Utshovঅধ্যায় 41
41.1
জনমেজয় উবাচ
বসিষ্ঠস্যাপবাহো বৈ ভীমবেগঃ কথং নু সঃ
কিমর্থং চ সরিচ্ছ্রেষ্ঠা তমৃষিং প্রত্যবাহয়ৎ
41.2
কেন চাস্যাভবদ্বৈরং কারণং কিং চ তত্প্রভো
শংস পৃষ্টো মহাপ্রাজ্ঞ ন হি তৃপ্যামি কথ্যতাম্
41.3
বৈশংপায়ন উবাচ
বিশ্বামিত্রস্য চৈবর্ষের্বসিষ্ঠস্য চ ভারত
ভৃশং বৈরমভূদ্রাজংস্তপঃস্পর্ধাকৃতং মহৎ
41.4
আশ্রমো বৈ বসিষ্ঠস্য স্থাণুতীর্থেঽভবন্মহান্
পূর্বতঃ পশ্চিমশ্চাসীদ্বিশ্বামিত্রস্য ধীমতঃ
41.5
যত্র স্থাণুর্মহারাজ তপ্তবান্সুমহত্তপঃ
যত্রাস্য কর্ম তদ্ঘোরং প্রবদন্তি মনীষিণঃ
41.6
যত্রেষ্ট্বা ভগবান্স্থাণুঃ পূজয়িত্বা সরস্বতীম্
স্থাপয়ামাস তত্তীর্থং স্থাণুতীর্থমিতি প্রভো
41.7
তত্র সর্বে সুরাঃ স্কন্দমভ্যষিঞ্চন্নরাধিপ
সেনাপত্যেন মহতা সুরারিবিনিবর্হণম্
41.8
তস্মিন্সরস্বতীতীর্থে বিশ্বামিত্রো মহামুনিঃ
বসিষ্ঠং চালয়ামাস তপসোগ্রেণ তচ্ছৃণু
41.9
বিশ্বামিত্রবসিষ্ঠৌ তাবহন্যহনি ভারত
স্পর্ধাং তপঃকৃতাং তীব্রাং চক্রতুস্তৌ তপোধনৌ
41.10
তত্রাপ্যধিকসংতাপো বিশ্বামিত্রো মহামুনিঃ
দৃষ্ট্বা তেজো বসিষ্ঠস্য চিন্তামভিজগাম হ
তস্য বুদ্ধিরিয়ং হ্যাসীদ্ধর্মনিত্যস্য ভারত
41.11
ইয়ং সরস্বতী তূর্ণং মত্সমীপং তপোধনম্
আনয়িষ্যতি বেগেন বসিষ্ঠং জপতাং বরম্
ইহাগতং দ্বিজশ্রেষ্ঠং হনিষ্যামি ন সংশয়ঃ
41.12
এবং নিশ্চিত্য ভগবান্বিশ্বামিত্রো মহামুনিঃ
সস্মার সরিতাং শ্রেষ্ঠাং ক্রোধসংরক্তলোচনঃ
41.13
সা ধ্যাতা মুনিনা তেন ব্যাকুলত্বং জগাম হ
জজ্ঞে চৈনং মহাবীর্যং মহাকোপং চ ভামিনী
41.14
তত এনং বেপমানা বিবর্ণা প্রাঞ্জলিস্তদা
উপতস্থে মুনিবরং বিশ্বামিত্রং সরস্বতী
41.15
হতবীরা যথা নারী সাভবদ্দুঃখিতা ভৃশম্
ব্রূহি কিং করবাণীতি প্রোবাচ মুনিসত্তমম্
41.16
তামুবাচ মুনিঃ ক্রুদ্ধো বসিষ্ঠং শীঘ্রমানয়
যাবদেনং নিহন্ম্যদ্য তচ্ছ্রুত্বা ব্যথিতা নদী
41.17
সাঞ্জলিং তু ততঃ কৃত্বা পুণ্ডরীকনিভেক্ষণা
বিব্যথে সুবিরূঢেব লতা বায়ুসমীরিতা
41.18
তথাগতাং তু তাং দৃষ্ট্বা বেপমানাং কৃতাঞ্জলিম্
বিশ্বামিত্রোঽব্রবীত্ক্রুদ্ধো বসিষ্ঠং শীঘ্রমানয়
41.19
ততো ভীতা সরিচ্ছ্রেষ্ঠা চিন্তয়ামাস ভারত
উভয়োঃ শাপয়োর্ভীতা কথমেতদ্ভবিষ্যতি
41.20
সাভিগম্য বসিষ্ঠং তু ইমমর্থমচোদয়ৎ
