Utshovঅধ্যায় 35
35.1
বৈশংপায়ন উবাচ
তস্মান্নদীগতং চাপি উদপানং যশস্বিনঃ
ত্রিতস্য চ মহারাজ জগামাথ হলায়ুধঃ
35.2
তত্র দত্ত্বা বহু দ্রব্যং পূজয়িত্বা তথা দ্বিজান্
উপস্পৃশ্য চ তত্রৈব প্রহৃষ্টো মুসলায়ুধঃ
35.3
তত্র ধর্মপরো হ্যাসীত্ত্রিতঃ স সুমহাতপাঃ
কূপে চ বসতা তেন সোমঃ পীতো মহাত্মনা
35.4
তত্র চৈনং সমুত্সৃজ্য ভ্রাতরৌ জগ্মতুর্গৃহান্
ততস্তৌ বৈ শশাপাথ ত্রিতো ব্রাহ্মণসত্তমঃ
35.5
জনমেজয় উবাচ
উদপানং কথং ব্রহ্মন্কথং চ সুমহাতপাঃ
পতিতঃ কিং চ সংত্যক্তো ভ্রাতৃভ্যাং দ্বিজসত্তমঃ
35.6
কূপে কথং চ হিত্বৈনং ভ্রাতরৌ জগ্মতুর্গৃহান্
এতদাচক্ষ্ব মে ব্রহ্মন্যদি শ্রাব্যং হি মন্যসে
35.7
বৈশংপায়ন উবাচ
আসন্পূর্বয়ুগে রাজন্মুনয়ো ভ্রাতরস্ত্রয়ঃ
একতশ্চ দ্বিতশ্চৈব ত্রিতশ্চাদিত্যসংনিভাঃ
35.8
সর্বে প্রজাপতিসমাঃ প্রজাবন্তস্তথৈব চ
ব্রহ্মলোকজিতঃ সর্বে তপসা ব্রহ্মবাদিনঃ
35.9
তেষাং তু তপসা প্রীতো নিয়মেন দমেন চ
অভবদ্গৌতমো নিত্যং পিতা ধর্মরতঃ সদা
35.10
স তু দীর্ঘেণ কালেন তেষাং প্রীতিমবাপ্য চ
জগাম ভগবান্স্থানমনুরূপমিবাত্মনঃ
35.11
রাজানস্তস্য যে পূর্বে যাজ্যা হ্যাসন্মহাত্মনঃ
তে সর্বে স্বর্গতে তস্মিংস্তস্য পুত্রানপূজয়ন্
35.12
তেষাং তু কর্মণা রাজংস্তথৈবাধ্যয়নেন চ
ত্রিতঃ স শ্রেষ্ঠতাং প্রাপ যথৈবাস্য পিতা তথা
35.13
তং স্ম সর্বে মহাভাগা মুনয়ঃ পুণ্যলক্ষণাঃ
অপূজয়ন্মহাভাগং তথা বিদ্বত্তয়ৈব তু
35.14
কদাচিদ্ধি ততো রাজন্ভ্রাতরাবেকতদ্বিতৌ
যজ্ঞার্থং চক্রতুশ্চিত্তং ধনার্থং চ বিশেষতঃ
35.15
তয়োশ্চিন্তা সমভবত্ত্রিতং গৃহ্য পরংতপ
যাজ্যান্সর্বানুপাদায় প্রতিগৃহ্য পশূংস্ততঃ
35.16
সোমং পাস্যামহে হৃষ্টাঃ প্রাপ্য যজ্ঞং মহাফলম্
চক্রুশ্চৈব মহারাজ ভ্রাতরস্ত্রয় এব হ
35.17
তথা তু তে পরিক্রম্য যাজ্যান্সর্বান্পশূন্প্রতি
যাজয়িত্বা ততো যাজ্যাঁল্লব্ধ্বা চ সুবহূন্পশূন্
35.18
যাজ্যেন কর্মণা তেন প্রতিগৃহ্য বিধানতঃ
