Utshovঅধ্যায় 42
42.1
বৈশংপায়ন উবাচ
সা শপ্তা তেন ক্রুদ্ধেন বিশ্বামিত্রেণ ধীমতা
তস্মিংস্তীর্থবরে শুভ্রে শোণিতং সমুপাবহৎ
42.2
অথাজগ্মুস্ততো রাজন্রাক্ষসাস্তত্র ভারত
তত্র তে শোণিতং সর্বে পিবন্তঃ সুখমাসতে
42.3
তৃপ্তাশ্চ সুভৃশং তেন সুখিতা বিগতজ্বরাঃ
নৃত্যন্তশ্চ হসন্তশ্চ যথা স্বর্গজিতস্তথা
42.4
কস্যচিত্ত্বথ কালস্য ঋষয়ঃ সতপোধনাঃ
তীর্থয়াত্রাং সমাজগ্মুঃ সরস্বত্যাং মহীপতে
42.5
তেষু সর্বেষু তীর্থেষু আপ্লুত্য মুনিপুংগবাঃ
প্রাপ্য প্রীতিং পরাং চাপি তপোলুব্ধা বিশারদাঃ
প্রয়য়ুর্হি ততো রাজন্যেন তীর্থং হি তত্তথা
42.6
অথাগম্য মহাভাগাস্তত্তীর্থং দারুণং তদা
দৃষ্ট্বা তোয়ং সরস্বত্যাঃ শোণিতেন পরিপ্লুতম্
পীয়মানং চ রক্ষোভির্বহুভির্নৃপসত্তম
42.7
তান্দৃষ্ট্বা রাক্ষসান্রাজন্মুনয়ঃ সংশিতব্রতাঃ
পরিত্রাণে সরস্বত্যাঃ পরং যত্নং প্রচক্রিরে
42.8
তে তু সর্বে মহাভাগাঃ সমাগম্য মহাব্রতাঃ
আহূয় সরিতাং শ্রেষ্ঠামিদং বচনমব্রুবন্
42.9
কারণং ব্রূহি কল্যাণি কিমর্থং তে হ্রদো হ্যয়ম্
এবমাকুলতাং যাতঃ শ্রুত্বা পাস্যামহে বয়ম্
42.10
ততঃ সা সর্বমাচষ্ট যথাবৃত্তং প্রবেপতী
দুঃখিতামথ তাং দৃষ্ট্বা ত ঊচুর্বৈ তপোধনাঃ
42.11
কারণং শ্রুতমস্মাভিঃ শাপশ্চৈব শ্রুতোঽনঘে
করিষ্যন্তি তু যত্প্রাপ্তং সর্ব এব তপোধনাঃ
42.12
এবমুক্ত্বা সরিচ্ছ্রেষ্ঠামূচুস্তেঽথ পরস্পরম্
বিমোচয়ামহে সর্বে শাপাদেতাং সরস্বতীম্
42.13
তেষাং তু বচনাদেব প্রকৃতিস্থা সরস্বতী
প্রসন্নসলিলা জজ্ঞে যথা পূর্বং তথৈব হি
বিমুক্তা চ সরিচ্ছ্রেষ্ঠা বিবভৌ সা যথা পুরা
42.14
দৃষ্ট্বা তোয়ং সরস্বত্যা মুনিভিস্তৈস্তথা কৃতম্
কৃতাঞ্জলীস্ততো রাজন্রাক্ষসাঃ ক্ষুধয়ার্দিতাঃ
ঊচুস্তান্বৈ মুনীন্সর্বান্কৃপায়ুক্তান্পুনঃ পুনঃ
42.15
বয়ং হি ক্ষুধিতাশ্চৈব ধর্মাদ্ধীনাশ্চ শাশ্বতাৎ
ন চ নঃ কামকারোঽয়ং যদ্বয়ং পাপকারিণঃ
42.16
যুষ্মাকং চাপ্রসাদেন দুষ্কৃতেন চ কর্মণা
পক্ষোঽয়ং বর্ধতেঽস্মাকং যতঃ স্ম ব্রহ্মরাক্ষসাঃ
42.17
এবং হি বৈশ্যশূদ্রাণাং ক্ষত্রিয়াণাং তথৈব চ
যে ব্রাহ্মণান্প্রদ্বিষন্তি তে ভবন্তীহ রাক্ষসাঃ
42.18
আচার্যমৃত্বিজং চৈব গুরুং বৃদ্ধজনং তথা
প্রাণিনো যেঽবমন্যন্তে তে ভবন্তীহ রাক্ষসাঃ
যোষিতাং চৈব পাপানাং যোনিদোষেণ বর্ধতে
42.19
তত্কুরুধ্বমিহাস্মাকং কারুণ্যং দ্বিজসত্তমাঃ
শক্তা ভবন্তঃ সর্বেষাং লোকানামপি তারণে
42.20
তেষাং তে মুনয়ঃ শ্রুত্বা তুষ্টুবুস্তাং মহানদীম্
মোক্ষার্থং রক্ষসাং তেষামূচুঃ প্রয়তমানসাঃ
42.21
