Utshovঅধ্যায় 64
64.1
সংজয় উবাচ
বাতিকানাং সকাশাত্তু শ্রুত্বা দুর্যোধনং হতম্
হতশিষ্টাস্ততো রাজন্কৌরবাণাং মহারথাঃ
64.2
বিনির্ভিন্নাঃ শিতৈর্বাণৈর্গদাতোমরশক্তিভিঃ
অশ্বত্থামা কৃপশ্চৈব কৃতবর্মা চ সাত্বতঃ
ত্বরিতা জবনৈরশ্বৈরায়োধনমুপাগমন্
64.3
তত্রাপশ্যন্মহাত্মানং ধার্তরাষ্ট্রং নিপাতিতম্
প্রভগ্নং বায়ুবেগেন মহাশালং যথা বনে
64.4
ভূমৌ বিবেষ্টমানং তং রুধিরেণ সমুক্ষিতম্
মহাগজমিবারণ্যে ব্যাধেন বিনিপাতিতম্
64.5
বিবর্তমানং বহুশো রুধিরৌঘপরিপ্লুতম্
যদৃচ্ছয়া নিপতিতং চক্রমাদিত্যগোচরম্
64.6
মহাবাতসমুত্থেন সংশুষ্কমিব সাগরম্
পূর্ণচন্দ্রমিব ব্যোম্নি তুষারাবৃতমণ্ডলম্
64.7
রেণুধ্বস্তং দীর্ঘভুজং মাতঙ্গসমবিক্রমম্
বৃতং ভূতগণৈর্ঘোরৈঃ ক্রব্যাদৈশ্চ সমন্ততঃ
যথা ধনং লিপ্সমানৈর্ভৃত্যৈর্নৃপতিসত্তমম্
64.8
ভ্রুকুটীকৃতবক্ত্রান্তং ক্রোধাদুদ্বৃত্তচক্ষুষম্
সামর্ষং তং নরব্যাঘ্রং ব্যাঘ্রং নিপতিতং যথা
64.9
তে তু দৃষ্ট্বা মহেষ্বাসা ভূতলে পতিতং নৃপম্
মোহমভ্যাগমন্সর্বে কৃপপ্রভৃতয়ো রথাঃ
64.10
অবতীর্য রথেভ্যস্তু প্রাদ্রবন্রাজসংনিধৌ
দুর্যোধনং চ সংপ্রেক্ষ্য সর্বে ভূমাবুপাবিশন্
64.11
ততো দ্রৌণির্মহারাজ বাষ্পপূর্ণেক্ষণঃ শ্বসন্
উবাচ ভরতশ্রেষ্ঠং সর্বলোকেশ্বরেশ্বরম্
64.12
ন নূনং বিদ্যতেঽসহ্যং মানুষ্যে কিংচিদেব হি
যত্র ত্বং পুরুষব্যাঘ্র শেষে পাংসুষু রূষিতঃ
64.13
ভূত্বা হি নৃপতিঃ পূর্বং সমাজ্ঞাপ্য চ মেদিনীম্
কথমেকোঽদ্য রাজেন্দ্র তিষ্ঠসে নির্জনে বনে
64.14
দুঃশাসনং ন পশ্যামি নাপি কর্ণং মহারথম্
নাপি তান্সুহৃদঃ সর্বান্কিমিদং ভরতর্ষভ
64.15
দুঃখং নূনং কৃতান্তস্য গতিং জ্ঞাতুং কথংচন
লোকানাং চ ভবান্যত্র শেতে পাংসুষু রূষিতঃ
64.16
এষ মূর্ধাবসিক্তানামগ্রে গত্বা পরংতপঃ
সতৃণং গ্রসতে পাংসুং পশ্য কালস্য পর্যয়ম্
64.17
ক্ব তে তদমলং ছত্রং ব্যজনং ক্ব চ পার্থিব
সা চ তে মহতী সেনা ক্ব গতা পার্থিবোত্তম
64.18
দুর্বিজ্ঞেয়া গতির্নূনং কার্যাণাং কারণান্তরে
যদ্বৈ লোকগুরুর্ভূত্বা ভবানেতাং দশাং গতঃ
64.19
অধ্রুবা সর্বমর্ত্যেষু ধ্রুবং শ্রীরুপলক্ষ্যতে
ভবতো ব্যসনং দৃষ্ট্বা শক্রবিস্পর্ধিনো ভৃশম্
64.20
তস্য তদ্বচনং শ্রুত্বা দুঃখিতস্য বিশেষতঃ
উবাচ রাজন্পুত্রস্তে প্রাপ্তকালমিদং বচঃ
64.21
বিমৃজ্য নেত্রে পাণিভ্যাং শোকজং বাষ্পমুত্সৃজন্
কৃপাদীন্স তদা বীরান্সর্বানেব নরাধিপঃ
64.22
ঈদৃশো মর্ত্যধর্মোঽয়ং ধাত্রা নির্দিষ্ট উচ্যতে
বিনাশঃ সর্বভূতানাং কালপর্যায়কারিতঃ