যদুক্তা সরিতাং শ্রেষ্ঠা বিশ্বামিত্রেণ ধীমতা
41.21
উভয়োঃ শাপয়োর্ভীতা বেপমানা পুনঃ পুনঃ
চিন্তয়িত্বা মহাশাপমৃষিবিত্রাসিতা ভৃশম্
41.22
তাং কৃশাং চ বিবর্ণাং চ দৃষ্ট্বা চিন্তাসমন্বিতাম্
উবাচ রাজন্ধর্মাত্মা বসিষ্ঠো দ্বিপদাং বরঃ
41.23
ত্রাহ্যাত্মানং সরিচ্ছ্রেষ্ঠে বহ মাং শীঘ্রগামিনী
বিশ্বামিত্রঃ শপেদ্ধি ত্বাং মা কৃথাস্ত্বং বিচারণাম্
41.24
তস্য তদ্বচনং শ্রুত্বা কৃপাশীলস্য সা সরিৎ
চিন্তয়ামাস কৌরব্য কিং কৃতং সুকৃতং ভবেৎ
41.25
তস্যাশ্চিন্তা সমুত্পন্না বসিষ্ঠো ময্যতীব হি
কৃতবান্হি দয়াং নিত্যং তস্য কার্যং হিতং ময়া
41.26
অথ কূলে স্বকে রাজঞ্জপন্তমৃষিসত্তমম্
জুহ্বানং কৌশিকং প্রেক্ষ্য সরস্বত্যভ্যচিন্তয়ৎ
41.27
ইদমন্তরমিত্যেব ততঃ সা সরিতাং বরা
কূলাপহারমকরোত্স্বেন বেগেন সা সরিৎ
41.28
তেন কূলাপহারেণ মৈত্রাবরুণিরৌহ্যত
উহ্যমানশ্চ তুষ্টাব তদা রাজন্সরস্বতীম্
41.29
পিতামহস্য সরসঃ প্রবৃত্তাসি সরস্বতি
ব্যাপ্তং চেদং জগত্সর্বং তবৈবাম্ভোভিরুত্তমৈঃ
41.30
ত্বমেবাকাশগা দেবি মেঘেষূত্সৃজসে পয়ঃ
সর্বাশ্চাপস্ত্বমেবেতি ত্বত্তো বয়মধীমহে
41.31
পুষ্টির্দ্যুতিস্তথা কীর্তিঃ সিদ্ধির্বৃদ্ধিরুমা তথা
ত্বমেব বাণী স্বাহা ত্বং ত্বয্যায়ত্তমিদং জগৎ
ত্বমেব সর্বভূতেষু বসসীহ চতুর্বিধা
41.32
এবং সরস্বতী রাজন্স্তূয়মানা মহর্ষিণা
বেগেনোবাহ তং বিপ্রং বিশ্বামিত্রাশ্রমং প্রতি
ন্যবেদয়ত চাভীক্ষ্ণং বিশ্বামিত্রায় তং মুনিম্
41.33
তমানীতং সরস্বত্যা দৃষ্ট্বা কোপসমন্বিতঃ
অথান্বেষত্প্রহরণং বসিষ্ঠান্তকরং তদা
41.34
তং তু ক্রুদ্ধমভিপ্রেক্ষ্য ব্রহ্মহত্যাভয়ান্নদী
অপোবাহ বসিষ্ঠং তু প্রাচীং দিশমতন্দ্রিতা
উভয়োঃ কুর্বতী বাক্যং বঞ্চয়িত্বা তু গাধিজম্
41.35
ততোঽপবাহিতং দৃষ্ট্বা বসিষ্ঠমৃষিসত্তমম্
অব্রবীদথ সংক্রুদ্ধো বিশ্বামিত্রো হ্যমর্ষণঃ
41.36
যস্মান্মা ত্বং সরিচ্ছ্রেষ্ঠে বঞ্চয়িত্বা পুনর্গতা
শোণিতং বহ কল্যাণি রক্ষোগ্রামণিসংমতম্
41.37
ততঃ সরস্বতী শপ্তা বিশ্বামিত্রেণ ধীমতা
অবহচ্ছোণিতোন্মিশ্রং তোয়ং সংবত্সরং তদা
41.38
অথর্ষয়শ্চ দেবাশ্চ গন্ধর্বাপ্সরসস্তথা
সরস্বতীং তথা দৃষ্ট্বা বভূবুর্ভৃশদুঃখিতাঃ
41.39
এবং বসিষ্ঠাপবাহো লোকে খ্যাতো জনাধিপ
আগচ্ছচ্চ পুনর্মার্গং স্বমেব সরিতাং বরা