Utshovঅধ্যায় 36
36.1
বৈশংপায়ন উবাচ
ততো বিনশনং রাজন্নাজগাম হলায়ুধঃ
শূদ্রাভীরান্প্রতি দ্বেষাদ্যত্র নষ্টা সরস্বতী
36.2
যস্মাত্সা ভরতশ্রেষ্ঠ দ্বেষান্নষ্টা সরস্বতী
তস্মাত্তদৃষয়ো নিত্যং প্রাহুর্বিনশনেতি হ
36.3
তচ্চাপ্যুপস্পৃশ্য বলঃ সরস্বত্যাং মহাবলঃ
সুভূমিকং ততোঽগচ্ছত্সরস্বত্যাস্তটে বরে
36.4
তত্র চাপ্সরসঃ শুভ্রা নিত্যকালমতন্দ্রিতাঃ
ক্রীডাভির্বিমলাভিশ্চ ক্রীডন্তি বিমলাননাঃ
36.5
তত্র দেবাঃ সগন্ধর্বা মাসি মাসি জনেশ্বর
অভিগচ্ছন্তি তত্তীর্থং পুণ্যং ব্রাহ্মণসেবিতম্
36.6
তত্রাদৃশ্যন্ত গন্ধর্বাস্তথৈবাপ্সরসাং গণাঃ
সমেত্য সহিতা রাজন্যথাপ্রাপ্তং যথাসুখম্
36.7
তত্র মোদন্তি দেবাশ্চ পিতরশ্চ সবীরুধঃ
পুণ্যৈঃ পুষ্পৈঃ সদা দিব্যৈঃ কীর্যমাণাঃ পুনঃ পুনঃ
36.8
আক্রীডভূমিঃ সা রাজংস্তাসামপ্সরসাং শুভা
সুভূমিকেতি বিখ্যাতা সরস্বত্যাস্তটে বরে
36.9
তত্র স্নাত্বা চ দত্ত্বা চ বসু বিপ্রেষু মাধবঃ
শ্রুত্বা গীতং চ তদ্দিব্যং বাদিত্রাণাং চ নিঃস্বনম্
36.10
ছায়াশ্চ বিপুলা দৃষ্ট্বা দেবগন্ধর্বরক্ষসাম্
গন্ধর্বাণাং ততস্তীর্থমাগচ্ছদ্রোহিণীসুতঃ
36.11
বিশ্বাবসুমুখাস্তত্র গন্ধর্বাস্তপসান্বিতাঃ
নৃত্তবাদিত্রগীতং চ কুর্বন্তি সুমনোরমম্
36.12
তত্র দত্ত্বা হলধরো বিপ্রেভ্যো বিবিধং বসু
অজাবিকং গোখরোষ্ট্রং সুবর্ণং রজতং তথা
36.13
ভোজয়িত্বা দ্বিজান্কামৈঃ সংতর্প্য চ মহাধনৈঃ
প্রয়য়ৌ সহিতো বিপ্রৈঃ স্তূয়মানশ্চ মাধবঃ
36.14
তস্মাদ্গন্ধর্বতীর্থাচ্চ মহাবাহুররিংদমঃ
গর্গস্রোতো মহাতীর্থমাজগামৈককুণ্ডলী
36.15
যত্র গর্গেণ বৃদ্ধেন তপসা ভাবিতাত্মনা
কালজ্ঞানগতিশ্চৈব জ্যোতিষাং চ ব্যতিক্রমঃ
36.16
উত্পাতা দারুণাশ্চৈব শুভাশ্চ জনমেজয়
সরস্বত্যাঃ শুভে তীর্থে বিহিতা বৈ মহাত্মনা
তস্য নাম্না চ তত্তীর্থং গর্গস্রোত ইতি স্মৃতম্
36.17
তত্র গর্গং মহাভাগমৃষয়ঃ সুব্রতা নৃপ
উপাসাং চক্রিরে নিত্যং কালজ্ঞানং প্রতি প্রভো
36.18
তত্র গত্বা মহারাজ বলঃ শ্বেতানুলেপনঃ
বিধিবদ্ধি ধনং দত্ত্বা মুনীনাং ভাবিতাত্মনাম্
36.19
উচ্চাবচাংস্তথা ভক্ষ্যান্দ্বিজেভ্যো বিপ্রদায় সঃ
নীলবাসাস্ততোঽগচ্ছচ্ছঙ্খতীর্থং মহায়শাঃ
36.20
তত্রাপশ্যন্মহাশঙ্খং মহামেরুমিবোচ্ছ্রিতম্
শ্বেতপর্বতসংকাশমৃষিসংঘৈর্নিষেবিতম্
সরস্বত্যাস্তটে জাতং নগং তালধ্বজো বলী
36.21
যক্ষা বিদ্যাধরাশ্চৈব রাক্ষসাশ্চামিতৌজসঃ
পিশাচাশ্চামিতবলা যত্র সিদ্ধাঃ সহস্রশঃ
36.22
