ্চ বালাশ্চ বৃদ্ধাশ্চ জনমেজয়
44.73
সহস্রশঃ পারিষদাঃ কুমারমুপতস্থিরে
বক্ত্রৈর্নানাবিধৈর্যে তু শৃণু তাঞ্জনমেজয়
44.74
কূর্মকুক্কুটবক্ত্রাশ্চ শশোলূকমুখাস্তথা
খরোষ্ট্রবদনাশ্চৈব বরাহবদনাস্তথা
44.75
মনুষ্যমেষবক্ত্রাশ্চ সৃগালবদনাস্তথা
ভীমা মকরবক্ত্রাশ্চ শিংশুমারমুখাস্তথা
44.76
মার্জারশশবক্ত্রাশ্চ দীর্ঘবক্ত্রাশ্চ ভারত
নকুলোলূকবক্ত্রাশ্চ শ্ববক্ত্রাশ্চ তথাপরে
44.77
আখুবভ্রুকবক্ত্রাশ্চ ময়ূরবদনাস্তথা
মত্স্যমেষাননাশ্চান্যে অজাবিমহিষাননাঃ
44.78
ঋক্ষশার্দূলবক্ত্রাশ্চ দ্বীপিসিংহাননাস্তথা
ভীমা গজাননাশ্চৈব তথা নক্রমুখাঃ পরে
44.79
গরুডাননাঃ খড্গমুখা বৃককাকমুখাস্তথা
গোখরোষ্ট্রমুখাশ্চান্যে বৃষদংশমুখাস্তথা
44.80
মহাজঠরপাদাঙ্গাস্তারকাক্ষাশ্চ ভারত
পারাবতমুখাশ্চান্যে তথা বৃষমুখাঃ পরে
44.81
কোকিলাবদনাশ্চান্যে শ্যেনতিত্তিরিকাননাঃ
কৃকলাসমুখাশ্চৈব বিরজোম্বরধারিণঃ
44.82
ব্যালবক্ত্রাঃ শূলমুখাশ্চণ্ডবক্ত্রাঃ শতাননাঃ
আশীবিষাশ্চীরধরা গোনাসাবরণাস্তথা
44.83
স্থূলোদরাঃ কৃশাঙ্গাশ্চ স্থূলাঙ্গাশ্চ কৃশোদরাঃ
হ্রস্বগ্রীবা মহাকর্ণা নানাব্যালবিভূষিতাঃ
44.84
গজেন্দ্রচর্মবসনাস্তথা কৃষ্ণাজিনাম্বরাঃ
স্কন্ধেমুখা মহারাজ তথা হ্যুদরতোমুখাঃ
44.85
পৃষ্ঠেমুখা হনুমুখাস্তথা জঙ্ঘামুখা অপি
পার্শ্বাননাশ্চ বহবো নানাদেশমুখাস্তথা
44.86
তথা কীটপতংগানাং সদৃশাস্যা গণেশ্বরাঃ
নানাব্যালমুখাশ্চান্যে বহুবাহুশিরোধরাঃ
44.87
নানাবৃক্ষভুজাঃ কেচিত্কটিশীর্ষাস্তথাপরে
ভুজংগভোগবদনা নানাগুল্মনিবাসিনঃ
44.88
চীরসংবৃতগাত্রাশ্চ তথা ফলকবাসসঃ
নানাবেষধরাশ্চৈব চর্মবাসস এব চ
44.89
উষ্ণীষিণো মুকুটিনঃ কম্বুগ্রীবাঃ সুবর্চসঃ
কিরীটিনঃ পঞ্চশিখাস্তথা কঠিনমূর্ধজাঃ
44.90
ত্রিশিখা দ্বিশিখাশ্চৈব তথা সপ্তশিখাঃ পরে
শিখণ্ডিনো মুকুটিনো মুণ্ডাশ্চ জটিলাস্তথা
44.91
চিত্রমাল্যধরাঃ কেচিত্কেচিদ্রোমাননাস্তথা
দিব্যমাল্যাম্বরধরাঃ সততং প্রিয়বিগ্রহাঃ
44.92
কৃষ্ণা নির্মাংসবক্ত্রাশ্চ দীর্ঘপৃষ্ঠা নিরূদরাঃ
স্থূলপৃষ্ঠা হ্রস্বপৃষ্ঠাঃ প্রলম্বোদরমেহনাঃ
