UtshovChapter 40
40.1
वैशंपायन उवाच
ब्रह्मयोनिभिराकीर्णं जगाम यदुनन्दनः
यत्र दाल्भ्यो बको राजन्पश्वर्थं सुमहातपाः
जुहाव धृतराष्ट्रस्य राष्ट्रं वैचित्रवीर्यिणः
Vaishampayana uvacha
Brahmayonibhirakirnam jagama yadunandanah
Yatra dalbhyo bako rajanpashvartham sumahatapah
Juhava dhritarashtrasya rashtram vaichitraviryinah
40.2
तपसा घोररूपेण कर्शयन्देहमात्मनः
क्रोधेन महताविष्टो धर्मात्मा वै प्रतापवान्
Tapasa ghorarupena karshayandehamatmanah
Krodhena mahatavishto dharmatma vai pratapavan
40.3
पुरा हि नैमिषेयाणां सत्रे द्वादशवार्षिके
वृत्ते विश्वजितोऽन्ते वै पाञ्चालानृषयोऽगमन्
Pura hi naimisheyanam satre dvadashavarshike
Vritte vishvajitonte vai panchalanrishayogaman
40.4
तत्रेश्वरमयाचन्त दक्षिणार्थं मनीषिणः
बलान्वितान्वत्सतरान्निर्व्याधीनेकविंशतिम्
Tatreshvaramayachanta dakshinartham manishinah
Balanvitanvatsatarannirvyadhinekavinshatim
40.5
तानब्रवीद्बको वृद्धो विभजध्वं पशूनिति
पशूनेतानहं त्यक्त्वा भिक्षिष्ये राजसत्तमम्
Tanabravidbako vriddho vibhajadhvam pashuniti
Pashunetanaham tyaktva bhikshishye rajasattamam
40.6
एवमुक्त्वा ततो राजन्नृषीन्सर्वान्प्रतापवान्
जगाम धृतराष्ट्रस्य भवनं ब्राह्मणोत्तमः
Evamuktva tato rajannrishinsarvanpratapavan
Jagama dhritarashtrasya bhavanam brahmanottamah
40.7
स समीपगतो भूत्वा धृतराष्ट्रं जनेश्वरम्
अयाचत पशून्दाल्भ्यः स चैनं रुषितोऽब्रवीत्
Sa samipagato bhutva dhritarashtram janeshvaram
Ayachata pashundalbhyah sa chainam rushitobravit
40.8
यदृच्छया मृता दृष्ट्वा गास्तदा नृपसत्तम
एतान्पशून्नय क्षिप्रं ब्रह्मबन्धो यदीच्छसि
Yadrichchhaya mrita drishtva gastada nripasattama
Etanpashunnaya kshipram brahmabandho yadichchhasi
40.9
ऋषिस्त्वथ वचः श्रुत्वा चिन्तयामास धर्मवित्
अहो बत नृशंसं वै वाक्यमुक्तोऽस्मि संसदि
Rishistvatha vachah shrutva chintayamasa dharmavit
Aho bata nrishansam vai vakyamuktosmi sansadi
40.10
चिन्तयित्वा मुहूर्तं च रोषाविष्टो द्विजोत्तमः
मतिं चक्रे विनाशाय धृतराष्ट्रस्य भूपतेः
Chintayitva muhurtam cha roshavishto dvijottamah
Matim chakre vinashaya dhritarashtrasya bhupateh
40.11
स उत्कृत्य मृतानां वै मांसानि द्विजसत्तमः
जुहाव धृतराष्ट्रस्य राष्ट्रं नरपतेः पुरा
Sa utkritya mritanam vai mansani dvijasattamah
Juhava dhritarashtrasya rashtram narapateh pura
40.12
अवकीर्णे सरस्वत्यास्तीर्थे प्रज्वाल्य पावकम्
बको दाल्भ्यो महाराज नियमं परमास्थितः
स तैरेव जुहावास्य राष्ट्रं मांसैर्महातपाः