তে সর্বে হ্যশনং ত্যক্ত্বা ফলং তস্য বনস্পতেঃ
ব্রতৈশ্চ নিয়মৈশ্চৈব কালে কালে স্ম ভুঞ্জতে
36.23
প্রাপ্তৈশ্চ নিয়মৈস্তৈস্তৈর্বিচরন্তঃ পৃথক্পৃথক্
অদৃশ্যমানা মনুজৈর্ব্যচরন্পুরুষর্ষভ
36.24
এবং খ্যাতো নরপতে লোকেঽস্মিন্স বনস্পতিঃ
তত্র তীর্থং সরস্বত্যাঃ পাবনং লোকবিশ্রুতম্
36.25
তস্মিংশ্চ যদুশার্দূলো দত্ত্বা তীর্থে যশস্বিনাম্
তাম্রায়সানি ভাণ্ডানি বস্ত্রাণি বিবিধানি চ
36.26
পূজয়িত্বা দ্বিজাংশ্চৈব পূজিতশ্চ তপোধনৈঃ
পুণ্যং দ্বৈতবনং রাজন্নাজগাম হলায়ুধঃ
36.27
তত্র গত্বা মুনীন্দৃষ্ট্বা নানাবেষধরান্বলঃ
আপ্লুত্য সলিলে চাপি পূজয়ামাস বৈ দ্বিজান্
36.28
তথৈব দত্ত্বা বিপ্রেভ্যঃ পরিভোগান্সুপুষ্কলান্
ততঃ প্রায়াদ্বলো রাজন্দক্ষিণেন সরস্বতীম্
36.29
গত্বা চৈব মহাবাহুর্নাতিদূরং মহায়শাঃ
ধর্মাত্মা নাগধন্বানং তীর্থমাগমদচ্যুতঃ
36.30
যত্র পন্নগরাজস্য বাসুকেঃ সংনিবেশনম্
মহাদ্যুতের্মহারাজ বহুভিঃ পন্নগৈর্বৃতম্
যত্রাসন্নৃষয়ঃ সিদ্ধাঃ সহস্রাণি চতুর্দশ
36.31
যত্র দেবাঃ সমাগম্য বাসুকিং পন্নগোত্তমম্
সর্বপন্নগরাজানমভ্যষিঞ্চন্যথাবিধি
পন্নগেভ্যো ভয়ং তত্র বিদ্যতে ন স্ম কৌরব
36.32
তত্রাপি বিধিবদ্দত্ত্বা বিপ্রেভ্যো রত্নসংচয়ান্
প্রায়াত্প্রাচীং দিশং রাজন্দীপ্যমানঃ স্বতেজসা
36.33
আপ্লুত্য বহুশো হৃষ্টস্তেষু তীর্থেষু লাঙ্গলী
দত্ত্বা বসু দ্বিজাতিভ্যো জগামাতি তপস্বিনঃ
36.34
তত্রস্থানৃষিসংঘাংস্তানভিবাদ্য হলায়ুধঃ
ততো রামোঽগমত্তীর্থমৃষিভিঃ সেবিতং মহৎ
36.35
যত্র ভূয়ো নিববৃতে প্রাঙ্মুখা বৈ সরস্বতী
ঋষীণাং নৈমিষেয়াণামবেক্ষার্থং মহাত্মনাম্
36.36
নিবৃত্তাং তাং সরিচ্ছ্রেষ্ঠাং তত্র দৃষ্ট্বা তু লাঙ্গলী
বভূব বিস্মিতো রাজন্বলঃ শ্বেতানুলেপনঃ
36.37
জনমেজয় উবাচ
কস্মাত্সরস্বতী ব্রহ্মন্নিবৃত্তা প্রাঙ্মুখী ততঃ
ব্যাখ্যাতুমেতদিচ্ছামি সর্বমধ্বর্যুসত্তম
36.38
কস্মিংশ্চ কারণে তত্র বিস্মিতো যদুনন্দনঃ
বিনিবৃত্তা সরিচ্ছ্রেষ্ঠা কথমেতদ্দ্বিজোত্তম
36.39
বৈশংপায়ন উবাচ
পূর্বং কৃতয়ুগে রাজন্নৈমিষেয়াস্তপস্বিনঃ
বর্তমানে সুবহুলে সত্রে দ্বাদশবার্ষিকে
ঋষয়ো বহবো রাজংস্তত্র সংপ্রতিপেদিরে
36.40
উষিত্বা চ মহাভাগাস্তস্মিন্সত্রে যথাবিধি
নিবৃত্তে নৈমিষেয়ে বৈ সত্রে দ্বাদশবার্ষিকে
আজগ্মুরৃষয়স্তত্র বহবস্তীর্থকারণাৎ
36.41
ঋষীণাং বহুলত্বাত্তু সরস্বত্যা বিশাং পতে
তীর্থানি নগরায়ন্তে কূলে বৈ দক্ষিণে তদা