64.23
সোঽয়ং মাং সমনুপ্রাপ্তঃ প্রত্যক্ষং ভবতাং হি যঃ
পৃথিবীং পালয়িত্বাহমেতাং নিষ্ঠামুপাগতঃ
64.24
দিষ্ট্যা নাহং পরাবৃত্তো যুদ্ধে কস্যাংচিদাপদি
দিষ্ট্যাহং নিহতঃ পাপৈশ্ছলেনৈব বিশেষতঃ
64.25
উত্সাহশ্চ কৃতো নিত্যং ময়া দিষ্ট্যা যুয়ুত্সতা
দিষ্ট্যা চাস্মি হতো যুদ্ধে নিহতজ্ঞাতিবান্ধবঃ
64.26
দিষ্ট্যা চ বোঽহং পশ্যামি মুক্তানস্মাজ্জনক্ষয়াৎ
স্বস্তিয়ুক্তাংশ্চ কল্যাংশ্চ তন্মে প্রিয়মনুত্তমম্
64.27
মা ভবন্তোঽনুতপ্যন্তাং সৌহৃদান্নিধনেন মে
যদি বেদাঃ প্রমাণং বো জিতা লোকা ময়াক্ষয়াঃ
64.28
মন্যমানঃ প্রভাবং চ কৃষ্ণস্যামিততেজসঃ
তেন ন চ্যাবিতশ্চাহং ক্ষত্রধর্মাত্স্বনুষ্ঠিতাৎ
64.29
স ময়া সমনুপ্রাপ্তো নাস্মি শোচ্যঃ কথংচন
কৃতং ভবদ্ভিঃ সদৃশমনুরূপমিবাত্মনঃ
যতিতং বিজয়ে নিত্যং দৈবং তু দুরতিক্রমম্
64.30
এতাবদুক্ত্বা বচনং বাষ্পব্যাকুললোচনঃ
তূষ্ণীং বভূব রাজেন্দ্র রুজাসৌ বিহ্বলো ভৃশম্
64.31
তথা তু দৃষ্ট্বা রাজানং বাষ্পশোকসমন্বিতম্
দ্রৌণিঃ ক্রোধেন জজ্বাল যথা বহ্নির্জগত্ক্ষয়ে
64.32
স তু ক্রোধসমাবিষ্টঃ পাণৌ পাণিং নিপীড্য চ
বাষ্পবিহ্বলয়া বাচা রাজানমিদমব্রবীৎ
64.33
পিতা মে নিহতঃ ক্ষুদ্রৈঃ সুনৃশংসেন কর্মণা
ন তথা তেন তপ্যামি যথা রাজংস্ত্বয়াদ্য বৈ
64.34
শৃণু চেদং বচো মহ্যং সত্যেন বদতঃ প্রভো
ইষ্টাপূর্তেন দানেন ধর্মেণ সুকৃতেন চ
64.35
অদ্যাহং সর্বপাঞ্চালান্বাসুদেবস্য পশ্যতঃ
সর্বোপায়ৈর্হি নেষ্যামি প্রেতরাজনিবেশনম্
অনুজ্ঞাং তু মহারাজ ভবান্মে দাতুমর্হতি
64.36
ইতি শ্রুত্বা তু বচনং দ্রোণপুত্রস্য কৌরবঃ
মনসঃ প্রীতিজননং কৃপং বচনমব্রবীৎ
আচার্য শীঘ্রং কলশং জলপূর্ণং সমানয়
64.37
স তদ্বচনমাজ্ঞায় রাজ্ঞো ব্রাহ্মণসত্তমঃ
কলশং পূর্ণমাদায় রাজ্ঞোঽন্তিকমুপাগমৎ
64.38
তমব্রবীন্মহারাজ পুত্রস্তব বিশাং পতে
মমাজ্ঞয়া দ্বিজশ্রেষ্ঠ দ্রোণপুত্রোঽভিষিচ্যতাম্
সেনাপত্যেন ভদ্রং তে মম চেদিচ্ছসি প্রিয়ম্
64.39
রাজ্ঞো নিয়োগাদ্যোদ্ধব্যং ব্রাহ্মণেন বিশেষতঃ
বর্ততা ক্ষত্রধর্মেণ হ্যেবং ধর্মবিদো বিদুঃ
64.40
রাজ্ঞস্তু বচনং শ্রুত্বা কৃপঃ শারদ্বতস্ততঃ
দ্রৌণিং রাজ্ঞো নিয়োগেন সেনাপত্যেঽভ্যষেচয়ৎ
64.41
সোঽভিষিক্তো মহারাজ পরিষ্বজ্য নৃপোত্তমম্
প্রয়য়ৌ সিংহনাদেন দিশঃ সর্বা বিনাদয়ন্
64.42
দুর্যোধনোঽপি রাজেন্দ্র শোণিতৌঘপরিপ্লুতঃ
তাং নিশাং প্রতিপেদেঽথ সর্বভূতভয়াবহাম্
64.43
অপক্রম্য তু তে তূর্ণং তস্মাদায়োধনান্নৃপ
শোকসংবিগ্নমনসশ্চিন্তাধ্যানপরাভবন্