Utshovঅধ্যায় 40
40.1
বৈশংপায়ন উবাচ
ব্রহ্ময়োনিভিরাকীর্ণং জগাম যদুনন্দনঃ
যত্র দাল্ভ্যো বকো রাজন্পশ্বর্থং সুমহাতপাঃ
জুহাব ধৃতরাষ্ট্রস্য রাষ্ট্রং বৈচিত্রবীর্যিণঃ
40.2
তপসা ঘোররূপেণ কর্শয়ন্দেহমাত্মনঃ
ক্রোধেন মহতাবিষ্টো ধর্মাত্মা বৈ প্রতাপবান্
40.3
পুরা হি নৈমিষেয়াণাং সত্রে দ্বাদশবার্ষিকে
বৃত্তে বিশ্বজিতোঽন্তে বৈ পাঞ্চালানৃষয়োঽগমন্
40.4
তত্রেশ্বরময়াচন্ত দক্ষিণার্থং মনীষিণঃ
বলান্বিতান্বত্সতরান্নির্ব্যাধীনেকবিংশতিম্
40.5
তানব্রবীদ্বকো বৃদ্ধো বিভজধ্বং পশূনিতি
পশূনেতানহং ত্যক্ত্বা ভিক্ষিষ্যে রাজসত্তমম্
40.6
এবমুক্ত্বা ততো রাজন্নৃষীন্সর্বান্প্রতাপবান্
জগাম ধৃতরাষ্ট্রস্য ভবনং ব্রাহ্মণোত্তমঃ
40.7
স সমীপগতো ভূত্বা ধৃতরাষ্ট্রং জনেশ্বরম্
অয়াচত পশূন্দাল্ভ্যঃ স চৈনং রুষিতোঽব্রবীৎ
40.8
যদৃচ্ছয়া মৃতা দৃষ্ট্বা গাস্তদা নৃপসত্তম
এতান্পশূন্নয় ক্ষিপ্রং ব্রহ্মবন্ধো যদীচ্ছসি
40.9
ঋষিস্ত্বথ বচঃ শ্রুত্বা চিন্তয়ামাস ধর্মবিৎ
অহো বত নৃশংসং বৈ বাক্যমুক্তোঽস্মি সংসদি
40.10
চিন্তয়িত্বা মুহূর্তং চ রোষাবিষ্টো দ্বিজোত্তমঃ
মতিং চক্রে বিনাশায় ধৃতরাষ্ট্রস্য ভূপতেঃ
40.11
স উত্কৃত্য মৃতানাং বৈ মাংসানি দ্বিজসত্তমঃ
জুহাব ধৃতরাষ্ট্রস্য রাষ্ট্রং নরপতেঃ পুরা
40.12
অবকীর্ণে সরস্বত্যাস্তীর্থে প্রজ্বাল্য পাবকম্
বকো দাল্ভ্যো মহারাজ নিয়মং পরমাস্থিতঃ
স তৈরেব জুহাবাস্য রাষ্ট্রং মাংসৈর্মহাতপাঃ
40.13
তস্মিংস্তু বিধিবত্সত্রে সংপ্রবৃত্তে সুদারুণে
অক্ষীয়ত ততো রাষ্ট্রং ধৃতরাষ্ট্রস্য পার্থিব
40.14
ছিদ্যমানং যথানন্তং বনং পরশুনা বিভো
বভূবাপহতং তচ্চাপ্যবকীর্ণমচেতনম্
40.15
দৃষ্ট্বা তদবকীর্ণং তু রাষ্ট্রং স মনুজাধিপঃ
বভূব দুর্মনা রাজংশ্চিন্তয়ামাস চ প্রভুঃ
40.16
মোক্ষার্থমকরোদ্যত্নং ব্রাহ্মণৈঃ সহিতঃ পুরা
অথাসৌ পার্থিবঃ খিন্নস্তে চ বিপ্রাস্তদা নৃপ
40.17
যদা চাপি ন শক্নোতি রাষ্ট্রং মোচয়িতুং নৃপ
অথ বৈপ্রাশ্নিকাংস্তত্র পপ্রচ্ছ জনমেজয়
40.18
ততো বৈপ্রাশ্নিকাঃ প্রাহুঃ পশুবিপ্রকৃতস্ত্বয়া