36.42
সমন্তপঞ্চকং যাবত্তাবত্তে দ্বিজসত্তমাঃ
তীর্থলোভান্নরব্যাঘ্র নদ্যাস্তীরং সমাশ্রিতাঃ
36.43
জুহ্বতাং তত্র তেষাং তু মুনীনাং ভাবিতাত্মনাম্
স্বাধ্যায়েনাপি মহতা বভূবুঃ পূরিতা দিশঃ
36.44
অগ্নিহোত্রৈস্ততস্তেষাং হূয়মানৈর্মহাত্মনাম্
অশোভত সরিচ্ছ্রেষ্ঠা দীপ্যমানৈঃ সমন্ততঃ
36.45
বালখিল্যা মহারাজ অশ্মকুট্টাশ্চ তাপসাঃ
দন্তোলূখলিনশ্চান্যে সংপ্রক্ষালাস্তথাপরে
36.46
বায়ুভক্ষা জলাহারাঃ পর্ণভক্ষাশ্চ তাপসাঃ
নানানিয়ময়ুক্তাশ্চ তথা স্থণ্ডিলশায়িনঃ
36.47
আসন্বৈ মুনয়স্তত্র সরস্বত্যাঃ সমীপতঃ
শোভয়ন্তঃ সরিচ্ছ্রেষ্ঠাং গঙ্গামিব দিবৌকসঃ
36.48
ততঃ পশ্চাত্সমাপেতুরৃষয়ঃ সত্রয়াজিনঃ
তেঽবকাশং ন দদৃশুঃ কুরুক্ষেত্রে মহাব্রতাঃ
36.49
ততো যজ্ঞোপবীতৈস্তে তত্তীর্থং নির্মিমায় বৈ
জুহুবুশ্চাগ্নিহোত্রাণি চক্রুশ্চ বিবিধাঃ ক্রিয়াঃ
36.50
ততস্তমৃষিসংঘাতং নিরাশং চিন্তয়ান্বিতম্
দর্শয়ামাস রাজেন্দ্র তেষামর্থে সরস্বতী
36.51
ততঃ কুঞ্জান্বহূন্কৃত্বা সংনিবৃত্তা সরিদ্বরা
ঋষীণাং পুণ্যতপসাং কারুণ্যাজ্জনমেজয়
36.52
ততো নিবৃত্য রাজেন্দ্র তেষামর্থে সরস্বতী
ভূয়ঃ প্রতীচ্যভিমুখী সুস্রাব সরিতাং বরা
36.53
অমোঘা গমনং কৃত্বা তেষাং ভূয়ো ব্রজাম্যহম্
ইত্যদ্ভুতং মহচ্চক্রে ততো রাজন্মহানদী
36.54
এবং স কুঞ্জো রাজেন্দ্র নৈমিষেয় ইতি স্মৃতঃ
কুরুক্ষেত্রে কুরুশ্রেষ্ঠ কুরুষ্ব মহতীঃ ক্রিয়াঃ
36.55
তত্র কুঞ্জান্বহূন্দৃষ্ট্বা সংনিবৃত্তাং চ তাং নদীম্
বভূব বিস্ময়স্তত্র রামস্যাথ মহাত্মনঃ
36.56
উপস্পৃশ্য তু তত্রাপি বিধিবদ্যদুনন্দনঃ
দত্ত্বা দায়ান্দ্বিজাতিভ্যো ভাণ্ডানি বিবিধানি চ
ভক্ষ্যং পেয়ং চ বিবিধং ব্রাহ্মণান্প্রত্যপাদয়ৎ
36.57
ততঃ প্রায়াদ্বলো রাজন্পূজ্যমানো দ্বিজাতিভিঃ
সরস্বতীতীর্থবরং নানাদ্বিজগণায়ুতম্
36.58
বদরেঙ্গুদকাশ্মর্যপ্লক্ষাশ্বত্থবিভীতকৈঃ
পনসৈশ্চ পলাশৈশ্চ করীরৈঃ পীলুভিস্তথা
36.59
সরস্বতীতীররুহৈর্বন্ধনৈঃ স্যন্দনৈস্তথা
পরূষকবনৈশ্চৈব বিল্বৈরাম্রাতকৈস্তথা
36.60
অতিমুক্তকষণ্ডৈশ্চ পারিজাতৈশ্চ শোভিতম্
কদলীবনভূয়িষ্ঠমিষ্টং কান্তং মনোরমম্
36.61
বায্বম্বুফলপর্ণাদৈর্দন্তোলূখলিকৈরপি
তথাশ্মকুট্টৈর্বানেয়ৈর্মুনিভির্বহুভির্বৃতম্
36.62
স্বাধ্যায়ঘোষসংঘুষ্টং মৃগয়ূথশতাকুলম্
অহিংস্রৈর্ধর্মপরমৈর্নৃভিরত্যন্তসেবিতম্
36.63
সপ্তসারস্বতং তীর্থমাজগাম হলায়ুধঃ
যত্র মঙ্কণকঃ সিদ্ধস্তপস্তেপে মহামুনিঃ