Avakirne sarasvatyastirthe prajvalya pavakam
Bako dalbhyo maharaja niyamam paramasthitah
Sa taireva juhavasya rashtram mansairmahatapah
40.13
तस्मिंस्तु विधिवत्सत्रे संप्रवृत्ते सुदारुणे
अक्षीयत ततो राष्ट्रं धृतराष्ट्रस्य पार्थिव
Tasminstu vidhivatsatre sampravritte sudarune
Akshiyata tato rashtram dhritarashtrasya parthiva
40.14
छिद्यमानं यथानन्तं वनं परशुना विभो
बभूवापहतं तच्चाप्यवकीर्णमचेतनम्
Chhidyamanam yathanantam vanam parashuna vibho
Babhuvapahatam tachchapyavakirnamachetanam
40.15
दृष्ट्वा तदवकीर्णं तु राष्ट्रं स मनुजाधिपः
बभूव दुर्मना राजंश्चिन्तयामास च प्रभुः
Drishtva tadavakirnam tu rashtram sa manujadhipah
Babhuva durmana rajanshchintayamasa cha prabhuh
40.16
मोक्षार्थमकरोद्यत्नं ब्राह्मणैः सहितः पुरा
अथासौ पार्थिवः खिन्नस्ते च विप्रास्तदा नृप
Moksharthamakarodyatnam brahmanaih sahitah pura
Athasau parthivah khinnaste cha viprastada nripa
40.17
यदा चापि न शक्नोति राष्ट्रं मोचयितुं नृप
अथ वैप्राश्निकांस्तत्र पप्रच्छ जनमेजय
Yada chapi na shaknoti rashtram mochayitum nripa
Atha vaiprashnikanstatra paprachchha janamejaya
40.18
ततो वैप्राश्निकाः प्राहुः पशुविप्रकृतस्त्वया
मांसैरभिजुहोतीति तव राष्ट्रं मुनिर्बकः
Tato vaiprashnikah prahuh pashuviprakritastvaya
Mansairabhijuhotiti tava rashtram munirbakah
40.19
तेन ते हूयमानस्य राष्ट्रस्यास्य क्षयो महान्
तस्यैतत्तपसः कर्म येन ते ह्यनयो महान्
अपां कुञ्जे सरस्वत्यास्तं प्रसादय पार्थिव
Tena te huyamanasya rashtrasyasya kshayo mahan
Tasyaitattapasah karma yena te hyanayo mahan
Apam kunje sarasvatyastam prasadaya parthiva
40.20
सरस्वतीं ततो गत्वा स राजा बकमब्रवीत्
निपत्य शिरसा भूमौ प्राञ्जलिर्भरतर्षभ
Sarasvatim tato gatva sa raja bakamabravit
Nipatya shirasa bhumau pranjalirbharatarshabha
40.21
प्रसादये त्वा भगवन्नपराधं क्षमस्व मे
मम दीनस्य लुब्धस्य मौर्ख्येण हतचेतसः
त्वं गतिस्त्वं च मे नाथः प्रसादं कर्तुमर्हसि
Prasadaye tva bhagavannaparadham kshamasva me
Mama dinasya lubdhasya maurkhyena hatachetasah
Tvam gatistvam cha me nathah prasadam kartumarhasi
40.22
तं तथा विलपन्तं तु शोकोपहतचेतसम्
दृष्ट्वा तस्य कृपा जज्ञे राष्ट्रं तच्च व्यमोचयत्
Tam tatha vilapantam tu shokopahatachetasam
Drishtva tasya kripa jagye rashtram tachcha vyamochayat
40.23
ऋषिः प्रसन्नस्तस्याभूत्संरम्भं च विहाय सः
मोक्षार्थं तस्य राष्ट्रस्य जुहाव पुनराहुतिम्
Rishih prasannastasyabhutsanrambham cha vihaya sah
