Utshovঅধ্যায় 43
43.1
জনমেজয় উবাচ
সরস্বত্যাঃ প্রভাবোঽয়মুক্তস্তে দ্বিজসত্তম
কুমারস্যাভিষেকং তু ব্রহ্মন্ব্যাখ্যাতুমর্হসি
43.2
যস্মিন্কালে চ দেশে চ যথা চ বদতাং বর
যৈশ্চাভিষিক্তো ভগবান্বিধিনা যেন চ প্রভুঃ
43.3
স্কন্দো যথা চ দৈত্যানামকরোত্কদনং মহৎ
তথা মে সর্বমাচক্ষ্ব পরং কৌতূহলং হি মে
43.4
বৈশংপায়ন উবাচ
কুরুবংশস্য সদৃশমিদং কৌতূহলং তব
হর্ষমুত্পাদয়ত্যেতদ্বচো মে জনমেজয়
43.5
হন্ত তে কথয়িষ্যামি শৃণ্বানস্য জনাধিপ
অভিষেকং কুমারস্য প্রভাবং চ মহাত্মনঃ
43.6
তেজো মাহেশ্বরং স্কন্নমগ্নৌ প্রপতিতং পুরা
তত্সর্বভক্ষো ভগবান্নাশকদ্দগ্ধুমক্ষয়ম্
43.7
তেনাসীদতি তেজস্বী দীপ্তিমান্হব্যবাহনঃ
ন চৈব ধারয়ামাস গর্ভং তেজোময়ং তদা
43.8
স গঙ্গামভিসংগম্য নিয়োগাদ্ব্রহ্মণঃ প্রভুঃ
গর্ভমাহিতবান্দিব্যং ভাস্করোপমতেজসম্
43.9
অথ গঙ্গাপি তং গর্ভমসহন্তী বিধারণে
উত্সসর্জ গিরৌ রম্যে হিমবত্যমরার্চিতে
43.10
স তত্র ববৃধে লোকানাবৃত্য জ্বলনাত্মজঃ
দদৃশুর্জ্বলনাকারং তং গর্ভমথ কৃত্তিকাঃ
43.11
শরস্তম্বে মহাত্মানমনলাত্মজমীশ্বরম্
মমায়মিতি তাঃ সর্বাঃ পুত্রার্থিন্যোঽভিচক্রমুঃ
43.12
তাসাং বিদিত্বা ভাবং তং মাতৄণাং ভগবান্প্রভুঃ
প্রস্নুতানাং পয়ঃ ষড্ভির্বদনৈরপিবত্তদা
43.13
তং প্রভাবং সমালক্ষ্য তস্য বালস্য কৃত্তিকাঃ
পরং বিস্ময়মাপন্না দেব্যো দিব্যবপুর্ধরাঃ
43.14
যত্রোত্সৃষ্টঃ স ভগবান্গঙ্গয়া গিরিমূর্ধনি
স শৈলঃ কাঞ্চনঃ সর্বঃ সংবভৌ কুরুসত্তম
43.15
বর্ধতা চৈব গর্ভেণ পৃথিবী তেন রঞ্জিতা
অতশ্চ সর্বে সংবৃত্তা গিরয়ঃ কাঞ্চনাকরাঃ
43.16
কুমারশ্চ মহাবীর্যঃ কার্ত্তিকেয় ইতি স্মৃতঃ
গাঙ্গেয়ঃ পূর্বমভবন্মহায়োগবলান্বিতঃ
43.17
স দেবস্তপসা চৈব বীর্যেণ চ সমন্বিতঃ
ববৃধেঽতীব রাজেন্দ্র চন্দ্রবত্প্রিয়দর্শনঃ
43.18
স তস্মিন্কাঞ্চনে দিব্যে শরস্তম্বে শ্রিয়া বৃতঃ
স্তূয়মানস্তদা শেতে গন্ধর্বৈর্মুনিভিস্তথা
43.19
তথৈনমন্বনৃত্যন্ত দেবকন্যাঃ সহস্রশঃ
দিব্যবাদিত্রনৃত্তজ্ঞাঃ স্তুবন্ত্যশ্চারুদর্শনাঃ
43.20
অন্বাস্তে চ নদী দেবং গঙ্গা বৈ সরিতাং বরা
দধার পৃথিবী চৈনং বিভ্রতী রূপমুত্তমম্
43.21
জাতকর্মাদিকাস্তস্য ক্রিয়াশ্চক্রে বৃহস্পতিঃ
বেদশ্চৈনং চতুর্মূর্তিরুপতস্থে কৃতাঞ্জলিঃ
43.22
ধনুর্বেদশ্চতুষ্পাদঃ শস্ত্রগ্রামঃ সসংগ্রহঃ
তত্রৈনং সমুপাতিষ্ঠত্সাক্ষাদ্বাণী চ কেবলা
43.23
স দদর্শ মহাবীর্যং দেবদেবমুমাপতিম্
শৈলপুত্র্যা সহাসীনং ভূতসংঘশতৈর্বৃতম্
43.24
নিকায়া ভূতসংঘানাং পরমাদ্ভুতদর্শনাঃ
বিকৃতা বিকৃতাকারা বিকৃতাভরণধ্বজাঃ
43.25
ব্যাঘ্রসিংহর্ক্ষবদনা বিডালমকরাননাঃ
বৃষদংশমুখাশ্চান্যে গজোষ্ট্রবদনাস্তথা
43.26
উলূকবদনাঃ কেচিদ্গৃধ্রগোমায়ুদর্শনাঃ
ক্রৌঞ্চপারাবতনিভৈর্বদনৈ রাঙ্কবৈরপি
43.27
শ্বাবিচ্ছল্যকগোধানাং খরৈডকগবাং তথা