ক্ষুতকীটাবপন্নং চ যচ্চোচ্ছিষ্টাশিতং ভবেৎ
কেশাবপন্নমাধূতমারুগ্ণমপি যদ্ভবেৎ
শ্বভিঃ সংস্পৃষ্টমন্নং চ ভাগোঽসৌ রক্ষসামিহ
42.22
তস্মাজ্জ্ঞাত্বা সদা বিদ্বানেতান্যন্নানি বর্জয়েৎ
রাক্ষসান্নমসৌ ভুঙ্ক্তে যো ভুঙ্ক্তে হ্যন্নমীদৃশম্
42.23
শোধয়িত্বা ততস্তীর্থমৃষয়স্তে তপোধনাঃ
মোক্ষার্থং রাক্ষসানাং চ নদীং তাং প্রত্যচোদয়ন্
42.24
মহর্ষীণাং মতং জ্ঞাত্বা ততঃ সা সরিতাং বরা
অরুণামানয়ামাস স্বাং তনুং পুরুষর্ষভ
42.25
তস্যাং তে রাক্ষসাঃ স্নাত্বা তনূস্ত্যক্ত্বা দিবং গতাঃ
অরুণায়াং মহারাজ ব্রহ্মহত্যাপহা হি সা
42.26
এতমর্থমভিজ্ঞায় দেবরাজঃ শতক্রতুঃ
তস্মিংস্তীর্থবরে স্নাত্বা বিমুক্তঃ পাপ্মনা কিল
42.27
জনমেজয় উবাচ
কিমর্থং ভগবাঞ্শক্রো ব্রহ্মহত্যামবাপ্তবান্
কথমস্মিংশ্চ তীর্থে বৈ আপ্লুত্যাকল্মষোঽভবৎ
42.28
বৈশংপায়ন উবাচ
শৃণুষ্বৈতদুপাখ্যানং যথাবৃত্তং জনেশ্বর
যথা বিভেদ সময়ং নমুচের্বাসবঃ পুরা
42.29
নমুচির্বাসবাদ্ভীতঃ সূর্যরশ্মিং সমাবিশৎ
তেনেন্দ্রঃ সখ্যমকরোত্সময়ং চেদমব্রবীৎ
42.30
নার্দ্রেণ ত্বা ন শুষ্কেণ ন রাত্রৌ নাপি বাহনি
বধিষ্যাম্যসুরশ্রেষ্ঠ সখে সত্যেন তে শপে
42.31
এবং স কৃত্বা সময়ং সৃষ্ট্বা নীহারমীশ্বরঃ
চিচ্ছেদাস্য শিরো রাজন্নপাং ফেনেন বাসবঃ
42.32
তচ্ছিরো নমুচেশ্ছিন্নং পৃষ্ঠতঃ শক্রমন্বয়াৎ
হে মিত্রহন্পাপ ইতি ব্রুবাণং শক্রমন্তিকাৎ
42.33
এবং স শিরসা তেন চোদ্যমানঃ পুনঃ পুনঃ
পিতামহায় সংতপ্ত এবমর্থং ন্যবেদয়ৎ
42.34
তমব্রবীল্লোকগুরুররুণায়াং যথাবিধি
ইষ্ট্বোপস্পৃশ দেবেন্দ্র ব্রহ্মহত্যাপহা হি সা
42.35
ইত্যুক্তঃ স সরস্বত্যাঃ কুঞ্জে বৈ জনমেজয়
ইষ্ট্বা যথাবদ্বলভিদরুণায়ামুপাস্পৃশৎ
42.36
স মুক্তঃ পাপ্মনা তেন ব্রহ্মহত্যাকৃতেন হ
জগাম সংহৃষ্টমনাস্ত্রিদিবং ত্রিদশেশ্বরঃ
42.37
শিরস্তচ্চাপি নমুচেস্তত্রৈবাপ্লুত্য ভারত
লোকান্কামদুঘান্প্রাপ্তমক্ষয়ান্রাজসত্তম
42.38
তত্রাপ্যুপস্পৃশ্য বলো মহাত্মা; দত্ত্বা চ দানানি পৃথগ্বিধানি
অবাপ্য ধর্মং পরমার্যকর্মা; জগাম সোমস্য মহত্স তীর্থম্
42.39
যত্রায়জদ্রাজসূয়েন সোমঃ; সাক্ষাত্পুরা বিধিবত্পার্থিবেন্দ্র
অত্রির্ধীমান্বিপ্রমুখ্যো বভূব; হোতা যস্মিন্ক্রতুমুখ্যে মহাত্মা
42.40
যস্যান্তেঽভূত্সুমহান্দানবানাং; দৈতেয়ানাং রাক্ষসানাং চ দেবৈঃ
স সংগ্রামস্তারকাখ্যঃ সুতীব্রো; যত্র স্কন্দস্তারকাখ্যং জঘান
42.41
সেনাপত্যং লব্ধবান্দেবতানাং; মহাসেনো যত্র দৈত্যান্তকর্তা
সাক্ষাচ্চাত্র ন্যবসত্কার্ত্তিকেয়ঃ; সদা কুমারো যত্র স প্লক্ষরাজঃ