Utshovঅধ্যায় 39
39.1
জনমেজয় উবাচ
কথমার্ষ্টিষেণো ভগবান্বিপুলং তপ্তবাংস্তপঃ
সিন্ধুদ্বীপঃ কথং চাপি ব্রাহ্মণ্যং লব্ধবাংস্তদা
39.2
দেবাপিশ্চ কথং ব্রহ্মন্বিশ্বামিত্রশ্চ সত্তম
তন্মমাচক্ষ্ব ভগবন্পরং কৌতূহলং হি মে
39.3
বৈশংপায়ন উবাচ
পুরা কৃতয়ুগে রাজন্নার্ষ্টিষেণো দ্বিজোত্তমঃ
বসন্গুরুকুলে নিত্যং নিত্যমধ্যয়নে রতঃ
39.4
তস্য রাজন্গুরুকুলে বসতো নিত্যমেব হ
সমাপ্তিং নাগমদ্বিদ্যা নাপি বেদা বিশাং পতে
39.5
স নির্বিণ্ণস্ততো রাজংস্তপস্তেপে মহাতপাঃ
ততো বৈ তপসা তেন প্রাপ্য বেদাননুত্তমান্
39.6
স বিদ্বান্বেদয়ুক্তশ্চ সিদ্ধশ্চাপ্যৃষিসত্তমঃ
তত্র তীর্থে বরান্প্রাদাত্ত্রীনেব সুমহাতপাঃ
39.7
অস্মিংস্তীর্থে মহানদ্যা অদ্যপ্রভৃতি মানবঃ
আপ্লুতো বাজিমেধস্য ফলং প্রাপ্নোতি পুষ্কলম্
39.8
অদ্যপ্রভৃতি নৈবাত্র ভয়ং ব্যালাদ্ভবিষ্যতি
অপি চাল্পেন যত্নেন ফলং প্রাপ্স্যতি পুষ্কলম্
39.9
এবমুক্ত্বা মহাতেজা জগাম ত্রিদিবং মুনিঃ
এবং সিদ্ধঃ স ভগবানার্ষ্টিষেণঃ প্রতাপবান্
39.10
তস্মিন্নেব তদা তীর্থে সিন্ধুদ্বীপঃ প্রতাপবান্
দেবাপিশ্চ মহারাজ ব্রাহ্মণ্যং প্রাপতুর্মহৎ
39.11
তথা চ কৌশিকস্তাত তপোনিত্যো জিতেন্দ্রিয়ঃ
তপসা বৈ সুতপ্তেন ব্রাহ্মণত্বমবাপ্তবান্
39.12
গাধির্নাম মহানাসীত্ক্ষত্রিয়ঃ প্রথিতো ভুবি
তস্য পুত্রোঽভবদ্রাজন্বিশ্বামিত্রঃ প্রতাপবান্
39.13
স রাজা কৌশিকস্তাত মহায়োগ্যভবত্কিল
স পুত্রমভিষিচ্যাথ বিশ্বামিত্রং মহাতপাঃ
39.14
দেহন্যাসে মনশ্চক্রে তমূচুঃ প্রণতাঃ প্রজাঃ
ন গন্তব্যং মহাপ্রাজ্ঞ ত্রাহি চাস্মান্মহাভয়াৎ
39.15
এবমুক্তঃ প্রত্যুবাচ ততো গাধিঃ প্রজাস্তদা
বিশ্বস্য জগতো গোপ্তা ভবিষ্যতি সুতো মম
39.16
ইত্যুক্ত্বা তু ততো গাধির্বিশ্বামিত্রং নিবেশ্য চ
জগাম ত্রিদিবং রাজন্বিশ্বামিত্রোঽভবন্নৃপঃ
ন চ শক্নোতি পৃথিবীং যত্নবানপি রক্ষিতুম্
39.17
ততঃ শুশ্রাব রাজা স রাক্ষসেভ্যো মহাভয়ম্
নির্যয়ৌ নগরাচ্চাপি চতুরঙ্গবলান্বিতঃ
39.18
স গত্বা দূরমধ্বানং বসিষ্ঠাশ্রমমভ্যয়াৎ
তস্য তে সৈনিকা রাজংশ্চক্রুস্তত্রানয়ান্বহূন্
39.19
ততস্তু ভগবান্বিপ্রো বসিষ্ঠোঽঽশ্রমমভ্যয়াৎ
দদৃশে চ ততঃ সর্বং ভজ্যমানং মহাবনম্
39.20
তস্য ক্রুদ্ধো মহারাজ বসিষ্ঠো মুনিসত্তমঃ
সৃজস্ব শবরান্ঘোরানিতি স্বাং গামুবাচ হ
39.21
তথোক্তা সাসৃজদ্ধেনুঃ পুরুষান্ঘোরদর্শনান্
তে চ তদ্বলমাসাদ্য বভঞ্জুঃ সর্বতোদিশম্
39.22
তদ্দৃষ্ট্বা বিদ্রুতং সৈন্যং বিশ্বামিত্রস্তু গাধিজঃ
তপঃ পরং মন্যমানস্তপস্যেব মনো দধে
39.23
সোঽস্মিংস্তীর্থবরে রাজন্সরস্বত্যাঃ সমাহিতঃ
নিয়মৈশ্চোপবাসৈশ্চ কর্শয়ন্দেহমাত্মনঃ
39.24
জলাহারো বায়ুভক্ষঃ পর্ণাহারশ্চ সোঽভবৎ
তথা স্থণ্ডিলশায়ী চ যে চান্যে নিয়মাঃ পৃথক্
39.25
অসকৃত্তস্য দেবাস্তু ব্রতবিঘ্নং প্রচক্রিরে
ন চাস্য নিয়মাদ্বুদ্ধিরপয়াতি মহাত্মনঃ
39.26
ততঃ পরেণ যত্নেন তপ্ত্বা বহুবিধং তপঃ
তেজসা ভাস্করাকারো গাধিজঃ সমপদ্যত
39.27
তপসা তু তথা যুক্তং বিশ্বামিত্রং পিতামহঃ
অমন্যত মহাতেজা বরদো বরমস্য তৎ
39.28
স তু বব্রে বরং রাজন্স্যামহং ব্রাহ্মণস্ত্বিতি
তথেতি চাব্রবীদ্ব্রহ্মা সর্বলোকপিতামহঃ
39.29
স লব্ধ্বা তপসোগ্রেণ ব্রাহ্মণত্বং মহায়শাঃ
বিচচার মহীং কৃত্স্নাং কৃতকামঃ সুরোপমঃ
39.30
তস্মিংস্তীর্থবরে রামঃ প্রদায় বিবিধং বসু
পয়স্বিনীস্তথা ধেনূর্যানানি শয়নানি চ
39.31
তথা বস্ত্রাণ্যলংকারং ভক্ষ্যং পেয়ং চ শোভনম্
অদদান্মুদিতো রাজন্পূজয়িত্বা দ্বিজোত্তমান্
39.32
যয়ৌ রাজংস্ততো রামো বকস্যাশ্রমমন্তিকাৎ
যত্র তেপে তপস্তীব্রং দাল্ভ্যো বক ইতি শ্রুতিঃ