সদৃশানি বপূংষ্যন্যে তত্র তত্র ব্যধারয়ন্
43.28
কেচিচ্ছৈলাম্বুদপ্রখ্যাশ্চক্রালাতগদায়ুধাঃ
কেচিদঞ্জনপুঞ্জাভাঃ কেচিচ্ছ্বেতাচলপ্রভাঃ
43.29
সপ্তমাতৃগণাশ্চৈব সমাজগ্মুর্বিশাং পতে
সাধ্যা বিশ্বেঽথ মরুতো বসবঃ পিতরস্তথা
43.30
রুদ্রাদিত্যাস্তথা সিদ্ধা ভুজগা দানবাঃ খগাঃ
ব্রহ্মা স্বয়ংভূর্ভগবান্সপুত্রঃ সহ বিষ্ণুনা
43.31
শক্রস্তথাভ্যয়াদ্দ্রষ্টুং কুমারবরমচ্যুতম্
নারদপ্রমুখাশ্চাপি দেবগন্ধর্বসত্তমাঃ
43.32
দেবর্ষয়শ্চ সিদ্ধাশ্চ বৃহস্পতিপুরোগমাঃ
ঋভবো নাম বরদা দেবানামপি দেবতাঃ
তেঽপি তত্র সমাজগ্মুর্যামা ধামাশ্চ সর্বশঃ
43.33
স তু বালোঽপি ভগবান্মহায়োগবলান্বিতঃ
অভ্যাজগাম দেবেশং শূলহস্তং পিনাকিনম্
43.34
তমাব্রজন্তমালক্ষ্য শিবস্যাসীন্মনোগতম্
যুগপচ্ছৈলপুত্র্যাশ্চ গঙ্গায়াঃ পাবকস্য চ
43.35
কিং নু পূর্বময়ং বালো গৌরবাদভ্যুপৈষ্যতি
অপি মামিতি সর্বেষাং তেষামাসীন্মনোগতম্
43.36
তেষামেতমভিপ্রায়ং চতুর্ণামুপলক্ষ্য সঃ
যুগপদ্যোগমাস্থায় সসর্জ বিবিধাস্তনূঃ
43.37
ততোঽভবচ্চতুর্মূর্তিঃ ক্ষণেন ভগবান্প্রভুঃ
স্কন্দঃ শাখো বিশাখশ্চ নৈগমেষশ্চ পৃষ্ঠতঃ
43.38
এবং স কৃত্বা হ্যাত্মানং চতুর্ধা ভগবান্প্রভুঃ
যতো রুদ্রস্ততঃ স্কন্দো জগামাদ্ভুতদর্শনঃ
43.39
বিশাখস্তু যয়ৌ যেন দেবী গিরিবরাত্মজা
শাখো যয়ৌ চ ভগবান্বায়ুমূর্তির্বিভাবসুম্
নৈগমেষোঽগমদ্গঙ্গাং কুমারঃ পাবকপ্রভঃ
43.40
সর্বে ভাস্বরদেহাস্তে চত্বারঃ সমরূপিণঃ
তান্সমভ্যয়ুরব্যগ্রাস্তদদ্ভুতমিবাভবৎ
43.41
হাহাকারো মহানাসীদ্দেবদানবরক্ষসাম্
তদ্দৃষ্ট্বা মহদাশ্চর্যমদ্ভুতং রোমহর্ষণম্
43.42
ততো রুদ্রশ্চ দেবী চ পাবকশ্চ পিতামহম্
গঙ্গয়া সহিতাঃ সর্বে প্রণিপেতুর্জগত্পতিম্
43.43
প্রণিপত্য ততস্তে তু বিধিবদ্রাজপুংগব
ইদমূচুর্বচো রাজন্কার্ত্তিকেয়প্রিয়েপ্সয়া
43.44
অস্য বালস্য ভগবন্নাধিপত্যং যথেপ্সিতম্
অস্মত্প্রিয়ার্থং দেবেশ সদৃশং দাতুমর্হসি
43.45
ততঃ স ভগবান্ধীমান্সর্বলোকপিতামহঃ
মনসা চিন্তয়ামাস কিময়ং লভতামিতি
43.46
ঐশ্বর্যাণি হি সর্বাণি দেবগন্ধর্বরক্ষসাম্
ভূতয়ক্ষবিহংগানাং পন্নগানাং চ সর্বশঃ
43.47
পূর্বমেবাদিদেশাসৌ নিকায়েষু মহাত্মনাম্
সমর্থং চ তমৈশ্বর্যে মহামতিরমন্যত
43.48
ততো মুহূর্তং স ধ্যাত্বা দেবানাং শ্রেয়সি স্থিতঃ
সেনাপত্যং দদৌ তস্মৈ সর্বভূতেষু ভারত
43.49
সর্বদেবনিকায়ানাং যে রাজানঃ পরিশ্রুতাঃ
তান্সর্বান্ব্যাদিদেশাস্মৈ সর্বভূতপিতামহঃ
43.50
ততঃ কুমারমাদায় দেবা ব্রহ্মপুরোগমাঃ
অভিষেকার্থমাজগ্মুঃ শৈলেন্দ্রং সহিতাস্ততঃ
43.51
পুণ্যাং হৈমবতীং দেবীং সরিচ্ছ্রেষ্ঠাং সরস্বতীম্
সমন্তপঞ্চকে যা বৈ ত্রিষু লোকেষু বিশ্রুতা
43.52
তত্র তীরে সরস্বত্যাঃ পুণ্যে সর্বগুণান্বিতে
নিষেদুর্দেবগন্ধর্বাঃ সর্বে সংপূর্ণমানসাঃ