44.93
মহাভুজা হ্রস্বভুজা হ্রস্বগাত্রাশ্চ বামনাঃ
কুব্জাশ্চ দীর্ঘজঙ্ঘাশ্চ হস্তিকর্ণশিরোধরাঃ
44.94
হস্তিনাসাঃ কূর্মনাসা বৃকনাসাস্তথাপরে
দীর্ঘোষ্ঠা দীর্ঘজিহ্বাশ্চ বিকরালা হ্যধোমুখাঃ
44.95
মহাদংষ্ট্রা হ্রস্বদংষ্ট্রাশ্চতুর্দংষ্ট্রাস্তথাপরে
বারণেন্দ্রনিভাশ্চান্যে ভীমা রাজন্সহস্রশঃ
44.96
সুবিভক্তশরীরাশ্চ দীপ্তিমন্তঃ স্বলংকৃতাঃ
পিঙ্গাক্ষাঃ শঙ্কুকর্ণাশ্চ বক্রনাসাশ্চ ভারত
44.97
পৃথুদংষ্ট্রা মহাদংষ্ট্রাঃ স্থূলৌষ্ঠা হরিমূর্ধজাঃ
নানাপাদৌষ্ঠদংষ্ট্রাশ্চ নানাহস্তশিরোধরাঃ
নানাবর্মভিরাচ্ছন্না নানাভাষাশ্চ ভারত
44.98
কুশলা দেশভাষাসু জল্পন্তোঽন্যোন্যমীশ্বরাঃ
হৃষ্টাঃ পরিপতন্তি স্ম মহাপারিষদাস্তথা
44.99
দীর্ঘগ্রীবা দীর্ঘনখা দীর্ঘপাদশিরোভুজাঃ
পিঙ্গাক্ষা নীলকণ্ঠাশ্চ লম্বকর্ণাশ্চ ভারত
44.100
বৃকোদরনিভাশ্চৈব কেচিদঞ্জনসংনিভাঃ
শ্বেতাঙ্গা লোহিতগ্রীবাঃ পিঙ্গাক্ষাশ্চ তথাপরে
কল্মাষা বহবো রাজংশ্চিত্রবর্ণাশ্চ ভারত
44.101
চামরাপীডকনিভাঃ শ্বেতলোহিতরাজয়ঃ
নানাবর্ণাঃ সবর্ণাশ্চ ময়ূরসদৃশপ্রভাঃ
44.102
পুনঃ প্রহরণান্যেষাং কীর্ত্যমানানি মে শৃণু
শেষৈঃ কৃতং পারিষদৈরায়ুধানাং পরিগ্রহম্
44.103
পাশোদ্যতকরাঃ কেচিদ্ব্যাদিতাস্যাঃ খরাননাঃ
পৃথ্বক্ষা নীলকণ্ঠাশ্চ তথা পরিঘবাহবঃ
44.104
শতঘ্নীচক্রহস্তাশ্চ তথা মুসলপাণয়ঃ
শূলাসিহস্তাশ্চ তথা মহাকায়া মহাবলাঃ
44.105
গদাভুশুণ্ডিহস্তাশ্চ তথা তোমরপাণয়ঃ
অসিমুদ্গরহস্তাশ্চ দণ্ডহস্তাশ্চ ভারত
44.106
আয়ুধৈর্বিবিধৈর্ঘোরৈর্মহাত্মানো মহাজবাঃ
মহাবলা মহাবেগা মহাপারিষদাস্তথা
44.107
অভিষেকং কুমারস্য দৃষ্ট্বা হৃষ্টা রণপ্রিয়াঃ
ঘণ্টাজালপিনদ্ধাঙ্গা ননৃতুস্তে মহৌজসঃ
44.108
এতে চান্যে চ বহবো মহাপারিষদা নৃপ
উপতস্থুর্মহাত্মানং কার্ত্তিকেয়ং যশস্বিনম্
44.109
দিব্যাশ্চাপ্যান্তরিক্ষাশ্চ পার্থিবাশ্চানিলোপমাঃ
ব্যাদিষ্টা দৈবতৈঃ শূরাঃ স্কন্দস্যানুচরাভবন্
44.110
তাদৃশানাং সহস্রাণি প্রয়ুতান্যর্বুদানি চ
অভিষিক্তং মহাত্মানং পরিবার্যোপতস্থিরে