প্রাচীং দিশং মহাত্মান আজগ্মুস্তে মহর্ষয়ঃ
35.19
ত্রিতস্তেষাং মহারাজ পুরস্তাদ্যাতি হৃষ্টবৎ
একতশ্চ দ্বিতশ্চৈব পৃষ্ঠতঃ কালয়ন্পশূন্
35.20
তয়োশ্চিন্তা সমভবদ্দৃষ্ট্বা পশুগণং মহৎ
কথং ন স্যুরিমা গাব আবাভ্যাং বৈ বিনা ত্রিতম্
35.21
তাবন্যোন্যং সমাভাষ্য একতশ্চ দ্বিতশ্চ হ
যদূচতুর্মিথঃ পাপৌ তন্নিবোধ জনেশ্বর
35.22
ত্রিতো যজ্ঞেষু কুশলস্ত্রিতো বেদেষু নিষ্ঠিতঃ
অন্যাস্ত্রিতো বহুতরা গাবঃ সমুপলপ্স্যতে
35.23
তদাবাং সহিতৌ ভূত্বা গাঃ প্রকাল্য ব্রজাবহে
ত্রিতোঽপি গচ্ছতাং কামমাবাভ্যাং বৈ বিনাকৃতঃ
35.24
তেষামাগচ্ছতাং রাত্রৌ পথিস্থানে বৃকোঽভবৎ
তথা কূপোঽবিদূরেঽভূত্সরস্বত্যাস্তটে মহান্
35.25
অথ ত্রিতো বৃকং দৃষ্ট্বা পথি তিষ্ঠন্তমগ্রতঃ
তদ্ভয়াদপসর্পন্বৈ তস্মিন্কূপে পপাত হ
অগাধে সুমহাঘোরে সর্বভূতভয়ংকরে
35.26
ত্রিতস্ততো মহাভাগঃ কূপস্থো মুনিসত্তমঃ
আর্তনাদং ততশ্চক্রে তৌ তু শুশ্রুবতুর্মুনী
35.27
তং জ্ঞাত্বা পতিতং কূপে ভ্রাতরাবেকতদ্বিতৌ
বৃকত্রাসাচ্চ লোভাচ্চ সমুত্সৃজ্য প্রজগ্মতুঃ
35.28
ভ্রাতৃভ্যাং পশুলুব্ধাভ্যামুত্সৃষ্টঃ স মহাতপাঃ
উদপানে মহারাজ নির্জলে পাংসুসংবৃতে
35.29
ত্রিত আত্মানমালক্ষ্য কূপে বীরুত্তৃণাবৃতে
নিমগ্নং ভরতশ্রেষ্ঠ পাপকৃন্নরকে যথা
35.30
বুদ্ধ্যা হ্যগণয়ত্প্রাজ্ঞো মৃত্যোর্ভীতো হ্যসোমপঃ
সোমঃ কথং নু পাতব্য ইহস্থেন ময়া ভবেৎ
35.31
স এবমনুসংচিন্ত্য তস্মিন্কূপে মহাতপাঃ
দদর্শ বীরুধং তত্র লম্বমানাং যদৃচ্ছয়া
35.32
পাংসুগ্রস্তে ততঃ কূপে বিচিন্ত্য সলিলং মুনিঃ
অগ্নীন্সংকল্পয়ামাস হোত্রে চাত্মানমেব চ
35.33
ততস্তাং বীরুধং সোমং সংকল্প্য সুমহাতপাঃ
ঋচো যজূংষি সামানি মনসা চিন্তয়ন্মুনিঃ
গ্রাবাণঃ শর্করাঃ কৃত্বা প্রচক্রেঽভিষবং নৃপ
35.34
আজ্যং চ সলিলং চক্রে ভাগাংশ্চ ত্রিদিবৌকসাম্
সোমস্যাভিষবং কৃত্বা চকার তুমুলং ধ্বনিম্
35.35
স চাবিশদ্দিবং রাজন্স্বরঃ শৈক্ষস্ত্রিতস্য বৈ
সমবাপ চ তং যজ্ঞং যথোক্তং ব্রহ্মবাদিভিঃ
35.36