মাংসৈরভিজুহোতীতি তব রাষ্ট্রং মুনির্বকঃ
40.19
তেন তে হূয়মানস্য রাষ্ট্রস্যাস্য ক্ষয়ো মহান্
তস্যৈতত্তপসঃ কর্ম যেন তে হ্যনয়ো মহান্
অপাং কুঞ্জে সরস্বত্যাস্তং প্রসাদয় পার্থিব
40.20
সরস্বতীং ততো গত্বা স রাজা বকমব্রবীৎ
নিপত্য শিরসা ভূমৌ প্রাঞ্জলির্ভরতর্ষভ
40.21
প্রসাদয়ে ত্বা ভগবন্নপরাধং ক্ষমস্ব মে
মম দীনস্য লুব্ধস্য মৌর্খ্যেণ হতচেতসঃ
ত্বং গতিস্ত্বং চ মে নাথঃ প্রসাদং কর্তুমর্হসি
40.22
তং তথা বিলপন্তং তু শোকোপহতচেতসম্
দৃষ্ট্বা তস্য কৃপা জজ্ঞে রাষ্ট্রং তচ্চ ব্যমোচয়ৎ
40.23
ঋষিঃ প্রসন্নস্তস্যাভূত্সংরম্ভং চ বিহায় সঃ
মোক্ষার্থং তস্য রাষ্ট্রস্য জুহাব পুনরাহুতিম্
40.24
মোক্ষয়িত্বা ততো রাষ্ট্রং প্রতিগৃহ্য পশূন্বহূন্
হৃষ্টাত্মা নৈমিষারণ্যং জগাম পুনরেব হি
40.25
ধৃতরাষ্ট্রোঽপি ধর্মাত্মা স্বস্থচেতা মহামনাঃ
স্বমেব নগরং রাজা প্রতিপেদে মহর্দ্ধিমৎ
40.26
তত্র তীর্থে মহারাজ বৃহস্পতিরুদারধীঃ
অসুরাণামভাবায় ভাবায় চ দিবৌকসাম্
40.27
মাংসৈরপি জুহাবেষ্টিমক্ষীয়ন্ত ততোঽসুরাঃ
দৈবতৈরপি সংভগ্না জিতকাশিভিরাহবে
40.28
তত্রাপি বিধিবদ্দত্ত্বা ব্রাহ্মণেভ্যো মহায়শাঃ
বাজিনঃ কুঞ্জরাংশ্চৈব রথাংশ্চাশ্বতরীয়ুতান্
40.29
রত্নানি চ মহার্হাণি ধনং ধান্যং চ পুষ্কলম্
যয়ৌ তীর্থং মহাবাহুর্যায়াতং পৃথিবীপতে
40.30
যত্র যজ্ঞে যয়াতেস্তু মহারাজ সরস্বতী
সর্পিঃ পয়শ্চ সুস্রাব নাহুষস্য মহাত্মনঃ
40.31
তত্রেষ্ট্বা পুরুষব্যাঘ্রো যয়াতিঃ পৃথিবীপতিঃ
আক্রামদূর্ধ্বং মুদিতো লেভে লোকাংশ্চ পুষ্কলান্
40.32
যয়াতের্যজমানস্য যত্র রাজন্সরস্বতী
প্রসৃতা প্রদদৌ কামান্ব্রাহ্মণানাং মহাত্মনাম্
40.33
যত্র যত্র হি যো বিপ্রো যান্যান্কামানভীপ্সতি
তত্র তত্র সরিচ্ছ্রেষ্ঠা সসর্জ সুবহূন্রসান্
40.34
তত্র দেবাঃ সগন্ধর্বাঃ প্রীতা যজ্ঞস্য সংপদা
বিস্মিতা মানুষাশ্চাসন্দৃষ্ট্বা তাং যজ্ঞসংপদম্
40.35
ততস্তালকেতুর্মহাধর্মসেতু;র্মহাত্মা কৃতাত্মা মহাদাননিত্যঃ
বসিষ্ঠাপবাহং মহাভীমবেগং; ধৃতাত্মা জিতাত্মা সমভ্যাজগাম