Utshovঅধ্যায় 38
38.1
বৈশংপায়ন উবাচ
উষিত্বা তত্র রামস্তু সংপূজ্যাশ্রমবাসিনঃ
তথা মঙ্কণকে প্রীতিং শুভাং চক্রে হলায়ুধঃ
38.2
দত্ত্বা দানং দ্বিজাতিভ্যো রজনীং তামুপোষ্য চ
পূজিতো মুনিসংঘৈশ্চ প্রাতরুত্থায় লাঙ্গলী
38.3
অনুজ্ঞাপ্য মুনীন্সর্বান্স্পৃষ্ট্বা তোয়ং চ ভারত
প্রয়য়ৌ ত্বরিতো রামস্তীর্থহেতোর্মহাবলঃ
38.4
তত ঔশনসং তীর্থমাজগাম হলায়ুধঃ
কপালমোচনং নাম যত্র মুক্তো মহামুনিঃ
38.5
মহতা শিরসা রাজন্গ্রস্তজঙ্ঘো মহোদরঃ
রাক্ষসস্য মহারাজ রামক্ষিপ্তস্য বৈ পুরা
38.6
তত্র পূর্বং তপস্তপ্তং কাব্যেন সুমহাত্মনা
যত্রাস্য নীতিরখিলা প্রাদুর্ভূতা মহাত্মনঃ
তত্রস্থশ্চিন্তয়ামাস দৈত্যদানববিগ্রহম্
38.7
তত্প্রাপ্য চ বলো রাজংস্তীর্থপ্রবরমুত্তমম্
বিধিবদ্ধি দদৌ বিত্তং ব্রাহ্মণানাং মহাত্মনাম্
38.8
জনমেজয় উবাচ
কপালমোচনং ব্রহ্মন্কথং যত্র মহামুনিঃ
মুক্তঃ কথং চাস্য শিরো লগ্নং কেন চ হেতুনা
38.9
বৈশংপায়ন উবাচ
পুরা বৈ দণ্ডকারণ্যে রাঘবেণ মহাত্মনা
বসতা রাজশার্দূল রাক্ষসাস্তত্র হিংসিতাঃ
38.10
জনস্থানে শিরশ্ছিন্নং রাক্ষসস্য দুরাত্মনঃ
ক্ষুরেণ শিতধারেণ তত্পপাত মহাবনে
38.11
মহোদরস্য তল্লগ্নং জঙ্ঘায়াং বৈ যদৃচ্ছয়া
বনে বিচরতো রাজন্নস্থি ভিত্ত্বাস্ফুরত্তদা
38.12
স তেন লগ্নেন তদা দ্বিজাতির্ন শশাক হ
অভিগন্তুং মহাপ্রাজ্ঞস্তীর্থান্যায়তনানি চ
38.13
স পূতিনা বিস্রবতা বেদনার্তো মহামুনিঃ
জগাম সর্বতীর্থানি পৃথিব্যামিতি নঃ শ্রুতম্
38.14
স গত্বা সরিতঃ সর্বাঃ সমুদ্রাংশ্চ মহাতপাঃ
কথয়ামাস তত্সর্বমৃষীণাং ভাবিতাত্মনাম্
38.15
আপ্লুতঃ সর্বতীর্থেষু ন চ মোক্ষমবাপ্তবান্
স তু শুশ্রাব বিপ্রেন্দ্রো মুনীনাং বচনং মহৎ
38.16
সরস্বত্যাস্তীর্থবরং খ্যাতমৌশনসং তদা
সর্বপাপপ্রশমনং সিদ্ধক্ষেত্রমনুত্তমম্
38.17
স তু গত্বা ততস্তত্র তীর্থমৌশনসং দ্বিজঃ
তত ঔশনসে তীর্থে তস্যোপস্পৃশতস্তদা
তচ্ছিরশ্চরণং মুক্ত্বা পপাতান্তর্জলে তদা
38.18
ততঃ স বিরুজো রাজন্পূতাত্মা বীতকল্মষঃ
আজগামাশ্রমং প্রীতঃ কৃতকৃত্যো মহোদরঃ
38.19
সোঽথ গত্বাশ্রমং পুণ্যং বিপ্রমুক্তো মহাতপাঃ
কথয়ামাস তত্সর্বমৃষীণাং ভাবিতাত্মনাম্
38.20
তে শ্রুত্বা বচনং তস্য ততস্তীর্থস্য মানদ
কপালমোচনমিতি নাম চক্রুঃ সমাগতাঃ
38.21
তত্র দত্ত্বা বহূন্দায়ান্বিপ্রান্সংপূজ্য মাধবঃ
জগাম বৃষ্ণিপ্রবরো রুষঙ্গোরাশ্রমং তদা
38.22
যত্র তপ্তং তপো ঘোরমার্ষ্টিষেণেন ভারত
ব্রাহ্মণ্যং লব্ধবাংস্তত্র বিশ্বামিত্রো মহামুনিঃ
38.23
ততো হলধরঃ শ্রীমান্ব্রাহ্মণৈঃ পরিবারিতঃ
জগাম যত্র রাজেন্দ্র রুষঙ্গুস্তনুমত্যজৎ
38.24
রুষঙ্গুর্ব্রাহ্মণো বৃদ্ধস্তপোনিত্যশ্চ ভারত
দেহন্যাসে কৃতমনা বিচিন্ত্য বহুধা বহু
38.25
ততঃ সর্বানুপাদায় তনয়ান্বৈ মহাতপাঃ
রুষঙ্গুরব্রবীত্তত্র নয়ধ্বং মা পৃথূদকম্
38.26
বিজ্ঞায়াতীতবয়সং রুষঙ্গুং তে তপোধনাঃ
তং বৈ তীর্থমুপানিন্যুঃ সরস্বত্যাস্তপোধনম্
38.27
স তৈঃ পুত্রৈস্তদা ধীমানানীতো বৈ সরস্বতীম্
পুণ্যাং তীর্থশতোপেতাং বিপ্রসংঘৈর্নিষেবিতাম্
38.28
স তত্র বিধিনা রাজন্নাপ্লুতঃ সুমহাতপাঃ
জ্ঞাত্বা তীর্থগুণাংশ্চৈব প্রাহেদমৃষিসত্তমঃ
সুপ্রীতঃ পুরুষব্যাঘ্র সর্বান্পুত্রানুপাসতঃ
38.29
সরস্বত্যুত্তরে তীরে যস্ত্যজেদাত্মনস্তনুম্
পৃথূদকে জপ্যপরো নৈনং শ্বোমরণং তপেৎ
38.30
তত্রাপ্লুত্য স ধর্মাত্মা উপস্পৃশ্য হলায়ুধঃ
দত্ত্বা চৈব বহূন্দায়ান্বিপ্রাণাং বিপ্রবত্সলঃ
38.31
সসর্জ যত্র ভগবাঁল্লোকাঁল্লোকপিতামহঃ
যত্রার্ষ্টিষেণঃ কৌরব্য ব্রাহ্মণ্যং সংশিতব্রতঃ
তপসা মহতা রাজন্প্রাপ্তবানৃষিসত্তমঃ
38.32
সিন্ধুদ্বীপশ্চ রাজর্ষির্দেবাপিশ্চ মহাতপাঃ
ব্রাহ্মণ্যং লব্ধবান্যত্র বিশ্বামিত্রো মহামুনিঃ
মহাতপস্বী ভগবানুগ্রতেজা মহাতপাঃ
38.33
তত্রাজগাম বলবান্বলভদ্রঃ প্রতাপবান্