বর্তমানে তথা যজ্ঞে ত্রিতস্য সুমহাত্মনঃ
আবিগ্নং ত্রিদিবং সর্বং কারণং চ ন বুধ্যতে
35.37
ততঃ সুতুমুলং শব্দং শুশ্রাবাথ বৃহস্পতিঃ
শ্রুত্বা চৈবাব্রবীদ্দেবান্সর্বান্দেবপুরোহিতঃ
35.38
ত্রিতস্য বর্ততে যজ্ঞস্তত্র গচ্ছামহে সুরাঃ
স হি ক্রুদ্ধঃ সৃজেদন্যান্দেবানপি মহাতপাঃ
35.39
তচ্ছ্রুত্বা বচনং তস্য সহিতাঃ সর্বদেবতাঃ
প্রয়য়ুস্তত্র যত্রাসৌ ত্রিতয়জ্ঞঃ প্রবর্ততে
35.40
তে তত্র গত্বা বিবুধাস্তং কূপং যত্র স ত্রিতঃ
দদৃশুস্তং মহাত্মানং দীক্ষিতং যজ্ঞকর্মসু
35.41
দৃষ্ট্বা চৈনং মহাত্মানং শ্রিয়া পরময়া যুতম্
ঊচুশ্চাথ মহাভাগং প্রাপ্তা ভাগার্থিনো বয়ম্
35.42
অথাব্রবীদৃষির্দেবান্পশ্যধ্বং মাং দিবৌকসঃ
অস্মিন্প্রতিভয়ে কূপে নিমগ্নং নষ্টচেতসম্
35.43
ততস্ত্রিতো মহারাজ ভাগাংস্তেষাং যথাবিধি
মন্ত্রয়ুক্তান্সমদদাত্তে চ প্রীতাস্তদাভবন্
35.44
ততো যথাবিধি প্রাপ্তান্ভাগান্প্রাপ্য দিবৌকসঃ
প্রীতাত্মানো দদুস্তস্মৈ বরান্যান্মনসেচ্ছতি
35.45
স তু বব্রে বরং দেবাংস্ত্রাতুমর্হথ মামিতঃ
যশ্চেহোপস্পৃশেত্কূপে স সোমপগতিং লভেৎ
35.46
তত্র চোর্মিমতী রাজন্নুত্পপাত সরস্বতী
তয়োত্ক্ষিপ্তস্ত্রিতস্তস্থৌ পূজয়ংস্ত্রিদিবৌকসঃ
35.47
তথেতি চোক্ত্বা বিবুধা জগ্মূ রাজন্যথাগতম্
ত্রিতশ্চাপ্যগমত্প্রীতঃ স্বমেব নিলয়ং তদা
35.48
ক্রুদ্ধঃ স তু সমাসাদ্য তাবৃষী ভ্রাতরৌ তদা
উবাচ পরুষং বাক্যং শশাপ চ মহাতপাঃ
35.49
পশুলুব্ধৌ যুবাং যস্মান্মামুত্সৃজ্য প্রধাবিতৌ
তস্মাদ্রূপেণ তেষাং বৈ দংষ্ট্রিণামভিতশ্চরৌ
35.50
ভবিতারৌ ময়া শপ্তৌ পাপেনানেন কর্মণা
প্রসবশ্চৈব যুবয়োর্গোলাঙ্গূলর্ক্ষবানরাঃ
35.51
ইত্যুক্তে তু তদা তেন ক্ষণাদেব বিশাং পতে
তথাভূতাবদৃশ্যেতাং বচনাত্সত্যবাদিনঃ
35.52
তত্রাপ্যমিতবিক্রান্তঃ স্পৃষ্ট্বা তোয়ং হলায়ুধঃ
দত্ত্বা চ বিবিধান্দায়ান্পূজয়িত্বা চ বৈ দ্বিজান্
35.53
উদপানং চ তং দৃষ্ট্বা প্রশস্য চ পুনঃ পুনঃ
নদীগতমদীনাত্মা প্রাপ্তো বিনশনং তদা