Mokshartham tasya rashtrasya juhava punarahutim
40.24
मोक्षयित्वा ततो राष्ट्रं प्रतिगृह्य पशून्बहून्
हृष्टात्मा नैमिषारण्यं जगाम पुनरेव हि
Mokshayitva tato rashtram pratigrihya pashunbahun
Hrishtatma naimisharanyam jagama punareva hi
40.25
धृतराष्ट्रोऽपि धर्मात्मा स्वस्थचेता महामनाः
स्वमेव नगरं राजा प्रतिपेदे महर्द्धिमत्
Dhritarashtropi dharmatma svasthacheta mahamanah
Svameva nagaram raja pratipede maharddhimat
40.26
तत्र तीर्थे महाराज बृहस्पतिरुदारधीः
असुराणामभावाय भावाय च दिवौकसाम्
Tatra tirthe maharaja brihaspatirudaradhih
Asuranamabhavaya bhavaya cha divaukasam
40.27
मांसैरपि जुहावेष्टिमक्षीयन्त ततोऽसुराः
दैवतैरपि संभग्ना जितकाशिभिराहवे
Mansairapi juhaveshtimakshiyanta tatosurah
Daivatairapi sambhagna jitakashibhirahave
40.28
तत्रापि विधिवद्दत्त्वा ब्राह्मणेभ्यो महायशाः
वाजिनः कुञ्जरांश्चैव रथांश्चाश्वतरीयुतान्
Tatrapi vidhivaddattva brahmanebhyo mahayashah
Vajinah kunjaranshchaiva rathanshchashvatariyutan
40.29
रत्नानि च महार्हाणि धनं धान्यं च पुष्कलम्
ययौ तीर्थं महाबाहुर्यायातं पृथिवीपते
Ratnani cha maharhani dhanam dhanyam cha pushkalam
Yayau tirtham mahabahuryayatam prithivipate
40.30
यत्र यज्ञे ययातेस्तु महाराज सरस्वती
सर्पिः पयश्च सुस्राव नाहुषस्य महात्मनः
Yatra yagye yayatestu maharaja sarasvati
Sarpih payashcha susrava nahushasya mahatmanah
40.31
तत्रेष्ट्वा पुरुषव्याघ्रो ययातिः पृथिवीपतिः
आक्रामदूर्ध्वं मुदितो लेभे लोकांश्च पुष्कलान्
Tatreshtva purushavyaghro yayatih prithivipatih
Akramadurdhvam mudito lebhe lokanshcha pushkalan
40.32
ययातेर्यजमानस्य यत्र राजन्सरस्वती
प्रसृता प्रददौ कामान्ब्राह्मणानां महात्मनाम्
Yayateryajamanasya yatra rajansarasvati
Prasrita pradadau kamanbrahmananam mahatmanam
40.33
यत्र यत्र हि यो विप्रो यान्यान्कामानभीप्सति
तत्र तत्र सरिच्छ्रेष्ठा ससर्ज सुबहून्रसान्
Yatra yatra hi yo vipro yanyankamanabhipsati
Tatra tatra sarichchhreshtha sasarja subahunrasan
40.34
तत्र देवाः सगन्धर्वाः प्रीता यज्ञस्य संपदा
विस्मिता मानुषाश्चासन्दृष्ट्वा तां यज्ञसंपदम्
Tatra devah sagandharvah prita yagyasya sampada
Vismita manushashchasandrishtva tam yagyasampadam
40.35
ततस्तालकेतुर्महाधर्मसेतु;र्महात्मा कृतात्मा महादाननित्यः
वसिष्ठापवाहं महाभीमवेगं; धृतात्मा जितात्मा समभ्याजगाम
Tatastalaketurmahadharmasetu;rmahatma kritatma mahadananityah
Vasishthapavaham mahabhimavegam; dhritatma jitatma samabhyajagama